European Court Of Human Rights-a Hnehna

JANUARY 11, 2007 chuan France ram Strasbourg-a awm European Court of Human Rights chuan Russia rama Jehova Thuhretute leh Russia Ram Sawrkâr inkâra thu buai awm chu a chingfel a, Thuhretute chu inlungrual takin thiam a chantîr ta a ni. Chu thu tlûkna chuan Jehova Thuhretute tân zalên taka sakhaw biak theihna leh thleibîk nei lova rorêlna dawng tûra dikna a neih chu a kengkawh a. Chu buaina lo chhuah dân chu i lo ngaihtuah ang u.

Russia ram, Chelyabinsk khawpuia Jehova Thuhretute kohhran pakhat chu bengchhêtho inkhâwmna deuh bîk a ni a. An inkhâwmna hmun atân chuan ei zawnna atâna hna zirna hmun chu an luah hawh a ni. Chawlhni, April 16, 2000-ah chuan an inkhâwm lai chu, chu mi rambial chhûnga Human Rights Commission hotunu ber, leh police officer hlun pahnih leh tualchhûng mi anga inchei mi pakhat chuan an va tibuai a. Pâwngpaw huatna, a bîk takin an hotunu pâwngpaw huatna avângin, dân ang lova inkhâwmna neih a ni tia puhna dik lo leh siam chawp hmangin an inkhâwm chu an tihtâwpsak a. May 1, 2000 chuan an inkhâwmna in tiam chin neia an luah hawh chu an tihtâwpsak lui ta a ni.

Jehova Thuhretute chuan Chelyabinsk khawpuia sawrkâr mi rawih dân leh thupêk kêngkawhtu hnênah chuan thu buai an theh lût a; mahse, engmah a rah chhuak lo. Russia Ram Dân, leh Human Rights leh Zalênna Humhalhtu Pâwl chuan zalên taka sakhaw biak theihna leh zalên taka inhmuhkhâwm chu a phalsak a ni. Chuvângin district court-ah thu buai theh luh a ni a, chu chu regional court-ah thlen chhoh a ni. Chu mi hma, July 30, 1999 khân thu buai dangah ram rorêlna sâng ber supreme court chuan “Chhia leh ṭha hriatna hmanna leh sakhaw inhmuhkhâwmna chungchânga zalenna Russia Dân chuan ‘tihbuaina awm lovin’ tih ṭawngkam awmzia chu sakhaw lam inhmuhkhâwmna [atâna siamna] hmuna chutiang inhmuhkhâwmna nei tûr chuan sawrkâr hotute hnêna phalna lâk emaw, chutiang nei thei tûra thuneihna lâk lâwk emaw a ngai lo tihna a ni tiin a lo hrilhfiah tawh a ni.” (Brackets hi keimahni dah chawp a ni lo.) Chutiang rorêlna a lo awm reng tawh chung pawhin, district leh regional court-a thu buai thehluhte chu hnâwlsak a ni.

December 17, 2001-ah chuan thu buai chu European Court of Human Rights hnêna thlen a ni a. September 9, 2004-ah thu buai chu ngaihtuah ṭan a ni. A hnuaia thute hi chu mi Court thu tlûkna siamte aṭanga lâk chhuah a ni:

“April 16, 2000-ah sawrkâr hotute chuan thu buai thehlûttute neih zalên taka sakhaw biak theihna chu va tibuaiin, a hun tâwp hmain an inkhâwmna chu an tihtâwpsak ngei a ni tih Court chuan a hmu.”

“Sakhaw biakna hmun atâna dân ang taka luah hawhna hmuna sakhaw thiltih lai tidarh tûrin dân ṭanchhan tûr a awm lo tih a chiang.”

“[Court chuan] Russia Supreme Court-in sakhaw lam inhmuhkhâwm nân sawrkâr hotute hnêna phalna lâk lâwk emaw, hriat lâwktîr emaw a ngai lo tih awmze neiin thu tlûkna a lo siam tawh ṭhîn tih a hria.”

“Chuvângin, Human Rights leh Zalênna Humhalhtu Pâwl siam Article 9-na [zalên taka sakhaw biak theihna] chu thu buai theh lûttute sakhaw lam inkhâwmna April 16, 2000-a Commission hotunu ber leh a ṭhuih hruaite’n an va tihbuai khân bawhchhiat a ni.”

“Court chuan ram chhûnga court-te’n . . . thu buai chu dik tak leh thleibîk nei lovin a ngaihthlâksak lo tih a hmu. . . . Human Rights leh Zalênna Humhalhtu Pâwl siam Article 6-na [rorêlna dik dawng tûra dikna an neih] chu bawh chhiatsak a ni.”

Jehova Thuhretute chu European Court of Human Rights-a hnehna Pathianin a pêk avângin a chungah an lâwm hle a ni. (Sâm 98:⁠1) Chu Court thu tlûkna siam chuan eng anga zauvin nge nghawng a neih dâwn? Institute on Religion and Public Policy-a an hotupa ber Joseph K. Grieboski-a chuan: “Chu thu tlûkna chuan European Court of Human Rights hnuaia awm ram zawng zawnga sakhaw lama dikna chu a nghawng dâwn avângin, hei hi Europe ram zawng zawnga sakhaw zalenna nghawngtu tûr thu tlûkna pawimawh tak dang a ni,” a ti. (w07 6/1)