Mi Dangte Chu Bible Zirtîrna Zâwm Tûrin Ṭanpui Rawh
Mi Dangte Chu Bible Zirtîrna Zâwm Tûrin Ṭanpui Rawh
“Lei ṭhaa mi erawh chu hêng mi hi an ni: rilru fel leh ṭhain thu an hria a, an vawng reng a, chhel takin an rah ṭhîn.”—LUKA 8:15.
1, 2. (a) What Does the Bible Really Teach? tih lehkhabu hi eng atâna siam nge a nih? (b) Kum kaltaahte khân, engtin nge Jehova chuan a mite’n zirtîr siam tûra an thawh rimna chu mal a sâwm?
“LEHKHABU ṭha chungchuang tak zawng a ni. Ka Bible zirpuite’n an duh hle a. Kei pawhin ka duh hle bawk. He lehkhabu hian mite kawtkaia Bible zirpui ṭan a tih awlsam phah a ni,” tiin Jehova Thuhretu regular pioneer thawk lai unaunu pakhat chuan What Does The Bible Really Teach? * lehkhabu chanchin chu a sawi a. He lehkhabu chungchâng bawk hi sawiin, Lalram thuchhuahtu upa lam pang pakhat chuan: “Kum 50 chhûng rawngbâwlnaa ka tel chhûngin, mi tam takte chu Jehova hre tûra puih theihna chanvo hlu tak ka nei a. Mahse, he lehkhabu hi chu a ṭha lawr lak a ni. Mi tiphûr thei tak milemte leh tehkhin thute hmuh chu a nuam khawp mai,” tiin a sawi. Chu chu Bible Teach bu i ngaih dân a ni ve em? He Bible zirnaa ṭanpuitu hi Isua’n: “Chutichuan, kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tia thu a pêk tipuitling tûra ruahman a ni.—Matthaia 28:19, 20.
2 Rinhlelh rual lohvin, Jehova thinlung chu a Thuhretu maktaduai 6.6 laite’n zirtîr siam tûra Isua kaihhruaina mahni duhthua an zâwm a han hmuh chuan a hlim hle a ni. (Thufingte 27:11) Jehova chuan an thawhrimna chu mal a sâwm tih a lang chiang hle. Entîr nân, kum 2005 rawngbâwl kum khân, chanchin ṭha chu ram 235-ah hrilh a ni a, chawhrualin, Bible zirpui 6,061,500 neih a ni. Chu mi avâng chuan, mi tam takin ‘Pathian Thu an hria a, mihring thu pawma pawm lovin, Pathian thu pawmin an pawm a ni.’ (1 Thessalonika 2:13) Kum hnih liamtaahte khân, zirtîr thar nuai sawmnga chuangte chuan Jehova tehnate mila an nun siam remin, Pathian hnênah an inpumpêk a ni.
3. Bible Teach bu hman dân chungchângah eng zawhnate nge he thuziakah hian kan enfiah dawn?
3 Tûn hnaiah tuemaw nêna Bible zirna hun hlimawm tak chu i hmang em? Khawvêl pum puiah hian, Pathian duhzâwng chu hriaa, ‘vawng reng a, chhel taka rah ṭhîn’ mi ‘rilru fel leh ṭha’ pu mi an la awm a ni. (Luka 8:11-15) Zirtîr siamna kawnga Bible Teach bu i hman theih dân i lo ngaihtuah ho ang u. Kan thil sawiho tûr chuan zawhna pathum a rawn bih chiang ang: (1) Engtin nge Bible zirpui i neih ṭan theih ang? (2) Eng ang zirtîr dân hmang hi nge ṭha ber? (3) Engtin nge mi chu Bible zirlai chauh ni lo va, Pathian Thu ziak, Bible zirtîrtu pawh ni thei tûra i ṭanpui theih ang?
Bible Zirpui I Neih Ṭan Theih Dân
4. Engvângin nge ṭhenkhat chuan Bible zir chu an tîm mai theih a, engtin nge an hreh tlatna chu i tihrehsak theih ang?
4 Vawi khat zuana lui zau tak zuan khûm tûra tih ni ta la, chu rawtna chu i pawm duh lo ngei ang a. Amaherawhchu, lui lai a khât tâwka rah tûr lung dah a nih erawh chuan, lui ral kai chu i tum chhin duh zâwk ngei ang. Chutiang chiah chuan, mi buai thei tak chuan Bible zir chu a tîm mai thei. In neitu chuan Bible zir tûr chuan hun leh tha leh zung tam tak sên ngai niin a ngai thei a ni. He a hrehna hi tireh tûrin engtin nge i ṭanpui theih ang? Thu bengvârthlâk tak tawi tê têa sawipuiin, Bible Teach bu chu hunbi neia Pathian Thu zirna neihna lama hruai nân i hmang thei a ni. Ṭha taka i inbuatsaih chuan, i va tlawhkîr lehna apiang chu Jehova nêna an inṭhianna atân hmasâwnna rahbi thar a lo ni chho zêl ang.
5. Engvângin nge Bible Teach bu chu kan chhiar a ngaih?
5 Amaherawhchu, mi dang tuemawin Bible Teach bu ṭangkaipui tûra i ṭanpui hmain, i hriat bel hmasak hle a ngai a ni. A bul aṭanga a tâwp thlengin i chhiar chhuak tawh em? Nupa kawp khat chuan an chawlh hmannaah he lehkhabu hi an keng a, tuipui kamah chuan hahchawlh pahin an chhiar a. Chu lai hmuna chêng hmeichhe pakhat, khualzinte hnêna thil zuar ṭhîn chuan rawn hnaihin, What Does the Bible Really Teach? tih lehkhabu hming inziak chu a rawn hmu a. Nupate hnênah chuan dârkâr rei lo tê liam tâah khân chu zawhna tak mai chhânna dîl chuan Pathian hnênah a ṭawngṭai thu a hrilh ta a. Chu nupa chuan hmeichhe hnênah chuan lehkhabu chu lawm takin an pe ta a ni. Mi kan nghah laite, kan hnathawhna hmun a nih loh leh school-a kan chawlh lawk hunah te pawh he thuchhuah chhiar tûr, a nih loh leh a vawi hnihna atâna chhiar nawn tûr hian ‘remchânnate i lei’ em? (Ephesi 5:15, 16) Chutianga i ti a nih chuan, he Bible zirna ṭanpuitu hi i lo hre bel hle ang a, a chhûnga thu awmte mite hrilh theihna hun remchâng pawh a siam thei bawk che a ni.
6, 7. Engtin nge Bible Teach bu chu Bible zirpui neih ṭan nân i hman theih?
6 Chu lehkhabu chu vântlâng hmuna rawng kan bâwlnaah kan pêk chhuah hian a milem te, Bible châng te, leh phêk 4, 5, leh 6-a zawhnate chu hmang ṭangkai ang che. Entîr nân, “Mihringte’n tûn laiah harsatna chi hrang hrang kan tâwk chung hian, eng hi nge min kaihruaitu atâna rin tlâk nia i ngaih?” tia zâwtin inbiakna chu i ṭan thei a. A chhânna chu ngun taka i ngaihthlâk hnuah, 2 Timothea 3:16, 17 chu chhiar la, Bible-in mihringte harsatna tihvenna dik tak a sawi chu hrilhfiah bawk rawh. Tichuan, in neitu chu phêk 4 leh 5-na kawhhmuh la, tichuan: “He mi phêka thil awm dân milema entîrte zîngah a eng hian nge tilungngai ber che?” tiin zâwt ang che. In neituin a engemaw ber a thlan hunah, a Bible châng ken tel chu i Bible aṭangin chhiarsak la, chutih lai chuan lehkhabu chu kentîr ang che. A dawtah phêk 6-na chu chhiar la, in neitu chu: “He mi phêk hnuaia zawhna paruk târ lan zîngah hian a eng ber chhânna hi nge hriat i duh?” tiin zâwt rawh. Pakhat a thlan chhuah chuan, chu mi zawhna chhângtu bung chu hmuhtîr la, lehkhabu chu hnutchhiahin chu zawhna sawipui tûra tlawhkîr tûr chuan ruahmanna nghet siam rawh.
7 Thu sawi dân târ lan tâkte hian minute nga vêl chauh a awh dâwn a. Amaherawhchu, chûng minute rei lo te chhûng chuan, in neitu ngaihven zâwng chu i lo hre thei ang a, Bible châng pahnih chhiarin a hmanna sawipuiin, tlawhkîr tûrin kawng i sial hman dâwn a ni. In neitu i biak hun rei lo te chhûng chu atân chuan hun rei tak hnua fuihtu leh thlamuanna a dawnna pawh a ni thei ngei ang. Chu mi avâng chuan, mi buai thei tak pawh chuan i bula hun rei lo tê han hman leh chu a châk thei ang a, ani chu ‘nunna kalna kawngkaa’ lût tûra rahbi thar zawh tûrin i ṭanpui thei ang. (Matthaia 7:14) Tichuan, in neituin tuina a han neih chhoh tâkah chuan Bible zir hun chhûng chu kan ti rei sawt thei a. Hei hi ṭhu chunga tih leh hun bithliah chin rei deuh zâwk neih rawtna hmangin a tih theih a ni.
Zirtîr Dân Hmang Ṭha Ber Chu
8, 9. (a) Engtin nge i Bible zirpui chu harsatna leh fiahna a tawh tûrte hmachhawn thei tûra i buatsaih theih? (b) Khawiah nge rinna chak tak siam thei tûr, thil kâng thei lote chu kan hmuh ang?
8 Bible zirtîrnate miin a han zawm tawh chuan, a hmasâwnna dâl thei tûr harsatnate a tawh ngei a rinawm a. Tirhkoh Paula chuan: “Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a sawi a ni. (2 Timothea 3:12) Paula chuan he fiahna hi in sakna bungrua ṭha tak tak lote kângchhia a, rangkachak, tangkarua, leh lung man tam tichhe si lo kâng mei nên a tehkhin a. (1 Korinth 3:10-13; 1 Petera 1:6, 7) I Bible zirpui chu fiahna a hmachhawn theihte laka a din chhuah nâna a thil mamawhte nei tûra ṭanpui tûrin, thil kâng thei lova i siam a ngai a ni.
9 Fakna hla phuahtu chuan “LALPA thute” chu “tangka, lei chunga rawhtuina meia fiah a, vawi sarih tihthianghlim tawh hnu” nên a tehkhin a. (Sâm 12:6) Bible-ah hian rinna chak tak neihna tûra hman theih thil hlu zawng zawngte chu a awm a ni. (Sâm 19:7-11; Thufingte 2:1-6) Tin, Bible Teach bu chuan Bible thiam taka hman dân a kawhhmuh bawk che a ni.
10. Engtin nge Bible zirlai chu Bible lam i ngaihtuahtîr theih ang?
10 Zirna neih chhûngin, zirlai chu bung tina Bible châng târ lante chu ngaihtuahtîr rawh. Zirlaiin Bible châng pawimawh lai a hriatthiam a, a nunpui theih nâna ṭanpui tûrin zawhnate zâwt rawh. A thil tih tûr pawngpaw hrilh chiam lo tûrin fîmkhur rawh. Isua entawn tûr siam chu entawn zâwk ang che. Dân hretu’n zawhna a zawh pawhin, Isua chuan: “Dân lehkhabuah engnge ziak ni? chutah chuan engnge i chhiar ṭhîn?” tiin a chhâng a ni. Chu pa chuan Pathian Lehkha Thu aṭangin a chhâng a, Isua’n chûng thu bulte a nunpui theih dân hmu thiam tûrin a ṭanpui a ni. Tehkhin thu sawiin, Isua’n chu pa chu Bible zirtîrnain amaha hna a thawh dân tûr hmu thiam tûrin a ṭanpui bawk. (Luka 10:25-37) Bible zirlai chu Bible thu bulte nunpui tûra i ṭanpui theih nân Bible Teach lehkhabu hi tehkhin thu hriat awlsam tak takin a khat tlat a ni.
11. Ṭum khatah eng zât nge kan zir ang?
11 Isua’n thil hriatthiam harsa takte pawh tluangtlam taka a sawifiah ang chiahin, Bible Teach bu pawh hian Pathian Thu hrilhfiah nân ṭawngkam tluangtlam tak leh hriatthiam awlsam tak chu a hmang a. (Matthaia 7:28, 29) Isua entawn tûr siam chu zui rawh. Thu chu tluangtlam tak, fiah tak, leh dik takin hrilh rawh. A thute chu hmanhmawh takin sawi liam puat suh. Chuai chuan, zirlai dinhmun leh theihna chuan ṭum khata in zir zât tûr chu hril zâwk rawh se. Isua chuan a zirtîrte phâk tâwk chu a hria a, ṭum khatah an hriat theih tâwk aia tam thu hrilhin phurrit a siamsak lo.—Johana 16:12.
12. Thu belhna chu eng anga hman tûr nge a nih?
12 Bible Teach bu-ah chuan thu chi hrang 14 awmna thu belhna a tel a. Bible zirlaite mamawh dân azirin, nang a zirtîrtu hian chûngte a ṭangkai thei ang bera hman dân chu i ngaihtuah thiam tûr a ni. Entîr nân, zirlaiin in thusawi lai chu hriatthiam harsa a ti emaw, a hmaa a sakhaw rin dân avânga thil engemaw bîkah zawhna a nei emaw a nih chuan, thu belhna zînga mi inâwm tak chu kawhhmuhin, chu mi chungchâng amah chhiartîr chu a tâwk thei ang. Kawng lehlamah chuan, zirlai mamawh chuan chu mi thu zir dun chu a ngai tih a tilang. Thu belhnaah chuan Bible thu pawimawh tak tak hêng “‘Nunna’ leh ‘Thlarau’—Hêng Thu Malte Hian Eng Awmzia Chiah Nge An Neih?” tih leh “‘Babulon Khaw Ropui’ Hriatfiahna,” tihte chu a awm a ni. Hêng thute hi i Bible zirpui nêna sawiho chu i duh mai thei bawk. Thu belhnaa thute atân hian zawhna pêk a nih loh avângin, zawhna awmze nei tak siam chhuak tûr chuan a chhûng thu chu i hriat bel hle a ngai ang.
13. Rinna tihchakna kawngah ṭawngṭainain eng hmun nge a luah?
13 Sâm 127:1 chuan: “LALPAN in a sak loh chuan, a satute chuan an thawk rim thlâwn mai a ni,” tiin a sawi a. Chuvâng chuan, Bible zipuina nei tûra i inbuatsaih hian Jehova ṭanpuina dîlin ṭawngṭai ang che. Bible zirna ṭanna leh tihtâwpna ṭawngṭaina hian Jehova nêna in inlaichînna ṭha tak chu târ lang rawh se. Bible zirlai chu Jehova hnêna A Thu hre thiam tûra finna dîl tûr leh a zilhnate nunpui tûra chakna a neih nâna ṭawngṭai tûrin fuih ang che. (Jakoba 1:5) Chutianga a tih chuan, zirlai chu tihduhdahna te tuar chhuak tûrin a lo chak ang a, rinnaah chuan a chak chho zêl ang.
Bible Zirlai Chu Zirtîrtu Ni Tûrin Ṭanpui Rawh
14. Eng hmasâwnna nge Bible zirlaiin a neih a ngaih?
14 Kan Bible zirpuite hian Isua’n a zirtîrte thu a pêk “zawng zawng” pawm tûr chuan, Pathian Thu zirlai an nihna ata zirtîrtu ni tûrin hma an sâwn chhoh a ngai a ni. (Matthaia 28:19, 20; Tirhkohte 1:6-8) Bible zirlaiin chutiang hmasâwnna a neih theih nâna ṭanpui tûrin eng nge i tih theih?
15. Engvângin nge i Bible zirpui chu Kristian inkhâwmnaahte tel tûra i fuih ang?
15 Bible a zir hmasak ber ṭum aṭangin, zirlai chu i ruala kohhran inkhâwmnaa tel tûrin sâwm nghâl rawh. Inkhâwmna chu Pathian Thu zirtîrtu ni tûra zirtîrna i dawnna hmun a nih thu hrilhfiah ang che. Chawlhkâr engemaw chen a liam hnuah, Bible zirna neih a nih zawh apiangin, inkhâwmna leh inkhâwmpuitea thlarau lam zirtîrna i dawn chi hrang hrangte chu rei lo te chhûng hrilh ṭhîn rawh. Hêng huna hlâwkna i dawnte chu phûr takin sawi ang che. (Hebrai 10:24, 25) Bible zirlai a rawn inkhâwm ziah tâkah chuan Pathian Thu zirtîrtu a lo nih ngei a rinawm a ni.
16, 17. Bible zirlai insiam theih leh tihhlawhtlin theih thiltum ṭhenkhat chu eng nge ni?
16 Bible zirpui chu a tihpuitlin theih tûr thiltum insiam tûrin ṭanpui rawh. Entîr nân, a thil zirte chu a ṭhiante emaw, a chhûngte emaw hrilh ve tûrin fuih la. Tin, Bible bu pum pui chhiar chhuah chu thiltuma nei tûrin rawt bawk rawh. Bible chhiar ziah tûra i ṭanpui theih chuan, baptisma a chan hnu zêlah pawh he tih dân hi a hlâwkpui hle ang. Chu bâkah, Bible Teach bu bung tina zawhna pawimawh ber mai chhânna Bible châng pakhat tal chhinchhiah tum tlat tûrin engvângin nge i rawt loh vang? Chutianga a tih chuan, ‘hnathawktu zak lo, thutak thu fel taka hmang’ a lo ni dâwn a ni.—2 Timothea 2:15.
17 Zirlai chu a Bible châng hriat tawh sa sawi chhuahtîr mai emaw, a tawi zâwnga sawi chhâwntîr mai emaw lovin, a rinna zâwtfiahtute a chhân hunah he Bible châng hi kan thu sawiho lai nêna a inkûngkaih dân hrilhfiah tûrin fuih rawh. Nang hi a rinna zâwttu chhûngkhat emaw, hna thawhpui emaw lema changin, tawi têa tihchhinna neih chu a ṭangkaipui thei ang. Zirlaiin chhânna a pêk hunah, ‘thuhnuairawlh tak leh ṭih dêk chunga’ a chhân dân tûr chu kawhhmuh rawh.—1 Petera 3:15.
18. Bible zirlai chu baptisma chang lo thuchhuahtu nih a tlin hunah, eng ṭanpuina nge i pêk chhunzawm zêl theih?
18 Nakinah chuan, zirlai chu thlawhhma rawngbâwlnaa tel tûrin a tling thei ang a. He hnaa tel phalsak nih hi chanvo hlu a ni tih sawi uar rawh. (2 Korinth 4:1, 7) Upate’n zirlai chu baptisma chang lo thuchhuahtu nih a tling tih thu tlûkna an siam ve leh, thusawi dân tluang tak pakhat inpuahchahpui la, in tinah kalpui ang che. Vântlâng rawngbâwlna pêng hrang hrangah thawhpui zêl la, tlawhkîr atâna inpuahchah dân leh a tih dân tûr chu zirtîr rawh. I entawn tûr siam ṭha tak chuan nghawng ṭha a nei ngei ang.—Luka 6:40.
“Nangmah Leh I Thu Ngaithlatute Chu I Chhandam Dâwn”
19, 20. Eng thiltum nge kan neih ang a, engvângin nge?
19 Rinhlelh rual lohvin, mi chu “thutak” hmu tûra ṭanpui tûr chuan thawh rim a ngai a ni. (1 Timothea 2:4) Amaherawhchu, tuemaw chu Bible zirtîrnate pawm tûra ṭanpui avânga lo awm hlimna nêna khaikhin theih hlimna chu nunah hian a awm mang meuh lo. (1 Thessalonika 2:19, 20) He khawvêl pum puia zirtîrna hnaa “Pathian hnathawhpuite” nih theihna hi chanvo hlu a va ni tak êm!—1 Korinth 3:9.
20 Isua Krista leh vântirhkoh thiltithei tak takte hmangin, Jehova chuan “Pathian hre lo mi leh kan Lalpa Isua chanchin ṭha âwih lo mite” chungah chuan phuba a la thuai dâwn a. (2 Thessalonika 1:6-8) Nun chu dinhmun hlauhawm takah a awm mêk a ni. What Does the Bible Really Teach? bu hmanga in lama Bible zirpui pakhat tal neih chu i thiltumah i siam thei ang em? He hna i thawh hian, ‘nangmah leh i thu ngaithlatute chhandam’ theihna hun remchâng i nei a ni. (1 Timothea 4:16) Tûnah hian, tûn hma zawng aiin mi dangte Bible zirtirna zâwm tûra ṭanpui chu a hmanhmawhthlâk lehzual a ni. (w07 1/15)
[Footnote]
^ par. 1 Jehova Thuhretute tihchhuah a ni.
Eng Nge I Zir?
• Bible Teach bu hi eng atâna siam nge a nih?
• Engtin nge Bible Teach bu hmangin Bible zirpui i neih ṭan theih?
• Eng ang zirtîr dân hi nge ṭha ber?
• Engtin nge zirlai chu Pathian Thu zirtîrtu lo ni tûra i ṭanpui theih?
[Zirlai Atâna Zawhnate]
[Phêk 17-naa milem]
He lehkhabu hi i hmang ṭangkai em?
[Phêk 18-naa milem]
Tawi têa sawihona hian mite chu Bible hriat châkna a neihtîr thei
[Phêk 20-naa milem]
Zirlai ngaihtuahna Bible lama kuai pêng tûrin eng nge i tih theih?
[Phêk 21-naa milem]
Bible zirlai chu hmasâwn tûrin ṭanpui rawh