Nuna Thiltum Nei Kum Za Chuang Mi

TUN hnai maia Sweden rama kum 105 leh a aia upa târ lannaa tel mi 60 zîngah chuan Elin-i chu a tel a. Ani chu kum 105 mi a ni. Tar dah khâwmna ina awm mah ni se, kum 60 aia tam liam ta aṭanga a nun kawng thlan anga Jehova Thuhretu phusa tak ni zêl tûrin a la chak a ni.

Mi dangte hnêna thu a hrilhnaah, Elin-i chuan ina khûng leh khuahkhirh a nih laia tirhkoh Paula tih dân chu a zui a. Paula chuan inlêng a neih apiang hnênah thu a hril a ni. (Tirhkohte 28:​16, 30, 31) Chutiang bawkin, Elin-i chuan a awmna thianfaitute, doctor-te, sam mêttute, nurse-te, leh mi dang a awmnaa a hmuh apiangte hnênah Bible-a awm chanchin ṭha chu a hrilh a. Elin-i lâwina kohhrana a rinpuite pawhin, a hriatna leh a thiltawnte chu an hlâwkpui theih nân an Bible zirpuite sâwmin an va tlawh ṭhîn a ni.

Elin-i lâwina kohhrana mite chuan mi hlim thei tak a nihna leh a thil hriat châkna avângin amah chu an ngaisâng hle. Thuhretu dang pakhat chuan: “Kohhran rawngbâwlnaah thil hriat theihna ṭha tak a nei a. Naupang zawng zawngte hming leh kohhrana lo insawn tharte hming chu a hre vek bawk,” a ti. Elin-i chu a khual chhawn thiamna te, a fiamthu thiamna te, leh a ṭha lam zâwnga thil a thlîr thiamna te avânga hriat hlawh tak a ni bawk.

Engin nge Elin-i chu hlim reng tûr leh nuna thiltum nei reng tûra ṭanpui? Ani chuan Jehova Thuhretute chhuah, Nî Tina Pathian Lehkha Thu Belh Chianna tih lehkhabu têa Bible châng pakhat chu nî tin a chhiar a. Enlenna hmangin nî tin Bible a chhiar bawk a ni. Elin-i chu Jehova Thuhretute chawlhkâr tin inkhâwmte atân a inpuahchah a, inkhâwmnaahte chuan tel thei lo mah se, thusawi an record-te chu a ngaithla a ni. Kan kum chu eng zât pawh ni se, Bible leh Bible ṭanchhan thu leh hla chhuahte chhiar ziahna leh Kristian inkhâwmnate bânsan lohna chuan nun lungawithlâk leh awmze nei tak nei tûrin min ṭanpui thei a ni.​—⁠Sâm 1:2; Hebrai 10:​24, 25. (w07 1/15)