Jehova Hming Chu I Chawimawi Tlâng Ang U

“Aw, LALPA chu mi fakpui ula, a hming chu i chawimawi tlâng ang u.”​—⁠SAM 34:⁠3.

1. Isua chuan a lei lam rawngbâwl chhûngin entawn tûr ṭha eng nge min hnutchhiah?

NISAN 14, C.E. 33 khân, Jerusalem pindan chungnungah Isua leh a tirhkohte chu Jehova fakin an zai a. (Matthaia 26:30) Chu chu Isua a tirhkohte nêna an zaihona hnuhnûng ber tûr a ni. Amaherawhchu, a tirhkohte nêna an inhmuhkhâwmna fakna hla saa tihtâwp a ni chu a inâwm hle. Isua chuan a leilam rawngbâwlna a inṭan aṭanga a tâwp thlengin a Pa chu a chawimawi a, A hming chu ṭhahnemngai takin a hriattîr bawk. (Matthaia 4:10; 6:9; 22:​37, 38; Johana 12:28; 17:⁠6) Dik takin, ani chuan fakna hla phuahtu sâwmna thu chu a sawi chhâwng a ni: “Aw, LALPA chu mi fakpui ula, a hming chu i chawimawi tlâng ang u,” tih chu. (Sâm 34:⁠3) Kan tân entawn tûr ṭha a va ni êm!

2, 3. (a) Engtin nge Sâm 34 hi hrilh lâwkna a ni tih kan hriat theih? (b) He thuziak leh a dawta mi-ah eng nge kan ngaihtuah ang?

² Tirhkoh Johana chuan Isua ruala fakna hla an sak hnu dârkâr rei lo têah thil danglam tak thleng chu a hmu a. A Pu leh mi sual pahnihte nghaisakna bana an thi lai chu a hmu a. Rom sipaite chuan mi sual pahnihte chu an thih hma nân an kête an tihtliahsak a. Amaherawhchu, Isua kete erawh an titliak ve lo tih Johana chuan a sawi. Sipaite’n Isua an rawn pan hnaih chuan, ani chu a lo thi fel dêr tawh a. Johana chuan a Chanchin Ṭha ziahah chu thilthleng chu Sâm 34-na châng dang: “A ruh pakhat mah tihtliah a ni lo vang,” tih thlen famkimna niin a sawi a ni.​—⁠Johana 19:​32-36; Sâm 34:⁠20.

³ Sâm 34-naah hian Kristiante ngaihven zâwng thu dang tam tak pawh a la awm a. Chuvângin, he thuziak leh a dawta mi-ah hian, he fakna hla a phuah laia Davida dinhmun leh a hla thu mi tichak thei takte chu kan ngaihtuah ang.

Saula Hnên Ata Davida Tlân Chhiatna

4. (a) Engvângin nge Davida chu nakina Israel lal atâna hriak thih a nih? (b) Engvângin nge Saula chuan Davida chu a ‘ngainat’ hle?

⁴ Davida naupan lai chuan Saula chu Israel lal a ni reng tawh a. Mahse, Saula chuan thu a âwih tâk loh avângin, Jehova duhsakna a hloh ta a ni. Chuvângin, zâwlnei Samuela chuan a hnênah: “Vawiin aṭang hian LALPAN Israel ram hi a chhuhsak ta chia, i aia ṭha zâwk i ṭhenawm a pe ta a ni,” a ti a. (1 Samuela 15:28) A hnuah, Jehova chuan Samuela chu a dawta Israel lal atân Jesaia fapa naupang ber Davida chu hriak thih tûrin a tîr ta a ni. Chutih lai chuan, Pathian thlarau a chân avângin, Lal Saula chu a lungngai hle a. Rimawi tum thiam tak, Davida chu Gibea-ah lal rawng bâwl tûra hruai a ni a, Davida rimawi chuan Saula chu a tiharh ṭhîn a, Saula chuan ani chu “a lo ngaina hle mai” a ni.​—⁠1 Samuela 16:​11, 13, 21, 23.

5. Engvângin nge Davida chunga Saula rilru put hmang chu a inthlâk a, Davida tân eng tih nge ngai?

⁵ Hun a liam zêl a, Jehova chuan Davida a awmpui tih a lo lang a. Jehova chuan Davida chu Philistia mi hrawl Goliatha a beihnaah a ṭanpuiin, sipai thiam tak leh hmingthang tak ni tûrin a ṭanpui bawk. Amaherawhchu, Davida chunga Jehova malsâwmna chuan Saula chu thîkna thinlung a neihtîr a, Davida chu a haw ṭan ta mai a. Ṭum hnih lai chu Davida’n Saula hmaa a ṭingṭang a tum laiin, lalber chuan feiin a khawh ta mai a. A ṭum hnihin Davida chuan fei chu a lo pumpelh thei a. Saula’n a vawi thumna atâna thah a tum chuan, nakina Israel lal tûr chuan a nun chhanhim nân a tlânchhiat a ngai a ni tih a hre ta a. A tâwpah chuan, Saula’n mana thah a tum reng avângin, Davida chuan Israel ram pâwna inhumhimna zawn chu a tum nghet ta a ni.​—⁠1 Samuela 18:11; 19:​9, 10.

6. Engvângin nge Saula chuan Nob khaw mite tihhlum vek thu a pêk?

 ⁶ Davida’n Israel ramri lam a panna kawngah, Nob khawpui chu a va thleng a, chutah chuan Jehova biak bûk a awm a. Davida chu a tlân chhiatna lamah tlangvâl rual chuan an vêng a, ani chuan amah leh a ṭhiante tân ei tûr a zawng a ni. Saula chuan puithiam lalin Davida leh a mite tân ei tûr a pein, Goliatha thi tawh hnên aṭanga Davida lâk khandaihpui chu a pe bawk tih a lo hria a. Thinur takin Saula chuan puithiam 85-te pawh tiamin khawpuia chêng zawng zawngte chu a tihlum ta vek mai a ni.​—⁠1 Samuela 21:​1, 2; 22:​12, 13, 18, 19; Matthaia 12:​3, 4.

Thihna Pumpelhna Dang Chu

7. Engvângin nge Gath chu Davida tân bihrûkna hmun him a nih loh?

⁷ Nob aṭang chuan Davida chu khawthlang lam mêl 25 vêla hlâa awm Philistia ram chhûngah chuan a lût a, Goliatha awmna Gath khaw Lal Akisa hnênah a va biru a. Davida chuan Gath khua chu Saula’n a zawn lohna tûr hmun a nih a ring pawh a ni thei ang. Mahse, rei lo têah chuan Gath lal chhiahhlawhte chuan Davida nihna chu an hre nghâl thuai a. Davida chuan a nihna an hria tih a han hriat chuan, “Gath lal Akisa chu a hlau ta hle mai a,” ni.​—⁠1 Samuela 21:​10-12.

8. (a) Sâm 56-nain Gath khuaa Davida thiltawn eng nge min hrilh? (b) Engtin nge Davida chuan a thih ṭêpna dang a pumpelh leh?

⁸ Philistia mite chuan Davida chu an man a. Davida’n Jehova hnêna: “Ka mittuite hi i savun pengah chuan thun ang che,” tia a ngenna fakna hla urhsûn tak chu, chutih hun laia a phuah a ni thei ngei ang. (Sâm 56:8 leh a chunga thuziak) Chutiang chuan, Jehova chuan a hrehawmzia chu a theihnghilh lo vang a, amah a ngaihsakin a vênghim zâwk ang tih a rin tlatna chu a târ lang a ni. Davida chuan Philistia lal bum dân tûr pawh a ngaihtuah chhuak bawk a. A inti â der ta chiam mai a. Chu chu a hmuhin, Lal Akisa chuan a chhiahhlawhte chu a hnêna “mi â” an rawn hruai avângin a hau va. Jehova chuan Davida thil tih dân chu mal a sâwm tih a chiang hle. Davida chu khawpui ata hnawh chhuah a ni a, tichuan, a thihna tûr chu a pumpelh leh ta hrâm a ni.​—⁠1 Samuela 21:​13-15.

9, 10. Engvângin nge Davida chuan Sâm 34-na hi a ziah a, chu fakna hla a phuah lai chuan tute nge Davida rilruah awm mai thei?

⁹ Bible chuan Davida thlâwptute chu Gath khuaa an luh thu emaw, a kiang hnaia awm Israel thingtlâng khua aṭanga amah an vên thu emaw engmah a sawi lang lo. Engpawh chu lo ni ta se, Davida’n Jehova chhan chhuah dân a han hrilh chuan an hlim tlâng leh ngei ang. Chu thilthleng chu Sâm 34-na a chunga thuziakin a târ lan angin, chu fakna hla phuah chhan chu a ni. A châng hmasa pasarihah, Davida chuan chhan chhuaha a awm avângin Pathian a fak a, Jehova chu A mite Chhanhimtu Ropui anga chawimawi tûrin a ṭhuih hruaite a sâwm bawk a ni.​—⁠Sâm 34:​3, 4, 7.

¹⁰ Davida leh a mite chu Gath khawchhak lam mêl sâwm vêl, Israel tlâng rama awm Adullam pûkah chuan an biru a. Chutah chuan, Lal Saula rorêlna hnuaia lungawi lo Israel mite chu a hnênah an rawn lût a ni. (1 Samuela 22:​1, 2) Davida’n Sâm 34:​8-22 a phuah lai chuan chutiang mite chu a rilruah an awm a nih ngei a rinawm. Chûng Bible chânga thu hriattîrte chu vawiina kan tân pawh a pawimawh a, chu fakna hla mawi tak chipchiar taka sawihona chu kan hlâwkpui ngei ang.

Davida Thil Tih Châk Ber Chu I Ṭâwmpui Em?

11, 12. Jehova fak reng chhan tûr eng nge kan neih?

¹¹ “Englai pawhin LALPA chu ka fak ang a: amah fakna chu ka kâah a chhuak fo vang.” (Sâm 34:⁠1) Khaw chhûng aṭanga hnawh chhuah a nih avângin, Davida chuan ei leh in tûr a lungkham ngei ang; mahse, hêng thute’n a târ lan angin, a nî tin mamawh hian Jehova fak a tumna chu a la bo chuang lo. Harsatna kan tawh hun atân entawn tûr ṭha a va ni tak êm! School kan kal emaw, hna kan thawk emaw, Kristianpuite nên kan awm emaw, a nih loh leh rawngbâwlnaah kan tel emaw pawh ni se, kan thil châk ber chu Jehova fak hi a ni tûr a ni. Jehova kan fak chhan tur tam takte hi han ngaihtuah teh! Entîr nân, Jehova kut chhuak mak danglam takte hmuh chhuah leh hlimpuina hian tâwp chin a nei lo va. Tin, a inawpna pâwl lei lam pêng hmanga a thil tihhlawhtlinte hi han ngaihtuah teh! Jehova chuan tûn laia mi rinawmte chu ṭha famkim an ni lo chung  pawhin ropui takin a hmang a. Pathian thil siamte leh a mite hmanga a hnathawhte chu khawvêlin pathian anga an biak mite hnathawh nên eng anga khaikhin theih nge ni? “Aw LALPA, pathiante zîngah nang ang rêng rêng an awm lo va, i thiltihte ang hi thiltih rêng rêng a awm hek lo,” tih ziaktu Davida ngaih dân chu i ṭâwmpui ve lovem ni?​—⁠Sâm 86:⁠8.

¹² Davida angin, Jehova chu a hnathawh ṭha chungchuangte avângin fak lo thei lo niin kan inhria a. Chu bâkah, Pathian Ram chu Davida Rochungtu nghet, Isua Krista kutah a awm tawh tih hriat chu kan phûr hle a ni. (Thu Puan 11:15) Hemi awmzia chu he khawvêl tâwpna ni a hnai tawh tihna a ni a. Mihring tlûklehdingawn ruk chuangte chatuan hmabâk chu a thim hle tihna a nih chu. Tûn ang tluk rêng hian Pathian Ram chungchâng leh mihringte tâna a rawn tihsak tûrte hrilhhriat leh kan ruala Jehova fak tûra ṭanpui an ngaih hun hi a la awm ngai lo. Chuvângin, kan nuna kan dah pawimawh ber tûr chu “ram chanchin ṭha” hi a tlai luat hmaa pawm tûra mite fuih theihna hun remchâng kan neih apiang hman ṭangkai hi a ni tûr a ni.​—⁠Matthaia 24:⁠14.

13. (a) Davida chuan tunge a chhuan a, eng ang mite’n nge chhâng lêt? (b) Engtin nge tûn laia thuhnuairawlhte chu Kristian kohhran lama hîp an nih?

¹³ “Ka nunna hian LALPA chu a chhuang ang a: thuhnuairawlhte chuan chu chu an hria ang a, an lâwm ang.” (Sâm 34:⁠2) Hetah hian Davida chuan ama thil tihhlawhtlin engmah a chhuang lo. Entîr nân, Gath lal a bum dân chu a chhuang lo va. Gath-a a awm laiin Jehova chuan amah chu a vênghim tih leh Jehova ṭanpuinain a tlân chhuak thei a ni tih a inhria a ni. (Thufingte 21:⁠1) Chuvângin, Davida chuan amah inchhuang lovin, Jehova a chhuang zâwk a. He mi avâng hian, thuhnuairawlhte chu Jehova lama hîpin an awm a. Chutiang chuan, Isua pawhin Jehova hming chu a chawimawi reng a, chu chuan thuhnuairawlhte leh zirtîrna dawng theite chu A lamah a hîp khâwm a ni. Tûn laiah hian, hnam tina mi thuhnuairawlhte chu Krista Lû a nihna khawvêl pum huap hriak thih kohhran lamah hîpin an awm a. (Kolossa 1:18) Pathian chhiahhlawh inngaitlâwm takte’n Pathian hming an chawimawi an han hriat leh Pathian thlarau thianghlimin hre thiam tûra a ṭanpui Bible thuchahte an han hriat hian, chûng chuan mi thuhnuairawlhte  thinlung chu a khawih hle a ni.​—⁠Johana 6:44; Tirhkohte 16:⁠14.

Inkhâwmte Hian Kan Rinna A Tichak

14. (a) Davida chu amah chauhva Jehova faknaah a lungawi em? (b) Biakna atâna inkhâwmna kawngah Isua’n entawn tûr eng nge min hnutchhiah?

¹⁴ “Aw, LALPA chu mi fakpui ula, a hming chu i chawimawi tlâng ang u.” (Sâm 34:⁠3) Davida chu mimala Jehova a faknaah a lungawi mai lo. Pathian hming chawimawipui tûrin a ṭhiante chu a sâwm a ni. Chutiang bawkin, Davida Ropui Zâwk Isua Krista chuan vântlâng hma​—⁠tualchhûng inkhâwmna inah te, Jerusalema Pathian biak ina kût hman hunah te, leh a hnungzuitute nêna inkawm hunah te Jehova fak chu nuam a ti a ni. (Luka 2:49; 4:​16-19; 10:21; Johana 18:20) A bîk takin, ‘ni chu lo hnai telh telha kan hriatin’ kan rinpuite nêna hun remchâng neih apianga Jehova fakna kawnga Isua entawn chu chanvo ropui leh hlimawm tak a va ni em!​—⁠Hebrai 10:​24, 25.

15. (a) Davida thiltawn chuan a ṭhuihhruaite chungah eng nghawng nge a neih? (b) Engtin nge kan inkhâwmna chu kan hlâwkpui?

¹⁵ “LALPA chu ka zawng a, tin, ani chuan mi chhâng a, ka hlauhzâwng zawng zawng lakah chuan mi chhanhim ta a.” (Sâm 34:⁠4) He thiltawn hi Davida tân chuan a pawimawh hle. Chuvângin, heti hian a sawi zawm a ni: “He mi rethei hi a au va, tin, LALPA chuan a hria a, a manganna zawng zawngah chuan a chhan chhuak ta a,” tiin. (Sâm 34:⁠6) Rinpuite nêna kan inhmuhkhâwm hian, dinhmun khirh tak hnuaia Jehova min ṭanpui dân mi tichak thei tak thiltawnte sawi chhuah theihna hun tam tak kan nei thei a. Chu chuan Davida thusawiin amah thlâwptute a tichak ang bawkin, kan rinpuite rinna chu a tichak thei a ni. Davida chungchângah chuan, a ṭhiante chuan Jehova “an en a, tin, an lo êng ta a: an hmêlte chu engtikah mah a zak lo vang.” (Sâm 34:⁠5) Lal Saula hnên ata tlânchhe mah sela, an zak chuang lo. Pathianin Davida a ṭanpui tih an ring tlat a, an hmêlte chu a êng a ni. Chutiang bawkin, tuina nei tharte leh hun rei tak ata Kristian dik lo ni tawhte chuan Jehova ṭanpuina chu an beisei a. Mahni ngeia Pathian ṭanpuina an tawn avângin, an hmêl êng chuan rinawm reng an tumzia a lantîr a ni.

Vântirhkoh Ṭanpuina Avânga Lâwmna

16. Engtin nge Jehova chuan a vântirhkohte chu min chhanhim nân a hman?

¹⁶ “Amah ṭihtute chu, an vêlah LALPA vântirhkoh chuan a awm chilh a, a chhanhim ṭhîn.” (Sâm 34:⁠7) Davida chuan Jehova chhanhimna chu ama chungah chauh thleng tûrah a ruat lo. Ani chu Jehova hriak thih, nakina Israel lal tûr zawng a ni ngei mai; mahse, Jehova chuan a vântirhkohte chu an challang emaw, challang lo emaw pawh ni se, mi rinawm zawng zawng vênhim nân a hmang tih a hria a ni. Kan tûn lai hunah pawh hian, betu dikte chuan Jehova pêk vênhimna chu an tawng thova. German rama Nazi hrân hun lai khân​—⁠leh Angola, Malawi, Mozambique, leh ram dang tam takah pawh​—⁠sawrkâr thuneitute chuan Jehova Thuhretute tihchimih tumin beihpui an thlâk tawh ṭhîn a. Mahse, an thawhrimna chu a thlâwn mai a ni. Chûng rama Jehova Thuhretute chu Jehova hming fak tlângin an duah hluah hluah zâwk a ni. Engvângin nge? A chhan chu Jehova’n a vântirhkoh thianghlimte chu a mite vênhim nân leh kaihhruai nâna a hman vâng a ni.​—⁠Hebrai 1:⁠14.

17. Eng kawngin nge Pathian vântirhkohte chuan min ṭanpui?

¹⁷ Chu bâkah, Jehova vântirhkohte chuan Jehova mite zînga tlûkna awmtîrtute paih chhuah a nih theih nân thil awm dân an sîksâwi thei a. (Matthaia 13:41; 18:​6, 10) A hun laiin kan lo hre lo ta pawh ni se, vântirhkohte chuan Pathian rawng kan bâwlna dâl theitu harsatnate chu an paih bovin, Jehova nêna kan inlaichînna tichhe thei thilte lak ata min vênghim a ni. A pawimawh  berah chuan, anni chuan dinhmun hlauhawm tak hnuaia thu hrilhna hmunte pawh tiamin, mi zawng zawng hnêna “chatuan chanchin ṭha” kan hrilhna kawngah min kaihruai a. (Thu Puan 14:⁠6) Vântirhkoh ṭanpuina finfiahna chanchinte chu Jehova Thuhretute chhuah thu leh hlaahte hian târ lan a ni fo va. * Chûng thiltawnte chu thil inang thleng dûn palh anga ngaih atân chuan a tam lulai deuh zawng a ni.

18. (a) Vântirhkoh ṭanpuina dawng tûrin eng nge kan tih ngai? (b) A dawta thuziakah eng nge kan ngaihtuah dâwn?

¹⁸ Vântirhkoh kaihhruaina leh vênhimna hlâwkpui zêl tûr chuan, dodâlna kan tâwk chung pawhin Jehova hming kan chawimawi fo tûr a ni. Pathian vântirhkoh chuan ‘amah [Jehova] ṭihtute chauh a awm chilh’ tih hre reng ang che. Chu chuan eng nge a kawh? Eng nge Pathian ṭihna chu ni a, engtin nge kan neih theih ang? Engvângin nge hmangaihna Pathian chuan amah kan ṭih a duh? Hêng zawhnate hi a dawta thuziakah sawiho a ni ang. (w07 3/1)

[Footnote]

Engtin Nge I Chhân Ang?

• Davida’n a naupan laiin eng fiahna nge a tawh?

• Davida angin, eng nge kan thil tih châk ber chu?

• Kristian inkhâwmte chu engtin nge kan thlîr?

• Engtin nge Jehova chuan a vântirhkohte chu min ṭanpui tûra a hman?

[Zirlai Atâna Zawhnate]

[Phêk 25-naa map]

(A lan dân tûr dik tak hriat nân, a lehkhabu en rawh)

Rama

Gath

Ziklag

Gibea

Nob

Jerusalem

Bethlehem

Adullam

Keila

Hebron

Ziph

Ramhnuai (Hores)

Karmel

Maon

En-gedi

Tuipui Al

[Milem Hawhtîrtu]

Map: Based on maps copyrighted by Pictorial Archive (Near Eastern History) Est. and Survey of Israel

[Phêk 25-naa milem]

Râl tlân a ni chung pawhin, Davida chuan Jehova hming a chawimawi