Jehova Chu Pathian Lâwm Nachâng Hre Tak A Ni
Jehova Chu Pathian Lâwm Nachâng Hre Tak A Ni
“A hming chunga hmangaihna in lantîr, . . . chu theihnghilh tûrin Pathian chu mi fel lo a ni si lo.”—HEBRAI 6:10.
1. Engtin nge Jehova’n Moab mi Ruthi a lawmzia a târ lan?
JEHOVA chuan a duhzâwng tih hrâm hrâm tumtute chu a lâwm tak zet a, anni chu nasa takin mal a sâwm a ni. (Hebrai 11:6) Mi rinawm Boaza chuan he Pathian mize langsâr tak hi a hre chiang a; Moab mi Ruthi, a pi zawn hmeithai duat taka enkawltu hnênah chuan: ‘LALPA chuan i thiltih chu rûl sela, . . . Pathian chuan i ṭhat man chu pe ṭeuh che rawh se,’ tiin a sawi a ni. (Ruthi 2:12) Ruthi chu Pathianin mal a sâwm em? Malsâwm tehrêng mai! A chanchin chu Bible-ah chhinchhiah a ni hial a ni! Chu bâkah, Boaza chu pasalah a nei ta a, Lal Davida leh Isua Krista thlahtu a lo ni ta bawk a ni. (Ruthi 4:13, 17; Matthaia 1:5, 6, 16) He entîrna hi Jehova’n a chhiahhlawhte chunga lâwm nachâng a hriatzia târ lanna Bible-a kan hmuh tam takte zînga pakhat a ni.
2, 3. (a) Jehova’n lâwmna thu a sawi chhuahna chu engin nge thil chhinchhiah tlâk nihtîr? (b) Engvângin nge Jehova’n lâwmna dik tak a sawi chhuah theih? Entîrna pe rawh.
2 Jehova chuan lâwm nachâng a hriat loh chuan, chu chu ama fel lohnaah a ruat ngei ang. Hebrai 6:10 chuan: “In hnathawh leh a hming chunga hmangaihna in lantîr, mi thianghlimte rawng in lo bâwl tûn thleng pawha in la bâwl cheu chu theihnghilh tûrin Pathian chu mi fel lo a ni si lo va,” tiin a sawi. He thusawi chhinchhiah tlâk tak nihtîrtu chu, Pathianin a hnêna inpumpêkte chu mi sual leh a ropuina chang zo lote pawh ni se, a lâwm a ni tih a lantîr hi a ni.—Rom 3:23.
3 Kan ṭhat famkim lohna avângin, Pathian ngaihsakna avânga kan thiltihte chu Pathian malsâwmna dawn nân tlêm tham leh pawimawh tham lo angin kan ngai thei. Jehova erawh chuan kan thiltih chhan leh kan dinhmunte chiang takin a hria a, kan thlarau zawng zawnga a rawng kan bâwlna chu a lâwm tak zet a ni. (Matthaia 22:37) Entîr nân: Nu pakhat chuan thilpêk—ṭhi man tlâwm tak—a dawhkâna lo awm chu a hmu a. Ani chuan chu thil pêk chu ngai hlu lo takin a hnâwl kiang vêl mai mai a. Amaherawhchu, chu thilpêk ruala rawn tel card chuan chu chu a fanu naupang têin a pawisa khâwl zawng zawng hmanga a lei a ni tih a târ lang a. Chutah zet zawng a nu chuan thilpêk a hmuh dân chu a danglam ta. A mita mittui tling piauvin, a fanu tê chu a kuah a, a lâwm tak zetzia a tilang ta a ni.
4, 5. Engtin nge Isua’n lâwmna lantîrna kawngah Jehova a entawn?
4 Jehova chuan kan thil tih chhan leh kan theih chin tâwk a hriat avângin, a tlêm emaw, a tam emaw pawh nise kan theih ang tâwk kan pêk hian a lâwm tak zet a ni. He mi chungchângah hian, Isua chuan a Pa tih ang chiah a rawn ti ve a. Bible-a hmeithai thawhlâwm chungchâng kha ngaihtuah lêt teh. “[Isua] a dâk chhuak a, mi hausaten thawhlâwm bâwma an thawhlâwm thlâk lai a hmu a. Tin, hmeithai rethei tê tu emaw dâr tangka dere pahnih rawn thlâk a hmu bawk a. Tichuan, ‘Tih tak zetin ka hrilh a che u. Hêng zawng zawng ai hian he hmeithai rethei tê hian a thlâk tam zâwk; hêng zawng zawng hian an neih aliama mi thawhlâwmah an thlâk a ni; ani erawh hi chuan a duh lai tak, a intunnunna tûra a neih chhun tê a thlâk vek a ni’ a ti a.”—Luka 21:1-4.
5 Isua chuan hmeichhe dinhmun—hmeithai leh mi rethei tak a ni tih—chu hre thiamin, a thilpêk hlutna dik tak chu a hria a, a lâwm hle a. Jehova pawhin hetiang tho hian a lâwm tih kan sawi thei a ni. (Johana 14:9) Eng ang dinhmunah pawh ding mah la, kan Pathian leh a Fapa, lâwm nachâng hre takte lawm i hlawh thei tih hriat chu a phûrawm hle a ni lâwm ni?
Jehova’n Pathian Ṭihtu Ethiopia Mi Chu Mal A Sâwm
6, 7. Engvângin nge Jehova’n Ebedmeleka a lawmzia a lantîr a, engtin nge a lantîr?
6 Pathian Lehkha Thu-ah hian Jehova’n a duhzâwng ti tute mal a sâwm ṭhin thu târ lan a ni fo va. Pathian ṭihtu Ethiopia mi, Jeremia dam rualpui Ebedmeleka, Juda lal rinawm lo Lal Hezekia in chhûnga chhiahhlawh a dâwr dân chu ngaihtuah teh. Ebedmeleka chuan Juda lal fapate’n zâwlnei Jeremia chu hel tûra mite fuih pawrh anga dik lo taka an puh thu leh lei hnuai ripa chaw ngheia thi mai tûr atân an paih luh thu a lo hria a. (Jeremia 38:1-7) Ebedmeleka chuan Jeremia chu a thu hrilh avânga nasa taka huat a ni tih a hriatin, a nun thâpin lal hnênah chuan a dîlsak a. Ethiopia mi chuan huaisen takin: “Ka pu, lalber, hêng miten zâwlnei Jeremia lei hnuai ripa an lo paih thlâk hi thil sual nasa tak an ti a ni; rilṭâm avângin a awmna hmunah chuan a thi mai dâwn alâwm,” tiin a sawi a. Lal thupêk angin, Ebedmeleka chuan mi 30 hruaiin, Pathian zâwlnei chu a chhan chhuak ta a ni.—Jeremia 38:1-13.
7 Ebedmaleka’n hlauhna a neih mai theihte hneh tûra ṭanpuitu rinna a nei tih Jehova chuan a hmu a. Chuti chuan, Jehova chuan a lawmzia a lantîr a, Jeremia kal tlangin Abedmeleka hnênah: “Ngai rawh, a ṭhatna tûr ni lovin, he khawpui chhiatna tûr zâwkin ka thute ka rawn thlen ang . . . Chumi nîah chuan nang erawh chu ka chhan chhuak ang che, . . . i mi hlauhte kutah pêk i ni lo vang. Ka chhanhim ngei dâwn si chia, . . . i nun chu i chhanhim ang, kei mi rin avângin,” tiin a sawi a ni. (Jeremia 39:16-18) Ni e, Jehova chuan Ebedmeleka leh Jeremia chu Juda lal sualte lak ata leh chu mi hnuah Babulon, Jerusalem tiṭiautu lak ata chu a chhan chhuak ngei a ni. “[Jehova] chuan a mi thianghlimte nunna chu a vawng ṭha ṭhîn a; anni chu mi suaksualte kut ata a chhanhim ṭhîn,” tiin Sâm 97:10 chuan a sawi a ni.
“I Pa A Rûka Hmu Ṭhîntu Chuan A Rûl Ang Che”
8, 9. Isua lantîr angin, eng ang chi ṭawngṭaina nge Jehova’n a lawm?
8 Jehova’n Pathian ngaihsakna kan lantîrte a hre thiamin a lâwm a ni tih hriat theihna dang leh chu Bible-in ṭawngṭai chungchâng a sawi aṭang hian a ni. Mi fing chuan heti hian a chhinchhiah a ni: “Mi ṭha ṭawngṭaina . . . chu [Pathian] lâwmzâwng a ni,” tiin. (Thufingte 15:8) Isua hun lai khân, sakhaw hruaitu tam takte chu an sakhaw mi vâng ni lovin, mite rilru lâk an duhna avâng zâwkin vântlâng hmunahte an ṭawngṭai a. Isua chuan: “An lâwmman chu an hmu zo tawh,” tiin a sawi a. Tichuan a zirtîrte chu: “Nang erawh chuan i ṭawngṭaiin, i pindan chhûngrilah lût la, i kawng khâr la, i Pa arûka awm hnênah chuan ṭawngṭai rawh; tichuan, i Pa arûka hmu ṭhîntu chuan a rûl ang che,” tiin a zirtîr a ni.—Matthaia 6:5, 6.
9 Amah ngei pawhin vântlâng hmuha ṭawngṭai châng a neih avângin, Isua chuan chutiang ṭawngṭaina hrim hrim chu a dem lo. (Luka 9:16) Jehova chuan mi dangte rilru lâk tumna tel lo thinlung tih tak zeta kan ṭawngṭaina chu a lâwm hle. Mi mala kan ṭawngṭainate hi Pathian kan hmangaihna leh amah kan rinna a thûkzia târ lanna ṭha tak a ni. Hei vâng hian, Isua’n ṭawngṭai nâna hmun fianrial a zawng ṭhîn pawh hi thil mak a ni lo. Ṭum khat chu, “khawvâr hma daihin” a ṭawngṭai a. Ṭum dang lehah “ṭawngṭai tûrin tlângah chuan a han kal hrang a.” A tirhkoh 12-te a thlan hmain, Isua chuan amah chauhvin zan khuain a ṭawngṭai bawk a ni.—Marka 1:35; Matthaia 14:23; Luka 6:12, 13.
10. Kan ṭawngṭainain tih tak zetna leh ngaihtuahna ril tak a târ lan hian eng nge kan rin tlat theih?
10 Jehova chuan a Fapain thinlung tak zeta a ṭawngṭaina chu a va han ngaithla ngun dâwn êm! Isua chuan a chângin “nasa taka au leh mittui tla chungin ṭawngṭainate leh dîlnate a hlân a, a ṭih dêk ṭhin avângin ngaihthlâkin a awm bawk.” (Hebrai 5:7; Luka 22:41-44) Kan ṭawngṭainain chutiang tih tak zetna leh ngaihtuahna ril tak a târ lan hunah hian, kan Pa vâna mi chuan ngun taka ngaithlain, a lâwm hle a ni tih kan ring tlat thei a ni. ‘Jehova chuan tih tak zeta amah kotu zawng zawng te chu a hnaih ṭhîn’ ngei mai.—Sâm 145:18.
11. Jehova’n keimahni chauhva kan awm laia kan thiltihte chu engtin nge a ngaih?
11 Jehova’n a rûka kan ṭawngṭaina a lawm chuan a rûka a thu kan âwihna chu a va lâwm dâwn tak êm! A ni, Jehova chuan keimahni chauhva kan awm laia kan thiltihte pawh chu an hre vek a ni. (1 Petera 3:12) Mi dangte hmuh lohva kan awm laia kan rinawmna leh thu kan âwihna hi thinlung thianghlim putu leh thil dika ding nghet tlattu Jehova lamah chuan “thinlung ṭha famkim” kan nei tih târ langtu ṭha tak a ni. (1 Chronicles 28:9) Chutiang nungchang chuan Jehova chu a va tilâwm tak êm!—Thufingte 27:11; 1 Johana 3:22.
12, 13. Engtin nge kan rilru leh thinlung chu vênghim a, zirtîr rinawm Nathanaela ang kan nih theih?
12 Tin, Kristian mi rinawmte chu an rilru leh thinlung eichhe thei a rûka thil sual tih, hêng saruak lem en te leh tharum thawhna en ang chite lakah hian an invêng him a ni. Sual ṭhenkhat chu mihring lakah thup theih a nih laiin, “kan chanchin kan thlenna tûra mithmuhah chuan engkim hi saruak leh inhawng sain a awm” tih kan hria a ni. (Hebrai 4:13; Luka 8:17) Jehova tilâwm lo thilte chu pumpelh tum tlatna hmangin, chhia leh ṭha hriatna thiang kan nei a, Pathian pawm tlâk kan ni tih hriain kan hlim a ni. Ni e, Jehova’n “dik taka awma, fel taka tia, a rilrua thutak sawi mi chu” a lâwm hle tih rinhlelh rual a ni lo.—Sâm 15:1, 2.
13 Mahsela, engtin nge khawvêl sualnaa khatah hian kan rilru leh thinlung chu kan vên theih ang? (Thufingte 4:23; Ephesi 2:2) Thlarau lama châwmnate kan dawn vek bâkah, thil ṭha lo apiangte chu hnâwla thil ṭha tih leh châkna dik lote chuan no a paia sual a hrin loh nân kan che nghâl vat tûr a ni. (Jakoba 1:14, 15) Isua’n Nathanaela chungchânga: “En teh u, . . . ngamthlêmna rêng nei lo saw,” tia a sawi ang hian kan hnênah sawi ve ta se kan hlim dân tûr chu ngaihtuah rawh. (Johana 1:47) Nathanaela, Bartholomaia tia koh bawk chuan a hnuah Isua zirtîr 12 zînga pakhat nih theihna chanvo hlu tak chu a chang a ni.—Marka 3:16-19.
“Puithiam Lalber Mi Lainat Thei leh Rinawm Tak”
14. Engtin nge Isua’n Mari chêtzia a chhân lêt dân chu mi dangte tih dân nên a in an loh?
14 Isua chu ‘hmuh theih loh Pathian [Jehova] anpui’ a nih angin, thinlung thianghlim taka Pathian rawngbâwltute lâwmna kawngah a Pa chu a entawn famkim a. (Kolossa 1:15) Entîr nân, a nun a pêk hma ni nga a la awmah khân, Isua chu a zirtîr ṭhenkhatte nên Bethani khuaa Simona inah an mikhual a. Chu mi ni tlai lamah chuan, Lazara leh Marthi farnu, Mari chuan “bûk zâtve spinard hriak rimtui to tak a rawn keng a,” (chu chu kumkhat hlawh vêl a ni), Isua lu leh kêah chuan a leih a. (Johana 12:3) Ṭhenkhat chuan: “Eng atân nge hetia a tihboral mai mai ni?” an ti a. Amaherawhchu, Isua chuan Mari chêtzia chu kawng dangin a thlîr a. Ani chuan thilphalna nasa tak leh a thiha phum a nih hun a hnaih tawhzia han ngaihtuah chuan, chu chu thil awmze nei tak niin a ngai thung. Chutichuan, Mari chu sawisêl aiin, a chawimawi ta zâwk a ni. “Khawvêl zawng zawngah khawiah pawh he chanchin ṭha hi an hrilna apiangah he hmeichhe thiltih pawh hi amah hriat rengna tûrin an sawi ve zêl ang,” tiin.—Matthaia 26:6-13.
15, 16. Engtin nge Isua mihring anga a nunna leh Pathian rawng a bâwlna chu kan hlâwkpui?
15 Chutianga lâwm nachâng hre tak Isua ang mi Hotua kan nei hi kan va vân nei tak êm! Dik takin, Isua mihring anga a nunna chuan Jehova’n a hna tûr atâna a lo ruahman lâwk—a hmasa berin hriak thih kohhran atân leh a hnuah khawvêla mite tâna Puithiam Lal leh Lalber anga rawngbâwl tûrin a buatsaih a ni.—Kolossa 1:13; Hebrai 7:26; Thu Puan 11:15.
16 Isua chuan leia a lo kal hma aṭang tawhin, mihringte chu nasa taka ngaihsakin, anni chu a bîk takin a lâwm hle a. (Thufingte 8:31) Mihring anga lo nungin, Pathian rawng kan bâwlnaa hrehawm kan tawrhte chu a rawn hre thiam a ni. Tirhkoh Paula chuan: “[Isua chu] Pathian lam thilahte chuan Puithiam Lalber mi lainat thei leh rinawm tak a nih theih nân, engkima a unaute anga lo awm chu a tân a ṭûl rêng a ni. Amah ngei chuan thlêmna tâwkin a lo tuar tawh avângin thlêmna tâwkte chu a ṭanpui thei a ni,” tiin a lo ziak a. Isua chu “keimahni anga kawng tinrênga thlêmna tâwk tawh, sual erawh chu sual lo” a nih avângin, “kan chak lohnate min hriatpui” thei a ni.—Hebrai 2:17, 18; 4:15, 16.
17, 18. (a) Asia Minor-a kohhran pasarihte hnêna lehkha thawn chuan, Isua lâwm nachâng hriatzia eng nge a lantîr? (b) Hriak thih Kristiante chu eng atân nge buatsaih an nih?
17 Isua’n amah zuitute hrehawm tawrh a hriat thiamzia chu kaihthawh a nih hnuah hian a lo lang chiang zual a. Tirhkoh Johana ziak ang hian, Asia Minor-a kohhran pasarihte hnêna a lehkha thawn hi ngaihtuah teh. Smurna kohhran mite hnênah, Isua chuan: “I hrehawmzia te, i pachhiatzia te . . . ka hria,” tiin a sawi a ni. Hetah hian, Isua chuan, ‘I harsatnate ka hre vek asin; I thil tawn pawh ka hre tak zet asin,’ a tihna a ni. Tichuan, amah ngei pawhin thihna a lo tawrh tawh avângin, khawngaihna leh tiamkamna nghet tak nên: “Thih thlengin rinawmin lo awm rawh, tichuan nunna lallukhum ka pe ang che,” tiin a sawi belh a ni.—Thu Puan 2:8-10.
18 Kohhran pasarihte hnêna lehkha thawnte chu Isua’n a zirtîrte thlêmna tawh a hriatpuizia leh an rinawmna an vawn avânga a lawmzia a sawi chhuahnain a khat tlat a ni. (Thu Puan 2:1–3:22) Chûng Isua’n lehkha a thawnte chu hriak thih Kristian, vâna a kianga rorêl tûrte an ni tih hre reng ang che. An Lalpa hniakhnung chu zuiin, anni chuan tihdam ngai mihringte chunga Krista inthawina hlâwkna chu khawgaihna nasa ber nêna pe chhuak tûra buatsaih an ni mêk a ni.—Thu Puan 5:9, 10; 22:1-5.
19, 20. Engtin nge “mipui tam tak” ni tûra insiamte chuan Jehova leh a Fapa chunga an lâwmna an lantîr?
19 Isua’n amah zuitu hriak thihte a hmangaihna chu a “berâm dang” rinawm mi maktaduai tam tak, tûna ‘hnam tin zînga mi mipui tam tak’ ni tûra insiam leh “hrehawm nasa tak” lo awm tûra dam khawchhuak tûrte lakah pawh a thleng bawk a ni. (Johana 10:16; Thu Puan 7:9, 14) Hêng mite hian Isua’n tlanna inthâwina a pêk avâng leh chatuana nun beiseina an neih tâk avânga a laka an lâwm êm avângin, amah chu an rawn bêl a. Engtin nge an lâwmzia chu an lantîr? ‘A chhûn azâna [Pathian] biak ina a rawng bâwl ṭhînna,’ hmangin an lantîr a ni.—Thu Puan 7:15-17.
20 Rawngbâwl kum 2006 atâna khawvêl pumpui report chuan, hêng rawngbâwltu rinawm takte hian Jehova hnênah ‘a chhûn azânin a biak inah rawng an bâwl’ tak zet a ni tih a târ lang chiang hle. Dik takin, chu kum khat chhûng chuan, anmahni leh hriak thih Kristian a la dam bâng tlêmtê chuan vântlâng rawngbâwl nân, a belhkhâwmin darkâr 1,333,966,199 chu an hmang a—chu chu kum 1,50,000 aia a tam zâwk fê a nih chu!
Lâwmna Lantîr Zêl Rawh!
21, 22. (a) Lâwmna lantîrna kawngah, engvângin nge Kristian chu tûn laiah a invên bîk ang? (b) Eng nge a dawta thuziaka ngaihtuah ho tûr chu?
21 Mihring ṭha famkim lote nêna an indâwrnaah hian, Jehova leh a Fapa chuan rilru hneh thei tak, lâwmna thûk tak chu an lantîr a. Amaherawhchu, lungchhiatthlâk takin mi tam zâwkte chuan, Pathian an ngaihtuah meuh lova, anmahni ngaihtuah lam lamah an inhmang zo zâwk a ni. Paula chuan “ni hnuhnûngahte chuan . . . mi mahni inhmangaihtu te, tangka ngainatu te . . . lâwm nachâng hre lo te . . . an ni dawn sî,” tih a sawi a. (2 Timothea 3:1-5) Chûng mite chu Kristian dik, Pathianin an tâna a thiltihte avânga an thinlung chhûngrila ṭawngṭaina te, duh vâng rênga a thu âwihna te, leh thlarau zawng zawnga rawngbâwlnate hmanga an lâwmzia lantîrtute nên chuan an va inang lo tak êm!—Sâm 62:8; Marka 12:30; 1 Johana 5:3.
22 A dawta thuziakah hian Jehova’n hmangaih taka thlarau lam thil min pêk tam takte zînga ṭhenkhat chu kan ennawn dâwn a. Hêng ‘thilpêk ṭhate’ kan ngaihtuah hian, kan lâwmna chu nasa lehzual sauh rawh se!—Jakoba 1:17. (w07 2/1)
Engtin Nge I Chhân Ang?
• Engtin nge Jehova chuan Pathian lâwm nachâng hre tak a nihzia a târ lan?
• Mahni chauhva kan awm lai hian, engtin nge Jehova thinlung chu kan tihlâwm theih?
• Eng kawngin nge Isua’n lâwm nachâng hriatna a lantîr?
• Engtin nge mihring anga a nunna chuan Isua chu rorêltu khawngaihna ngah leh lâwm nachâng hre tak ni tûra a ṭanpui?
[Zirlai Atâna Zawhnate]
[Phêk 22-naa milem]
Nu leh pate’n an fate thilpêk hotê pawh an lâwm angin, kan thil neih ṭha ber kan pêk hian Jehova chu a lâwm