“Ṭawnga Ṭhen Hran, Hmangaihnaa Inpumkhat”

Chhan chhuahna. Zalênna. Chhandamna. Kum zabi tam tak chhûng chu mite chuan phurrit leh manganna ata chhuah zalen an nih hlân an nghâkhlel hle a. Engtin nge nuna harsatnate kan tuar theih ang? Chhan chhuahna a lo thleng ngei ang em? A lo thleng ngai dâwn a nih chuan, engtin nge a lo thlen ang?

CHU chu May 2006-a inṭan, ni thum chhûng awh Jehova Thuhretute district inkhâwmpuia thusawite zînga mi chu a ni. A thupui chu “Chhan Chhuahna A Hnai!” tih a ni.

He mi inkhâwmpui zînga pakuate chu ram hrang hrang aṭanga lo kal palai sâng tam takte’n an chhim a ni. Chûng chu kum 2006 July leh August thla chhûng khân Czech Republic khawpui Prague-ah te; Slovakia khawpui Bratislava-ah te; Poland ram Chorzow leh Poznan-ah te; * leh German ram khawpui panga​—⁠Dortmund, Frankfurt, Hamburg, Leipzig, leh Munich-ah te neih a ni a. He inkhâwmpuia telte belhkhâwm chu 313,000 a chuang a ni.

Inkhâwmpuinaahte chuan eng ang boruak nge awm? Chanchin thehdarhna lam chuan eng angin nge an chanchin a târ lan? Inkhâwmpui rawn chhimtute chuan a tâwpah inkhâwmpui chu engtin nge an ngaih?

Inbuatsaihnate

A tlawhtute leh tualchhûnga Thuhretute chuan inkhâwmpuite chu thlarau lam thilthleng hriatreng tlâk a nih dâwn avângin an nghâkhlel hle a. Hmun dang aṭanga lo kal inkhâwmpui chhimtu zawng zawngte tâna thlenna tûr ruahmansak chu hna lian tak a tling a ni. Entîr nân, Chorzow inkhâwmpui atân chuan Poland rama Thuhretute chuan Europe Khawchhak lam aṭanga lo kal mikhual 13,000 dâwn laite chu an thleng a. Chu inkhâwmpuiah chuan Armenia te, Belarus te, Estonia te, Georgia te, Kazakhstan te, Kyrgyzstan te, Latvia te, Lithuania te, Moldova te, Russia te, Tajikistan te, Turkmenistan te, Ukraine te, United States te, leh Uzbekistan te aṭangin an rawn tel a ni.

Inkhâwmpui chhimtu tam takte chu an zinna tûr atân chuan thla engemaw zât an lo inbuatsaih lâwk a ngai a. Tatiana-i chu Japan hmâr chhak lama awm Russia ram Kamchatka hmuna hun bikima chanchin ṭha hriltu a ni a, inkhâwmpui kal thei tûrin kum khat chhûng a lo inkhâwl lâwk a ni. Ani chu kilometer 10,500 lai a zin a ngai a. Thlawhnain  dârkâr 5 a thlâwk phawt a; chu mi hnuah rêlin ni thum deuh thaw a zin leh a; tin, a tâwpah chuan Chorzow thleng tûrin Bus-in darkâr 30 a zin leh a ni.

Inkhâwmpui ṭan hmaa hna ṭûl ang angte thawk a, chu khêlmual leh a hual vêlte chu Pathian biakna tûr hmun ni thei tûra lo siam tûrin, mi sâng tam takte chu an inpe a ni. (Deuteronomy 23:14) Entîrna pakhat chauh târ lang ta ila, Leipzig-ah chuan tualchhûnga Thuhretute chuan inkhâwmpui neihna hmun tûr khêlmual chu tifaiin hna ṭha tak an thawk a, inkhâwmpui a zawh hunah pawh tihfai leh an intiam bawk a ni. Chu mi avâng chuan, chu khêlmual thuneitute chuan luahhawh man zînga tihfaina man an belh ṭhin chu an belh ta lo a ni.

Sâwmnate

Khawvêl pum puia kohhrante chuan “Chhan Chhuahna A Hnai!” tih Inkhâwmpui chungchâng chu an puang darh zau hle a. He mi abîk taka neih inkhâwmpuia tel tûrte chu campaign-naah chuan phûr takin an tel a ni. Inkhâwmpui ṭan a nih hma zân thlengin inkhâwmpui lo awm tûr chungchâng chu an puang chhunzawm zêl a. An ṭhahnemngaihna chuan rah ṭha a chhuah em?

Poland mi Thuhretu pakhat, Bogdan-a chuan putar pakhat inkhâwmpuinaa kal duh a tâwk a; mahse, a pension hmuh tlêm tê chu mêl 75 laia hla Chorzow kalna atân a daih lo a ni. Tualchhûng kohhranin bus an hawhah chuan ṭhutna pakhat a ruak ta hlauh mai a. Bogdan-a chuan heti hian a sawi: “Chu pa hnênah chuan chhuahna tûr hmuna zîng 5:​30-a a lo kal chuan kan rualin a thlâwna a kal ve theih tûr thu kan hrilh a,” tiin. Chu pa chuan sâwmna chu pawmin, inkhâwmpuinaah chuan a tel ve ta a ni. A hnuah unaute hnênah: “He inkhâwmpuia ka tel hnuah hian, mi ṭha zâwk nih ka tum tlat a ni,” tiin a ziak a ni.

Prague khua hotel pakhat, Britain ram aṭanga inkhâwmpui chhim tûra lo kalte thlennaa thleng ve mi pakhat chuan tlai khat chu chu mi nia inkhâwmpuinaa a tel thu inkhâwm chhimtute hnênah a hrilh a. Engin nge chuta teltîr le? Chu pa chuan kal kawngah thuchhuahtu sâwm lai mai hnên aṭanga inkhâwmpui sâwmna a dawn hnuah chuan kal lo thei a nih loh thu a hrilh a nih chu! A rilru a hneh hle a, zir belh chu a châk ta a ni.​—⁠1 Timothea 2:​3, 4.

Bible Zirtîrna Ṭha Tak

Inkhâwmpuinaah chuan harsatna chi hrang hrang chinfel dânte ngaihthlâk a ni a. Bible châng ṭan chhan thusawi tlang takte chuan harsatna tawhte chinfel dân emaw, tawrh chhuah dân emaw chu a hrilhfiah a ni.

Tarna te, hrisêl lohna te, hmangaih tak thihna te, a nih loh leh mi mal harsatna dang tuartute chuan an harh chhuah theih nân Bible aṭanga fuihna an dawng a ni. (Sâm 72:​12-14) Nupate leh nu leh pate chuan nupa nun hlim tak neih dân te leh fate hlawhtling taka enkawl chhoh dân chungchânga Bible zilhnate chu an ngaithla a ni. (Thuhriltu 4:12; Ephesi 5:​22, 25; Kolossa 3:21) Kristian naupang​—⁠in lam leh kohhrana Pathian Thu zilhna fing tak dawng si a, school-a an rualpuite nêksâwrna ṭha lo tak hmachhawntu​—⁠te chuan an ṭhiante nêksâwrna hmachhawn dân leh “tleirâwl châknate . . . tlânsan” dân zirtîrna chhawr tlâk tak an dawng a ni.​—⁠2 Timothea 2:⁠22.

Khawvêl Puma Inunauna Dik Tak

Jehova Thuhretute chuan an inkhâwmnaah  Pathian thu kaihhruaina chhawr tlâk tak chu an dawng fo ṭhîn a. (2 Timothea 3:16) Amaherawhchu, hêng inkhâwmpuite danglam bîk tak nihtîrtu chu khawvêl pum puia mite an tel vâng a ni. Hêng a bîka neih inkhâwmpui zawng zawngte hian ṭawng chi hrang tam takin thlarau lam chaw thuhmun chu a pe chhuak a. Nî tina Jehova Thuhretute Governing Body zînga mite thusawi leh ram dang aṭanga thu dawnte chuan a tiphûrawm zual a ni. Hêng thusawite leh thu dawnte hi chu mi hmuna tel ṭawng hrang hrang hmangte’n an hlâwkpui atân lehlinsak a ni bawk.

Inkhâwmpui chhimtute chuan ram dang aṭanga lo kal an unaute hmuh chu an châk hle a. Chûng mite zînga pakhat chuan: “Ṭawng kan inhriat pawh lohna chuan harsatna tak tak engmah a siam lo. Chutih ahnêkin, inkhâwmpui hlimawmna chu a belhchhah zâwk mah a ni. Mikhualte chu hnam hrang hrang aṭanga lo kal an ni a; mahse, rinna pakhatah an inpumkhat a ni,” a ti. Munich inkhâwmpuina chhimtu pakhat chuan: “Ṭawnga ṭhen hran, hmangaihnaa inpumkhat,” tiin a sawi thung. An awmna ram leh an ṭawng hman chu hrang mah se, inkhâwmpuinaa telte chuan ṭhian tak tak​—⁠thlarau lama an unaute​—⁠bula awm angin an inhria a ni.​—⁠Zakaria 8:⁠23.

Lâwmna Lantîrna

Inkhâwmpui laia Poland rama khaw awm dân chuan inkhâwmpui chhimtute rilru put hmang leh chhelna chu a fiah a ni. Ruah a sûr deuh reng bâkah, 14°C vêl a ni a, a vâwt hle a ni. United State aṭanga lo kal unaupa pakhat chuan: “Inkhâwmpui ka tel tawhna zawnga khaw chhiat lai ber leh vâwt ber a ni hial âwm e; tin, thusawite lah ka hre thiam mang lo. Mahse, khawvêl pum inkhâwmpui boruak duhawm tak te, mite inpêkna nasa tak te, leh an khual chhawn thiamna te chuan chûng zawng zawngte ai chu a awh zo vek a ni. Kha inkhâwmpui kha theihnghilh theih rual a ni lo!” tiin a sawi.

Poland ṭawng hmang inkhâwmpui chhimtute tâna thil engemaw theihnghilh theih loh dang leh chu, anmahni ṭawnga Insight on the Scriptures tihchhuah thu puanchhuah kha a ni a​—⁠chu chu khaw vâwt leh ruah sûr kâra an chhelna lâwmman ropui tak chu a ni. Lehkhabu chhuah thar, Live With Jehovah’s Day in Mind tih tlângzarhna pawh chu “Chhan Chhuahna A Hnai!” tih Inkhâwmpui zawng zawnga hlimna thlentîrtu a ni.

Inkhâwmpui chhimtu dang tam takte chuan chhan dangte avângin inkhâwmpui chu an hre reng ngei ang. Czech rama unaunu pakhat, ram pâwn aṭanga rawn kalte bus-a kalpui tûra inpe Kristina-i chuan heti hian a sawi: “Inthlahna kan neih lai chuan, unaunu pakhat chuan kil khatah min hruai hrang a, min kuah a: ‘Min va enkawl ṭha tak êm! Chawi ei tûr kan ṭhutnaah ngei min rawn pe a, tui in tûr pawh min pe hial bawk si a. I inpêkna leh hmangaihna avâng hian ka lâwm tak meuh meuh a ni,’” a ti. A sawi chu ram pâwn aṭanga lo kalte tâna chhûn chaw an buatsaih chu a ni. Unaupa pakhat chuan: “He hna hi kan la thawk ngai miah lo. Chutah chuan nî tina chhûn chaw 6,500 deuh thaw pêk a tel a. Naupangte pawh tiama mi tam tak an inpe hmuh chuan thinlung a khawih hle a ni,” tiin a sawi.

Ukrain aṭanga Chorzow-a inkhâwmpui hmang tûra zin unaunu pakhat chuan: “Kan unaute hmangaihna, enkawlna, leh thil phalna chuan min khawih tak zet a ni. Kan lawmzia chu sawiin a siak lo,” a ti. Finland aṭanga lo kal kum riat mi Annika-i chuan Poland-a Jehova Thuhretute branch office-ah heti hian lehkha a thawn a: “Inkhâwmpui chu ka suangtuah phâk bâkin a ropui a. Khawvêl pum puia ṭhian kan neih theih zêl avângin, Jehova inawpna pâwla awm hi thil ṭha a va ni tak êm!” tiin.​—⁠Sâm 133:⁠1.

Lo Thlîrtute Thusawi

Inkhâwmpui hmain, ram dang aṭanga  inkhâwm rawn chhimtute tân khawchhûng leh a vêl fanna buatsaihsak a ni a. Bavarian hmun thingtlâng lamah chuan, chu mi hmun tlawhtute chu Kingdom Hall-ah an va châwl a, tualchhûng Thuhretute’n an lo lâwm a ni. Chûng ram fangtute ho khat hruaitu Thuhretu ni lo pakhat chu he inunauna lantîrna hian a hneh hle a. Unaupa pakhat chuan: “Kan hotel lam panna kawngah chuan, min hruaitu chuan khualzin dangte laka kan danglamzia a sawi a. Ṭha takin kan inthuam vek a, min hruaitu chu kan thlâwp vek a ni. Ang buan buan kan awm lo va, buaina lah a chhuak hek lo. Hmêlhriat ngai lohte ṭhian ṭha taka an insiam nghâl theih dân chu mak a ti hle a ni,” tiin a sawi.

Prague inkhâwmpuinaa News Service Department-a thawk unaupa pakhat chuan heti hian a sawi: “Chawlhni zîngah chuan inkhâwmpui endik tûra ruat police hotupa ber chuan min rawn tlawh a. Remna a awm a, tih tûr engmah a neih loh thu a sawi a ni. Tin, chu khêlmual bul vêla chêngte chuan hun hman dân phung vêl chu an zawh thu a sawi lang bawk. Chu police officer pain Jehova Thuhretute an nih thu a han sawi lan huna an thlaphânna an lantîr hian ani chuan: “Mite hian Jehova Thuhretute nungchang ang zât ve chauh pawh pu sela chuan, Police an awm a ngai lo vang,’ tiin a hrilh ṭhîn,” tiin.

Tam Takte Chu Chhan Chhuah An Ni Dêr Tawh!

Pathian Thu, Bible chu Kristiante inkâra remna leh inpumkhatna awmtîr a, hnam ze hrang hrangte inpawhna leihlâwn angah a ṭang a ni. (Rom 14:19; Ephesi 4:​22-24; Philippi 4:⁠7) “Chhan Chhuahna A Hnai!” tih a bîk taka neih inkhâwmpui chuan hei hi a târ lang reng tawh a ni. Jehova Thuhretute chu he khawvêl hri vei tam tak lak ata chhan chhuah an ni der tawh a. An zîngah chuan khawtlâng hri vei zînga ṭhenkhat​—⁠inngaih theih lohna te, mahni invaivungna te, leh chi inthliarna te​—⁠chu a bo zo ṭêp tawh a, khawvêl pum pui hi chutiang harsatnate laka a fihlîm hun tûr chu an nghâkhlel hle a ni.

Hêng inkhâwmpuia telte hian ram hrang hrang leh hnam hrang hrang aṭanga lo kal khâwm Thuhretute zînga inpumkhatna awm chu a hmunah ngei hian an tawng a ni. Hei hi inkhâwmpui a han tâwp hian a lang chiang hle. An vai mai chuan kut an bêng a, ṭhian tharte chu an kuah a, a tâwp ber atân thlate an la a ni. (1 Korinth 1:10; 1 Petera 2:17) Harsatna zawng zawngte laka chhan chhuahna chu a hnai tawh a ni tih an hriat avânga hlim tak leh ring tlat chungin, Pathian “nunna thu” chu nghet taka vawn tum sauh sauhvin inkhâwmpui chhimtute chu an inah leh kohhranah te an hawkîr leh ta a ni.​—⁠Philippi 2:​15, 16. (w07 7/1)

[Footnote]

[Phêk 10-naa bâwm/milem]

Ṭawng Sawmhnih leh Paruk Chu Pakhat Angin An Ṭawng

Inkhâwmpui neihna hmun kuaah chuan, thusawite chu inkhâwmpui nghahna tualchhûng ṭawnga neih vek a ni a. Germany rama inkhâwmpui neih chhûng chuan thusawite chu ṭawng dang 18 laia pêk a ni bawk. Dortmund khuaah chuan Arabic te, Farsi te, Portuguese te, Spanish te, leh Russia ṭawng tea hun hman a ni a; Frankfurt khuaah thung chuan Sâpṭawng te, French te, leh Serbian/Croatia ṭawnga sawi a ni; Hamburg khuaah chuan Danish te, Dutch te, Swedish te, leh Tamil ṭawng tea hun hman a ni a; Leipzig khuaah chuan Chinese te, Poland ṭawng te, leh Turkish ṭawng tea sawi a ni; tin, Munich khuaah chuan Greek te, Italian te, leh German Sign Language tea thusawina neih a ni bawk. Prague khuaa inkhâwmpuiah chuan thusawi zawng zawng chu Czech te, Sapṭawng te, leh Russia ṭawng tea neih a ni. Bratislava khuaah chuan Sâpṭawng te, Hungarian te, Slovak te, leh Slovakian Sign Language tea thusawina neih a ni. Chorzow khuaah thung chuan Poland te, Russia te, Ukrain ṭawng te, leh Polish Sign Language te hman a ni. Tin, Poznan khuaah chuan Poland leh Finland ṭawng hman a ni thung.

A vaiin ṭawng sawmhnih leh paruk lai zu nia! Dik takin, inkhâwmpuinaa lo telte chu ṭawnga ṭhen hran an ni nâ a, hmangaihnaah an inpumkhat tak zet a ni.

[Phêk 9-naa milem]

Frankfurt khuaa inkhâwmpui chhim Crotia mite chu “New World Translation” mahni ṭawng ngeia an neih avângin an lâwm hle