Thawhlehna—I Tân a Tak Em?
Thawhlehna—I Tân a Tak Em?
“Thawhlehna a awm ang.”—TIRHKOHTE 24:15.
1. Engvângin nge thihna chu pumpelh theih loh thil nia a lan?
“HE KHAWVELAH hian thihna leh chhiah chawi tih loh chu pumpelh theih loh thil engmah a awm lo.” He thu hi kum 1789-a America ram veimi mi lâr tak Benjamin Franklin-a ziak a ni a, chuvângin mi ṭhenkhatte chuan ani chu mi chinchâng hre tak angin an ngaihphah a ni. Amaherawhchu, mi rinawm lo tam tak chuan an chhiah chawi tûr an pe lo emaw, an pe kim lo emaw ṭhîn a. Chuvângin, thihna chu pumpelh theih loh thil ni zâwk fê niin a lang. Ṭanpuina tel lo chuan, tumahin thihna chu kan pumpelh thei lo va. Kan zaa chungah a lo thleng ṭhîn. Tâwk tih rêng nei lo Sheol—mihringte thlân pângngai—chuan kan hmangaihte chu a lem ṭhîn a ni. (Thufingte 27:20) Mahse, he thil thlamuanthlâk tak hi han ngaihtuah teh.
2, 3. (a) Engvângin nge thihna chu mi tam takte ngaih angin pumpelh theih loh thil a nih loh? (b) He thuziakah hian eng nge kan ngaihtuah ang?
2 Jehova Thu chuan thawhlehna—nunnaa kaihthawh leh—beiseina chiang tak chu min pe a. Hei hi duhthusâm thil mai a ni lo va, he beiseina a taka chantîr lo tûrin Jehova chu lei leh vâna chakna engmahin a dang thei lo. Mahse, ṭhenkhat tân chuan thihna chu tûn laia mi tam takte ngaih angin pumpelh theih loh thil a ni lo. Engvângin nge? “Mipui tam tak” tuma chhiarsên lohte chu lo thleng mai tûr “hrehawm nasa tak” ata an dam khawchhuah dâwn avângin. (Thu Puan 7:9, 10, 14) Chu mi hnuah chuan chatuana nun beiseina neiin an nung ang. Chuvângin, anni tân chuan thihna chu pumpelh theih loh thil a ni lo. Chu bâkah, “tihbova awm tûr chu thihna hi a ni.”—1 Korinth 15:26.
3 “Mi felte leh fel lote thawhlehna a awm ang,” titu tirhkoh Paula angin, thawhlehna chu a lo thleng ngei dâwn tih kan chian ve a ngai a. (Tirhkohte 24:15) Thawhlehna chungchânga zawhna pathum i lo ngaihtuah ang u. A hmasain, engin nge he beiseina hi thil lo thleng ngei tûr a ni tih tichiang êm êm? A pahnihnaah, engtin nge thawhleh beiseinaah nangmah ngeia thlamuanna i neih theih? A pathumnaah chuan, engtin nge he beiseina hian tûna i nun dân chu a nghawng theih?, tihte hi.
Thawhlehna—Thil Lo Thleng Ngei Tûr Chu
4. Engtin nge thawhlehna chu Jehova thiltum pawimawh tak a nih?
4 Thawhlehna a lo thleng ngei dâwn tih tichiangtu thil tam tak a awm a. A bul berah chuan, hei hi Jehova thiltum pawimawh tak a ni. Setana’n mihringte chu sualah a hruai lût a, pumpelh theih loh thihna a thlen a ni tih chu hre reng rawh. Chuvângin, Isua chuan Setana chu: “Ani chu atîr ata tualthat a ni,” a Johana 8:44) Mahse, Jehova chuan a “hmeichhia,” a nih loh leh vâna awm a nupui ang inawpna pâwlin “rulpui tar” lû tithitling a, Setana tiboral ṭhaktu tûr “thlah” a hring ang tih a tiam a. (Genesis 3:1-6, 15; Thu Puan 12:9, 10; 20:10) Jehova’n chu Thlah Messia chungchânga a thiltum chu zawi zawia a târ lan chuan, chu Thlah chuan Setana tihboral mai aia tam a ti dâwn tih a lo lang tial tial a ni. Pathian Lehkha Thu chuan: “Pathian Fapa lo lan chhan ber chu diabola hnathawhte a tihboral theih nân a ni,” a ti. (1 Johana 3:8) Adama hnên aṭanga kan rochun sualin a awmtîr thihna chu, Jehova’n Isua kal tlanga sût lêt, a nih loh leh tihboral a tum Setana hnathawhte zînga langsâr ber a ni. He mi chungchângah hian, Isua tlanna inthawina leh a thawhlehna chu a pawimawh hle.—Tirhkohte 2:22-24; Rom 6:23.
ti. (5. Engvângin nge thawhlehna chuan Jehova hming a chawimawi ang?
5 Jehova chuan a hming thianghlim chu chawimawi a tum tlat. Setana’n Pathian hming chu sawichhiain, dâwt thu a thehdarh a. Adama leh Evi’n Pathian khap thei rah an ei chuan an ‘thi lo vang’ tiin dâwt a sawi a ni. (Genesis 2:16, 17; 3:4) Chutaṭang chuan, Setana’n chutiang bawk dâwt thu, taksa thih hnuaa thlarau la dam zêl tih zirtîrna ang chi zirtîrna dik lote chu a sawi chho zêl a. Amaherawhchu, thawhlehna hmangin Jehova chuan chûng dâwt thu zawng zawngte nihna chu a lai lang vek ang a. Amah chauh chu nunna Humtu leh Tungding lehtu a nihzia chatuan atân a târ lang ang.
6, 7. Engtin nge Jehova’n mite kaihthawh leh chungchâng chu a ngaih a, engtin nge a rilru chu kan hriat theih?
6 Jehova chuan mi kaihthawhleh a châk ngawih ngawih. Bible chuan he mi chungchânga Jehova rilru chu chiang takin a târ lang. Entîr nân, mi rinawm Joba thâwk khum thute hi han ngaihtuah teh: “Mi a thih chuan a nung leh ang em ni? Ka hun ruat chhûng hi chuan ka nghâk ang, ka chhuahna a thlen thlengin. Mi ko vang a, keiin ka chhâng ang che; I kut hnathawh i ngaina [“châk ngawih ngawih,” NW] a ni,” tih hi. (Joba 14:14, 15) Hêng thute hian eng awmzia nge a neih?
7 Joba chuan a thih hnuah hun engemawti chhûng chu thihnaa muhîlin a nghah a ngai dâwn tih a hria a. Ani chuan chu hun chu a chhuah hun a thlen hmaa a awm ngei ngeina tûr “hun ruat” angin a thlîr a ni. Atân chuan chu chhuahna chu thil lo thleng ngei tûr a ni a. Joba chuan a chhuahna hun chu a lo thleng dâwn tih a hria a ni. Engvângin nge? Jehova rilru a hriat vâng a ni a. Jehova chuan a chhiahhlawh rinawm hmuh leh chu a “châk ngawih ngawih” a ni. Ni e, Pathian chuan mi rinawm zawng zawngte kaihthawh leh hlân chu a nghâkhlel hle. Jehova chuan mi dangte pawh lei Paradis-a chatuana nun theihna hun remchâng a pe bawk ang. (Luka 23:43; Johana 5:28, 29) Chu thiltum hlen chhuah chu Pathian duhzâwng a nih avângin, tuin nge dang thei tehlul ang?
8. Engtin nge Jehova’n kan nakin hun beiseina chu a ‘nemngheh’?
8 Kan nakin hun beiseina chu Isua thawhlehna hian a nemnghet. Paula chuan Atheni khuaa mite hnênah thu sawiin: “Chu mi niah chuan [Pathian] mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kai thovin, mi zawng zawng hnênah a hriattîr [“nemnghet,” NW] tawh a ni,” tih a puang chhuak a ni. (Tirhkohte 17:31) Paula thusawi ngaithlatu zînga ṭhenkhat chuan thawhlehna thu an hriatin an nuihzat a. Mahse, ṭhenkhat chu ringtu an lo ni a. He beiseina hi nemngheh a ni a tih hian an rilru a la a ni ngei ang. Jehova’n Isua a kaihthawh khân, thilmak ropui ber chu a ti a. A Fapa chu thihna ata thlarau thiltithei takah a kai tho a ni. (1 Petera 3:18) Kaihthawh leh Isua chu mihring a rawn nih hma aiin a ropui zâwk daih a. Isua chu thi thei lo leh Jehova dawta thiltihtheitu ber niin, tûnah chuan a Pa pêk chanvo ropui tak thawk thei dinhmunah a ding ta a ni. Isua chu—vân nunna emaw, lei nunna emaw pawh ni se—thawhlehna dang zawng zawng thlentîrtu atâna Jehova mi hman a ni. Amah ngei chuan: “Kei hi thawhlehna leh nunna chu ka ni,” a ti. (Johana 5:25; 11:25) Jehova chuan a Fapa kai thovin, mi rinawm zawng zawngte tân chutiang beiseina chu a nemnghet a ni.
9. Engtin nge Bible-a thawhlehna chhinchhiahte chuan a lo thleng ngei dâwn tih a nemngheh?
Johana 11:17-44, 53; 12:9-11) Ni e, thawhlehna chu thil lo thleng ngei tûr a ni tih kan ring tlat thei a. Pathian chuan min thlamuan tûr leh kan rinna tichak tûrin, hmân laia thawhlehna thlengte chu a lo chhinchhiahtîr a ni.
9 Thawhlehna chu mite mit hmuh ngeia thleng a ni a, Pathian Lehkha Thua chhinchhiah a ni bawk. Bible-ah chuan lei hring nuna kaihthawh leh mi pariatte chanchin chipchiar tak chu a chuang a. Hêng thilmakte hi a rûk a râla tih ni lovin, a lang a pauva tih a ni a, mite mithmuh ngeia tih a ni fo. Isua’n ni li lai thi tawh Lazara chu a sûntu mipui—a chhûngte, a ṭhiante, leh ṭhenawmte pawh an tel ngei ang a, anni—hmaah a kaitho a ni. Chu chuan Isua chu Pathian tirh a nihzia a finfiah chian êm avângin, a hmêlma sakhaw hruaitute pawhin chu thilthleng chu an hnâwl thei lo. Isua chauh ni lo, Lazara ngei pawh tihlum tûrin ruahmanna an siam ta zâwk a ni. (Thawhleh Beiseinaa Tlamuanna Hmuin
10. Bible-a thawhlehna chanchinte aṭanga thlamuanna hmu tûrin engin nge min ṭanpui ang?
10 Thihna i hmachhawn huna thlamuanna neih chu i châk em? Thlamuanna rin tlâk pakhat chu Bible-a chhinchhiah thawhlehna chanchinah hian a hmuh theih a ni. Chûng chanchinte chhiar a, chhût ngun a, thilthlengte han mitthlana chuan i tân thawhleh beiseina chu thilthleng tak tak tûr a nihtîr lehzual thei a ni. (Rom 15:4) Hêngte hi thawnthu mai a ni lo. Keimahni ang mihring tak tak, awmna leh awm hun nei tak takte chunga thilthleng a ni. Entîrna pakhat chu tâwi têin i lo ngaihtuah ang u—Bible-a chhinchhiah thawhlehna thleng hmasa ber chu.
11, 12. (a) Zarephath hmeithai chungah eng chhiatna râpthlâk tak nge thleng a, atîrah chuan engtin nge a chhân lêt? (b) Hmeithai tâna thiltihsak tûra Jehova’n a chhiahhlawh Elija hnêna thiltihtheihna a pêk chu sawi rawh.
11 Thil awm dân chu han mitthla teh. Elija chu Zarephath hmeithai ina mikhual a nihna chawlhkâr engemaw zât a liam tawh a, a pindan chungnungah chuan a chêng a ni. Chu hun chu hun chhe tak a ni a. Chu ram leh a vêlah chuan khua a khêngin, ṭâm a tla bawk a. Mi tam takin an thih phah hial a ni. Jehova’n he hmeithai tlâwm tak rinna malsâwm tûr hian hun rei tak chhûng awh thilmak ti tûrin Elija chu a hmang reng tawh a. Hmeithai chu chhangphut leh sahriak neihtîr reng tûra Pathianin Elija hnêna thiltihtheihna a pêk lai khân, hmeithai leh a fa mipa naupang chu an ṭâm ṭêp tawh a, chaw vawikhat ei tûr chauh an nei tawh a ni. Mahse, tûnah chuan hmeithai chungah chuan chhiatna râpthlâk tak a lo thleng ta. Naupang chu a dam lo thut a, a hnu lawkah chuan a thaw ta lo mai a. Hmeithai chu a va lungngai tak êm! Pasal ṭanpuina tel lova nun a harsat tawh nâk laiin, tûnah chuan a fapa neihchhun pawh a chân lehnghâl bawk si a. A lungngaihna a nasat êm avângin Elija leh a Pathian, Jehova chu a mawhchhiat hial a! Zâwlnei chuan eng nge a tih tâk ang?
12 Elija chuan hmeithai chu dik lo taka a puhna avângin a zilh lo va. Chu aimah chuan: “I fapa chu mi han pe teh,” a ti zâwk a. A awmna pindana naupang chu a pawm chhoh hnuah, a lo nun lehna tûrin Elija chu a ṭawngṭai nawn mawlh mawlh a. A tâwpah chuan Jehova chuan thil a ti ta! Naupangin thaw a lâk avângin a âwm bâwr chu a lo sâng chho va, chu mi a han hmuha Elija hlim hmêl tûr chu han ngaihtuah chhin teh. Naupangin a mit a han khap a, fiah takin a rawn meng a. Elija chuan naupang chu a nu hnênah a chhukpui a: “En teh, i fapa hi a dam leh ta e,” a ti a. A nu hlim dân chu sawiin a siak lo. Ani chuan: “Tûnah zet chuan Pathian mi i ni a, i kâa LALPA thu hi thutak a ni tih ka lo hre ta,” a ti a ni. (1 Lalte 17:8-24) Jehova leh a aiawhtu a rinna chu a nghet lehzual ta a ni.
13. Engvângin nge Elija’n hmeithai fapa a kaihthawhna chanchin chu tûn laiah kan tân thlamuanna a nih?
13 Chûng chanchinte chhût ngunna chuan thlamuanna nasa tak a pe ngei ang che. Jehova’n kan hmêlma thihna a hneh thei tih chu a va lang chiang tak êm! Mitthi kaihthawh huna leia chêng mi sâng tam takin hmeithai nu hlimna ang an tawn ve hun tûr chu han mitthla chhin teh! Khawvêl huapa thawhlehna thlentîr Johana 5:28, 29) Thihna hian i hmangaih tuemaw nunna chu a la em? Jehova’n mitthite chu a kaitho theiin, a kaitho dâwn tih hriat chu a va ropui tak êm!
tûra Jehova’n lâwm taka a Fapa a kaihhruai hunah chuan vâna hlimna pawh chu a nasa hle ang. (I Beiseina leh Tûna I Nun
14. Engtin nge thawhleh beiseina chuan i nun a nghawng theih?
14 Engtin nge thawhleh beiseina chuan tûna i nun dân chu a nghawng theih? Harsatna te, buaina te, tihduhdahna te, a nih loh leh thil hlauhawm te i hmachhawnin, he beiseina aṭang hian chakna i nei thei a. Setana chuan i rinawmna chu himna tiamkamna thlâwn mai mai ṭhenkhat nêna thlâkthleng duh tûr khawpa thihna i râp chu a duh a ni. Setana’n Jehova hnênah: “Miin a neih zawng zawng a nunna atân a pe phal ang chu!,” tiin a sawi tih hre reng rawh. (Joba 2:4) Chutiang thu chu sawiin, Setana chuan nangmah ngei pawh tiamin, kan vaiin min sawichhe tel a ni. Hlauhawm i hmachhawn hunah chuan Pathian rawng i bâwlna chu i bânsan ang em? Thawhleh beiseina ngaihtuahin, i Pa vâna mi duhzâwng tih zawm zêl chu i tum nghet sauh thei a ni.
15. Engvângin nge Setana emaw, a mi hmante emaw chu kan hlauh loh vang?
15 Setana emaw, a mi hmante emaw chu kan hlauh a ngai lo. Ṭhenkhat chuan min tinâin, mi tihlum hial thei ngei ang. Mahse, an tihtheih a chhe ber pawh chu rei lo tê atân chauh a ni. Jehova chuan a chhiahhlawh rinawmte chunga tihchhiatna engpawh a sût lêt leh theiin, a sût lêt leh ngei dâwn a, thihna aṭangin a kaitho hial dâwn a ni. Jehova chauhvin kan ṭih, kan ngaihhlutna, leh kan zah chu a phu a. Amah chauhvin nakin nun beiseina zawng zawng chawpin nunna chu a la bo thei a ni. Lâwmawm takin, Jehova chuan chutiang thil i chunga a thlen chu a duh lo. (2 Petera 3:9) Thawhleh beiseina avângin, keini Pathian chhiahhlawhte hian engtik lai pawhin kan him reng tih kan hre thei a ni. Kan rinawm phawt chuan chatuan nunna chu kan hmaah a awm a, chu mi chungchângah Setana leh a chhiahhlawhte chuan engmah tih theih an nei lo.—Sâm 118:6; Hebrai 13:6.
16. Engtin nge thawhlehna kan thlîr dân chuan thil ngaih pawimawh dân indawt kan siam chu a nghawng?
16 Thawhlehna chu kan tân beiseina dik tak a nih chuan, chu chuan nunna chungchânga kan rilru put hmang chu a siam danglam thei a. ‘Kan nun pawhin, kan thih pawhin Jehova ta kan ni,’ tih chu kan hre thei a ni. (Rom 14:7, 8) Chuvângin, thil ngaih pawimawh dân indawta kan siamnaah, Paula fuihna hi kan nunpui a ni: “He khawvêl dân ang hian awm suh ula; Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru athara awmin lo danglam zâwk tawh rawh u,” tih hi. (Rom 12:2) Mi tam takte chuan an châkzâwng apiang, an thiltum apiang, an duhzâwng lo awm apiangte chu phuhru tûrin an bawh huam huam a. Nun hi tawi tak anga an thlîr avângin, an nuam tihzâwng ûmnaah pawisak pawh nei tawh lo ni hialin an lang a, sakhaw ngaihsak anna an neih pawhin, chu chu “Pathian duhzâwng” mil a ni lo.
17, 18. (a) Engtin nge Jehova Thu chuan mihring dam rei lohzia chu a sawi a; mahse, eng nge Pathianin kan tân min duhsak? (b) Engvângin nge nî tin Jehova chawimawi tûra chêttîr kan nih?
17 Nun chu a tawi ngei mai a. Kum 70 emaw, 80 emaw vêl chu “a ral thuai a, keini pawh kan thlâwk bo ṭhîn a nih hi.” (Sâm 90:10) Mihringte chu hlobet hring ang, hlimthla ral ṭhîn ang, leh engmah lo mai angin an lo piang a, mual an liam leh mai ṭhîn. (Sâm 103:15; 144:3, 4) Mahse, mihringte hi kum sâwmbi tlêm te chhûnga lo seilian a, finna leh thiltawn ṭhenkhat nei a, a hnu kum sâwmbi tlêm tê chhunga chhiat lam pan zêla a tâwpa natna leh thihna tawrh mai chu kan tâna Pathian thiltum a ni lo. Jehova chuan mihringte chu chatuana nun châkna neiin a siam a. Bible chuan Pathianin “mihring rilruah chuan chatuan a dah” tih min hrilh a ni. (Thuhriltu 3:11) Chutiang châkna min pe sauh sauh va, nei thei lo tûra min awmtîr leh si tûrin Pathian chu a nunrâwng em? Nunrâwng lo ve, dik tak chuan “Pathian chu hmangaihna a ni.” (1 Johana 4:8) Ani chuan thi tawhte’n chatuana nunna an neih theih nân thawhlehna chu a hmang dâwn a ni.
18 Thawhleh beiseina avângin, nakin hun him tak chu kan nei thei a. Tûn la laa hma kan sâwn theihna tûr ûm huam huam a ngai lo va. He khawvêl boral mêk hi kan “hmang lutuk” tûr a ni hek lo. (1 Korinth 7:29-31; 1 Johana 2:17) Beiseina dik tak nei lote ang lovin, keini chuan Pathian Jehova chunga kan rinawm chuan, amah chawimawi nân leh nunna kan chen nân chatuanin hun kan nei dâwn a ni tih hriatna thilpêk ropui tak chu kan nei a ni. Chuvângin, thawhleh beiseina chu thil lo thleng ngei ngei tûr nihtîrtu Jehova chu nî tin i chawimawi ang u! (w07 5/15)
Engtin Nge I Chhân Ang?
• Thawhlehna chu engtin nge kan ngaih ang?
• Eng thilte’n nge thawhleh beiseina chu thil lo thleng ngei ngei tûr a ni tih tichiang?
• Engtin nge thawhleh beiseina aṭangin thlamuanna i hmuh theih?
• Thawhleh beiseina chuan i nun dânah nghawng eng nge a neih ang?
[Zirlai Atâna Zawhnate]
[Phêk 20-naa milem]
Joba chuan Jehova’n mi felte kaihtawh chu a châk ngawih ngawih tih a hria
[Phêk 20-naa milem]
“En teh, i fapa hi a dam leh ta e”