Sual—Thunun Theih Loh A Ni Em?
Sual—Thunun Theih Loh A Ni Em?
Thil chîk duh mipa naupang chuan lovah thil pakhat—leia phûm chi bomb—chu a chhar a, chu chuan a mit a tidelin, a dam chhûng zawnga ramtuileilovah a siam. Nausên piang hlim chu a nuin kawng sîr bawlhhlawh zînga thukrûin a kalsan. A hnathawh lai chântu chuan a hnathawhna hmuna a hmuh apiang kâp hlumin a tâwpah a inkâp hlum ve nghâl. Mi zahkai tak chuan chhantu nei lo naupangte chu mipat hmeichhiatna a hmanpui.
KAN hun laia hetiang thil sual tihna chanchin kan hre zîng lutuk hi a lungchhiatthlâk hle mai. A aia lungchhiatthlâk lehzual chu, hêng chanchinte hi hnam insuatna leh fîrfiaka chêtna te’n a hliahkhuh fo hi a ni. Kum 1995-a chhuak editor thu khawchâng pakhat chuan: “A chhiat lai berah chuan tûn kum zabi hi Setana kum zabi a ni. Hnam te, sakhuana te emaw, nihna te emaw avânga mi dang maktaduai têl tihhlumna kawngah tûn ang tluka thiamna leh châkna chu tûn hmaa mite chuan an nei ngai lo,” a ti.
Chutih rual chuan, mihringte chuan boruak leh lei an tibawlhhlawh a, leilung hausakna tikiamin, nungcha tam takte chu an timang ṭêp tawh a ni. Mihringte hian hêng sual zawng zawng hi hnehin, khawvêl ṭha zâwk leh him zâwk an siam thei ang em? Nge, chutianga tih tum chu thil theih loh hulhual tûr tih tum ang lek ni dâwn? Sual chungchâng bîk ziaktu Professor pakhat chuan: “Khawvêl tihhmasâwn nâna inthlâk thlengna lian tham tak neih nghâl a ngai tih hre mah ila, khawvêl hian ṭhat lam a pan chak lo hle,” a ti. Chutiang chu i ngaih dân a ni ve mai thei.
Khawvêlin chhiat lam a pan dân chu a ni têla buai leh hlauhawm lam pan tial tial tuifinriat lam pantu lawng nêna tehkhin theih a ni a. Tumahin chu mi lam pan chu duh lo mah se, a kawng thlâk tûra ṭan lâkna zawng zawng chu a hlawhchham a. Lawng chuan thlipui hlauhawm tak lam chu a pan a, dan theih rual a ni lo.
Hetianga dinhmunin chhiat lam a pan zual zêl chhan chu engemaw chenah chuan mihringte ṭhat famkim loh vâng a tih theih ang. (Rom 3:23) Chutichung pawhin, sual a nasatzia leh a nunrâwnzia hi mihringte chauh awmtîr mai a nih hmêl loh hle. Mihringte chu hmuh theih loh sual thiltithei takin a thunun a ni thei ang em? Chutiang a nih chuan, chu chu eng nge a nih a, engtin nge a laka kan invênhim theih ang? A dawta thuziak hian hêng zawhnate hi a chhâng ang. (w07 6/1)
[Phêk 3-naa Milem Hawhtîrtu]
© Heldur Netocny/Panos Pictures