Jehova Ṭihna Nun Neiin Hlim Takin Awm Rawh
Jehova Ṭihna Nun Neiin Hlim Takin Awm Rawh
“Aw, a mi thianghlimte u, LALPA chu ṭih rawh u: amah ṭihtute tân chuan tlâkchhamna rêng rêng a awm si lo.”—SAM 34:9.
1, 2. (a) Eng kawng inkalh takin nge Kristianna ram chuan Pathian ṭihna chu a thlîr? (b) Eng zawhnate nge kan bih chian ang?
PATHIAN ṭih dân zirtîrtu Kristianna rama Pathian thu hriltute chuan Pathianin mi sualte chu hremhmun meidîlah chatuanin a hrem tih, Bible-in a zirtîr ni hauh lo chu an zirtîr fo va. Chutiang thurin chu Bible-in Jehova chu hmangaihna leh rorêl dikna Pathian anga a sawi nên erawh a inkalh tlat thung. (Genesis 3:19; Deuteronomy 32:4; Rom 6:23; 1 Johana 4:8) Kristianna rama rawngbâwltu dangte chuan chu mi kalh chiah chu an hmang leh thung a. Pathian ṭih chungchâng an sawi lang ngai rêng rêng lo. Pathian chu khirh lo tak, miin eng ang nun kawng pawh zawh mahse, mi zawng zawng deuhthaw pawm vek angin an zirtîr thung. Chu pawh chu Bible zirtîrna a ni lo bawk.—Galatia 5:19-21.
2 Dik takin, Bible chuan Pathian chu ṭih tûr, a nih loh leh hlau tûrin min fuih a. (Thu Puan 14:7) He thudik hian zawhna a chawk chhuak a ni. Engvângin nge hmangaihna Pathian chuan amah kan ṭih a duh? Eng ang chi ṭihna nge Pathianin min phût? Engtin nge Pathian ṭihna chu kan hlâwkpui? Hêng zawhnate hi Sâm 34-na sawiho chhunzawm pahin kan ngaihtuah dâwn a ni.
Pathian Kan Ṭih Chhan
3. (a) Pathian ṭih tûra thupêk chu engtin nge i ngaih? (b) Engvângin nge Jehova ṭihtute chu an hlim?
3 Siamtu leh lei leh vâna Rorêltu Chungnungber a nih avângin, Jehova chuan ṭih a phu a. (1 Petera 2:17) Mahse, chutiang ṭihna chu pathian nunrâwng tak nasa taka râpna lam a ni lo. Jehova nihna avânga amah zahna thûk tak a ni zâwk. Amah tihlâwm loh hlauhna a ni bawk a. Hetiang zâwnga Pathian ṭihna hi chu a chungnungin mi a chawi kâng a, mi tilunghnualtu emaw, tithlabârtu emaw a ni lo. “Fak tlâk Pathian,” a nih loh leh Pathian hlim Jehova chuan a mihring siamte hlim taka an awm chu a duh a ni. (1 Timothea 1:10, 11) Mahse, hlim thei tûr chuan Pathian thil phûtte mila kan nun a ngai a. Mi tam tak tân chuan Pathian thil phûtte mila nung tûr chuan nunphung thlâk a ngai hial a ni. Chutianga inthlâkthlengna siamtute chuan fakna hla phuahtu Davida thu: “Aw, LALPA ṭhatzia chu tem chhin teh rêng u: amaha rinna nghat mi chu a eng a thâwl e. Aw, a mi thianghlimte u, LALPA chu ṭih rawh u: amah ṭihtute tân chuan tlâkchhamna rêng rêng a awm si lo,” tih a dikzia chu an tawng a ni. (Sâm 34:8, 9) Pathian nêna inlaichînna ṭha tak an neih avângin, Jehova ṭihtu apiang chuan hlutna tluantling nei thil engmah tlâkchham an nei lo.
4. Eng ang intiamkamna nge Davida leh Isua’n an siam?
4 Davida hun laia hman a nih angin, ani chuan a mite chu “mi thianghlimte” tiin a ko tih chhinchhiah ang che. Anni chu Pathian hnam thianghlimte zînga mi an ni a. Davida zui tûrin an nun pawh an thâp hial. Lal Saula lak ata râl tlân an ni chung pawhin, Davida chuan an mamawh châkkhai zawng zawng chu Jehova’n a pe dâwn tih a ring tlat a. Heti hian a ziak a ni: “Sakeibaknei vânglaite chu an tlachhamin an ril a ṭâm ṭhîn a: LALPA zawngtute erawh chuan thil ṭha rêng rêng an tlachham lo vang,” tiin. (Sâm 34:10) Isua chuan chutiang bawk chuan a hnungzuitute hnênah intiamkamna a siam a ni.—Matthaia 6:33.
5. (a) Isua zuitu tam takte chu eng ang mi nge an nih? (b) Hlauhna, a nih loh leh ṭihna chungchângah Isua’n eng zilhna nge a pêk?
5 Isua thusawi ngaithlatu tam takte chu Juda mi hnuaihnung, mi tlâwm takte an ni a. Chuvângin, Isua chuan “vêngtu nei lo berâmte anga hrehawm leh darha an awm avângin a khawngaih ta êm êm a.” (Matthaia 9:36) Chutiang mi hnuaihnungte chuan Isua zui tûrin huaisenna an nei ang em? Huaisen tûr chuan mihring hlauhna ni lovin, Jehova ṭih an zir tûr a ni. Isua chuan: “Taksa tihlum a, chu mi hnua engmah dang ti leh thei tawh lote chu hlau suh ang che u. Amaherawhchu tunge in hlauh tûr ka hrilh lâwk ang che u: a tihhlum hnu pawha Gehena-a paih theihna thu neia chu hlau rawh u; a ni, ka hrilh a che u, amah mawlh chu hlau rawh u. Chawngzawng panga dâr tangka pahnihah an hralh ṭhîn lo vem ni? nimahsela an zînga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni,” a ti a.—Luka 12:4-7.
6. (a) Isua ṭawngkam engin nge Kristiante chu tichak? (b) Engvângin nge Isua chu Pathian ṭihna lantîrna kawngah entawn tlâk ber a nih?
6 Jehova ṭihtute chuan an hmêlmate’n Pathian rawng bâwl lo tûra an nêksâwr hian, Isua thusawi: “Mite hmaa mi ṭan apiang Pathian vântirhkohte hmaah mihring Fapain a ṭan ve ang. Nimahsela mite hmaa mi phat chu Pathian vântirhkohte hmaah phat a ni ve ang,” tih chu an hre chhuak ṭhîn. (Luka 12:8, 9) Hêng thute hian a bîk takin biakna dik khuahkhirhna rama awm Kristiante chu a tichak zual a. Chûng mite chuan remhre takin Kristian inkhâwmnaah leh an vântlâng rawngbâwlnaahte Jehova chu an fak zawm zêl a ni. (Tirhkohte 5:29) Isua chuan ‘Pathian ṭihna’ kawngah entawn tûr ṭha ber a siam a. (Hebrai 5:7) A chungchângah, hrilh lâwk Thu chuan: “LALPA ṭihna thlarau chu—a chungah a fu ang: tichuan a lâwmna chu LALPA ṭihnaah a ni ang,” tiin a lo sawi lâwk a ni. (Isaia 11:2, 3) Chuvângin, Isua chu Pathian ṭihna hlutna min zirtîr tûrin a tling hle a ni.
7. (a) Engtin nge Kristiante chuan Davida tihchhuah ang sâwmna chu an pawm a tih theih? (b) Engtin nge nu leh pate chuan Davida entîrna ṭha tak chu an entawn theih?
7 Isua entîrna zui a, a zirtîrna zâwmtu zawng zawngte chuan, Davida tihchhuah ang sâwmna chu an pawm a tih theih a ni: “Hawh u, naupangte u, ka thu ngaithla rawh u: LALPA ṭih dân ka lo zirtîr ang che u,” tia sâwmna chu. (Sâm 34:11) Davida mite chuan ani chu an hruaitu anga ngaisâng taka an en avângin, anni chu “naupangte” tia a ko hi a inâwm hle a. Davida chuan a hnungzuitute chu Pathian duhsakna an dawn theih nân Pathian ṭih dân a zirtîr a ni. Chu chu Kristian nu leh pate tân entawn tûr ṭha tak a va ni êm! Jehova chuan nu leh pate hnênah an fate chu ‘Lalpa thununnaah leh zilhnaa enkawl’ tûrin thuneihna a pe a. (Ephesi 6:4) Nu leh pate chuan nî tina an fate thlarau lam thil sawipuiin leh hunbi neia Bible zirpuiin, naupangte chu Jehova ṭihna nun neia hlim taka awm tûrin an ṭanpui a ni.—Deuteronomy 6:6, 7.
Pathian Ṭihna Nunpui Dân
8, 9. (a) Engin nge Pathian ṭihna nun kawng chu duhawm tak nih tîr? (b) Kan lei vên ṭhatna kawngah eng nge tel?
8 Kan sawi tâk ang khân, Jehova ṭihna chuan kan hlimna a la bo lo va. Davida chuan: “Ṭhatna a hmuh theih nâna, nunna duha dam rei ngaina mi chu tunge ni?,” tiin a zâwt a ni. (Sâm 34:12) Jehova ṭih chu dam reina leh ṭhatna hmuhna a ni tih a chiang hle. Mahse, “Pathian ka ṭih,” tih mai chu a awlsam hle a. Kan nungchanga târ lan erawh a awlsam lo hle thung. Chuvângin, Davida chuan Pathian ṭihna kan lantîr theih dân min hrilhfiah chhunzawm zêl a ni.
9 “I lei chu sual lakah vêng ṭha la, i hmui chu tihderna thu sawi lo tûrin vêng ṭha rawh.” (Sâm 34:13) Tirhkoh Petera’n Kristiante chu unau inhmangaihnaa incheibâwl tawn tûr an ni tih zilhna thu a sawi zawhah, Sâm 34-na heti lai thu hi la chhâwng tûra Pathian thlarauva thâwk khum a ni a. (1 Petera 3:8-12) Kan lei sual laka vêng ṭha tih chu mi rêlna thu ṭha lo kan thehdarh lo tihna a ni. Mite kan biak rêng rêng hian, anmahni tihchak chu kan tum zâwk ang. Chu bâkah, huaisen taka thudik tak sawi chu kan tum bawk ang.—Ephesi 4:25, 29, 31; Jakoba 5:16.
10. (a) Thil sual kalsan tih awmzia chu hrilhfiah rawh. (b) Thil ṭha tihah hian engte nge tel?
10 “Sual kalsan la, thil ṭha ti rawh; remna zawng la, a ûmin ûm rawh.” (Sâm 34:14) Pathian duh loh thil nungchang bawlhhlawhna te, zahmawh lam thuziak leh mi lem te, rûk rûkte, thlarau zâwlna te, tharum thawhna te, zu ruihna te, leh damdawi ngawlveina te chu kan pumpelh a. Chutiang thil tenawmte târ lanna intihhlimnate pawh chu kan hnâwl bawk. (Ephesi 5:10-12) Chu aimahin, kan hun chu thil ṭha tih nân kan hmang a. Thil ṭha ber kan thawh theih chu Lalram thu hrilhna leh zirtîr siamnaa tel leh mi dangte chhandam ni tûra ṭanpui hi a ni. (Matthaia 24:14; 28:19, 20) Thil ṭha tihah chuan Kristian inkhâwm atâna inbuatsaih te, khawvêl pum rawngbâwlna atâna thawhlâwm thawh te, kan Kingdom Hall enkawl te, Kristian retheite ṭanpuite pawh a tel bawk a ni.
11. (a) Engtin nge Davida chuan amah ngeiin a sawi remna chungchâng chu a nunpui? (b) Kohhrana ‘remna ûm’ tûrin eng nge i tih theih?
11 Davida chuan remna ûmna kawngah entawn tûr ṭha min hnutchhiah a ni. Ṭum hnih lai chu Saula thah theihna hun remchâng a nei a. A ṭum hnih chuan Davida chuan tharum a thawh lo, a hnuah chuan remna neih leh inbeisei chungin zah takin lalber chu a bia a ni. (1 Samuela 24:8-11; 26:17-20) Dinhmun hian kohhran remna a tihderthâwn hunah eng nge tih theih a nih? ‘Remna zawngin, a ûmin kan ûm’ tûr a ni. Chutichuan, keimahni leh rinpui pakhat inkârah inlaichînna ṭha lo a awm tih kan hriat hian, Isua thurâwn: ‘I unau rem zet rawh,’ tih chu kan zâwm a. A hnuah chuan, biakna dik thiltih dangte chu kan ti ṭhîn a ni.—Matthaia 5:23, 24; Ephesi 4:26.
Pathian Ṭihna Chuan Lâwmman Tam Tak A Nei
12, 13. (a) Pathian ṭihtute chuan eng hlâwkna nge tûnah an dawn? (b) Eng lâwmman ropui tak nge betu rinawmte’n reilote hnuah an dawn ang?
12 “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn.” (Sâm 34:15) Pathianin Davida a dâwr dân chanchinte chuan hêng thute dikzia hi a finfiah a ni. Tûn laiah hian, Jehova’n min hmu reng tih kan hriat avângin hlimna nasa tak leh chhûngrila thlamuanna chu kan nei a. Ani chuan kan mamawh min pe reng ang a, lungngaihna nasa tak kan tawh hunah pawh kan mamawh chu min pe zêl dâwn tih kan ring tlat a ni. Betu dik zawng zawngte chuan sawi lâwk angin Magoga rama Goga beihna leh “LALPA ni ropui tak leh râpthlâk tak” chu an tâwk thuai dâwn tih kan hria a. (Joela 2:11, 31; Ezekiela 38:14-18, 21-23) Chutih hunah chuan eng ang dinhmun pawh tâwk dâwn ila, Davida thu: “Mi felte chu an au va, tin, LALPA chuan a lo hria a, an manganna zawng zawngah chuan a chhan chhuak ta a,” tih chu kan chungah a lo thleng dik ang.—Sâm 34:17.
13 Chutih huna Jehova’n a hming ropui tak a chawimawi hmuh chu a va phûrawm dâwn êm! Kan thinlung chu tûn hma zawng aiin mak tihnain a khat ang a, dodâltu zawng zawngte chuan zahthlâk taka tihboralna an tâwk ang. “LALPA hmêl chuan thil tisualtute chu a do ṭhîn, anmahni hriat rengna chu lei ata tiboral tûrin.” (Sâm 34:16) Chu Pathian khawvêl thara chhan chhuahna ropui tak tawn chu lâwmman ropui tak a va ni dâwn êm!
Chhel Tûra Min Ṭanpuitu Thutiamte
14. Harsatna tâwk mah ila, engin nge chhel tûrin min ṭanpui ang?
14 Chu mi lo thlen hma chuan, khawvêl sual tak leh chhe taka Jehova thu âwih zêl tûrin chhelna neih a ngai a. Pathian ṭihna chuan thuawihna nei tûrin nasa takin min ṭanpui a ni. Kan awmna hun khirh tak avângin, Jehova chhiahhlawh ṭhenkhat chuan anmahni nasa taka tilungngaitu leh tilunghnualtu harsatna tâwpkhâwkte chu an tâwk a. Amaherawhchu, Jehova an rinchhan phawt chuan, ani chuan chhel tûrin a ṭanpui dawn tih an ring tlat thei a ni. Davida thute chuan nasa takin min thlamuan a ni: “LALPA chuan thinlunga lungchhiate chu a hnaih ṭhîn a, rilrua innchhîr apiangte chu a chhandam ṭhîn.” (Sâm 34:18) Phûrawm takin Davida chuan: “Mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” a tih belh a ni. (Sâm 34:19) Eng ang harsatna pawhin min tlâk buak mah sela, Jehova chu min chhan chhuak tûrin a chak tâwk a ni.
15, 16. (a) Davida chuan Sâm 34-na a phuah hnu lawkah eng nge a hriat? (b) Engin nge fiahna hnuaia chhel tûrin min ṭanpui ang?
15 Davida chuan Sâm 34-na a phuah hnu lawkah, Saula’n Nob khawpuia awmte leh puithiam zawng zawng deuhthaw chu a that fai vek tih a hria a. Hetianga Saula chêttîrtu chu Nob khua a va tlawh vâng a nih avângin Davida chu a va lungngai dâwn êm! (1 Samuela 22:13, 18-21) Ani chuan Jehova ṭanpuina a dîl ngei ang a, nakina lo thleng tûr “mi felte” thawhleh beiseina chuan nasa takin a thlamuan ngei ang.—Tirhkohte 24:15.
16 Tûn laiah hian, thawhleh beiseina chuan keini pawh min tichak a. Kan hmêlmate tih theih eng mah hian chatuana chhiatna min thlen thei lo tih kan hria a ni. (Matthaia 10:28) Davida chuan chutiang tho rin tlatna chu: “[Mi fel] ruh zawng zawng a vawng ṭha a, pakhat mah tihtliah a ni lo,” tia a sawi hian a lo sawi chhuak tawh a ni. (Sâm 34:20) He mi châng hian Isuaah thlen famkimna tak tak a nei a. Isua chu nunrâwng taka tihhlum mah ni se, a ruh pakhat mah “tihtliah” a ni lo. (Johana 19:36) A hmanna dangah chuan, Sâm 34:20 hian hriak thih Kristiante leh an ṭhian “berâm dang” hian eng ang fiahna pawh tâwk sela, chatuana chhiatna an tâwk ngai lo vang tih min tiam a. An ruhte chu tihtliah a ni ngai dâwn lo a tih theih a ni.—Johana 10:16.
17. Inchhîr lova Jehova mite haw zêltute chuan an hmaah eng chhiatna nge tawn tûr an neih?
17 Mi suaksualte tân erawh dinhmun chu a dang daih thung. Thil ṭha lo an chîn rah chu an seng thuai ang. “Thil ṭha lovin mi suaksualte chu a tihlum ang a: mi fel hawtute chuan thiam loh an chang ang.” (Sâm 34:21) Pathian mi dodâl zêl apiangte chuan chhiatna tâwpkhâwk chu an tâwk ang. Isua Krista a lo inlâr hunah, anni chuan “hrem an tuar ang . . . chatuana boralna chu.”—2 Thessalonika 1:9, 10.
18. Eng kawngin nge “mipui tam tak” chu chhan chhuah an nih tawh a, nakinah eng thil nge an tawn ang?
18 Davida fakna hla chu he thutiam duhawm tak hian tihtâwp a ni: “LALPA chuan a chhiahhlawhte nunna chu a tlan ṭhîn a: amaha rinna nghatte chu pakhat mah thiam loh chang an awm lo vang,” tih hian. (Sâm 34:22) Kum 40 a lal chhûng tâwp dâwn hnaih lamah, Lal Davida chuan: ‘LALPA chuan manganna zawng zawngah ka nunna a humhim,’ tih a sawi a. (1 Lalte 1:29) Davida angin, Jehova ṭihtute chuan rei lo têah sual avânga inthiam lohna leh an hrehawm tawrhna ata humhim an nih dân chu hlim takin an thlîr lêt thei ang. Hriak thih Kristian zawng zawng deuhthaw chuan an vân lam lâwmman chu an dawng tawh a. Hnam tin aṭanga lo chhuak “mipui tam tak” chuan Isua unau a la bângte chu Pathian rawngbâwlna kawngah an va fina, chuvâng chuan Jehova hmaah dinhmun thianghlim an nei a ni. Hei hi Isua thisen chhuakin a chhan chhuah theihna an rin vâng a ni a. Lo thleng thuai tûr Krista Kum Sâng Rorêl hun chhûng hian, tlanna hlutna chu an chungah hman pumhlûm a ni ang a, ṭha famkima siam an ni ang.—Thu Puan 7:9, 14, 17; 21:3-5.
19. “Mipui tam tak” zînga mite’n eng tih nge an tum tlat?
19 Pathian chibai bûktu “mipui tam tak” chungah engvângin nge hêng malsâwmna zawng zawngte hi a lo thlen ang? Jehova ṭih zêl an tum tlat a, zahna thûk tak nêna a rawng an bâwl bawk a, zah taka a thu an âwih bawk avângin a ni. Dik takin, Jehova ṭihna chuan tûna kan nun chu hlimawm takah a siam a, Pathian khawvêl thara chatuana nunna, ‘nunna tak tak chu vuan nghet’ tûrin min ṭanpui bawk a ni.—1 Timothea 6:12, 18, 19; Thu Puan 15:3, 4. (w07 3/1)
I Hria Em?
• Engvângin nge Pathian kan ṭih ang a, Pathian ṭih tih awmzia chu eng nge ni?
• Pathian ṭihna chuan kan nungchangah eng nge nghawng a neih ang?
• Pathian ṭihna aṭangin eng ang hlâwkna nge lo awm?
• Eng thutiamin nge chhel tûra min ṭanpui?
[Zirlai Atâna Zawhnate]
[Phêk 28-naa milem]
Jehova ṭihtute chuan khap behna hnuaiah remhriatna an hmang
[Phêk 30-naa milem]
Kan ṭhenawmte hnêna thil ṭha tih theih dân kawng ṭha ber chu an hnêna Lalram chanchin ṭha hrilh hi a ni