Hmangaihna Nei Berâm Vêngtute Lakah Intulût Rawh
Hmangaihna Nei Berâm Vêngtute Lakah Intulût Rawh
“In hotute thu âwih ula, an thu thuin awm rawh u.”—HEBRAI 13:17.
1, 2. Eng Bible chângte hian nge Jehova leh Isua chu hmangaihna nei Berâm Vêngtu an nihzia târ lang?
PATHIAN JEHOVA leh a Fapa, Isua Krista te chu hmangaihna nei Berâm Vêngtute an ni a. Isaia chuan: “En teh u, Lalpa PATHIAN chu mi chak tak angin a lo kal dâwn hi; a bân chuan a aiah ro a rêl ang. . . . Ani chuan berâm vêngtu angin a pâwl chu a châwm ang a, berâm note chu a bânin a pawm khâwm ang a, a ângchhûnga dahin a kalpui ang a, no hruai laite chu zawi têin a hruai dial dial ang,” tiin a lo hrilh lâwk a ni.—Isaia 40:10, 11.
2 Chu dinthar lehna hrilh lâwkna chuan B.C.E 537-a Juda a la bângte Judai rama an kîr leh khân thlen famkimna hmasa a nei a. (2 Chronicles 36:22, 23) Chu chu kum 1919-a Kura Ropui zâwk, Isua Krista’n hriak thih a la bângte “Babulon Khaw Ropui” aṭanga a chhuahtîr khân a thleng famkim leh a ni. (Thu Puan 18:2; Isaia 44:28) Ani chu rorêl tûr Jehova “bân” a ni a, berâmte chu pawm khâwmin, duat takin a enkawl a ni. Isua ngei chuan: “Kei zawng berâm vêngtu ṭha ka ni, . . . ka ta ka hria a, ka ta pawhin mi hria a ni,” a ti.—Johana 10:14, 15.
3. Engtin nge Jehova’n a berâmte cheibâwl an nih dân a ngaihsakzia a târ lan?
3 Isaia 40:10, 11-a hrilh lâwkna chuan Jehova’n a mite duat taka a vênzia a sawi uar a. (Sâm 23:1-6) Isua pawhin leia a rawngbâwl chhûng khân a zirtîrte leh mi nâwlpuite chungah duatna thinlung a lantîr a ni. (Matthaia 11:28-30; Marka 6:34) Jehova leh Isua chuan Israel berâm vêngtu, a nih loh leh hruaitu sual tak, an berâmte thlahthlama, dik lo taka cheibâwltute chu an hua a. (Ezekiela 34:2-10; Matthaia 23:3, 4, 15) Jehova chuan heti hian thu a tiam a ni: “Ka berâmte chu ka chhanhim ang a, saseh mai an ni tawh lo vang a, berâmte kâr thu ka rêlsak ang. Tin, an chungah berâmpu pakhat ka dah ang a, ka rawngbâwltu Davida ngei chu; ani chuan anni chu a châwm ang; ani chu an vêngtu a ni ang a, anni chu a châwm ang,” tiin. (Ezekiela 34:22, 23) He tâwpna hunah hian, Davida Ropui zâwk Isua Krista chu Jehova chuan leia A chhiahhlawh zawng zawng, thlarauva hriak thih Kristiante leh “berâm dang” chungah “vêngtu pakhat” atân a ruat a ni.—Johana 10:16.
Kohhran Hnêna Jehova Thilpêkte
4, 5. (a) Jehova’n leia a mite hnênah eng thilpêk hlu tak nge a pêk? (b) Isua’n a kohhran hnênah eng thilpêk nge a pêk?
4 Jehova chuan leia a chhiahhlawhte chungah “vêngtu pakhat”—Isua Krista—chu awmtîrin, Kristian kohhran hnênah thilpêk hlu tak a pe a ni. He thilpêk Hruaitu vâna mi chungchâng hi Isaia 55:4-ah hrilh lâwk a ni: “Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni,” tiin. Hriak thih Kristiante leh “mipui tam tak” chu chi tin te, hnam tin te, mi tin te, leh ṭawng tin te aṭanga lâk khâwm an ni. (Thu Puan 5:9, 10; 7:9) Anni chu “vêngtu pakhat” Isua Krista kaihhruaina hnuaia khawvêl pum huap kohhran, ‘pâwl khata’ din an ni.
5 Isua pawhin leia a kohhran hnênah thilpêk hlu tak chu a pe chhâwng a. Ani chuan Jehova leh amah entawna berâmte duat taka enkawltu a hnuaia berâm vêngtu rinawmte chu a pe a ni. Tirhkoh Paula chuan Ephesi khuaa Kristiante hnêna a lehkha thawnah he thilpêk duhawm tak hi a sawi a ni: “‘Chung lama a han chhoh lai khân mante chu salah a hruai a, mihringte hnênah pawh thilpêkte a pe a.’ . . . Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlim te tihfamkim nân Krista taksa siam ṭha tûrin ṭhenkhatte chu tirhkoh atân te, ṭhenkhatte chu zâwlnei atân te, ṭhenkhatte chu chanchin ṭha hriltu atân te, ṭhenkhatte chu kohhran châwmtu leh zirtîrtu atân te a pe a,” tia ziakin.—Ephesi 4:8, 11-13.
6. Engtin nge upahote zînga mi hriak thih upate chu Thu Puan 1:16, 20-ah târ lan an nih a, upaa ruat berâm dangte chungchângah eng nge sawi theih a nih?
6 Hêng ‘mihringte hnêna thilpêkte’ hi berâmte duat taka vêngtu atâna Jehova leh a Fapa hian thlarau thianghlim kal tlanga an ruat hotute, a nih loh leh upate an ni a. (Tirhkohte 20:28, 29) Atîrah chuan hêng hotu zawng zawngte hi hriak thih Kristian mipa vek an ni. Thu Puan 1:16, 20-ah chuan hêng hriak thih kohhran chhûnga upahote hi Krista thununna entîrtu a ding lama “arsi” emaw, “tirhkoh” emaw anga entîr an ni a. Mahse, he tâwpna hunah hian leia la awm hriak thih hotute hi an tlêm tawlh tawlh avângin, Kristian kohhrana upa a tam zâwkte chu berâm dang zînga mite an ni. Hêngte hi thlarau thianghlim kaihhruaina hnuaia Governing Body aiawhtute ruat an nih avângin, anni pawh hi Berâm Vêngtu Ṭha, Isua Krista ding lama (a nih loh leh, a kaihhruaina hnuaia) awm tia sawi theih an ni. (Isaia 61:5, 6) Kan kohhrana upate hian kohhran Lû, Krista hnuaia an intukluh avângin, kan thlâwp tlat an phû a ni.—Kolossa 1:18.
Thu Awihna leh Intukluhna
7. Kristian hotute laka kan rilru put hmang tûr chungchângah tirhkoh Paula’n eng zilhna thu nge a pêk?
7 Berâm Vêngtu vâna mi, Pathian Jehova leh Isua Krista chuan kohhrana mawhphurhna an pêk an hnuaia berâm vêngtute thu kan âwih a, an laka kan intukluh chu an beisei a. (1 Petera 5:5) Thlarau thâwk khuma awmin, tirhkoh Paula chuan: “In hotu, Pathian thu lo hrilhtute che u chu hre reng ula, an awm dâna thil chhuak chu ngaihtuahin an rin dân zir rawh u. In hotute thu âwih ula, an thu thuin awm [a nih loh leh, intulût] rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin a ziak.—Hebrai 13:7, 17.
8. Eng thu ‘ngaihtuah’ tûrin nge Paula’n min sâwm a, engtin nge ‘thu kan âwih’ ang?
8 Paula chuan upate rinna thiltih chu ‘ngaihtuah,’ a nih loh leh fîmkhur taka chhût a, chutiang rinna chu zui tûrin min sâwm tih chhinchhiah rawh. Chu bâkah, hêng upate thu âwih a, an kaihhruaina hnuaia intulût tûrin min fuih bawk a ni. Bible scholar R. T. France-a chuan atîra ziak Grik ṭawngah chuan heta “thu âwih” tia lehlin hi “thu âwihna satliah mai ni lovin, a nihna takah chuan ‘rilrua hmin thlapna’ a ni a, an kaihhruaina châk tak chunga pawmna a kawk a ni,” tiin a hrilhfiah a. Pathian Lehkha Thu-in ti tûra min kawhhmuh vâng chauh ni lovin, Lalram hmakhua leh kan ṭhatna tûr an ngaihtuah tih kan rilrua kan hmin thlap avâng pawhin upate thu chu kan âwih a ni. An kaihhruaina châk taka kan pawm chuan kan hlim ngei ang.
9. Thu âwih bâkah, engvângin nge kan ‘intukluh’ a ṭûl?
9 A nih leh, thil engemawa upate kaihhruaina pêk chu a ṭha ber nih ring lo ta ila engtin nge ni ang? Chutah tak chuan a ni intukluh a ṭûlna chu. Thil engkim a chian a, kan pawm theih huna thu âwih chu a awlsam a; mahse, an kaihhruaina pêk kan hriat thiam loh hunah pawh thu kan âwih chuan, intukluhna dik tak kan lantîr tihna a ni ang. A hnua tirhkoh lo ni ta, Petera chuan hetiang intukluhna hi a lantîr a ni.—Luka 5:4, 5.
Châk Taka Thlâwp Chhan Tûr Palite
10, 11. Eng kawngin nge hotute chuan kum zabi khatna leh tûn laiah an Kristianpuite hnêna ‘Pathian thu an hrilh’?
10 A chunga kan târ lan tâk Hebrai 13:7, 17-ah, tirhkoh Paula chuan Kristian hotute thu kan âwih chhan tûr leh an laka kan intukluh chhan tûr pali chu a sawi a. A hmasa berah chuan anni chu ‘Pathian thu min hrilhtute’ an nih vâng a ni. Isua’n kohhran hnêna a pêk hêng ‘mihringte hnêna thilpêkte’ hi “mi thianghlim te tihfamkim nân,” a nih loh leh siam ṭhat nân a ni tih chu hre chhuak leh rawh. (Ephesi 4:11-13) Ani chuan a kaihhruaina hnuaia awm berâm vêngtute hmangin, kum zabi khatnaa Kristiante ngaihtuahna leh nungchang chu a siam ṭha a, chûng berâm vêngtute zînga ṭhenkhat chu kohhrante hnêna lehkha thawn ziak tûra thâwk khum an ni. Isua chuan chutiang hotu atâna thlarauva ruatte chu Kristian hmasate kaihruai tûr leh tichak tûrin a hmang a ni.—1 Korinth 16:15-18; 2 Timothea 2:2; Tita 1:5.
11 Tûn laiah, Governing Body leh upaa ruatte’n a ai an awh “bawi rinawm, fing tak” hmangin Isua chuan min kaihruai a. (Matthaia 24:45) “Berâm vêngtu lalber,” Isua Krista kan zahna avângin, Paula zilhna thu: “In zînga thawkrim leh, Lalpaa in hotua awm leh, zilhtute che u chu hre . . . rawh u,” tih chu kan zâwm a ni.—1 Petera 5:4; 1 Thessalonika 5:12, 13; 1 Timothea 5:17.
12. Engtin nge hotute chuan ‘kan thlarau min vênsak’?
12 Kristian hotute kan thlâwp chhan tûr pahnihna chu ‘kan thlarau min vênsaktu’ an nih vâng a ni a. Thlarau lam atâna hlauhawm thei kan rilru put hmang emaw, kan nungchang emaw engpawh an hmuh chuan min siam ṭha tûrin kan mamawh zilhna min pe nghâl ṭhîn a ni. (Galatia 6:1) Grik thu mal “vênsak” tia lehlin awmze dik tak chu “muhîl lo” tihna a ni a. Bible scholar pakhat sawi dân chuan, hei hian “berâm vêngtu harhvân rengna a kâwk a ni.” Upate chuan an thlarau lam harhvânna an vawn reng bâkah, an berâmte thlarau lam ṭhatna tûr an ngaihtuah avângin mutmu pawh an tuah hman lo thei a ni. “Berâm vêngtu ropui tak,” Isua Krista’n berâmte duat taka a ngaihsak dân entawn tûra theih tâwp chhuahtu berâm vêngtute chu châk takin kan thlâwp tûr a ni lâwm ni?—Hebrai 13:20.
13. Tu hnênah leh eng kawngin nge hotute leh Kristian zawng zawngte’n mahni chanchin an sawi ang?
13 Hotute châk taka kan thlâwp chhan tûr pathumna chu ‘chanchin sawi tûr anga’ min vên reng vâng a ni. Hotute chuan vân lama Berâm Vêngtu, Pathian Jehova leh Isua Krista hnuaia thawk an ni tih an inhre reng a ni. (Ezekiela 34:22-24) Jehova chu a Fapa ‘thisena a lei’ berâmte Neitu a ni a, hêng hotua ruatte hian A berâmte an cheibâwl dânah A hnênah chanchin an sawi tûr a ni a; anni chuan berâmte chu duat takin an enkawl tûr a ni. (Tirhkohte 20:28, 29) Chuvângin, kan vai hian Jehova kaihhruaina kan chhân lêt dânah mahni chanchin kan sawi ṭheuh tûr a ni. (Rom 14:10-12) Upaa ruatte thu kan âwihna chuan kohhran Lû, Krista hnêna kan intukluhzia a târ lang bawk.—Kolossa 2:19.
14. Engin nge Kristian hotute chungah ‘lungngaihna’ thlen thei a, chu chuan eng nge a rah chhuah?
14 Paula chuan Kristian hotute chunga inngaitlâwm taka kan intukluh chhan tûr a palina chu a sawi a. Heti hian a ziak a ni: “Lungngai chunga sawi lova, hlim chunga an sawi theihna tûrin . . . lungngai chunga sawi chu in tâna pawi tûr a ni si a,” tiin. (Hebrai 13:17) Zirtîr te, berâm vên te, thu hrilh hnaa hmahruai te, an chhûngkaw châwm te, leh kohhrana buainate chinfelna ang chi mawhphurhna rit takte chu Kristian upate chuan an phur a ni. (2 Korinth 11:28, 29) Anmahni kan thlâwp loh chuan, an phur chu kan belh chhah mai a ni a. Hei hian anmahniah ‘lungngaihna’ a thlen dâwn a ni. Kan thlâwp duh lohna chuan Jehova a tilâwm lovin, chu chu kan tân thil pawi tak a ni thei a. Zahna leh thlâwpna dik tak kan lantîr hunah erawh upate chuan an hna chu hlim takin an thawk thei a, chu chuan Lalram thu hrilhnaa telnaah inlungrualna leh hlimna a awmtîr a ni.—Rom 15:5, 6.
Kan Intukluhna Lantîrin
15. Engtin nge kan thu âwihna leh intukluhna chu kan lantîr theih?
15 Hotua ruatte thlâwp theih dân kawng tam tak a awm a. Thu hrilhna biala dinhmun thar mila insiamrem an tumna lamah upate chuan thlawhhma rawngbâwlna atâna inkhâwmna chu kan hun duan thlâkthleng ngai tûrin an duang em? Ruahmanna thar thlâwp tûrin theih tâwp i chhuah ang u. Kan beisei miah loh malsâwmna kan dawng mai thei asin. Rawngbâwlna enkawltuin kan Kohhran Lehkhabu Zirna group a thlawh em? Chu mi chawlhkârah chuan thu hrilhnaah theih tâwpin i tel ang u. Theocratic Rawngbâwlna School-ah chanvo kan nei em? Chuta tel a, kan chanvo chu tih ve ngei i tum ang u. Kohhran Lehkhabu Zirna enkawltuin kan group tân Kingdom Hall tihfai hun a ni tih a puang em? Kan hrisêlna leh chakna tlin tâwkin i ṭanpui ang u. Hêngte leh kawng dang tam takin, Jehova leh a Fapain berâmte ngaihsak tûra an ruatte laka kan intukluhna chu kan lantîr a ni.
16. Upain kawhhmuhna a dawn anga thil a tih loh pawhin, engvângin nge hei hi hel chhan tûr a nih loh?
16 A châng chuan, upa chuan bâwih rinawm pâwl leh a Governing Body kaihhruaina angin thil a ti lo mai thei a. Chutianga a tih zawm zêl chuan, kan “thlarau vêngtu leh Hotu,” Jehova hnênah chanchin a sawi a ngai ang. (1 Petera 2:25) Mahse, upate lama tlin lohna leh tihsual palhna chuan helna rilru kan neih chu thiam a chantîr chuang lo vang. Jehova chuan thu âwih lohna leh helna chu mal a sâwm si lo.—Number 12:1, 2, 9-11.
Jehova Chuan Châk Taka Inthlâwpna Mal A Sâwm
17. Kan hotute chunga kan rilru put hmang tûr chu eng nge ni?
17 Pathian Jehova chuan hotua a ruatte chu ṭha famkim an ni lo tih a hria a. Mahse, anni chu a hmang a; tin, a thlarau hmangin leia a mite chu a enkawl a. Chu chu upate tân—leh kan za atân—a dik a ni: ‘thiltihtheihna nasatzia chu keimahni hnêna mi ni lo va, Pathian ta a ni’ tih hi. (2 Korinth 4:7) Chuvângin, kan hotu rinawmte hmanga a thiltihte avângin Jehova chungah kan lâwm tûr a ni a, thlâwp duhna kan lantîr tûr a ni.
18. Hotute laka kan intukluh hian, a nihna takah chuan tu hnêna intulût nge kan nih?
18 Hotute chuan Jehova’n ni hnuhnûnga a berâmte enkawl tûra a ruat berâm vêngtute nihna a sawi Jeremia 3:15-a a târ lan thu: “Ka lungdumzâwng tak berâmpute ka pe ang che u a, annin hriatna leh hriat thiamnatein an châwm ang che u,” tih mila nun chu theih tâwp chhuahin an tum a ni. Kan zînga upate hi Jehova berâmte zirtîrna leh vênhimna hna an thawhna avângin an fakawm hle. An thawhrimna avânga kan lâwmzia chu châk taka thlâwpin, thu âwihin, leh intulûtin i lantîr zêl ang u. Chutianga kan tih chuan, Berâm Vêngtu vâna mi, Pathian Jehova leh Isua Krista chunga kan lâwmzia kan lantîr a ni ang. (w07 4/1)
Ennawn Nân
• Engtin nge Jehova leh Isua Krista te chuan hmangaihna nei tak Berâm Vêngtu an nihzia an lantîr?
• Thu âwih mai bâkah, engvângin nge intukluhna a ngaih?
• Eng kawngtein nge intukluhna kan lantîr theih?
[Zirlai Atâna Zawhnate]
[Phêk 28-naa milem]
Kristian upate chu Krista hruainaah an intulût
[Phêk 30-naa milemte]
Jehova ruat berâm vêngtute laka kan intukluhna lantîr theih dân kawng tam tak a awm