Nunrâwnna Hi A Tâwp Ngai Ang Em?

MAHNI hmasialna chu tûn laia khawvêla nunrâwnna awmtîrtu ber a ni tih mi tam tak chuan an pawm nghâl ngei ang. Kum sâwmbi engemaw zât kal ta aṭanga mahni hmasialna nunphung chawisânna chuan a tam zâwkte’n mahni chauh an inngaihsak berna khawtlâng chu a hring chhuak a. Mi tam tak chuan an duhzâwng neih theih nân thil eng pawh tih an hreh lo va, chu chuan nunrâwnna a rah chhuak fo a ni. Chu chu mi malah chauh ni lovin, ram zawng zawng tân pawh a dik a ni.

Mahni mihringpuite nunna chu a hlu tawh lo niin a lang a. Ṭhenkhat phei chuan nunrâwng taka chêt chu nuam an ti hial a ni. Nuam tih avâng maia mi dangte tinâ nia inpuangtu dân bawhchhetute angin, anni chuan nunrâwn chu intihhlimna angah an hmang a. Tin, tharum thawhna leh nunrâwnna lam film en duhtu mi maktaduai têlte avânga film industry-in mahni hlâwkna atâna chutiang chi film an tichhuak chur chur mai hi engtin nge ni ang? Intihhlimna leh chanchin theh darhna kal tlanga tharum thawhna hmuh rengna chuan mi tam takte chu a tichawmawlh a ni.

Nunrâwnna tuartute chuan rilru lam buaina an tâwk fo va, mi dangte chunga nunrâwn ve chu an tum thei a ni. Tharum thawhnain a tihchhuah nunrâwnna chungchâng chu sawiin, National Autonomous University of Mexico-a zirtîrtu Noemí Díaz Marroquín-i chuan: “Tharum thawh chu a zira zir a ni a, kan hnam dân zîngah a tel a ni. . . . Kan dinhmunin a zir a, min fuih hunah tharum thawh dân kan zir ṭhîn,” a ti. Chuvâng chuan tihduhdahna tuartute chuan mi dangte an tiduhdah ve duh hle a, an tawrh ang chiah chuan an tiduhdah hial thei a ni.

Ṭhenkhatah chuan, zu leh ruihhlo dik lo taka hmangte chuan nunrâwng taka thiltih an chîng thei a ni. Sawrkârin mipuite mamawh a phuhhrûk loh avânga lungâwi lote chu hmuh hmaih tûr an ni lo. An zînga ṭhenkhat chuan an thlîr dân mite hriattîr nân nunrâwnna thiltih leh fîrfiaka chêtnate thleng an hmang a, chu chuan pawisawi lote a tawrhtîr fo a ni.

Mahse, hetiang hian i ngaihtuah mai thei: ‘Mihringte hian anmahni maiin em ni nunrâwn dân an zir? Tûn laia kan dinhmun tawn mêk phênah hian eng nge awm?’ tiin.

Nunrâwnna Phênah Tunge Awm?

Bible chuan Diabol-Setana’n he khawvêl chungah hian nasa takin thu a nei tih min hrilh a, “he khawvêl pathian,” tiin a ko a ni. (2 Korinth 4:⁠4) Ani chu lei leh vâna mahni hmasial ber leh nunrâwng ber a ni a. Isua chuan ani chu inhmeh takin “tualthat” leh “dâwt pa,” tiin a ko a ni.​—⁠Johana 8:⁠44.

Adama leh Evi’n thu an âwih loh aṭang khân, Setana chuan mihringte chu nasa takin a thunun a. (Genesis 3:​1-7, 16-19) Mihring nupa tuak hmasa berte’n Jehova an kalsan hnu kum zabi  15 vêlah, vântirhkoh helte chuan mihring taksa puin mihring hmeichhiate an pâwl a, Nephilim tia koh thlah pawlh hnam chi khat chu an hring chhuak a ni. Chûng thlah pawlhte mize dang lam bîk tak chu eng nge ni? An hming aṭangin a chhânna chu a hmuh theih a. An hming awmzia chu “Titlutute,” a nih loh leh “mi dang tlûktîrtute” tihna a ni. Anni chu nunrâwnna leh nungchang bawlhhlawhna thlentu tharum thawh hmang an ni a, chuvângin Pathian awmtîr tuilêt chauhvin anni chu a tiboral thei a ni. (Genesis 6:​4, 5, 17) Nephilimte chu Tuilêta tihboral vek ni mah se, an pate chu mita hmuh theih loh ramhuaite niin thlarau ramah an kîr leh a ni.​—⁠1 Petera 3:​19, 20.

Vântirhkoh helte nunrâwnzia chu Isua hun laia ramhuai man mipa naupang chungchângah a lang a. Ramhuai chuan mipa naupang chu a sawisa fo va, tihboral tumin meiah te leh tuiah te a nam thlu a ni. (Marka 9:​17-22) Chutiang “thlarau sualho” chuan khawngaihna nei lo, nunrâwnna kawnga an hotu ber, Diabol-Setana mizia chu an lantîr chiang hle a ni.​—⁠Ephesi 6:⁠12.

Tûn laiah, ramhuai thununna chuan mihringte zîngah nunrâwnna a la awmtîr zêl a, chu chu Bible-in a sawi lâwk a ni: “Ni hnuhnûngahte chuan hun khirh takte a lo awm ang. Mi, mahni inhmangaihtu te, . . . intivei te, chapo te, . . . lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang,” tiin.​—⁠2 Timothea 3:​1-5.

Bible hrilh lâwkna chuan kum 1914-a Krista Isua lalna Pathian Lalram din a nih hnuah, Setana leh a ramhuaite chu vân aṭanga paih thlâk an nih avângin, kan hun hi a khirh bîk zual tih a târ lang a. “Lei leh tuifinriata chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tiin Bible chuan a puang chhuak a ni.​—⁠Thu Puan 12:​5-9, 12.

Chu chu kan dinhmunin hma a sâwn thei dâwn lo tihna em ni? A hmaa a thusawi kan lâk chhuah tâk, Díaz Marroquín-i chuan, mize duhawm lote chu “mite chuan zâwi zâwiin an paih bo thei” a ti. Amaherawhchu, Setana thununnain a fan chhuah vek tûn lai khawvêlah hian, miin a ngaihtuahna leh a thiltihte chu thiltihtheihna sâng zâwk a thununtîr a nih chauh loh chuan, mize ṭha lote a paih bo chu a beisei awm lo hle. Chu thiltihtheihna chu eng nge ni?

Inthlâkthleng Theih A Ni​—⁠Engtin Nge?

Pathian thlarau thianghlim chu thiltithei ber a ni a, chu chuan eng ang ramhuai thununna pawh a hneh thei a, a lâwmawm hle. Chu chuan hmangaihna leh mihringte ṭhatna tûr a awmtîr a. Pathian thlarauva khata awm tûr chuan Jehova tilâwm duh apiang chuan nunrâwnna rawngkai nungchangte pawh an pumpelh tûr a ni. Chutiang tûr chuan Pathian duhzâwng mila mahni mizia thlâk thleng a ngai a. A nih leh chu Pathian duhzâwng chu eng nge ni? A theih ang chen chena Pathian kan entawn hi a ni a. Chutah chuan Pathian thlîr dân anga mi dangte thlîr a tel a ni.​—⁠Ephesi 5:​1, 2; Kolossa 3:​7-10.

Pathian thil rêlbâwl dân zirna chuan, Jehova’n mi dangte ngaihsakna a tlachham ngai lo tih a rinnghehtîr ang che. Ani chuan mihring tumah dik lo takin a cheibâwl ngai lo va, rante tak ngial pawh chutiang chuan a ti lo. * (Deuteronomy 22:10; Sâm 36:7; Thufingte 12:10)  Nunrâwnna leh mi nungrâwng zawng zawngte chu a hnâwl ṭhak zâwk a ni. (Thufingte 3:​31, 32) Jehova’n Kristiante nei tûra a phût mihring thar chuan anni chu mi dangte mahni aia chungnung zâwk anga thlîr tûr leh zahthiam tûrin a ṭanpui a. (Philippi 2:​2-4) Chu Kristian mize tharah chuan “lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te,” a tel a ni. Hmaih hauh loh tûr chu hmangaihna a ni, “chu chu phuar famkimna a ni” si a. (Kolossa 3:​12-14) Chutiang mize nei tam tak ta sela chuan, khawvêl chu hmun nuam tak a ni ang tih chu i pawm dâwn lâwm ni?

Amaherawhchu, mizia thlâk thleng hlen hi thil awm thei tak tak a nih i ring lo mai thei a. Aw le, thilthleng tak tak pakhat hi han ngaihtuah teh. Martín-a * chuan a fate hmaah a nupui chu ânkhum vak vakin, nasa takin a sawisa ṭhîn a. Ṭum khat phei chu a hlauhawm êm avângin, an fate chuan ṭhenawmte an pun a ngai hial a ni. Chutianga kum tam tak a vei hnuah, an chhûngkua chuan Jehova Thuhretute nên Bible an zir ṭan a. Martín-a chuan a mize neih tûrte leh mi dangte a cheibâwl dân tûr chu a hre ta a ni. A inthlâk thleng thei em? A nupui chuan chu zawhna chu a chhâng a ni: “Tûn hmate kha chuan, ka pasal a thinrim hian tawrhhlelhawm tak a ni a. Chu mi avâng chuan, kan nun chuan hun rei tak chhûng chu mu leh mal pawh a nei lo. Jehova’n Martín-a inthlâkthleng tûra a ṭanpui avânga ka lâwmna chu sawiin a siak lo. Tûnah chuan naupangte tâna pa ṭha tak leh pasal fel tak a ni,” tiin.

Chu chu thilthleng pakhat mai a ni a. Khawvêl puma Jehova Thuhretute nêna Bible zir mi maktaduai têlte chuan nunrâwnna chu an hnuchhawn ṭhak a ni. Ni e, inthlâkthleng chu thil theih a ni.

Nunrâwnna Zawng Zawng Tâwpna Chu A Hnai

Kan hma lawkah, Pathian Ram​—⁠Krista Isua, Rorêltu ngilnei tak nêna vâna din tawh sawrkâr⁠​—⁠​chuan leiah thu a rawn nei pumhlûm dâwn a. Chu sawrkâr chuan nunrâwnna bul ber Setana leh a ramhuaite chu vân ata a thianfai tawh a ni. Pathian Ram chuan leia remna ngainatu a khua leh tuite mamawh chu a phuhrûksak thuai dâwn. (Sâm 37:​10, 11; Isaia 11:​2-5)  Chu chauh chu a ni, khawvêl buaina tawhte tihvenna awmchhun dik tak chu. Mahse, chu Lalram i nghah mêk lai chuan nunrâwnna tuartu lo ni ta la engtin nge ni ang?

Nunrâwn lêtna chuan a ṭanpui lo vang che. Chu chuan nunrâwn lehzualna chauh a hring ang. Bible chuan Jehova rinchhan tûrin min sâwm a, ani chuan a hun têah chuan ‘mi tin an awm dân ang zêl leh an thiltih rah ang zêlin a pe ang.’ (Jeremia 17:10) (He thuziak ruala tel, “Nurâwnna Hmachhawn Dân Tûr,” tih bâwm chu en rawh.) Dân bawhchhiatna thiltih nunrâwng tak chu i tuar pawh a ni thei a. (Thuhriltu 9:11) Mahse, Pathian chuan nunrâwnnain a rahchhuah engpawh, thihna hial pawh a sût lêt leh thei a ni. A thutiam nêna inmilin, nunrâwnna thiltih avânga an nun chântu a hriatrengnaa awmte chu a kai tho leh ang.​—⁠Johana 5:​28, 29.

Nunrâwnna tuartu la ni thei rih mah i la, Pathian nêna inlaichînna ṭha leh a thutiamte rin tlatnaah thlamuanna kan nei thei a ni. Pasal ṭanpuina tel lova fapa pahnih enkawl a, zirna ṭha dawntîrtu Sara-i hi han ngaihtuah teh. A tar hunah, a fapate chuan an thlahthlam a, sum leh paia an ṭanpui loh bâkah, a dam loh pawhin an enkawl lo va. Mahse, tûna Kristian ni tawh Sara-i chuan: “Ka lung chu chhe hle mah se, Jehova’n mi thlahthlam lo. Engtik lai pawha min ngaihsaktu thlarau lama ka unaute hmangin ani chuan min ṭanpui a ni. Rei lo têah chuan ka harsatna chauh ni lo, a thiltih theihna ring a, a thupêk zâwmtu zawng zawngte harsatna chu a tihvênsak thuai dâwn tih ka ring tlat a ni,” a ti.

Sara-i sawi thlarau lama a unaute chu tute nge an nih? Anni chu a Kristian ṭhian, Jehova Thuhretute an ni. Anni chuan nunrâwnna a tâwp thuai dâwn tih ringtute awmna khawngaihna nei khawvêl pum huap inunauna chu an din a ni. (1 Petera 2:17) Nunrâwnna mawhphurtu ber Diabol-Setana chu a awm tawh lo vang a, amah anga thil ti apiang lah an awm tawh hek lo vang. Thu ziaktu pakhatin a koh angin he “nunrâwnna hun” chu a awm tawh lo vang. Jehova Thuhretute zînga tuemaw ber be pawpin engvângin nge he beiseina chungchâng hi i zir loh vang? (w07 4/15)

[Footnote-te]

[Phêk 6-naa bâwm]

Nunrâwnna Hmachhawn Dân Tûr

Pathian Thu chuan nunrâwnna hmachhawn dân tûr thurâwn chhawr tlâk tak a pe a. A hnuaia finna thute i nunpui theih dân chu ngaihtuah rawh:

“‘Sual chu ka thungrûl teh mai ang,’ ti suh la, LALPA ngaichâng rih la, ani chuan a chhanhim ang che.”​—⁠Thufingte 20:⁠22.

“Rethei hnehchhiahna te, pâwngnêkin rorêlna leh diknate a tibo a ni tih i hmuh pawhin mak ti suh; hotu sâng chu a sâng lehzualin a mit sîr ru reng si a.”​—⁠Thuhriltu 5:⁠8.

“Thuhnuairawlhte chu an eng a thâwl e; lei hi an la rochung dâwn si a.”​—⁠Matthaia 5:⁠5.

“Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u.”​—⁠Matthaia 7:⁠12.

“Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u. A theih phawt chuan nangmahni lam tal, mi zawng zawng nên inremin awm rawh u. Duh takte u, in phuba la suh ula, Pathian thinurna kian zâwk rawh u, ‘“Phuba rêng rêng keima lâk tûr a ni, keiman ka thungrûl ang,” Lalpain a ti,’ tih ziak a ni si.”​—⁠Rom 12:​17-19.

“Krista pawh khân a tuarsak che u . . . a hniaka in zuina tûrin entawn tûr a hnutchhiah che u kha. . . . Mi hauhva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk a.”​—⁠1 Petera 2:​21-23.

[Phêk 7-naa milemte]

Jehova chuan mi tam tak chu nunrâwnna kalsan tûrin a zirtîr