Chhânna Dik Tak Zawnna

Engtin nge ka hrisêlna ka vawn theih ang?

Kan chhûngkaw nun a hlim lehzualna tûrin eng nge ka tih theih?

Engtin nge ka hna ka chelh reng theih ang?

HENG zawhnate zînga a engemaw tal hi i inzâwt tawh ngai em? A chhânna chhawr tlâk tak i hmu tawh em? Kum tinin hêng zawhnate leh thu pawimawh tak dangte chungchânga thurâwn petu lehkhabu chi hrang hrang 2,000 vêl chu tihchhuah a ni a. Britain ramah ringawt pawh, lehkha chhiartute chuan nuna harsatnate hmachhawn dân chungchânga thurâwn inziahna lehkhabute atân pound maktaduai 80 lai (U.S. $ maktaduai 150 vêl) kum khatah an hmang a ni. United State-ah chuan kum khata mahnia inzirna lehkhabu hralh chhuah man chu Dollar maktaduai 600 vêl a tling pha a. Nî tin nun hmachhawn dân chungchânga thurâwn ṭha zawngtu awmchhun i ni lo tih chu a chiang hle.

Hêng lehkhabu tam taka awm thurâwnte chungchângah, ziaktu pakhat chuan: “Lehkhabu tam tak chuan ziah tawh hnu an ziak chhâwng leh mai a ni,” tiin a sawi. A nihna takah chuan, hêng lehkhabutea thurâwn hmuh tam tak hi khawvêla lehkhabu upa berte zîng pakhata chuang finna thute ziah chhâwnna mai a ni. Rinhlelhrual lohvin, he lehkhabu hi khawvêla lehkhabu semchhuah tam ber a ni a. He lehkhabu hi a ṭhenlaite emaw, a bu pumpui emaw chu ṭawng 2,400 vêla lehlin a ni. A vaia belhkhâwm chuan, tlûklehdingawn 4.6 aia tam khawvêl pum puiah chhut chhuah a ni a. Chu lehkhabu chu Bible hi a ni.

Bible chuan: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni,” tiin fiah takin a sawi a. (2 Timothea 3:16) Bible chu mahnia inzirna lehkhabu anga ziak a ni lo tih chu a chiang hle. A thiltum bulpui ber chu mihringte tâna Pathian duhzâwng târ lan hi a ni a. Chuti chung pawh chuan, Bible chuan kan vaia kan tawn ṭheuh harsatnate hmachhawn dân tûr tam tak a sawi tel a, a kawhhmuhna zâwmtute chuan an hlâwkpui ang tih pawh a tiam bawk a ni. (Isaia 48:​17, 18) Nunpui a nih phawt chuan a thurâwnte chu hnam hrang, ze hrang, a nih loh leh lehkha thiam dân inang lo tak takte tân pawh a chhawr tlâk reng a ni. A dawta thuziak hi chhiarin, engvângin nge Bible-in hrisêlna te, chhûngkaw nun te, leh hnathawh chungchâng a sawite hi a chhawr tlâk leh tlâk loh nangmah ngeiin thu tlûkna i insiam loh vang? (w07 4/1)