Engvângin Nge—Thudik Kan Sawi Ang?
Engvângin Nge—Thudik Kan Sawi Ang?
KUM 18 a nihin, Manfred-a chuan office pakhatah hna a zir a. * A hnathawhna company chuan amah leh hna zirlai mi dang engemaw zâtte chu hna zirna college-a chawlhkâr khata ni hnih zir tûrin ruahmanna a siamsak a. Ni khat chu hun duan aia hmâa bântîr an ni. Company dân siam ang chuan, zirlaite chu kîr leha hna thawk zawm tûr an ni a. Mi dang zawngte chu intihlim tûrin an kal bo va, Manfred-a erawh chu hnathawhna hmunah a kîr leh a ni. Chutih lai tak chuan, company-a hna zirlaite hotu ber chu a lo kal kher a ni. Manfred-a a han hmuh chuan, ani chuan: “Engah nge class-a i kal loh? Khawiah nge hna zirlai dangte an awm?” tiin a zâwt a. Manfred-a tân eng anga chhân tûr nge ni ang?
Manfred-a dinhmun khirh tak tawn chu thil tlânglâwn tak a ni. Thudik a sawi dâwn nge, a zirpuite chu a thupmawi dâwn? Chhânna dik tak pêkna chuan mi dangte buaina a thlenin, ṭhiante zînga tla tlum lo takah a siam dâwn a ni. Chutiang dinhmunah chuan dâwt han sawi zeuh mai chu a pawi ang em? Nangmah ni ta la, eng nge i tih ang? Manfred-a chanchin chu nakinah kan sawi leh ang a; thudik emaw, dik lo emaw sawi tûra thu tlûkna siam a ngaih huna thil inhnamhnawih telte chu ilo ngaihtuah hmasa ang u.
Thudik leh Dik Lo—Thu Bul Inkalh Chu
Mihring chanchin inṭan tirh khân, thil engkim mai chu thudikah a innghat vek a. Thil nih dân kawih her a awm lo va, thudik sîksawi vêl emaw, dik lo taka sawi emaw lah a awm hek lo. Siamtu, Jehova chu “thutak Pathian” a ni. A thu chu a dikin, dâwt a sawi thei lo va, dâwt leh dawtheite chu a dem a ni.—Sâm 31:5; Johana 17:17; Tita 1:1, 2.
Chutiang a nih chuan, engtin nge thudik lo chu a lo inṭan? Isua Krista’n amah thah tum sakhaw lama dodâltute hnêna: “Nangni zawng in pa Diabola hnêna chhuak in ni a, in pa duhzâwng tih in duh a ni. Ani chu a tîr ata tualthat a ni, thutakah a awm lo, a chhûngah thutak rêng a awm loh avângin. Dâwt thu a sawiin ama tihchhuah a sawi a ni ṭhîn; dawthei a ni si, dâwt pa pawh a ni,” tia a sawi khân chhânna dik tak a pe a ni. (Johana 8:44) Dik takin Isua chuan, Setana’n mihring nupa hmasa berte Pathian thu âwih lo tûra a thlêm laia Eden huana thilthleng leh, chu mi avânga sualna leh thihna awm chu a sawi a ni.—Genesis 3:1-5; Rom 5:12.
Isua ṭawngkam chuan Setana chu “dâwt pa,” dâwt leh thudik lo bul ṭantu a nihzia chiang takin a târ lang a. Setana chu thudik lo thlâwp tlattu bul ber ni zêlin, “khawvêl zawng zawng bumtu” pawh a ni. Dâwt darh zau takin tûn lai mihringte hnêna a thlentîr chhiatna mawh rit tak chu a phur bawk.—Thu Puan 12:9.
Diabol-Setana tihchhuah thudik leh thudik lo inkâra thu buai chu tûn thlengin a la awm zêl a. Chu chuan mihring zawng zawng a fan chhuak a, mi tinte chu a nghawng a ni. Mi chu a nun kawng chuan thu buaia a khawi lam emaw zâwk zâwkah a dah a. Pathian lama ṭangte chuan Pathian Thutak, Bible ṭanchhan nun kawng chu an zawh a. “Khawvêl pumhlûm hi mi sual thu thuin a awm” avângin, thutak kawng zawh lo tupawh chu hre reng chungin emaw, hre lovin emaw Setana kutah an awm a ni.—1 Johana 5:19; Matthaia 7:13, 14.
Engvângin Nge Dâwt Sawi Duhna A Awm?
“Khawvêl pumhlûm hi” Setana thu thua a awmna chuan, mi tam takte’n dâwt an sawi chhan min hriattîr a ni. Mahse, ‘Engvângin nge Setana, “dâwt pa” chuan dâwt a sawi?,’ tiin kan zâwt mai thei a. Setana chuan Jehova chu nupa tuak hmasa ber pawh tiamin, A thilsiam zawng zawng chunga Lalchungnung ber ni tûrin dikna a nei tih a hria a. Mahse, Setana chuan he a phu loh nihna sâng tak leh duhawm tak hi a ît a ni. Duhâmna leh mahni ropuina ûm avângin, Jehova dinhmun chhuhsak chu a tum ta a. Chu mi tihlawhtling tûrin, Setana chuan dâwt leh ngamthlêmna chu a hmang ta a ni.—1 Timothea 3:6.
Tûn laiah eng nge ni ve le? Duhâmna leh mahni ropuina ûmna chu mi tam takte dâwt sawitîrtu a ni tih i pawm lâwm ni? Sumdâwnna duhâm tak te, politics bawlhhlawh tak te, leh sakhaw dik lo te chu ngamthlêmna, dâwt sawina, thudik sîksawi vêlna, leh inbumnain a khat a ni. Engvângin nge? Mite’n an phu loh hausakna te, thuneihna te, a nih loh leh dinhmunte an ûm chhan chu duhâmna leh tum sânnain a chêttîr vâng a ni fo lâwm ni? Rorêltu fing, hmân lai Israel Lal Solomona chuan: “Hausak thuai tum erawh chu hrem lohvin a chhuak lo vang,” tiin a vaukhân a. (Thufingte 28:20) Tin, tirhkoh Paula chuan: “Tangka sum ngainat hi sual tinrêng bul a ni,” tiin a ziak bawk. (1 Timothea 6:10) Thu neihna leh nihna chin tâwk awm lova îtna pawh chutiang bawk chu a ni tih ching takin kan sawi thei a ni.
Dâwt sawi a nih chhan dang leh chu hlauhna—thudik sawinain a rahchhuah tûr emaw, mi dangte ngaih dân tûr emaw hlauhna a ni. Mi dangte duhzâwng nih leh an zînga tlâktlum duh chu thil pângngai tak a ni a. Mahse, he duhna hian anni chu thil ho tê pawh ni se, tlin lohna khuh tûr te, thil thup mawi tûr te, leh hming ṭhat duh vâng ringawt tea thudik herhkawi tûrin a chêttîr thei a ni. Inâwm takin, Solomona chuan: “Midang ngaih dân pawisak luat a hlauhawm a, LALPAa innghah erawh chu a him,” tiin a ziak a ni.—Thufingte 29:25.
Thutak Pathian Chunga Rinawmna
Manfred-a chuan an company hotuin thil a zawhfiah khân eng nge a sawi? Thudik tak a sawi a ni. Ani chuan: “Zirtîrtuin vawiin chu min bân hmatîr avângin hnathawkin ka lo kîr leh a ni. Mi dangte tân chuan sawi theih ka nei lo. Anmahni i zâwt zâwk mai dâwn nia,” a ti.
Manfred-a chuan a hna zirpuite laka tlâktlum nân, fing thiam takin a chhâng thei reng a. Mahse, ani chuan thudik chunga rinawm tlatna tûr chhan ṭha a nei a ni. Manfred-a chu Jehova Thuhretute zînga mi a ni a. A rinawmna chuan a chhia leh ṭha hriatna thianghlim chu a vênghim a ni. Chu chuan a ruaitu rin pawh a hlawhtîr bawk. A hna zirna zînga mite angin, Manfred-a chu hna zirlaite thawh ngai zen zen
lohna rangkachak chherna lama thawk tûra ruat a ni a. A hnu kum 15 vêla company-a dinhmun sânga hlânkai a nih chuan, an hotupa ngai bawk chuan lawmpuina hrilh tûr leh thudik atâna a nghehna thilthleng chu hrilhnawn tûrin a phone hial a ni.Jehova chu thutak Pathian a nih avângin, amah nêna inlaichînna hnai nei duh apiang chuan ‘dâwt sawi bânsanin,’ “thu dik tak [an] sawi” tûr a ni a. Pathian chhiahhlawh chuan thudik a ngaina tûr a ni. “Hretu dik chu a daw lo vang,” tiin, Bible-a mi fing chuan a ziak a. A nih chuan, eng hi nge dâwt kan tih chu?—Ephesi 4:25; Thufingte 14:5.
Eng Hi Nge Dâwt Kan Tih Chu?
Dâwt zawng zawng hi thudik lo a ni a; mahse, thudik lo zawng zawng hi dâwt a ni vek lo. Engvângin nge a nih loh? Dictionary pakhat chuan dâwt chu “a sawituin dik lo nia a hriat leh a rin chu mi bum nâna thudik anga a sawina” tiin a hrilhfiah a ni. Ni e, dâwt sawinaah chuan mi tuemaw bum tumna a tel a ni. Chuvâng chuan, tum rêng vâng ni lova thudik lo sawina—tihpalh vânga thil dik lo leh number dik lo sawina—chu dâwt sawi nên a thuhmun lo.
Chu bâkah, chanchin min zâwttu chu chanchin kimchang tak hre tlâk a nih leh nih loh kan ngaihtuah a ngai a. Entîr nân, Manfred-a kha company danga hotuin, chu zawhna bawk chu zâwt ta se. Manfred-a chuan thil engkim a hrilh vek kher a ngai ang em? Ngai lo vang. Chu hotupa chuan chutiang thil hre tûra dikna a neih loh avângin, Manfred-a chuan a kimchang taka a hriattîr kher a ngai lo. Mahse, he tah pawh hian, dâwt sawi chu a tân a dik chuang miah lo.
He mi chungchângah hian Isua Krista’n entawn tûr eng nge min hnut chhiah? Ṭumkhat pawh, Isua chu a zinna tûr ngaihventu ringtu ni lo mi dang nên an inbia a. Anni chuan: “Heta ṭangin Judai ramah va kal rawh,” tiin thu an râwn a. Eng eng Isua chhân lêtna chu? “‘Nangni kûtnaah [Jerusalemah] han kal rawh u, kei zawng tûn kûtah hian ka han kal dâwn rih lo ve, ka hun a la thlen loh avângin,’ a ti a.” Chu mi hnu lawk chuan, Isua chu kût hmang tûrin Jerusalemah a kal leh ngei bawk si. A nih chuan, engvângin nge chutianga a chhân? A awmna tûr dik tak hre tlâk an nih loh vâng a ni. Chuvângin, Isua’n thudik lo hulhual a sawi loh laiin, amah leh a hnungzuitute chhiatna thlentîr thei laka invên nân chanchin kimchang a hrilh lo a ni. Chu chu dâwt a ni lo, Krista chungchângah tirhkoh Petera chuan: “Ani chuan thil rêng a tisual lo va, a kaah ngamthlêmna a awm hek lo,” tia a ziah avângin.—Johana 7:1-13; 1 Petera 2:22.
Eng nge amah Petera ngei chungchâng hi le? Isua man a nih zân khân, Petera chuan vawithum dâwt sawiin, Isua hre ngai lo angin a inchhâl a ni lâwm ni? Ni e, Petera chu mihring hlauhnain a khat a, dâwt a sawi a ni. Mahse, Matthaia 26:69-75; Tirhkohte 4:18-20; 5:27-32; Jakoba 3:2.
‘ṭap zawih zawihin’ a inchhîr leh thuai a, a sualna chu ngaihdam a ni a. Chu bâkah, a thiltih sual aṭangin a inzir a. Ni engemaw zât hnuah, vântlâng hmâah Isua chanchin sawiin, Jerusalema Juda thu neitute’n an vau hrep pawhin thusawi a bânsan chuang lo. Rei lo te chhûng Petera tlûkna leh a dinchhuah leh vatna chu keini chak loh laia awlsam taka lungngai ṭhînte leh ṭawngkam leh thiltiha thil tisual ṭhînte tân min tichaktu a ni tûr a ni.—Thudik Chu Kumkhuain A Ding Nghet Ang
“Thu tak hmui chu kumkhuain tihngheh a ni ang a, lei dawthei erawh chu rei lo tê atân chauh a ni,” tiin Thufingte 12:19 chuan a hrilhfiah a. Ni e, thu dik tak sawi chu a tlo a ni. Tin, mite chu thudik an inhrilh tawna, chu mi mila thil an tih hunah, mihring inlaichînna chu a nghetin, a lungâwithlâk zual a. Dik takin, dikna chuan tûn lâ lâah pawh lâwmman a nei nghâl a ni. Chûng zîngah chuan chhia leh ṭha hriatna thiang te, hming ṭha neih te, leh nupa inkârah, chhûngkuaah, ṭhian inkârah, leh sumdâwnna thlengin inlaichînna nghet a awmtîr a ni.
Kawng leh lamah chuan, dâwt chu a tâwpah a lo lang chhuak leh ṭhîn a. Dâwt thu chuan hun engemaw chhûng chu mi a bum mai thei; mahse, thudik lo chuan rei a daih ṭhîn lo. Chu bâkah, thutak Pathian Jehova chuan thudik lo leh dâwt thehdarhtute a ngaih theih hun tûr a bithliah a. Bible chuan Jehova’n Diabol-Setana, dâwt pa, khawvêl zawng zawng bumtu thununna chu a nuai bo dâwn tih min tiam a ni. Jehova chuan dâwt thu leh dawthei zawng zawng chu a tiboral thuai ang.—Thu Puan 21:8.
“Thu tak hmui” kumkhuaa neih a nih hun chuan, a va hahdamthlâk dâwn em! (w07 2/1)
[Footnote]
^ par. 2 A hming tak a ni lo.
[Phêk 5-naa thu lâk chhuah]
Duhâmna leh mahni ropuina ûmna chu mi tam takte dâwt sawitîrtu a ni
[Phêk 6-naa thu lâk chhuah]
Dâwt zawng zawng hi thudik lo a ni a; mahse, thudik lo zawng zawng hi dâwt a ni vek lo
[Phêk 6-naa milem]
Petera’n Krista a phatna aṭangin eng nge kan zir?
[Phêk 7-naa milem]
Thudik inhrilh tawnna chuan inlaichînna nghet leh lungâwithlâk a siam