Thudik Sawi—Mi Dang Hnên Aṭang Chauhvin Em Ni Kan Beisei?
Thudik Sawi—Mi Dang Hnên Aṭang Chauhvin Em Ni Kan Beisei?
“DAWT ka hua, mi dâwt hrilh nih lah ka haw bawk!” tiin kum 16 mi hmeichhe tleirâwl chuan a sawi chhuak a. A ngaih dân ṭâwmpui lo kan awm mang meuh lo vang. Thu kan dawn rêng rêng—ṭawngkam emaw, ziak emaw pawh ni se—thudik tak ni se kan ti hle a. Mahse, mi dangte hnêna chanchin kan hrilh chhâwnin thudik kan sawi em?
German rama ngaih dân lâk khâwmna pakhatah, mi a tam zâwkte chuan “mahni emaw, mi dangte emaw vênhim nâna dâwt pawi tham vak lo sawi chu a pawi lo va; mite inngeih theih nân dâwt sawi a ṭûl châng pawh a awm hial,” an ti a. Tin, chanchin la khâwmtu journalist pakhat chuan: “Thudik sawi leh englai pawha thudik sawi mai chu ngaih sân awm hle mah se, a ninawm lam zawng a ni,” tiin a ziak a ni.
Mite chu thudik sawi tûra kan duh laiin, thudik sawi loh chhan tûr nei nia inhriat châng kan nei a ni thei ang em? Thudik kan sawi leh sawi loh chu a pawimawh em? Thudik lo sawina rahchhuah chu engte nge ni?
Thudik Lovin A Tihchhiat Chu
Thudik lovin a tihchhiat theihte chu han ngaihtuah teh. Dâwt sawi chuan nupa inkâr leh chhûngkaw zînga mite inkârah inrin lohna a siam a. Bulbâl nei lo inrêlna chuan mi hming a tichhe thei a ni. Hnathawktu bum hmangte avângin thil siam chhuah man a lo sâng a, chu chuan an thil siam chhuahte man chu a tisâng lehzual a. Chhiah pêk tûr pêk kim lohna chuan, vântlâng tâna sawrkâr sum hman tûr a rawk a ni. Zir chîk mite dâwt sawina chuan an hna ṭha tak a tihchhiat bâkah zirna pâwl zahkaite hming pawh a tichhe tel bawk. Hausak thutna tûr ruahmanna rinawm lote chuan sum lu nei bum awlsam takte dam chhûng sum khâwl chu a lâk bosak a, chu aia rah chhe zâwk pawh a thlen a ni. Bible-in “lei daw thei te” leh “hretu der dâwt sawi ṭhîn te” chu Pathian Jehova tenzâwng takte zînga mi a ni tih min hrilh pawh hi a mak lo ve!—Thufingte 6:16-19.
Dâwt darh zau tak chuan a mi mal leh a khawtlânga chhiatna a thlen thei a. Chu chu hnialtu an awm meuh lo vang. A nih chuan, engvângin nge mite chuan thudik lo chu duhrêng vânga an sawi ṭhin? Thudik lo sawi chhuah rêng rêng chu dâwt a ni em? A dawta thuziakah hêng zawhnate leh zawhna dangte chhânna chu kan sawiho vang. (w07 2/1)
[Phêk 3-naa milem]
Dâwt sawi chuan nupa inkârah inrin lohna a siam