Kohhran Chu Nghet Deuh Deuh Rawh Se

“Kohhranhote chu . . . an nghet deuh deuh va, muang takin an awm ta a.”​—⁠TIRHKOHTE 9:​31.

1. “Pathian kohhranho” chungchângah eng zawhnate nge zawh theih a nih?

VANTLANG Kum Chhiar 33, Pentikost nîah chuan, Jehova chuan Krista zirtîr ho khat chu hnam thar, “Pathian Israelte” angin a pawm a. (Galatia 6:16) Hêng thlarauva hriak thih Kristiante hi Bible-in “Pathian kohhranho” a tihte an lo ni ta bawk a ni. (1 Korinth 11:22) Mahse, chutah chuan eng nge tel? “Pathian kohhranho” chu eng anga ruahman tûr nge a nih? Chu chuan he leia a mi leh sate awmna a piangah engtin nge hna a thawh ang? Tin, engtin nge kan nunna leh hlimna nêna a inkûngkaih?

2, 3. Engtin nge Isua chuan kohhranin kalhmang mumal tak a nei ang tih a târ lan?

² Thuziak hmasaa târ lan tawh angin, Isua chuan hriak thih amah zuitu he kohhran lo awm tûr hi sawi lâwkin, tirhkoh Petera hnênah: “He lungpui [Isua Krista] chungah hian ka kohhranho ka rem chho ang a, Mitthi Khaw kulh  kawngkhârte chuan, chu chu an ngam lo vang,” a ti. (Matthaia 16:18) Chu bâkah, Isua chuan tirhkohte hnêna a la awm laiin, nakin lawka din tûr kohhran hnathawh dân tûr leh ruahman dân tûr chu a târ lang a ni.

³ Isua chuan kohhrana mi ṭhenkhatin hma an hruai dâwn tih a ṭawngkam chhuak leh thiltihin a zirtîr a. Anni chuan an hote zînga mi dangte rawngbâwlsakin hma an hruai dâwn a ni. Krista chuan: “Jentailte chunga rorêltua an ruatte chu an chungah an lal êm êm ṭhin a, an mi liante chuan an chungah thu an nei êm êm bawk ṭhin tih in hria. Nimahsela, nangni zîngah zawng chutiang a ni lo vang; tupawh in zînga mi lian nih duh apiang chu in rawngbâwltuah a awm zâwk tûr a ni, tupawh in zînga hmasa ber nih duh apiang chu mi zawng zawng chhiahhlawhah a awm bawk tûr a ni,” a ti. (Marka 10:​42-44) “Pathian kohhranho” chu darh kual a, mi mal tinte chu inla hrang a, kohhran chu kalhmang mumal nei lova awm mai tûr a ni lo tih a chiang hle. Chu ai mah chuan, kalhmang a neiin, kohhran chhûnga mite chuan hna an thawk tlângin, an inbe pawp tawn zâwk dâwn a ni.

4, 5. Kohhranin thlarau lama zirtîrna a mamawh dâwn tih engtin nge kan hriat theih?

⁴ “Pathian kohhranho” chunga Lû nihna changtu tûr chuan a hnên aṭanga zir a tirhkohte leh mi dangte’n kohhrana mi dangte chungah mawhphurhna an nei ang tih a târ lang. Eng ti tûrin nge? An chanvo pawimawh ber chu kohhrana mite hnêna thlarau lam kaihhruaina pêk hi a ni. Tholeh Isua’n tirhkoh dang ṭhenkhatte awm laiin Petera hnênah: “Johana fapa, nangin kei mi hmangaih em?” a ti a. Petera chuan: “Aw, Lalpa, ka ngainâ che tih i hria e,” tiin a chhâng a ni. Isua chuan a hnênah: “Ka berâm note châwm rawh. . . . Ka berâmte enkawl rawh. . . . Ka berâmte châwm rawh,” a ti a ni. (Johana 21:​15-17) Chanvo pawimawh a va ni tak êm!

⁵ Isua ṭawngkam aṭang hian kohhrana lâk khâwmte chu berâm huang chhûnga berâmte nêna khaikhin a ni tih kan hre thei a. Hêng berâmte​—⁠Kristian mipate, hmeichhiate, leh naupangte​—⁠hian thlarau lama châwm leh ṭha taka enkawl chu an mamawh dâwn a. Chu bâkah, Isua chuan a hnungzuitu zawng zawngte chu mi dangte zirtîr tûr leh zirtîrahte siam tûra thu a pêk bawk avângin, a berâm lo ni tharte chuan chu Pathian thupêk hlen chhuah dân tûr kaihhruaina zirtîr chu an mamawh dâwn a ni.​—⁠Matthaia 28:​19, 20.

6. “Pathian kohhranho” din thar hlimah hian eng ruahmannate nge siam a nih?

⁶ “Pathian kohhranho” din a nih hunah chuan, chuta telte chu inkaihhruaina leh infuih tawnna atân an inhmukhâwm ziah a: “Tirhkohte zirtîrin, inpâwlin, chhang phelin, ṭawngṭaiin ṭhahnemngai takin an awm reng a.” (Tirhkohte 2:​42, 46, 47) Hmân lai chanchin chhinchhiah zînga langsâr tak dang leh chu thil ṭangkai eng engemawte enkawl tûra mi puitling ṭhenkhat ruat an ni hi a ni. Anni chu lehkha an zir sân avâng emaw, an themthiam vâng emawa thlan an ni lo. Hêng mite hi ‘thlarau leh finnaa khat’ an ni a. An zînga pakhat chu Stephana a ni a, chanchin ziak chuan ani chu “rinna leh thlarau thianghlima khat” niin a sawi. Kohhran ruahmanna avângin “Pathian thu chu a lo darh a; Jerusalem khuaah zirtîrteho an pung ta êm êm a.”​—⁠Tirhkohte 6:​1-7.

Pathian Hman Mipate

7, 8. (a) Kristian hmasate zîngah Jerusalema tirhkohte leh upate chuan eng angin nge rawng an bâwl? (b) Kaihhruaina chu kohhrante kal tlanga pêk a nihin eng nge a rah chhuah?

⁷ Hriatthiamawm takin, kohhran ruahmanna inṭan tirhah tirhkohte’n hma an hruai a; mahse, anni chu hmahruaitu awmchhun an ni lo. Ṭum khat chu Paula leh a ṭhiante chu Suria ram Antiokei-ah an kîr leh a. Tirhkohte 14:27 chuan: “Tin, an thlen hnuin kohhranhote chu an ko khâwm a, Pathianin anmahni hmanga thil a tih zawng zawngte . . . chu an hrilh a,” tiin a sawi a ni. Chu mi tualchhûng kohhrana an awm lai chuan, Jentail ringtute’n serh an tan a ngaih leh ngaih loh chungchângah thu buai a lo chhuak a. Chu mi chungchâng chingfel tûr chuan, Paula leh Barnaba chu governing body anga rawngbâwl “Jerusalem khuaa tirhkohte leh upate” hnêna tirh an ni.​—⁠Tirhkohte 15:​1-3.

⁸ ‘Tirhkohte leh upate chu, chu mi thu ngaihtuah tûra an inkhâwm’ chuan, Kristian upa Jakoba, Isua unaupa tirhkoh ni lo chuan inkhâwm  chu a kaihruai a. (Tirhkohte 15:⁠6) Fîmkhur taka an sawiho hnuah chuan thlarau thianghlim ṭanpuinain Pathian Lehkha Thu nêna inmil thu tlûkna chu an siam thei a. Chu thu tlûkna siamte chu tualchhûng kohhran hnênah chuan lehkha thawnin an hriattîr a ni. (Tirhkohte 15:​22-32) Chu hriattîrna dawngte chuan thu tlûkna chu pawmin, an nunpui a. Chu chuan eng rah nge a chhuah? Unaute chu tihngheh leh tihchakin an awm a ni. Bible chuan heti hian a sawi: “Chutichuan kohhran pâwlte chu rinnaah chuan an nghet ta a, ni tin an pung ta deuh deuh va,” tiin.​—⁠Tirhkohte 16:⁠5.

9. Bible chuan Kristian mipa nih tlingte tân eng chanvote nge a sawi lan?

⁹ Mahse, tualchhûng kohhrante chuan eng angin nge hna a thawh ang? Kret thliarkâra kohhrante hi entîr nân han ngaihtuah teh. Chuta awm tam tak chuan hming chhia nei mah se, ṭhenkhat chu an nun dân thlâkin Kristian dik an lo ni a. (Tita 1:​10-12; 2:​2-5) Anni chu Jerusalema awm governing body aṭanga hla tak, khawpui hrang hrangah an awm a ni. Mahse, chu chu buaina liam tham a ni lo, a chhan chu hmun dang ang bawkin Kret thliarkâra tualchhûng kohhran tinah chuan thlarau lama “upate” chu ruat an ni a. Chûng mite chuan Bible-a kan hmuh tlin ngaite chu an tlin a ni. Anni chu ‘zirtîrna dik tak kawngah mi fuih thei tûr leh, hnialtute chu thiam loh chantîr thei tûr’ upa, a nih loh leh hotua ruat an ni. (Tita 1:​5-9; 1 Timothea 3:​1-7) Mipa dang thlarau mi takte chu kohhran ṭanpui tûra kohhranho rawngbâwltuahte an tling a ni.​—⁠1 Timothea 3:​8-10, 12, 13.

10. Matthaia 18:​15-17 nêna inmilin, buaina khûnkhân takte chu eng anga tihven tûr nge ni?

¹⁰ Isua chuan chutiang ruahmanna chu a awm ang tih a lo târ lang a. Pathian mite pahnih inkâra pakhatin a dang pakhat chunga thil a tihsual chânga chinfel dân tûr a sawina Matthaia 18:​15-17 chu hre chhuak rawh. A tuartu chuan a pakhat zâwk panin, an pahnih chauhva hriatah ‘a sualnaah chuan a zilh tûr a ni a.’ Chu hma lâkna chuan buaina a tihfel loh chuan thil nih dân hretu mi pakhat emaw, pahnih emaw chu ṭanpui tûra koh theih a ni a. Buaina chu chinfel a nih loh fo chuan engtin nge ni ta ang? Isua chuan: “Anni pawh chu a ngaihthlâk duh loh chuan kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se,” a ti a. Isua’n chu mi a sawi lai chuan Judate chu “Pathian kohhranho” an la ni a, chuvângin  a thusawi hi atîrah chuan anmahni sawina a ni. * Amaherawhchu, Kristian kohhran din a nih tâk hnuah chuan, Isua kaihhruaina pêk chu Kristian kohhran tân a lo ni a. Hei hi Kristian tinte tihchak nân leh kaihhruai nâna kohhran ruahmanna Pathian mite’n an neih tûr thu târ langtu dang a ni.

11. Engtin nge upate chu buainate chinfelnaah an tel?

¹¹ Inâwm takin, upate, a nih loh leh hotute chuan buaina chinfelnaah emaw, thilsual tih chungchâng chinfelnaah emaw tualchhûng kohhran ai chu an awh a. Chu chu Tita 1:​9-a târ lan upate thil tlin ngai nên a inmil a ni. Paula’n kohhrana a ‘tihfel bâkte tifel’ tûra a tirh Tita ang bawkin, tualchhûnga upate chu mi ṭha famkim an ni lo ngei mai a. (Tita 1:​4, 5) Tûn laiah, upa ni tûrte chuan an nih hmain hun engemaw chen chu an rinna leh an inpumpêkna an lantîr phawt tûr a ni. Chutiang chuan, kohhran chhûnga mite chuan he ruahmanna kal tlanga pêk kawhhmuhna leh kaihhruaina chu rinna tûr chhan an nei a ni.

12. Upate’n kohhran chungah eng mawhphurhna nge an neih?

¹² Ephesi kohhrana upate hnênah Paula chuan: “Pathian kohhranho, a [Fapa] thisena a leite chu châwm tûrin, nangmahni leh in hote zawng zawng chungah chuan fîmkhur rawh u, thlarau thianghlimin an chunga hotuah a siam che u hi,” a ti. (Tirhkohte 20:28) Chutiang bawkin tûn lai kohhrana hotute chu ‘Pathian kohhranho châwm tûra’ ruat an ni a. Anni chuan berâmte chunga intilal lovin, hmangaih takin an châwm tûr a ni. (1 Petera 5:​2, 3) Hotute chuan an “hote zawng zawng” chu tihchak leh ṭanpui an tum tlat tûr a ni.

Kohhran Bêl Tlatin

13. A châng chuan, kohhranah eng thil nge thleng thei a, engvângin nge?

¹³ Kohhran chhûnga upate leh mi dangte chu mi ṭha famkim lo vek an ni a, chuvângin kum zabi khata tirhkoh ṭhenkhatte an la awm laia mi ang bawkin, inhriat sualna emaw, buaina emaw chhuah châng a awm ṭhîn. (Philippi 4:​2, 3) Hotu pakhatin emaw, mi dangin emaw chaltlai tak leh ngilnei lo tak anga lang thu engemaw a sawi, a nih loh leh thil dik hlel deuh a sawi a ni thei. A nih loh leh, Pathian Thu nêna inmil lo thil engemaw tak thleng niin kan ngai a, mahse tualchhûng upate’n an hre reng chung pawhin, an chingfel lo niin a lang thei bawk. Dik tak chuan, chu buaina chu Pathian Lehkha Thu nêna inmilin chinfel a ni tawh emaw, chinfel mêk a ni emaw a ni thei a, chu chu kan lo hre lo pawh a ni thei. Pathian Thu nêna inmil lo thil a thleng pawh ni tehrêng se, hei hi ngaihtuah rawh: Jehova’n a ngaihsak Korinth kohhranah ngei chuan hun engemaw chhûng chu thilsual lian tak tih a ni a. A hnuah chuan, chu thilsual chu dik tak leh khauh takin a chinfeltîr ngei a ni. (1 Korinth 5:​1, 5, 9-11) Heti hian kan inzâwt thei a ni, ‘Chutih laia Korinth khuaa awm ni ta i la, buaina chinfel a nih hma chuan engtin nge ka tih ang?’ tiin.

14, 15. Engvângin nge ṭhenkhat chuan Isua an zui tawh loh va, chu chuan eng zir tûr nge min pêk?

¹⁴ Kohhran nêna inkûngkaiha thil thleng thei dang pakhat hi ngaihtuah teh. Miin Pathian Lehkha Thu zirtîrna pakhat chu hriatthiam leh pawm harsa ti ta se. Bible leh kohhran kal tlanga hmuh theih thu leh hla chhuahte chu zir chîkin, mi puitling a Kristianpuite, leh upate ṭanpuina thlengin a lo hmu tawh a. Chutichung pawhin, hriatthiam emaw, pawm emaw chu harsa a ti a ni. Eng nge a tih tâk ang? Chutiang deuh bawk chu Isua thih hma kum khat vêl khân a thleng a ni. Ani chuan “nunna chhang” a nih thu leh chatuana nung tûr chuan miin ‘Mihring Fapa tisa a eiin, a thisen a in’ a ngai tih a sawi a. Chu chuan a zirtîr ṭhenkhat chu mak a tihtîr a. A hrilhfiahna zawn emaw, rinna nêna nghah mai emaw ai chuan, zirtîr tam takte chuan “ [Isua] an pâwl leh ta lo va.” (Johana 6:​35, 41-66) Tûnah pawh hian chuta awm chu ni ta i la, eng nge kan tih ang?

¹⁵ Tûn laiah, ṭhenkhat chuan mahnia Pathian rawngbâwl tumin tualchhûng kohhran an bêl  tawh lo va. A rilru a nâ emaw, thil sual tih chu siam ṭhat a ni lo emaw, a nih loh leh zirtîrna ṭhenkhat an pawm thei lo emaw niin an sawi mai thei. An thiltih dân chu a âwm em? Kristian tinte chuan Pathian nêna mi mal inlaichînna an nei ṭheuh tûr a ni tih chu a dik rualin, tirhkohte hun lai ang bawkin, khawvêl pum huap kohhran chu a hmang a ni tih chu kan hnâwl thei lo. Chu bâkah, Jehova chuan kum zabi khatnaa tualchhûng kohhran chu a hmangin, mal a sâwm a, kohhrante’n an hlâwkpui atân upa leh kohhranho rawngbâwltu nih tlingte chu a ruat a. Chutiang chuan tûn laiah pawh a ti a ni.

16. Miin kohhran chhuahsan a tumin, eng nge a ngaihtuah ang?

¹⁶ Kristian pakhat chuan Pathian nêna ama mi mal inlaichînna ringawta innghat thei anga a ngaih chuan, Pathian duan ruahmanna​—⁠Pathian mite khawvêl pum huap kohhran leh tualchhûng kohhrante​—⁠chu a hnâwl tihna a ni. Mi chuan mahni chauhvin Pathian a bia emaw, mi dang tlêm tê chauh a kâwm emaw a ni thei; mahse, kohhran pâwn lamah hian upate leh kohhranho rawngbâwltu ruahmanna chu a awm em ni? Paula’n Kolossa khuaa kohhran hnêna a lehkha thawnah Laodikei khuaah pawh chu lehkha chu chhiar tûra a kawhhmuh khân, ani chuan ‘[Kristaa] zung kai leh rem chhoh deuh deuhva awm’ chungchâng a sawi hi chhinchhiah tlâk tak a ni. Mahni inla hrangte ni lovin, kohhran chhûnga mite chauhvin chu chu an hlâwkpui dâwn a ni.​—⁠Kolossa 2:​6, 7; 4:​16.

Thutak Ban leh Innghahna

17. Kohhran chungchângah 1 Timothea 3:​15-na chuan eng nge a târ lan?

¹⁷ Kristian upa Timothea hnêna a lehkha thawn hmasa berah, tirhkoh Paula chuan tualchhûng kohhrana upa leh kohhranho rawngbâwltute tlin tûr chu a târ lang a. Chu mi zawh veleh Paula chuan “Pathian nung kohhranho” chu târ langin, chu chu “thutak ban leh innghahna” a ni tih a sawi a ni. (1 Timothea 3:15) Kum zabi khatnaa hriak thih Kristian kohhran zawng zawng chu chutiang thutak ban chu a ni tak zet a ni. Tin, Kristian tinte’n chutiang thutak an dawn nâna ruahmanna siam bul ber chu tualchhûng kohhran a ni tih hnial rual a ni lo. Chu chu thutak zirtîrna leh humhimna hmun, mi mala an ngheh deuh deuh theihna hmun chu a ni.

18. Engvângin nge kohhran inkhâwmte chu a pawimawh?

¹⁸ Chutiang bawkin, khawvêl pum huap Kristian kohhran chu Pathian chhûngte a ni a, “thutak ban leh innghahna” a ni. Kan tualchhûng kohhrana inkhâwm ziah leh chhânnate pêk chu Pathian nêna kan inlaichînna leh a duhzâwng ti tûra kan inbuatsaihna kawnga kan ngheh deuh deuhna leh tihchaka kan awmna ber a ni. Paula chuan Korinth khuaa awm kohhran hnêna a lehkha thawnah chutiang inkhâwmnaa thusawite chu a ngaihsak a. Ani chuan an inkhâwmnaa telte chu ‘siam ṭhat,’ a nih loh leh tihchaka an awm theih nân, chuta thusawite chu fiah tak leh hriatthiam theih ni se a duh thu a ziak a ni. (1 Korinth 14:​12, 17-19) Pathian Jehova’n tualchhûng kohhran ruahmanna atân thu a pe a, a ṭanpui bawk tih kan hriat chuan, tûn laiah tihngheh deuh deuhvin kan awm ve thei a ni.

19. Engvângin nge i kohhran chunga i lâwm êm êm?

¹⁹ Ni e, Kristiante nia ngheh deuh deuh kan duh chuan, kohhran chhûngah kan awm tûr a ni. Chu chu hun rei tak ata tawhin zirtîrna dik lote laka invênhimna leh khawvêl pum huapa a Messia Lalram chanchin ṭha puan chhuah nâna Pathian hmanrua a ni. Rinhlelh rual lohvin, Pathian chuan Kristian kohhran kal tlangin thil tam tak a hlen chhuak tawh a ni.​—⁠Ephesi 3:​8-11. (w07 4/15)

[Footnote]

I Hre Chhuak Thei Em?

• Engvângin nge Pathianin leia kohhrante a hman chu kan beisei ang?

• Mi ṭha famkim lo mah ni se, upate’n kohhran tân eng nge an tih?

• Engtin nge tualchhûng kohhranin nghet deuh deuhva a siam che?

[Zirlai Atâna Zawhnate]

[Phêk 4-naa milem]

Jerusalema tirhkohte leh upate chuan governing body angin rawng an bâwl