Ezekiela Bu Aṭanga Thu Pawimawh Hrilhfiahna—I
Jehova Thu Chu A Nung
Ezekiela Bu Aṭanga Thu Pawimawh Hrilhfiahna—I
VANTLANG kum chhiar inṭan hma kum 613 kha a ni a. Zâwlnei Jeremia chu Judai ramah a awm a, Jerusalem tihchiatna leh Judai ram tihramna lo thleng tûr chanchin chu huaisen takin a hril a ni. Babulon Lal Nebukadnezzara chuan Juda mi tam tak chu râl lâkin a lo la tawh a. Chûng zîngah chuan Kaldai lal ina rawngbâwl Daniela leh a ṭhian palite pawh an tel a ni. Juda sal tâng a tam zâwk chu “Babulon rama Kebar lui” kamah an awm a. (Ezekiela 1:1-3) Jehova chuan chûng sal tângte chu thuchah kengtu nei lovin a thlahthlam mai lo. Kum 30 mi Ezekiela chu zâwlneiah a ruat a ni.
B.C.E. 591-a ziak zawh Ezekiela lehkhabu chuan kum 22 chhûnga thilthlengte a huap a ni. Ezekiela chu a thil ziakah a fîmkhurin, a fîr hle a. A thu hrilh lâwkna ni leh thla leh a kumte nên lam chuan a ziak thlap a ni. Ezekiela thuchah hmasa lam chu Jerusalem tlûk chhiatna chungchâng deuh vek a ni a. A lai hâwl vêl chu, a chhehvêla hnamte chunga chungpikna thu puan chhuahna a ni a; tin, a tâwpna lam chuan Jehova biakna din thar lehna lam chungchâng a sawi ber a ni. He thuziak hi Ezekiela 1:1–24:27 chhûnga thu pawimawhte hrilhfiahna a ni a; chûngah chuan inlârnate, hrilh lâwknate, leh Jerusalem chunga thil lo thleng tûrte a taka entîrna a tel a ni.
“VENGTUAH KA RUAT CHE”
(Ezekiela 1:1–19:14)
Jehova lalṭhutthlêng ropui tak inlârnaa hmuhtîr a nih hnuah chuan, Ezekiela chuan a hna thawh tûr chu a dawng a. Jehova chuan a hnênah: “Israel chhûngte vêngtuah ka ruat che a ni; tichuan ka kâa thu i hria ang a, keima aiah i vaukhân tûr a ni,” a ti. (Ezekiela 3:17) Jerusalem hual a nih dân tûr leh chu miin nghawng a neih dân tûr hrilh lâwk nân, Ezekiela chu thil pahnih lem changa entîrna nei tûra tirh a ni. Judai ram chungchâng sawiin, Jehova chuan Ezekiela hmangin heti hian a ti: “Ngai rawh u, kei, keimah ngei hian in chungah khandaih ka rawn lek ang a, in bâwlhmunte chu ka tichhe vek dâwn a ni,” tiin. (Ezekiela 6:3) Chu rama chêngte hnênah chuan: “I chhiatna tûr i chungah a lo thleng e,” a ti a ni.—Ezekiela 7:7.
B.C.E. 612-ah chuan, inlârnaah Ezekiela chu Jerusalema dah sawn a ni a. Pathian biak ina thiltih a hmuhte chu a va tenawm tak êm! Jehova chuan he kalpênna chunga a thinurna tilang tûra a vân sipaite (‘mi parukin’ an entîrte) a tirh chuan, ‘an chala chhinchhiahna’ neite chauh chu an him ang. (Ezekiela 9:2-6) Mahse, a hmasain “meivâm”—mei anga kâng thei Pathian hnên aṭanga lo chhuak tihboralna chanchin—chu khawpui chunga theh darh a ni phawt ang. (Ezekiela 10:2) ‘Jehova chuan an sual mawh khumtîr dâwn’ mah se, Israel mi hmun hrang hranga kal darh tawhte lâk khâwm leh chu a tiam a ni.—Ezekiela 11:17-21.
Pathian thlarau chuan Ezekiela chu Kaldai ramah a hruai kîr a. Lemchan pakhatna chuan Jerusalem Lal Zedekia leh a mite tlân chhiat dân chu a entîr a. Zâwlnei leh hmeichhe zâwlnei derte chuan dem an hlawh a ni. Milem betute chu hnâwl an ni. Judai ram chu grêp hrui ṭâwng tak nêna tehkhin a ni a. Mupui leh grêp chungchânga thu khirh tak chuan Aigupta ṭanpuina a zawn avânga Jerusalem chunga thil lo thleng tûr duhawm lo tak chu a târ lang. Chu thu khirh tak chu he thutiam hian tihtâwp a ni: ‘Jehova chuan thing zîk chu tlâng sâng langsâr takah a phun ang,’ tiin. (Ezekiela 17:22) Amaherawhchu, Judai ramah chuan “lal tiang” pawh a awm tawh lo vang.—Ezekiela 19:14.
Bible Chungchânga Zawhnate Chhânna:
1:4-28—Vân tawlailîr chuan eng nge a entîr? Tawlailîr chuan Jehova inawpna pâwl vân lam pêng, thlarau thil siam rinawmte hmanga din chu a entîr a ni. Chu tawlailîr chakna hnâr chu Jehova thlarau thianghlim hi a ni a. Chu tawlailîr Khalhtu, Jehova aiawhtu chu a ropui hle. A muanawmna chu chhimbâl mawi tak hian a entîr a ni.
1:5-11—Thilnung palite chu tute nge ni? Ezekiela inlârna hmuh a pahnihna chuan chûng thilnung palite chu cherub-ho an ni tih a târ lang a. (Ezekiela 10:1-11; 11:22) He sawifiahna hnuhnûng zâwkah hian, ani chuan bâwngpa hmêl chu “cherub hmêl” tiin a ko a ni. (Ezekiela 10:14) Bâwngpa chu thiltihtheihna leh chakna chhinchhiahna a nih avâng leh cherub-ho chu thlarau thil siam thiltithei tak an nih avângin hei hi thil inâwm tak a ni.
2:6—Engvângin nge Ezekiela chu “mihring fapa” tia koh nawn leh ṭhin a nih? Jehova chuan zâwlnei chu mihring a nihzia hriatnawntîr nân hetiang hian a ko a ni. Chu chuan mihring thuchah kengtu leh thuchah lo chhuahna Bul, Pathian inan lohna chu a ti lang chiang hle. Chu nihna bawk chu Chanchin Ṭha ziakahte chuan Isua Krista koh nân vawi 80 lai hman a ni a, chu chuan Pathian Fapa chu thlarau thil siam mihringa lo chang mai ni lovin, mihring tak tak angin a lo kal tih a târ lang.
2:9–3:3—Engvângin nge ṭahna leh lusûnna lehkhabu zial chu Ezekiela tân thil thlum tak a nih? Ezekiela tâna lehkhabu zial thlum tak nihtîrtu chu a hna thawh tûr chunga a rilru put hmang hi a ni a. Ezekiela chu zâwlnei anga Jehova rawng a bâwl theih avângin a lâwm hle a ni.
4:1-17—Ezekiela chuan Jerusalem hual a nih tûr thu lem changin a entîr tak zet em? Ezekiela chuan chhang ur nâna hman tûr thil thlâk tûra a dîlna leh Jehova’n thlâk a phalsakna chuan lem changin a entîr tak zet tih a târ lang. Vei lam delha a mutna chu kum 390 chhûnga hnam sâwm lalram bawhchhiatna—din ṭan a nihna B.C.E. 997 aṭanga Jerusalem tih chhiat hun B.C.E. 607 thleng—atân a ni. Ding lam delha a mutna chu Judate kum 40 chhûng sualna, Jeremia zâwlneia ruat a nihna B.C.E. 647 aṭanga B.C.E. 607 thleng atân a ni. Chu ni 430 chhûng zawng chuan, Ezekiela chu chaw leh tui tlêm tê chauh rinchhanin a nung a, chu chuan Jerusalem hual a nih chhûnga ṭâm tla tûr chu a entîr lâwk a ni.
5:1-3—Ezekiela’n thlia a theh darh tûr a sam zînga ṭhenkhat laa a kawrfual hmâwra a bâwkna chuan eng awmzia nge a neih? Hei hi kum 70 chhûng tihrama a awm hnua a la bângte chu Judai rama kîr lehin, biakna dik an vuan leh dâwn tih târ lan nân a ni.—Ezekiela 11:17-20.
17:1-24—Tute nge mupui pahnihte chu ni a, engtin nge sidar thing zîkte chu thliah a nih a; tin, tu hi nge Jehova phun sidar thing “zîk” chu? Mupui pahnihte chuan Babulon leh Aigupta lal pahnihte a entîr a. Mupui hmasa chu sidar thing lêrah a lo thlâwk a, chu chu, Davida lal thlah kal zêl sawrkârnaah a lo kal tihna a ni. He mupui hian Judai Lal Jehoiakina aia Zedekia laltîrin, a ṭang zîk no ber chu a thliak a ni. Rinawmna tiamtîra lâk luh mah ni se, Zedekia chuan mupui dang, Aigupta lal ṭanpuina chu a zawng a; mahse, a hlawhchham a ni. Ani chu sala hruai a ni ang a, Babulonah a thi ang. Jehova pawhin sidar thing “zîk,” Messia Lal chu a thliak a. ‘Tlâng sâng langsâr tak,’ vân lam Zion Tlângah a phun sawn a; chutah chuan “sidar ropui tak,” leilung tâna malsâwmna thlentu tûr a lo ni ang.—Thu Puan 14:1.
Kan Zir Tûrte:
2:6-8; 3:8, 9, 18-21. Mi suaksualte chu kan hlau tûr a ni lo va, an hnêna vaukhânna telna Pathian thuchah chu kan puang hreh tûr lah a ni hek lo. Mi ngaihsak lohna emaw, dodâlna emaw kan tawh hunah, lung chang tak ang mai kan nih a ngai a ni. Amaherawhchu, rilru sak tak, mi ngaihsak lo, a nih loh leh râwng tak ni lo tûrin kan fîmkhur tûr a ni. Isua chuan thu a hrilhate chu a khawngaih a, keini pawh mite khawngaihna chuan an hnêna thu hril tûrin min chêttîr tûr a ni bawk.—Matthaia 9:36.
3:15. Ezekiela chu a hna thawh tûr hrilh a nih hnuah, a thuchah puan tûr ngun taka ngaihtuah nân Telabib hmunah ‘ni sarih chhûng makti takin’ a awm a ni. Keini pawhin thlarau lam thutak rilte hre thiam tûrin, taima taka zirin kan chhût ngun tûr a ni lâwm ni?
4:1–5:4. Ezekiela tân hrilh lâwkna pahnih a lem changa entîr tûrin inngaihtlâwmna leh huaisenna neih a ngai a. Keini pawh Pathian chanvo min pêkte thawk tûr chuan, kan inngaitlâwmin kan huaisen ve tûr a ni.
7:4, 9; 8:18; 9:5, 10. Pathian rorêlna tâwkte chu kan lainat tûr emaw, kan khawngaih tûr emaw a ni lo.
7:19. Jehova’n he kalhmang chunga ro a rêl hunah, sum leh pai chuan hlutna rêng a nei lo vang.
8:5-18. Kalpênna hi thlarau lama thihna thlentu a ni. “Pathian ngaihsak lo mi [“kalpêngtu,” New World Translation] chuan a kâin a ṭhenawmte a tiboral,” a ni. (Thufingte 11:9) Kalpêngte thusawi ngaihthlâksak ringawt pawh a tuma tum hauh loh chu a finthlâk a ni.
9:3-6. Chhinchhiahna—inpumpêka baptisma chang tawh Pathian chhiahhlawh kan ni tih leh Kristian mizia kan nei tih lantîrna—neih chu “hrehawm nasa tak” aṭanga dam khawchhuah nân a pawimawh hle. (Matthaia 24:21) Lehkhatui bûr paiin a entîr hriak thihte chuan he chhinchhiahna hnaah hian hma an hruai a, chu hna chu Lalram thu hrilhna leh zirtîr siamna hna hi a ni. Kan chhinchhiahna chu neih reng kan duh chuan, he hnaah hian taima takin kan ṭanpui tûr a ni.
12:26-28. Ezekiela chuan a thuchah nuihsantute hnênah pawh: “[Jehova] thu engmah hi khêk [“tihkhawtlai,” NW] a ni lo vang,” tih a sawi a ngai a ni. Jehova’n he kalhmang a tihtâwp hma hian, amaha rinna nghat tûrin mi dangte chu theihtâwp chhuahin kan ṭanpui tûr a ni.
14:12-23. Chhandamna chan chu kan mi mal mawhphurhna a ni. Tuman min tihsak thei lo.—Rom 14:12.
18:1-29. Mahni thiltih rah chu kan seng ṭhîn.
“KA LINGLET ANG, KA LINGLET ANG, KA LINGLET ANG”
(Ezekiela 20:1–24:27)
Sal tânna a kum sarihna, B.C.E. 611 chuan, Israel zînga tarho chu Ezekiela hnênah “LALPA râwn tûrin” an lo kal a. Anni chuan Israelte helna chanchin sei tak chu an ngai thla a; tin, ‘Jehova chuan a khandaih chu a pai ata a phawi ang’ tih vaukhânna pawh an ngaithla a ni. (Ezekiela 20:1; 21:3) Israel hotu (Zedekia) chungchângah, Jehova chuan: “Hotu lukhum chu paihsak ula, lallukhum chu paihsak rawh u, hei hi a ngaiin a awm lo vang: mi tlâwmte chawi sâng ula, mi liante chu titlâwm rawh u. Ka linglet ang, ka linglet ang, ka linglet ang; hei pawh hi a ngaiin a awm lo vang, a neitu tak tûr [Isua Krista] a lo kal hma zawng,” a ti.—Ezekiela 21:26, 27.
Jerusalem chu thilsual tih chungchânga thu buai neihtîr a ni a. Oholahi (Israel) leh Oholibahi (Juda) sualna chu laih lan a ni. Oholahi chu “a ngaihzâwngte, Assuria, a hak hiamte kut ngeiah” pêk a ni. (Ezekiela 23:9) Oholibahi tihchhiatna chu a lo thleng thuai ang. B.C.E. 609-ah chuan thla 18 awhtu Jerusalem hualna chu a inṭan a. A tâwpa khawpui lâk a nih chuan, Judate chuan an lungngaihna chu sawi thei lo khawpin mak an ti a ni. Ezekiela chuan Pathian thuchah chu Babulona hruaite hnênah a sawi lo vang; khawpui tihchhiat a nih thu ‘tlân chhuakte’ kâ aṭanga a hriat hma loh chuan.—Ezekiela 24:26, 27.
Bible Chungchânga Zawhnate Chhânna:
21:3—Jehova’n a pai ata a phawi “khandaih” chu eng nge ni? Jehova’n Jerusalem leh Judai ram chunga rorêlna thlentîr tura a hman “khandaih” chu Babulon Lal Nebukadnezzara leh a sipaite an ni. Chutah chuan thlarau thil siam thiltithei takte hmanga din Pathian inawpna pâwl vân lam pêng pawh a tel thei bawk ang.
24:6-14—Bêl kâng khir chuan eng nge a entîr? Hual beha awm Jerusalem chu saso bêl nêna tehkhin a ni a. A kâng khir chuan nungchang lama khawpui bawlhhlawhna—amah avânga awm hurna leh thisen chhuahna—chu a entîr a ni. A bawlhhlawhna chu a nasat êm avângin, chu bêl chu aruaka meivâm chunga chhuan a nih a, a dâr ling khawpa chhuan sat a nih pawhin a bêl kâng khir chu a tla chuang lo.
Kan Zir Tûrte:
20:1, 49. Israel upate chhân lêt dân chuan Ezekiela thusawi an ringhlel tih a târ lang. Pathian vaukhânna pêk chu i ringhlel ngai suh ang u.
21:18-22. Nebukadnezzara chuan aien chîng mah se, Jehova chuan he milem betu lal hi Jerusalem bei tûrin a fehchhuahtîr a ni. Hei hian ramhuaite meuh pawhin Jehova rorêlna thlentîrtuin a thiltum a tihlawhtlingna tûr chu an dang thei lo tih a târ lang a ni.
22:6-16. Jehova chuan mi hêkna te, hurna te, thuneihna hman dik loh te, leh thamna lâk chînnate chu a hua. Chutiang thil sualte tih loh chu kan tum nghet sauh tûr a ni.
23:5-49. Politics lama ṭanrualpui siamna chuan Israel leh Juda chu an ṭanrualpuite sakhuana dik lo a chhawmtîr a. Kan rinna tichhe thei khawvêl mite nêna inṭhianna lakah i invêng ang u.—Jakoba 4:4.
Thuchah Nung leh Thiltithei Tak Chu
Ezekiela bu a hmasa lam bung 24 aṭanga kan thil zir chu a va ṭha tak êm! Hênga thu bul sawi lante hian Pathian huat min hlawhtîrtu te, a zahngaihna dawn dân te, leh mi suaksualte kan vaukhân chhan tûrte a târ lang a. Jerusalem chhiatna chungchâng hrilh lâwkna chuan Jehova chu ‘thil thar a lo thlen hmaa a mite hnêna hrilhtu’ Pathian angin a târ lang chiang hle a ni.—Isaia 42:9.
Ezekiela 17:22-24 leh 21:26, 27-a awm hrilh lâwkna ang chi-te chuan, vâna Messia Lalram dinna chungchâng a kâwk a ni. Rei lo têah chuan, chu rorêlna chuan leia Pathian duhzâwng tihna chu a lo thlentîr ang. (Matthaia 6:9, 10) Rinna nghet tak leh rin tlatna nên chuan Lalram malsâwmnate chu kan beisei thei. A ni, “Pathian thu hi a nung a, thil a ti thei” tak zet a ni.—Hebrai 4:12. (w07 7/1)
[Phêk 12-naa milem]
Vân tawlailîr chuan eng nge a entîr?
[Phêk 14-naa milem]
Thu hrilhnaa taihmâkna chuan kan “chhinchhiahna” neih vawng reng tûrin min ṭanpui