Krista leh A Bâwih Rinawm Lakah Rinawm Rawh
Krista leh A Bâwih Rinawm Lakah Rinawm Rawh
“A pu [chuan] . . . a neih zawng zawng chungah hotuah a siam ang.”—MATTHAIA 24:45-47.
1, 2. (a) Bible sawi dânin, tunge min Hruaitu chu? (b) Engin nge Krista’n Kristian kohhranah hma a hruai tlat tih târ lang?
“‘HRUAITUTE’ tihin awm . . . suh u, in hruaitu chu pakhat chauh a ni, Krista chu.” (Matthaia 23:10) Isua’n hêng thute hmang hian a hnungzuite hnênah leia mihring tumah hi an hruaitu an ni thei lo tih a hrilh chiang a. An Hruaitu neih chhun chu vâna mi—Isua Krista ngei chu a ni ang. Jehova chuan Isua chu he nihna hi a pe a. ‘Mitthi zîng ata a kai tho va, . . . amah chu engkim zawng zawng chungah lû atân kohhranho hnênah chuan a pe a, kohhranho chu a taksa a ni.’—Ephesi 1:19-23.
2 Krista chu Kristian kohhran “zawng zawng chungah lû” a nih avângin, kohhran chhûnga thilthleng zawng zawng chungah a thuneihna chu a hmang a ni. Kohhran chhûngah a hriat lova thilthleng engmah a awm lo. Kristian pâwl tin, a nih loh leh kohhran tinte thlarau lam dinhmun chu a en thla reng a ni. Chu chu C.E. kum zabi khatna tâwp dâwn lama tirhkoh Johana hnêna a pêk inlârnaah chiang takin a lang a. Kohhran pasarihte hnênah Isua chuan an thiltihte, an ṭhatnate, an tlin lohnate a hria tih vawi nga lai a sawi a, chu mi mil chuan zilhna leh fuihna chu a pe a ni. (Thu Puan 2:2, 9, 13, 19; 3:1, 8, 15) Krista chuan Asia minor te, Palestine te, Suria te, Babulon te, Grik te, Italy te, leh hmun danga kohhrante thlarau lam dinhmun pawh a hria ang tih chu kan ring tlat thei bawk. (Tirhkohte 1:8) Tûn lai dinhmun hi eng nge ni ve le?
Bâwih Rinawm
3. Engvângin nge Krista chu lû leh kohhran chu taksa nêna tehkhin chu thil inâwm tak a nih?
3 A thawhleh hnu vâna a Pa hnêna a chhoh hma lawk khân, Isua chuan a zirtîrte hnênah: “Lei leh vâna thuneihna zawng zawng ka hnênah pêk a ni tawh,” tih a hrilh a. “Ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tih a sawi bawk a ni. (Matthaia 28:18-20) An Hruaitu thatho tak niin an hnênah a awm zêl dâwn a ni. Paula’n Ephesi khua leh Kolossa khuaa Kristiante hnêna a lehkha thawnah khân Kristian kohhran chu “taksa” nên a tehkhin a, chutah chuan Krista chu Lû a ni. (Ephesi 1:22, 23; Kolossa 1:18) The Cambridge Bible for Schools and Colleges sawi dân chuan, he entîrna thu hian “Lû nêna inlungrual a pawimawhna chauh ni lovin, Lûin taksa pum a thunun pawh a pawimawh tih a târ lang. Taksa chu A hmanruate an ni,” a ti. Kum 1914-a Lalram thuneihna pêk a nih aṭangin Isua’n eng pâwl nge a hmanrua atâna a hman?—Daniela 7:13, 14.
4. Malakia hrilh lâwkna nêna inmilin, thlarau lam biak in enfiah tûra Jehova leh Krista Isua an lo kal khân eng nge an hmuh?
4 Malakia hrilh lâwknaah chuan Jehova chu a “thuthlung tirhkoh,” lala ṭhu thar a Fapa, Krista Isua nên A “biak inah,” a nih loh leh thlarau lam biakna inah chuan rorêl tûr leh enfiah tûrin an lo kal ang tih a sawi lâwk a. ‘Pathian chhûngte chunga rorêlna hun’ chu kum 1918-ah chiang takin a rawn inṭan a ni. * (Malakia 3:1; 1 Petera 4:17) Leia dik taka Pathian bia nia inchhâlte chu ṭha taka enfiah an ni a. Kum za têl chhûng Pathian chawimawi lo thurin zirtîr a, Khawvêl Indopui I-na mihring sâmnaa tel Kristianna ram kohhrante chu hnâwl an ni. Mi rinawm hriak thih Kristian a la bângte chu fiah an niin, meia tihthianghlim ang an ni a; tin, pawm an ni a, Jehova tân “felnaa thil hlântute” an lo ni ta a ni.—Malakia 3:3.
5. Isua’n a ‘lo awm lehna’ chungchâng a hrilh lâwkna nêna inmilin, tunge “bawi” rinawm chu?
5 Malakia hrilh lâwkna nêna inmilin, Isua’n a zirtîrte hnêna a “lo [awm] lehna leh khawvêl tâwpna” an hriat theihna tûra chhinchhiahna hlâwm khat a pêkte zîngah chuan “bawi” pâwl nihna pawh a tel a ni. Isua chuan: “Bawi rinawm, fing tak, a puin a hun apianga an chaw chan tûr semsak tûrin a chhûngte chunga hotua a siama chu, tu ber nge ni ang le? A pu a lo kal huna bawi chutiang tia a rawn hmuh a chu a eng a thâwl ang. Tih tak meuhvin ka hrilh a che u, a neih zawng zawng chungah hotuah a siam ang,” a ti. (Matthaia 24:3, 45-47) Kum 1918-a a “bawi” enfiah tûra “a lo kal” chuan, Krista chuan “a hun apianga” thlarau lam chaw sem tûra kum 1879 aṭang tawha he Vênnainsâng leh Bible ṭanchhan thu leh hla chhuah dangte hmangtu thlarauva hriak thih a la bâng a zirtîr mi rinawmte chu a rawn hmu a. Anni chu a hmanraw hlâwm khat, a nih loh leh “bawi” pâwl khat angin a pawm a, kum 1919-ah chuan lei lama a thil neih zawng zawng chu a enkawltîr a ni.
Lei Lama Krista Thil Neihte Enkawlin
6, 7. (a) Isua’n “bawi” rinawm chungchâng a sawinaah ṭawngkauchheh dang eng nge a hman? (b) Isua hman “sum enkawltu” tih thu mal hian eng nge a kawh?
6 Isua’n a lo awm lehna chhinchhiahna thu a hrilh lâwknaah chuan leia ama aiawhtu “bawi” a awm tûr thu pawh a tel a. Chu mi hrilh lâwkna a sawi hma thla tlêm têah chuan ṭawngkauchheh dang lam deuh hlek hmangin chu “bawi” mawhphurhnate chu a târ lang a ni. Isua chuan: “Sum enkawltu rinawm, fing tak, a puin a hun apianga an chaw chan tûr semsak tûrin a chhûngte chunga hotua a siam tûr chu tu ber nge ni ang le? Dik takin ka hrilh a che u, a neih zawng zawng chunga hotuah a siam ang,” a ti a ni.—Luka 12:42, 44.
7 Hetah hian bâwih chu sum enkawltu tia koh a ni a, hei hi “in chhûng emaw, in leh lo emaw enkawltu” tih awmze nei Grik thu mal aṭanga lehlin a ni. He sum enkawltu pâwl hi Bible thu ngaihnawm takte hrilhfiahtu mi fingho awmkhâwm mai a ni lo. “A hun apianga” thlarau lam chaw ṭha tak pe chhuak tûr a nih bâkah, “sum enkawltu rinawm” chu Krista chhûngte chunga hotua ruat a ni a, “a neih zawng zawng,” leia Krista kohhran leh a thiltih zawng zawng enkawl tûra tih a ni bawk dâwn a ni. Chutah chuan engte nge tel?
8, 9. Bâwih chu eng thil “neih” te enkawl tûra ruat nge a nih?
8 Bâwih mawhphurhnaah chuan Krista zuitute’n an Kristian thiltihte atâna an hman khawvêl puma Jehova Thuhretute hmunpuite leh branch office-te, leh khawvêl tluan chhuaka biakna hmun atâna an hman—Kingdom Hall-te leh Assembly Hall-te enkawlna a tel a ni. Chu aia pawimawh zâwk chu, bâwih chuan thlarau lama intihchak nân chawlhkâr tin inkhâwmte, Bible zirnate, leh a khât tawka neih inkhâwmpuite chu a enkawl bawk a ni. Hêng kal khâwmnaahte hian, Bible hrilh lâwknate thlen famkimna leh nî tin nuna Bible thu bulte nunpui dân a hun taka kawhhmuhnate chu pêk a ni.
9 Sum enkawltu mawhphurhnaahte chuan “he ram chanchin ṭha” hrilhna leh ‘hnam tina mi zirtîra’ siamna enkawl pawh a tel bawk a. Chutah chuan Kohhran Lû, Krista’n he tâwpna hun chhûnga ti tûra thu a pêk zawng zawngte pawm tûra mite zirtîrna pawh a tel a ni. (Matthaia 24:14; 28:19, 20; Thu Puan 12:17) Thu hrilh leh zirtîr siamna hian hriak thih a la bângte ṭhian rinawm “mipui tam tak” chu a rah chhuak a. Hêng “hnam tinrêng thil duhzâwngte” hi bâwih rinawmin a enkawl Krista thil “neih” hlute zînga chhiar tel ngei ngei tûr an ni.—Thu Puan 7:9; Hagaia 2:7.
Bâwih Aiawhtu Governing Body
10. Kum zabi khatnaah khân, thu tlûkna siamtu eng pâwl nge awm a, kohhran chungah nghawng eng nge a neih?
10 Bâwih rinawm mawhphurhna rit takah chuan thu tlûkna tam tak siam a tel tih chu a chiang hle a. Kristian kohhran ṭan tîr lamah chuan, Jerusalema tirhkohte leh upate chu bâwih pâwl aiawhtua ṭangin, Kristian kohhran pum pui atân thu tlûknate an siam a ni. (Tirhkohte 15:1, 2) He kum zabi khatnaa governing body siam thu tlûknate hi lehkha thawn leh khualzina rawngbâwltute hmanga kohhrante hnêna hrilh hriat a ni a. Kristian hmasate chuan he kaihhruaina chiang tak hi lâwm takin an dawng a, governing body an thlâwpna chuan remna leh inlungrualna a awmtîr a ni.—Tirhkohte 15:22-31; 16:4, 5; Philippi 2:2.
11. Krista’n a kohhran kaihruai tûrin tûn laiah tunge a hman a, engtin nge he hriak thih Kristian pâwl hi kan thlîr ang?
11 Kristian hmasate hun lai angin, tûn lai leia Krista zuitu thlarauva hriak thih enkawltu tlêm tê chu Governing Body-ah an ṭang a. Kristian kohhran Lû, Krista “kut dinglam” chakna chuan chûng mipa rinawmte’n Lalram hna an enkawlna chu a kaihruai a ni. (Thu Puan 1:16, 20) Kum rei tak chhûng Governing Body zînga mi ni a, tûn hnai lawka a lei lam nun hmang zo ta Albert Schroeder-a chuan a nun kawng chanchin ziahnaah: “Governing Body chu Nilaini apiangin an inhmukhâwm a, inkhâwmna chu Jehova thlarau kaihhruaina dîla ṭawngṭainain hawn a ni ziah a. Thil tinrêng leh thu tlûkna siam apiang chu Pathian Thu, Bible nêna inmil tûrin an thawkrim hle a ni,” * tiin a ziak a. Chûng hriak thih rinawmte chu kan ring tlat thei a ni. A bîk takin anmahni chungchângah, tirhkoh Paula thu pêk chu kan zâwm tûr a ni: “In hotute thu âwih ula, an thu thuin awm rawh u; . . . in thlarau an vênsak ṭhîn che u a ni,” tih chu.—Hebrai 13:17.
Bâwih Rinawm Chungah Zahna Dik Tak Lantîrin
12, 13. Bâwih pâwl zahna lantîr chhan tûr Bible ṭanchhan eng thil nge awm?
12 Bâwih rinawm pâwl chungah zahna dik tak kan lantîr chhan bul ber chu, Pu ber, Isua Krista zahna kan lantîr tihna a nih vâng a ni. Paula’n hriak thihte chungchângah: “Bâwih lova awm kohva chu Krista bâwih a ni. Mana lei in ni tawh,” tiin ziak a. (1 Korinth 7:22, 23; Ephesi 6:5-8) Chuvângin, bâwih rinawm leh a Governing Body kaihhruaina hnuaia rinawm taka kan intukluh hian, bâwih Pu, Krista hnuaia intulût kan ni. Krista’n lei lama a thil neihte enkawl tûra a hmanraw hman chunga zahna dik lantîr chu ‘Pathian tihropuina tûra, “Isua Krista chu Lal a ni,”’ tih kan lantîrna kawng khat a ni.—Philippi 2:9-11.
13 Bâwih rinawm zahna kan lantîr chhan tûr Bible ṭanchhan dang leh chu leia Kristian hriak thihte hi “thlarauva” Jehova awmna “Pathian in” anga sawi an nih vâng a ni. Chutiang an nih avângin, “mi thianghlimte” an ni. (1 Korinth 3:16, 17; Ephesi 2:19-22) Pathian in thianghlim anga târ lan he pâwl kutah hian Isua chuan a lei lam thil neihte chu a dah avângin, Kristian kohhrana thu neihna leh mawhphurhna engemaw bîk takte chu he pâwl ta liau liau hi a ni. He mi avâng hian, kohhrana mi zawng zawngte chuan bâwih rinawm leh a Governing Body aṭanga lo kal kaihhruainate zui leh thlâwp chu an mawhphurhna thianghlim angin an thlîr a. “Berâm dang” chuan an Pu ber thil neihte enkawlna kawnga bâwih pâwl ṭanpui chu chanvo hlu tak angin an thlîr tak zet a ni.—Johana 10:16.
Rinawm Taka Ṭanpuiin
14. Isaia’n a hrilh lâwk angin, engtin nge berâm dangte chuan hriak thih bâwih pâwl chu an zui a, “thawkrimho” anga rawng an bâwl?
14 Thlarau lam Israel hriak thihte laka thuhnuairawlh taka berâm dangte intukluhna chu Isaia hrilh lâwknaah sawi lâwk a ni: “LALPA chuan heti hian a ti, ‘Aigupta thawkrimho leh Ethiopia sumdâwng mi leh Seba-ho mi sâng takte chu in hnên lamah an lo kal ang a, in taah an awm tawh ang; nangmahni an zui ang che u; khaidiat bunin a ni an lo kal dâwn ni: tichuan bawkkhupin chibai an bûk ang che u a, “Pathian chu nangmahniah a awm ngei mai; a dang rêng rêng an awm lo, Pathian dang rêng rêng an awm lo,” tiin in hnênah khawngaihna an dîl ang,’” tiin. (Isaia 45:14) Tûn laia berâm dangte chuan hriak thih pâwl leh a Governing Body chu an zui a tih theih a, an kaihhruaina chu an zâwm a ni. Krista’n leia a hnungzui hriak thihte hnêna a pêk khawvêl puma thu hrilhna ṭanpui tûrin, berâm dangte chuan “thawkrimho” an nih angin an tha leh zung leh an thil neihte chu phal takin an pe a ni.—Tirhkohte 1:8; Thu Puan 12:17.
15. Engtin nge Isaia 61:5, 6 hrilh lâwknaah berâm dangte leh thlarau lam Israelte inlaichînna chu sawi lâwk a nih?
15 Berâm dangte chuan bâwih pâwl leh a Governing Body enkawlna hnuaiah Jehova rawng chu hlim tak leh lâwm takin an bâwl a. Anni chuan hriak thihte chu “Pathian Israelte” zînga mi an ni tih an hria a ni. (Galatia 6:16) Entîr nei “ram dang mite” leh “hriat ngai loh mite” chuan thlarau lam Israelte chu an zawm angin, hriak thih “LALPA puithiamte” leh “Pathian rawngbâwltute” kaihhruaina hnuaiah anni chu hlim takin “leilettu-ahte” leh “grêp hrui enkawltu-ahte” an ṭang a ni. (Isaia 61:5, 6) He Ram chanchin ṭha hrilhnaah leh hnam zawng zawngte zirtîra siamnaah hian ṭhahnemngai takin an tel a. Berâm ang mi hmuh tharte enkawlnaah leh châwmnaah bâwih pâwl chu tih tak zetin an ṭanpui a ni.
16. Berâm dangte chu rinawm taka bâwih rinawm leh fing tak ṭanpuina pe tûrin engin nge chêttîr?
16 Berâm dangte chuan bâwih rinawmin taima taka a hun taka thlarau lam chaw an pêk chu nasa takin an hlâwkpui tih an hria a. Anni chuan bâwih rinawm leh fing tel lo chuan Bible thutak hlu tak, Jehova lal chungnunna te, a hming tihthianghlimna te, Lalram te, vân tharte leh lei thar te, thlarau chungchâng te, mitthite dinhmun te, leh Jehova, a Fapa, leh thlarau thianghlim nihna dik takte chu an hre tlêm hle emaw, an hre lo hulhual emaw ngei ang tih chu inngaitlâwm takin an pawm a ni. Lâwm avâng leh rinawmna avâng liau liauvin, berâm dangte chuan he hun tâwp dâwn lama leia Krista hriak thih ‘unaute’ hi châk tak chungin an ṭanpui a ni.—Matthaia 25:40.
17. Governing Body chuan eng nge tih ngai nia a hriat a, a dawta thuziakah eng nge sawiho ni ang?
17 Hriak thihte chu an tlêm zêl avângin, Krista thil neihte enkawl tûrin kohhran zawng zawngah an awm vek thei lo va. Chuvângin, Governing Body chuan Jehova Thuhretute branch office-te, district-te, circuit-te, leh kohhrante enkawl tûrin berâm dang zînga mipate chu a ruat a ni. Krista hnuaia hêng berâm vêngtute chunga kan rilru put hmang chuan Krista leh a bâwih rinawm laka kan rinawmna chungah nghawng a nei em? Chu chu a dawta thuziakah sawiho a ni ang. (w07 4/1)
[Footnote-te]
^ par. 4 He mi chungchâng chipchiar zâwka sawihona atân, Vênnainsâng March 1, 2004, phêk 12-17, leh December 1, 1992 (English), phêk 13-na chu en rawh.
^ par. 11 March 1, 1988 (English) chhuak he magazine, phêk 10-17-naah hian tihchhuah a ni.
Ennawn Nân
• Tunge kan Hotu chu ni a, kohhran chhûnga dinhmunte a hria tih engin nge târ lang?
• ‘Biak in’ enfiahnaah, bâwih rinawm anga thawk tute nge hmuh an nih a, eng thil neihte nge kawltîr an nih?
• Rinawm taka bâwih rinawm thlâwp chhan tûr Bible ṭanchhan eng thu nge awm?
[Zirlai Atâna Zawhnate]
[Phêk 23-naa milemte]
“Sum enkawltu” enkawl thil ‘neihah’ chuan sum leh pai te, thlarau lam thil te, leh thu hrilhna te a tel
[Phêk 25-naa milem]
Berâm dangte chuan ṭhahnemngai taka thu hrilin bâwih rinawm an thlâwp