Lâwm Nachâng I Hriatna Kha Hloh Ngai Suh
Lâwm Nachâng I Hriatna Kha Hloh Ngai Suh
“Aw Pathian, i ngaihtuahnate chu ka tân a va hlu êm! A infin khâwm chu a va nasa êm!”—SAM 139:17.
1, 2. Engvângin nge Pathian Thu chu kan ngaihhlut ang a, engtin nge fakna hla phuahtu chuan a ngaihhlutna chu a sawi chhuah?
THIL hmuh chhuah chhinchhiah tlâk tak zawng a ni. Jerusalema Jehova biak in siam ṭhat a nih lai khân, Puithiam Lalber Hilkia chuan “Mosia hmanga pêk LALPA dân bu” chu a chhar a, chu chu kum 800 lai liamtaa ziah zawh, atîra ziak a ni tih rinhlelh rual a ni lo! Chu dân bu chu Pathian ṭih mi Lal Josia hmaa dah a han niha a awm dân tûr chu i mitthla thei em? Chu dân bu chu a roh hle nghe nghe a, rang takin Saphana, lehkha ziaktu chu a chhiartîr ta a ni.—2 Chronicles 34:14-18.
2 Tûn laiah hian Pathian Thu hi a bu pum puiin emaw, a bu ṭhen laite emaw chu mi tlûklehdingâwn tam tak chhiar theihin a awm tawh a. Mahse chu chuan Pathian Lehkha Thu hlutna a tinêpin, a pawimawhna a tinêp em? Tinêp lo ve! Tihah chuan, Pathian Lehkha Thu-ah hian kan hlâwkpui atâna chhinchhiah Engkimtitheia ngaituahnate a tel si a. (2 Timothea 3:16) Fakna hla phuahtu Davida chuan Pathian Thu a ngaih dân chu sawi chhuakin, heti hian a ziak a ni: “Aw Pathian, i ngaihtuahnate chu ka tân a va hlu êm! A infin khâwm chu a va nasa êm!” tiin.—Sâm 139:17.
3. Engin nge Davida chu thlarau lam thil hre thiam mi a ni tih târ lang?
3 Davida’n Jehova, a Thu, leh biakna dik atâna ruahmanna a siamte a ngaihhlutna chu a reh ngai lo. Davida phuah fakna hla tam tak chuan a rilru ngaihtuahna chu a phawrh a ni. Entîr nân, Sâm 27:4-ah chuan heti hian a ziak a: “LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin ka dam chhûng zawnga LALPA ina ka awm reng theihna tûr chu,” tiin. Atîra Hebrai ṭawnga ziakah chuan, “a biak ina thu zâwt tûrin” tih hi chîk taka ngaihtuah reng, chîk taka endik, lungawina, lâwmna leh ngaihsânna nêna en tihna a ni. Chiang takin, Davida chu thlarau lama Jehova châwmnate chunga lâwm tak zettu leh thutak Pathianin thlarau lam thil a hriattîr apiangte chu lâwm taka lo dawngsawngtu, thlarau lam thil hre thiam mi a ni. A lawm dân chuan entawn a phu hle.—Sâm 19:7-11.
Bible Thutak Hriat Theihna Hun Remchâng Avângin Lâwm Rawh
4. Engin nge Isua chu ‘thlarau thianghlima lâwmtîr êm êm’?
4 Pathian thu hriatna neih hi chapona awmtîrtu finvârna emaw, khawvêl lehkha zirna emawah chuan a innghat lo. Jehova’n an thlarau lam mamawh hre thiamtu mi inngaitlâwm Matthaia 5:3; 1 Johana 5:20) Isua’n mihring ṭha famkim lo ṭhenkhat hming chu vâna ziak luh a nih thu a han ngaihtuah chuan, “thlarau thianghlimah a lâwm êm êm a, ‘Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che,’” tiin a sawi a ni.—Luka 10:17-21.
leh mi rilru ṭhate hnêna a pêk ngilneihnaah a innghat zâwk a ni. (5. Engvângin nge Isua zirtîrte chuan Lalram thutak an hnêna puan chhuah chu an ngaihnêp loh vang?
5 Chutianga a thinlung chhûngril aṭanga ṭawngṭaina a chham chhuah hnuah, Isua chuan a zirtîrte lam chu hawiin: “In thil hmuhte hi a hmuhna mitte chu a vânnei e! Ka ti a che u, zâwlnei tam tak leh lal tam takte pawhin in thil hmuhte hi an châk ṭhîn a, nimahsela an hre si lo a ni,” tiin a sawi. Ni e, Isua’n amah zuitu mi rinawmte chu an hnêna hriattîr Lalram thutak hlu tak mai ngainêp lo tûrin a fuih a. Hêng thutakte hi chhuan hmasa lama Pathian chhiahhlawhte hnênah khân puan chhuah a ni lo va, Isua hun laia “mi fing leh mi bengvârte” hnêna puan chhuah lah a ni hek lo!—Luka 10:23, 24.
6, 7. (a) Pathian thutak avânga lâwm nachâng hriat chhan tûr eng nge kan neih? (b) Tûn laiah sakhaw dik leh dik lo inan lohna eng nge kan hmuh?
6 Kan hun laiah hian, Jehova’n ‘bâwih rinawm leh fingte’ hmanga a mite hnêna Bible hriatna ril zâwk a pêkte avângin lâwm chhan tûr kan nei lehzual a ni. (Matthaia 24:45; Daniela 12:10) Tâwpna hun chungchângah zâwlnei Daniela chuan heti hian a ziak a: “Mi tam tak an tlân vêl ang a, hriatnate a pung dâwn a ni,” tiin. (Daniela 12:4) Tûn laiah hian Pathian hriatna a “pung” hlein, Jehova chhiahhlawhte chu thlarau lamah ṭha taka châwm an ni tih i pawm lâwm ni?
7 Pathian mite’n thlarau lam hausakna an chen leh Babulon Khaw Ropui sakhaw lama buaina chu a inang lo hle mai! Chu mi avângin, sakhaw dik lo chunga lungawi lote emaw, sakhaw dik lo tentu emaw tam takte chu sakhaw dik lamah an inlet a. Anni chu berâm ang rilru pu ‘[Babulon Khaw Ropui] sualnatea tel duh lo’ emaw, ‘a hremnate hmu ve duh lotute’ emaw chu an ni. Jehova leh a chhiahhlawhte chuan chutiang mi zawng zawngte chu Kristian Kohhran dik takah chuan lo awm tûrin an sâwm a ni.—Thu Puan 18:2-4; 22:17.
Lâwm Nachâng Hriate Chuan Pathian Lam An Pan
8, 9. Engtin nge Hagaia 2:7 thute hi tûn laiah a thlen famkim?
8 Entîr nei thlarau lam biak in chungchângah Jehova chuan heti hian a lo sawi lâwk a ni: “Hnam tinrêng ka tinghîng ang a, hnam tinrêng thil duhzâwngte chu a lo thleng ang a, he in hi ropuinain ka tikhat ang,” tiin. (Hagaia 2:7) He hrilh lâwkna mak tak mai hi Hagaia hun laia din thar leh a la bâng Pathian mite’n Jerusalema biak in an sak ṭhat leh khân a thleng famkim a. Tûn laiah hian, Jehova thlarau lam biak in ropui tak chungchângah Hagaia thute chuan thlen famkimna a neih belh a ni.
9 Maktaduai tam takte chu entîr nei thlarau lam biak ina “thlarau leh tih tak zeta” Pathian be tûrin an lo kal khâwm a, kum tinin “hnam tinrêng thil duhzâwngte” chu a nuai têlin an rawn lût reng a ni. (Johana 4:23, 24) Entîr nân, kum 2006 rawngbâwl kum atâna khawvêl pum huap report chuan mi 248,327 chu Jehova hnêna an impumpêkna lantîr nân baptisma an chan thu a târ lang. Chu chu, chawhrualin mi thar 680 vêlin nî tin baptisma an chang tihna a nih chu! Thutak an hmangaihna leh Lalram thu puangchhuaktu anga Jehova rawng bâwl an duhna chuan Pathian hîp an nih tak zetzia a lantîr a ni.—Johana 6:44, 65.
10, 11. Mite’n Bible thutak an lo ngaihhlut ṭan dân lantîrtu thiltawn chu han sawi teh.
10 Rilru ṭha pu mi tam takte chuan ‘mi fel leh mi suaksual, Pathian rawngbâwltu leh bâwl lotu an thliar theih’ avângin, anni chu thutak lama hîpin an awm a ni. (Malakia 3:18) Protestant kohhrana an awm chung pawha sakhaw lam thil zawhna tam takte chhânna lungawithlâk hmu zo lo Wayne-a leh Virginia-i te thiltawn hi ngaihtuah teh. An pahnih hian indo an haw hle a, sakhaw hruaitute’n sipaite leh an râlthuamte mal an sâwm lai an hmuh chuan a ngaihna hre lovin, an rilru a buai hle a ni. Virginia-i chuan Sunday school-ah kum tam tak a zirtîr tawh chung pawhin, an han upat deuh chuan, an kohhran puite chuan an ngaihsak lo nia inhriatna an nei a. Anni chuan heti hian an sawi: “Tuma’n min rawn tlawh lo va, kan thlarau lam nun an ngaihsak thu an sawi lang hek lo. Kohhran chuan kan pawisa neih chauh chu a duh a ni. A ngaihna tak pawh kan hre lo,” tiin. Mawngkawhurte an han pawm theih tâkah phei chuan a ngaihna an hre lo lehzual a ni.
11 Chutih lai chuan, Wayne-a leh Virginia-i te tunu leh a hnuah an fanu chu Jehova Thuhretute zînga mi an lo ni a. Atîrah chuan Wayne-a leh Virginia-i te chu, chu mi thil avâng chuan an lungngai a; mahse, a hnuah an rilru an thlâk a, Bible Zirpui rem an ti ve ta a ni. Wayne-a chuan: “Thla thum chhûng lekin, tûn hma kum 70 chhûng kan zir aia tam kan zir a! Pathian hming Jehova a ni tih rêng kan hre ngai lo va, Lalram leh lei Paradis chungchâng lah engmah kan hre lo,” tiin a sawi. Rei lo têah he nupa rilru ṭha takte hi Jehova Thuhretute tualchhûng kohhranah chuan an inkhâwm ve ṭan ta a ni. Virginia-i chuan: “Thutak hi mi tinte hrilhhriat kan duh,” tiin a sawi. An pahnih hian kum 80 an pêl ve ve tawh a, kum 2005 khân baptisma an chang ta a ni. Anni chuan: “Kristian dik takte awm khâwmna chu kan hmu chhuak ta,” tiin an sawi.
‘Hna Ṭha Tinrêng Thawk Tûra Inthuamna’ Avânga Lâwmin
12. Eng nge Jehova’n a mite hnênah a pêk fo ṭhin a, chu mi hlâwkpui tûr chuan eng nge kan tih ngai?
12 Jehova chuan a duhzâwng ti tûrin a chhiahhlawhte chu a ṭanpui reng ṭhîn. Entîr nân, Nova chuan lawng a tuk dân tûrah kaihhruaina chiang tak leh chipchiar tak chu a dawng a ni—a vawikhatna atâna a nihna tûr ang thlapa thawh ngai hna chu! Tichuan, chutiang tak chuan thawh a ni ta. Engvângin nge? A chhan chu Nova chuan ‘Pathianin a hnêna thu a pêk zawng zawng ang ngei chuan a tih tâk’ vâng a ni. (Genesis 6:14-22) Tûn laiah pawh hian Jehova chuan a chhiahhlawhte chu a duhzâwng ti tûrin kim takin a thuam a. Kan hna bulpui ber chu Pathian Lalram din tawh a nih thu chanchin ṭha mite hrilh leh a phute chu Isua Krista zirtîr an lo nih theihna tûra ṭanpui hi a ni. Nova chunga a thlen dik ang bawkin, kan hlawhtlinna chu thu kan âwihnaah a innghat a. Jehova’n a Thu leh a inawpna pâwl hmanga kaihhruaina min pêkte chu thuâwih takin kan zâwm tlat tûr a ni.—Matthaia 24:14; 28:19, 20.
13. Eng hmangin nge Jehova’n zirtîrna min pêk?
13 Chu hna thawk zo tûr chuan, kan hmanraw pawimawh ber—Pathian Thu—chu ‘fel taka hman’ kan zir tûr a ni, chu chu “zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.” (2 Timothea 2:15; 3:16, 17) Kum zabi khatna ang bawk khân, Jehova chuan Kristian kohhran kaltlangin zirtîrna hlu tak min pe a. Tûn laiah hian khawvêl pum puia kohhran 99,770-ah chuan Theocratic Rawngbâwlna School leh Rawngbâwlna Inkhâwm chu rawngbâwlnaa min ṭanpuitu atân chawlhkâr tina neih a ni. Hêng inkhâwm pawimawh takte avânga i lâwmna hi inkhâwm ziahna leh chuta i thil zirte nunpuina hmangin i lantîr em?—Hebrai 10:24, 25.
14. Engtin nge Jehova chhiahhlawhte’n Pathian rawng an bâwl theihna chanvo avânga an lâwmzia an lantîr?
14 Khawvêl pum puia Pathian mi maktaduai tam takte chuan an zirtîrna dawn avânga an lâwmzia chu theihtâwpa rawngbâwlin an lantîr a. Entîr nân, kum 2006 rawngbâwl kum chhûngin, Lalram thuchhuahtu 6,741,444-te chuan rawngbâwlna pêng chi hrang hrangah avaia belhkhâwmin darkâr 1,333,966,199 an hmang a, chutah chuan in lama Bible zirpuina 6,286,618 neihnaa hun hman pawh chu a tel a ni. Hêngte hi khawvêl pum puia min tichak thei report pêkte zînga a ṭhen azâr chauh a ni. Kum zabi khatnaa kan unaute’n an hun laia thu hrilh rawngbâwlnain hma a sâwn dân report an hriata an chak phah ang ngei khân, he report hi ngun taka en tûr leh chu mi aṭanga chakna hmu ve ngei tûrin kan sâwm a che u.—Tirhkohte 1:15; 2:5-11, 41, 47; 4:4; 6:7.
15. Engvângin nge thinlung zawng zawnga Jehova rawng an bâwlna chungah tumah hi an lunghnual loh vang?
15 Kum tina fakna au thâwm nasa tak Pathian hnêna chho chuan, Jehova chhiahhlawhte’n amah an hriatna leh a hming ṭâwmpuitu an nihna chanvo hlu tak avânga an lâwmzia a târ lang a ni. (Isaia 43:10) Kan unaute zînga ṭhenkhat tarte, a nih loh leh hrisêl loh avânga chak vak lote’n faka inthawina an hlan chu hmeithai thawhlâwm nên chuan khaikhin theih a ni. Amaherawhchu, Jehova leh a Fapa chuan thinlung zawng zawnga Pathian rawngbâwltu, an theih apiang titute chu an lâwm tak zet a ni tih erawh chu i theihnghilh ngai lo vang u.—Luka 21:1-4; Galatia 6:4.
16. Eng zirtîrna hmanruate nge Pathianin tûn hnai mai khân min pêk?
16 Jehova chuan rawng bâwl tûra min zirtîr bâkah, a inawpna pâwl kaltlangin zirtîrna hmanraw ṭha chungchuangin min thuam a. Tûn hnai lawk kum sâwmbi-ahte khân, chung hmanruate zîngah chuan Chatuan Nunnaa Hruaitu Thutak, You Can Live Forever in Pradise on Earth, Chatuan Nunnaa Hruaitu Hriatna tih leh, tûna kan hman mêk What Does The Bible Really Teach? tih lehkhabute chu a tel a ni. Hêng hmanruate avânga lâwm nachâng hriate chuan rawngbâwlnaah an hmang ṭangkai hle a ni.
Bible Teach Bu Chu Hmang Ṭangkai Rawh
17, 18. (a) Bible Teach bu a englai hi nge i rawngbâwlnaah târ lan i duh? (b) Bial kantu pakhatin Bible Teach bu chungchâng eng nge a sawi?
17 Bung 19 awmna, appendix kimchang tak nei, a thu fiah leh ṭawng hriat nuam taka ziah What Does The Bible Really Teach? tih lehkhabu hian rawngbâwlnaa malsâwmna a nihzia a tichiang hle a ni. Entîr nân, bung 12-na chuan “Pathian Tilâwm Zâwnga Nungin” tih chungchâng chu a rawn sawi a. Hei hian Bible zirlai chu mi tam takin ngaihtuah pawh an la ngaihtuah ngai hauh loh leh thil theih ni pawha an ngaih loh, Pathian ṭhian nih theih dân a hrilhfiah a ni. (Jakoba 2:23) Engtin nge he Bible zirnaa ṭanpuitu hi mite’n an lo dawnsawn?
18 Australia rama bial kantu pakhat chuan Bible Teach buin “in neitute nêna tîtîna a neihtîr nghâl” thu a sawi a. He lehkhabu hi awlsam taka hman theih a ni a, “hei hian Lalram thuchhuahtu
tam takte inrintâwkna leh rawngbâwlnaa hlimna an neih chu a tihtharsak a ni. Ṭhenkhatin he lehkhabu hi Rangkachak Rohlu tia an ko pawh hi a mak lo ve!” tiin a sawi belh a ni.19-21. Bible Teach bu hlutna târ langtu thiltawn ṭhenkhatte sawi rawh.
19 Guyana rama hmeichhe pakhat chuan a kawngkaa ding pioneer pakhat hnênah: “Pathianin a rawn tîr che a ni ngei ang,” tiin a sawi a. A chênpui chuan tûn hnai mai khân amah leh an fa naupang pahnihte chu a chhuahsan a ni. Pioneer chuan Bible Teach bu bung 1-na a han keuva, “Engtin Nge Pathianin Rorêl Dik Lohna Kan Tawhte Hi A Ngaih?” tih thupuitê hnuaia paragraph 11-na chu a chhiarsak a. “Chu thu chuan a rilru a khawi hle a. Ding chhuakin, a dâwr hnung lamah a va kal chhuak a, a va ṭap ta hial a ni,” tiin pioneer chuan a sawi. He hmeichhia hian tualchhûng unaunu pakhat nêna Bible zirna neih chu a remti a, hma a sâwn chak hle a ni.
20 Spain rama chêng José-a chuan traffic accident-ah a nupui a chân a. Ruihhlo hmanga inhnem a tum a, rilru lama mithiamte ṭanpuina pawh a la hial a ni. Amaherawhchu, rilru lam zir mite chuan José-a tibuaitu ber: “Engvângin nge Pathian hian ka nupui thih a phal?” tih zawhna chu an chhâng thei lo. Ni khat chu José-a chuan Francesc-a, a hna thawhna hmuna thawk ve chu a tawng a. Ani chuan Bible Teach bu bung 11-naa “Engvângin Nge Pathianin Hrehawm Tawrhna Awm A Phal?” tih chu sawipuiah a rawt a. Bible sawifiahna leh zirtîrtu leh School naupang pakhat chungchânga tehkhin thu chuan José-a rilru chu a khawih hle a. Bible chu a zir ta ṭâng ṭâng a, bial inkhâwmpuiah te a tel a, tûnah phei chuan tualchhûnga Kingdom Hall-ah a inkhâwm tawh a ni.
21 Poland rama sumdâwng kum 40 mi Roman-a chuan Pathian Thu zahna a nei reng ṭhîn a. Mahse, a hnaa a inhman êm avângin, a Bible zirnaah chuan hma a sâwn ṭha thei lo. Chutichung pawhin, district inkhâwmpuiah chuan a tel a, Bible Teach bu chu a dawng ve a. Chu mi hnuah chuan, hmuh theih khawpin hma a sâwn a ni. Roman-a chuan: “He lehkhabu aṭang hi chuan, Bible zirtîrna bul berte chu a chiang ta vek mai,” a ti. Tûnah chuan Bible a zir ziah tawh a, hma a sâwn chak hle a ni.
Lâwm Nachâng Hre Zual Zêlin
22, 23. Engtin nge kan hmaa awm beiseina avânga kan lâwmna chu kan lantîr chhunzawm zêl theih ang?
22 “Chhan Chhuahna A Hnai!” tih District Inkhâwmpui phûrawm tak neiha sawifiah tawh angin, Kristian dikte chuan “chatuana tlanna,” a nih loh leh chhan chhuahna Pathianin a tiam leh Isua Krista thisen chhuakin a awmtîr theih chu an nghâkhlel hle a ni. He beiseina hlu tak avânga kan lâwmna chu ‘Pathian nung rawng bâwl tûra thiltih thite laka’ intihthianghlim aia lantîr dân tûr kawng ṭha zâwk a awm lo.—Hebrai 9:12, 14.
23 Mahni hmasial tûra nêksâwrna a nasat hle laia Lalram thupuangtu maktaduai ruk aia tamin rinawm taka Pathian rawng an bâwl ṭâng ṭâng chu thil mak a ni tak zet a. Chu chuan Jehova chhiahhlawhte’n Pathian rawng bâwlna avângin an lâwm a, ‘an thawhrimna chu Lalpaah chuan a thlâwn ngai lo’ tih an hriatzia pawh a târ lang bawk. Chu lâwm nachâng hriatna chu ṭhang lovin awm ngai rêng rêng suh se!—1 Korinth 15:58; Sâm 110:3. (w07 2/1)
Engtin Nge I Chhân Ang?
• Fakna hla phuahtu chuan Pathian leh a thlarau lam thilpêkte avânga lâwmna chungchâng eng nge min zirtîr?
• Engtin nge Hagaia 2:7 thu hi tûn laiah a thlen famkim?
• Engtin nge Jehova’n a chhiahhlawhte chu a rawng ṭha taka bâwl thei tûra a thuam famkim?
• Jehova ṭhatnate chunga i lâwmna chu tilang tûrin eng nge i tih theih?
[Zirlai Atâna Zawhnate]
[Phêk 29-naa milemte]
Jehova chuan a duhzâwng ti tûrin kim takin min thuam