Pathianin A Zawm Tawh Chu Ṭhen Suh
Pathianin A Zawm Tawh Chu Ṭhen Suh
“Pahnih an ni tawh lo va, tisa pum khat an ni tawh zâwk a ni. Chuvângin Pathianin a zawm tawh chu mihringin ṭhen suh se.”—MATTHAIA 19:6.
1, 2. Engvângin nge nupate chuan buaina tawh châng an nei ang tih beisei chu Pathian Lehkha Thu nêna inmil leh thil beisei âwm rêng a nih?
MOTORA thui tak zin chhuak tûrah han inchan ta la. Kawng lakah harsatna i tâwk ang em? Tâwk lo tûra inngaih chu a âtthlâk hle ang! Entîr nân, khua a ṭha lo hle thei a, zawi muang leh fîmkhur taka i khalh pawh a ngai mai thei. Engtikah emaw chuan i siam ṭhat theih loh khâwl lam thil fel lohna chu i tâwk thei a, kawngsîra dintîr a, mi thiam ṭanpuina i dîl pawh a ngai thei a ni. Chutiang dinhmun chuan i zin chhuak fuh lo palh anga ngaihtîr che-in, i motor chu a kalsantîr mai tûr che em ni? Ni lo ve. Hmun hla taka kan zin rêng rêng hian, buaina a thlen chu kan beiseiin, a chinfel dân tûr chu kan zawng a ni.
2 Chutiang tho chu inneihnaah pawh a ni. Buaina chu pumpelh theih a ni lo va, inneih tumte tân hlim reng tûra in beisei chu a âtthlâk ang. Korinth thawn khat 7:28-ah Bible chuan pasal leh nupuite’n “tisaah chuan hrehawm an tuar ang” tiin a ruh lang râwtin a sawi a. Engvângin nge hrehawm an tawrh ang? A tawi zâwnga sawi chuan, pasalte leh nupuite chu ṭha famkim lo an nih vâng leh “hun khirh takte” kâra kan awm vâng a ni. (2 Timothea 3:1; Rom 3:23) Chuvângin, nupa inmil tak leh thlarau lam thil ngaihsak takte pawhin buaina tawh châng an nei ngei ang.
3. (a) Khawvêl mi tam takin inneihna chu engtin nge an thlîr? (b) Engvângin nge Kristiante chuan an inneihna siam ṭhat chu an tum?
3 Tûn lai khawvêlah hian, nupa tuak ṭhenkhat chuan harsatna an tawhin an inneihna tihtâwp chu an tum hmasa ber ṭhîn. Ram tam takah chuan nupa inṭhen zât chu khuahkhirh theih loh khawpin a pung nasa a. Mahse, Kristian dikte chuan hmanhmawh taka inṭhen tum aiin buaina chu an chingfel zâwk a ni. Engvângin nge? Inneihna hi Jehova thilpêk thianghlim tak anga an thlîr vâng a ni. Isua chuan nupa kawpte chungchângah: “Pathianin a zawm tawh chu mihringin ṭhen suh se,” a ti a. (Matthaia 19:6) He tehna mila nun hi a awlsam reng lo ngei mai. Entîr nân, inneihna lama thurâwn petute pawh tiamin, chhûngkhatte leh mi dang Bible thu bul hre lote chuan nupate chu Pathian Lehkha Thu ang ni lo va awm hrang tûr emaw, inṭhen tûr emawin an fuih fo ṭhîn a. * Mahse, Kristiante chuan hmanhmawh taka inneihna tihtâwp ai chuan siam ṭhat leh a, enkawl ṭhat zêl chu a ṭha zâwk fê tih an hria a ni. Dik takin, atîr tê aṭanga mi dangte thurâwn ang ni lo va, Jehova tih dân anga tih tum tlat chu a pawimawh hle a ni.—Thufingte 14:12.
Harsatnate Hnehin
4, 5. (a) Inneihnaah hian eng ang harsatna nge kan hneh a ngaih? (b) Engvângin nge Pathian Thua kan hmuh thu bulte zawm chu inneihnaa harsatna a lo chhuah hunah pawh a ṭangkai?
4 Inneihna apiang hian buaina chinfel nâna a khât tâwka ngaihsak ṭûl châng a nei ṭhîn a. A tam zâwkah chuan inlungrual lohna tênau takte sawiremna a ni ang. Mahse, inneihna ṭhenkhatah chuan inlaichînna bul ber tichhe thei khawp buaina nasa tak a awm thei a ni. A châng chuan nupui nei Kristian upa ṭanpuina i dîl pawh a ngai hial thei ang. Amaherawhchu, hêng thilthlengte avâng hian in inneihna chu a hlawhchham ta tihna a ni lo. Chûng chuan a chinfel dân zawnna kawnga Bible thu bulte zui tlat a pawimawhzia a târ lang mai zâwk a ni.
5 Mihringte Siamtu leh inneihna Bul Ṭantu a nih angin, Jehova chuan inneihna hlawhtling neih nâna kan mamawh chu a hre ber a. Mahse zawhna lo awm ta chu, A Thu-a awm zilhna thute chu ngaithlain, kan zâwm ang em? tih hi a ni. Chutianga kan zawm chuan kan hlâwkpui ngei ang. Jehova chuan hmân laia a mite hnênah: “Aw nangni hian ka thupêkte chu lo ngaithla ta ula chu aw! in chunga remna chu lui ang maia awmin, in felna chu tuifinriat fâwnte ang maiin a awm tûr,” a ti a. (Isaia 48:18) Bible-a kaihhruaina pêkte nunpuina chuan inneihna hlawhtling a awmtîr thei a ni. Tûnah hian pasalte hnêna Bible-in zilhna a pêk chu ilo en hmasa ang u.
“In Nupuite Hmangaih Rawh U”
6. Pasalte tâna Pathian Lehkha Thu zilhna chu eng nge ni?
6 Ephesi khuaa mite hnêna tirhkoh Paula lehkha thawnah chuan pasalte tâna kaihhruaina chiang tak a tel a ni. Ani chuan: “Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân. Chutiang bawkin pasalte pawhin mahni taksate angin mahni nupuite chu an hmangaih tûr a ni. Mahni nupui hmangaihtu chu mahni inhmangaih a ni. Tuman mahni tisa an haw ngai si lo va, an châwmin an duat zâwk ṭhîn a ni. Kristan kohhranho a châwmin a duat ang hian. Engpawh ni se, tupawhin mahni a inhmangaih angin mahni nupui hmangaih ṭheuh sela,” tiin, a ziak a ni.—Ephesi 5:25, 28, 29, 33.
7. (a) Eng nge Kristian inneihna atâna lungphûm pawimawh tak ni tûr chu? (b) Engtin nge pasalte’n an nupuite an hmangaih chhunzawm zêl ang?
7 Paula chuan nupa inkâra harsatna lo awm thei tûr apiang chu a sawi vek kher lo. Kristian inneihna zawng zawng tâna lungphûm pawimawh tak ni tûr leh buaina chinfelna tûr ber—hmangaihna—chungchâng chu a sawi zâwk a ni. A nihna takah chuan a chunga Bible chângah hian hmangaihna thu hi vawi sarih lai sawi lan a ni a. Chu bâkah, Paula chuan pasalte chu: “In nupuite hmangaih rawh u,” a ti a, atîra ziakah chuan hmangaih chhunzawm zêl tûra tihna ṭawngkam a tel a ni. Paula chuan nula tlangvâl inhmangaihna neih ṭan chu inneih hnua hmangaihna neih reng aiin a awlsam zâwk hle tih a hre chiang hle. A bîk takin he ‘ni hnuhnûng,’ mite “mahni inhmangaihtu te,” leh “huaikawmbâwl te” an nihna hunah hian chutianga hmangaihna neih reng chu a harsa lehzual a ni. (2 Timothea 3:1-3) Chutiang mize ṭha lote chuan inneihna tam tak a tichhia a; mahse, hmangaihna nei pasal chuan mahni hmasialna khawvêl mizia chu a ngaihtuahna leh a thiltih a nghawngtîr lo vang.—Rom 12:2.
Engtin Nge I Nupui Thil Mamawh I Pêk Theih Ang?
8, 9. Eng kawngin nge Kristian pasal chuan a nupui mamawh a pêk?
8 Kristian pasal i nih chuan, engtin nge mahni hmasial duhna pumpelh a, i nupui hmangaihna dik tak i lantîr theih ang? A hmaa kan lâk chhuah tâk Ephesi khuaa mite hnêna a lehkha thawnah khân Paula chuan i tih ngai thil chi hnih chu a târ lang a—i nupui mamawh pe rawh, tih leh i taksate angin hmangaih rawh tih hi a ni. I kawppui mamawh chu engtin nge i pêk theih ang? Pêk theih dân kawng khat chu a tisa lam mamawh ngaihsak hi a ni. Paula chuan Timothea hnênah: “Tupawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a ziak a ni.—1 Timothea 5:8.
9 Amaherawhchu, chutah chuan chaw, silhfên, leh chênna in pêk mai aia tam a tel a ni. Engvângin nge? Pasal chuan a nupui tisa lam mamawh a pêk ṭhat hle laiin, a rilru lam leh thlarau lam mamawh a pêk loh theih vâng a ni. A nupui rilru lam leh thlarau lam mamawh pêk chu a pawimawh hle a. Kristian mipa tam takte chu kohhran thilah an buai thei hle tih chu a dik a. Mahse, kohhrana mawhphurhna rit tak a neih avângin pasal chuan chhûngkaw lû anga Pathian pêk a mawhphurhna chu a ngaihthah thei lo. (1 Timothea 3:5, 12) He mi chungchângah hian, kum engemaw zât liam ta khân he magazine tho hian hetiang hian a lo sawi tawh a ni: “Bible-a thil phûtte nêna inmilin, ‘berâm vênna chu in aṭanga inṭan a ni’ a tih theih ang. Upa chuan a chhûngkua a ngaihthah chuan, upa a nihna a chân thei a ni,” a ti. * Chiang takin, i nupui tisa lam, rilru lam leh, a pawimawh berah chuan a thlarau lam mamawh pêk chu i tih ngei tûr thil a ni.
I Nupui Hmangaih Tih Chu Eng Tihna Nge?
10. Engtin nge pasal chuan a nupui a hmangaih theih?
10 I nupui i hmangaih chuan ṭha takin i enkawl ang. Chu chu kawng tam takin i ti thei a. A hmasa berah chuan, i kawppui chu hun ṭhahnem tâwk hmanpui rawh. He mi kawnga i nupui i ngaihthah chuan, a hmangaihna che chu a chuai thei ang. Tin, i nupuiin hun leh ngaihsakna a mamawh zât nia i hriat chu ani’n a mamawh nia a hriat zât a ni lo thei tih hi chhinchhiah bawk rawh. I kawppui i hmangaih tih sawi mai chu a tâwk lo. I nupui chuan hmangaih nia inhriatna a nei tûr a ni. Paula chuan: “Tupawhin mahni ṭhatna tûr zawng lovin mi dang ṭhatna tûr zawng zâwk rawh se,” tiin a ziak a. (1 Korinth 10:24) Hmangaihna nei pasal i nih angin, i nupui mamawh dik tak hriat chian chu i duh ngei ang.—Philippi 2:4.
11. Engtin nge pasalin a nupui a cheibâwl dân hian Pathian leh kohhran nêna an inlaichînna a nghawng theih?
11 I nupui i hmangaihna lantîr theih dân kawng dang chu ṭawngkam leh thiltiha dimdâwihna lantîr hi a ni. (Thufingte 12:18) Paula chuan Kolossa mite hnênah: “Pasalte u, in nupuite hmangaih ula, an lakah vîn suh u,” tiin a ziak a. (Kolossa 3:19) Lehkhabu pakhat sawi dânin, Paula thusawi a tâwpna lam chu ṭawngkauchheh mawi takin “ani chu awmpui angin cheibâwl suh” emaw, “ani chu chhiahhlawhah siam suh” emaw tiin a lehlin theih a ni. Mipui hma emaw, a lang lo emawa pasal mi hnehchhiah hmang chuan a nupui a hmangaih tih a lantîr lo chiang hle. A nupui râwng taka cheibâwltu pasal chuan Pathian nêna an inlaichînna pawh a tichhe thei a ni. Tirhkoh Petera chuan pasalte hnênah heti hian lehkha a ziak a ni: “In nupuite nên in khawsak dânah bêl keh awl zâwk an nih hre thiam ula, khawngaih thilpêk nunna chanpuitu che u an nih hriain chawimawi rawh u, tichuan in ṭawngṭainate dâl a ni dâwn lo nia,” tiin. *—1 Petera 3:7.
12. Isua’n Kristian kohhran a cheibâwl dân aṭangin Kristian pasal chuan eng nge a zir theih?
12 I nupuiin a hmangaihna che chu amaha lo awm mai tûrah ngai rêng rêng suh. I hmangaih reng tih tiam nawn ṭhîn rawh. Isua chuan Kristian kohhran a cheibâwl dân aṭangin Kristian pasalte tân entawn tûr a hnutchhiah a ni. A hnungzuitute’n mize ṭha lo an lantîr fo reng chung pawhin a nunnêmin ngil a nei a, ngaihdam a peih bawk a ni. Chuvângin, Isua chuan mi dangte hnênah: “Ka hnênah lo kal ula, . . . thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang,” a ti thei a ni. (Matthaia 11:28, 29) Isua chu entawnin, Kristian pasal chuan a nupui chu Isua’n kohhranho a cheibâwl angin a cheibâwl ve tûr a ni. A nupui hmangaih tak zettu chuan, chu a hmangaihna chu ṭawngkam leh thiltihin a lantîr a; chu chu a nupui tâna hahdamna dik tak a ni ngei ang.
Bible Thu Bulte Nunpuitu Nupuite
13. Nupuite ṭanpui thei tûr eng thu bulte nge Bible-ah awm?
13 Bible-ah hian nupuite ṭanpui theitu thu bulte a awm bawk a. Ephesi 5:22-24, 33 chuan: “Nupuite u, Lalpa hnêna in intulût ang hian mahni pasalte hnênah intulût rawh u. Krista chu amah ngei taksa chhandamtu nia kohhranho lû a ni ang bawk hian, pasal chu nupui lû a ni si a. Chutichuan kohhranho Krista hnêna an intulût ang bawk hian nupuite chu engkimah an pasalte hnênah intulût rawh se. . . . A pasal hlau thiam [“zah hle,” NW] rawh se,” a ti.
14. Engvângin nge Pathian Lehkhathu-a intukluhna thu bul chu hmeichhe nihna ngaihnêpna a nih loh?
14 Paula chuan intukluhna leh zahna a sawi uar hle tih chhinchhiah rawh. Nupui chu a pasal hnuaia intulût tûra hriattîr a ni a. Hei hi Pathian ruahmanna siam nên a inmil bawk a ni. Lei leh vâna thil nung zawng zawng chu tuemaw hnuaia dah a ni a. Isua ngei pawh Pathian Jehova hnuaiah a intulût a ni. (1 Korinth 11:3) Lû a nihna ṭha taka hmangtu pasal chuan a nupui tân intukluh reng chu a tiawlsam zual ngei ang.
15. Nupuite tâna zilhna thu ṭhenkhat Bible-a hmuhte chu eng nge ni?
15 Paula chuan nupuiin a pasal a “hlau thiam,” a nih loh leh a zah hle tûr a ni tih pawh a sawi bawk a. Kristian nupui chuan “rilru thuhnuairawlh leh nunnêm” a lantîr tûr a ni a, chaldelh takin a pasal thu neihna a sawisêl emaw, mahni thu thua awm a tum emaw tûr a ni lo. (1 Petera 3:4) Pathian ṭih nupui chuan in chhûngkhur atâna thawk rimin, a lû, a nih loh leh a pasal chu a chawimawi a ni. (Tita 2:4, 5) A pasal chu a mawi zâwnga sawi a tum ang a, chutiang chuan mi dangin a pasal an ngaihnêp theihna tûr thil engmah a ti lo vang. Tin, a pasal thu tlûkna siam a hlawhtlin nân a thawk rim bawk ang.—Thufingte 14:1.
16. Kristian hmeichhiate chuan Sari leh Rebeki hnên aṭangin eng nge an zir theih?
16 Rilru thuhnuairawlh leh nunnêm nei tih chu Kristian hmeichhiain ngaih dân a nei lo emaw, a ngaihtuahna chu a pawimawh lo emaw tihna a ni lo. Hmân laia Pathian ṭih hmeichhiate zînga mi Sari leh Rebeki te chuan an rilru kamtu thilte chu an sawi chhuak a, Bible thuziak chuan Jehova’n an thiltih a pawm tih a târ lang. (Genesis 21:8-12; 27:46–28:4) Kristian hmeichhiate pawhin an rilru ngaihtuahna chu an sawi chhuak thei a ni. Amaherawhchu, ngaihnêpna aw tichhuak miah lo leh an pasalte hmangai tak chungin an sawi chhuak tûr a ni. Chutianga an tih chuan an pasalte chuan an ngaih dân chu an pawm duh tlângpui tih an hmu ang.
Intiamna Pawimawhna
17, 18. Nupui leh pasalte’n an inneihna tihchhiat tuma Setana beihna an do lêt theih dân kawng ṭhenkhat chu eng nge ni?
17 Inneih hi dam chhûng daih intiamna a ni a. Chuvângin, pasal leh nupui chuan an inneihna hlawhtlintîr duhna dik tak an nei tûr a ni. Inbiak pawhna ṭha a awm loh hian buaina a lo pungin, buaina lian tham takah a lo chang thei a. Nupate chu buaina an neih hian an inbe lo ṭhîn a, chu chuan thinurna rilrua pai rengna a thlen fo a ni. Nupa ṭhenkhat phei chuan an inlaichînna tihtâwp dân kawng dapin, an kawppui ni lo mi dangte pawh an ngaizâwng hial thei. Isua chuan: “Tupawh ngaih châka hmeichhe melh apiang chu, a thinlungah a uirê tawh reng a ni,” tiin a vaukhân a ni.—Matthaia 5:28.
18 Tirhkoh Paula chuan nupui pasal neite pawh tiamin Kristian zawng zawngte chu: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u,” tiin a zilh a ni. (Ephesi 4:26, 27) Kan hmêlma lian ber Setana chuan Kristiante inkâra inlungrual lohnate chu hman ṭangkai a tum reng a. Ani chu hlawhtlintîr suh ang che! Buaina a lo chhuah hian, chu mi chungchânga Jehova ngaih dân Bible sawite hriat nân Bible ṭanchhan thu leh hla chhuahte chu hmangin zir chîkna nei ang che. Inlungrual lohna awmte chu zaidam tak leh inpawh tawn takin sawiho rawh u. Jehova tehna i hriatte leh chu mi nunpui tûra i thiltihte inmil lohna awm apiang chu siam ṭha rawh. (Jakoba 1:22-25) In inneihna chungchângah hian, nupa kawp anga Pathian nêna lên dun chu tum tlat la, Pathianin a zawm tawh chu mihring emaw, thil dang emaw ṭhentîr suh ang che!—Mika 6:8. (w07 5/1)
[Footnote-te]
^ par. 3 Jehova Thuhretute chhuah Awake! February 8, 2002 chhuak, (English) phêk 10-naa “Inṭhenna leh Awm Hranna” tih bâwm chu en rawh.
^ par. 9 Vênnainsâng, May 15, 1989, phêk 12 (English) chu en rawh.
^ par. 11 Kristian kohhrana chanvo hlute chelh thei tûr chuan, unaupa chu “mi velh hmang”—chu chu, mi va hnek tak tak emaw, ṭawngkama tihṭhaih mi emaw tihna—a ni tûr a ni lo. Chuvângin, September 1, 1990 chhuak Vênnainsâng (English) chuan phêk 25-naah: “Mi chu hmun danga Pathian ngaihsak mi ang taka khawsa si a, in lama a nunrâwn si chuan a tling lo a ni,” a ti.—1 Timothea 3:2-5, 12.
I Hre Chhuak Em?
• Engvângin nge Kristian inneihna pawhin buaina a tawh theih?
• Engtin nge pasal chuan a nupui mamawh chu pein, a hmangaihna a lantîr theih?
• Nupui chuan a pasal a zah hle tih lantîr nân eng nge a tih theih?
• Engtin nge nupui leh pasal chuan an intiamna an tihngheh theih?
[Zirlai Atâna Zawhnate]
[Phêk 24-naa milem]
Pasal chuan a nupui tisa lam mamawh mai ni lovin, a thlarau lam mamawh pawh a ngaihsak tûr a ni
[Phêk 25-naa milem]
Kristian nupuite chuan an rilru ngaihtuahna chu zahawm takin an hriattîr