Lei Thiltihtheihna

GIRAFFE (Africa ram sanghâwngsei) lei hi inchi 18-a sei a ni a, thing kûnga thing hnahte thliak thei khawpin a chakin, a ṭuan a ṭha a ni. Blue whale sanghapui lei hi sai pakhat tluk zeta rit a ni a. Chu mi tihsawn nân ringawt pawha chakna thahrui ngai tûr chu han ngaihtuah teh!

Chûngte nêna khaikhin chuan, mihring lei lenzâwng te, rihzâwng te, leh chakzâwngte hi eng tham mah niin a lang lo. Mahse, thil a tithei zâwk fê a ni. Bible chuan he mihring taksa pêng te tak tê chungchângah hian: “Lei thiltihtheihnaah chuan thihna leh nunna a awm,” tiin a sawi. (Thufingte 18:21) Dâwt thu phuahchawp leh thu dik lo hmanga mihring lei thihna tûr pai chuan pawisawi lote tâna chhiatna, thihna hial pawh a thlen thu kan hre zing hle a ni lâwm ni?

Chutiang bawk chuan, kum rei tak chhûng inṭhian ṭhatna chu ṭawngkam na tak mai chuan a tichhia a. Ṭawngkam thin khei tak chuan mite rilru a tina hle ṭhîn bawk. Ṭhiante sawi chhiatna nasa tak tâwktu Joba chu: “Eng chen nge mi tihhrehawm ang a, thutea mi vuak vual dâwn?” tiin a au chhuak hial a ni. (Joba 19:⁠2) Zirtîr Jakoba chuan lei vên ṭhat lohvin thil a tihchhiat theihzia chiang takin a târ lang a: “Lei . . . hi taksa pêng te tak tê a ni a, nasa takin a uang ṭhîn. Ngai teh u, mei te tak têin thing a va tikâng nasa êm? Tin, lei hi mei a ni,” tiin.​—⁠Jakoba 3:​5, 6.

Kawng lehlamah chuan, lei thiltihtheihna chu nunna petu pawh a ni thei bawk. Khawngaih ṭawngkam leh mi hnêm thei ṭawngkam chuan mi ṭhenkhatte chu rilru hahna leh mahni intihhlumna lak ata a chhan chhuak hial thei a. Zawm a nih chuan, thurâwn ṭha tak chuan ruihhlo ngaite leh khawlaia mi sual nunrâwng takte pawh a hun hmaa thihna tûr ata a chhanhim thei a ni. Dik takin, mi dik lei chu “nunna thing” leh “tangkaraw bâwma rangkachak apple ang” a ni.​—⁠Thufingte 15:4; 25:⁠11.

Mahse, lei hman dân ṭha ber chu Pathian Jehova fak nân te, Pathian Lalram chanchin ṭha puan chhuah nân te, leh Bible thutak hlu takte mi dangte zirtîr nân tea hman chu a ni. Engvângin nge? Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tia a sawi avângin.​—⁠Johana 17:3; Matthaia 24:14; 28:​19, 20. (w07 6/1)