Jehova’n I Thuâwihna Chu A Hlut
Jehova’n I Thuâwihna Chu A Hlut
“Ka fapa, fing la, ka thinlung tilâwm rawh.”—THUFINGTE 27:11.
1. Tûn lai mihringte hi eng rilru put hmangin nge an khah?
TUN lai khawvêl hi mahni inlâk hranna leh thuâwih lohna rilru put hmangin a khat a. Tirhkoh Paula chuan Ephesi khuaa Kristiante hnêna a lehkha thawnah chutiang a nih chhan chu a hrilhfiah a ni: “Hmânah khân he khawvêl dân anga in awm kha, boruaka thuneihna lal, tûna âwih lo fate chhûnga thâwk mêktu thlarau dân ang hian,” tiin. (Ephesi 2:1, 2) Ni e, “boruaka thuneihna lal” Diabol-Setana chuan khawvêl pum pui hi thuâwih lohna rilru put hmang a veitîr i ti thei ang. Ani chuan kum zabi khatnaah chutiang chuan a lo ti tawh a, vân ata paih chhuah a nih hun Khawvêl Indopui I-na vêl aṭang khân, nasa lehzualin a ti bawk a ni.—Thu Puan 12:9.
2, 3. Jehova thu kan âwih chhan tûr eng nge awm?
2 Mahse, Kristiante kan nih angin, Pathian Jehova chu min Siamtu, kan nunna Châwmtu, hmangaihna nei Lalchungnungber, leh min Chhan Chhuaktu a nih avângin, ani chuan thinlung taka a thu kan âwih chu a phû tih kan hria a ni. (Sâm 148:5, 6; Tirhkohte 4:24; Kolossa 1:13; Thu Puan 4:10, 11) Mosia hun laia Israelte chuan Jehova chu an Nunna Petu leh anmahni Chhan Chhuaktu a nihzia an hria a. Chuvângin, Mosia’n an hnênah: “LALPA in Pathianin thu a pêk che u anga ti tûrin fîmkhur rawh u,” a ti a ni. (Deuteronomy 5:32) Ni e, Jehova chuan an thuâwihna chu a phu a. Mahse, an Lalchungnungber thu an âwih chhûng chu a rei lo hle.
3 Lei leh vân Siamtu tân kan thuâwihna chu engtiang khawpin nge a pawimawh? Ṭum khat chu Pathianin zâwlnei Samuela chu Lal Saula hnênah heti hian a sawitîr a ni: “Inthawina aiin thuâwih chu a ṭha zâwk,” tiin. (1 Samuela 15:22, 23) Eng nge a chhan?
Thuâwihna Chu ‘Inthawina Aia A Ṭhat Zâwk’ Dân
4. Eng kawngin nge Jehova hnênah thil engemaw kan pêk theih?
4 Siamtu a nih angin, Jehova chuan kan thil neih zawng zawng chu a nei sa reng a. Chutiang a nih chuan, a hnêna pêk theih thil engemaw kan nei em? Nei e, thil hlu tak engemaw chu kan pe thei a ni. Chu chu eng nge ni? A chhânna chu he fuihna: “Ka fapa, fing la, ka thinlung tilâwm rawh; mi sawi chhetute ka chhân theih nân,” tih aṭang hian kan hmu thei a. (Thufingte 27:11) Pathian hnênah kan thuâwihna chu kan pe thei a ni. Kan dinhmun leh ṭobul chu inang lo mah se, thuâwihna hmangin Diabol-Setana puhna suaksual tak, mihringte’n harsatna an hmachhawnin Pathian lakah an rinawm reng lo vang tih chu kan chhâng ṭheuh thei a ni. Chanvo ropui a va ni êm!
5. Engtin nge thuâwih lohna chuan Siamtu chu a nghawng? Entîrna pe rawh.
5 Pathian chuan thu tlûkna kan siamte chu a ngaihven a. Thu kan âwih loh chuan, chu chuan amah a nghawng a ni. Engtin nge? Kawng dik lo zawh tupawh a hmuhin a rilru a nâ a ni. (Sâm 78:40, 41) Entîr nân, zun thlum vei pakhat chuan a tâna ṭha tûra chawh ei leh in ṭha chu ei in lovin, atâna ṭha lo tûr chu ei reng ta se. Engtin nge amah enkawltu doctor chuan a ngaih ang? Jehova chuan nunna atâna a thil chawh hnâwlna sawhkhâwk râpthlâk tak chu a hriat avângin, a thu an âwih loh hian a rilru a nâ a ni tih chu kan chiang thei a ni.
6. Engin nge Pathian thu âwih tûrin min ṭanpui ang?
6 Engin nge mi tinte chu thu âwih tûrin min ṭanpui ang? Lal Solomona tih angin, Pathian hnênah “hriatna thinlung,” a nih loh leh atîra ziakin a târ lan angin, thinlung thuâwih tak kan dîl ṭheuh chu a âwm a ni. Ani chuan a Israel puite chunga ro a rêl theih nân ‘a chhia leh a ṭha thliar theihna’ thinlung chu a dîl a ni. (1 Lalte 3:9) Thuâwih lohna rilru put hmanga khat khawvêlah hian a chhia leh a ṭha thliar thei tûr chuan, “thinlung thuâwih tak” kan mamawh a. Chu mi kan neih theihna tûrin Pathian chuan a Thu, Bible zirna ṭanpuitute, Kristian inkhâwmte, leh min ngaihsak tak kohhran upate chu min pe a ni. Chûngte chu kan hmang ṭangkai em?
7. Engvângin nge Jehova chuan thuâwihna chu inthâwina aia a dah pawimawh zâwk?
7 He mi chungchângah hian, hun kal tawhahte khân Jehova chuan hmân laia a mite hnênah thuâwihna chu rana inthawina ai pawhin a pawimawh zâwkzia a târ lang tawh tih hre chhuak leh rawh. (Thufingte 21:3, 27; Hosea 6:6; Matthaia 12:7) Jehova’n a mite chu chutiang inthâwina hlân tûrin thu a pe si a, engvângin nge thuâwihna chu a pawimawh theih zâwk? Aw le, inthâwina hlântu chu engin nge chêttîr? Pathian tihlâwm nâna hlan a ni em? Nge, thiltih ṭhin engemaw a zui mai zâwk? Pathian betu chuan Amah tihlâwm a duh tak zet a nih chuan, Pathian thupêk zawng zawng zâwm tûrin a fîmkhur ang. Pathian chuan rana inthawina chu a mamawh lo; mahse, thuâwihna chu a hnêna kan pêk theih thil hlu tak chu a ni.
Vaukhânna Entîrna
8. Engvângin nge Pathianin Saula chu lal nihna ata a hnâwl?
8 Bible-a chhinchhiah Lal Saula chanchin chuan thuâwih a pawimawhzia chu a târ lang a. Saula chuan inngaitlâwm leh thuhnuairawlh takin a rorêlna chu a ṭan a, ‘ama ngaihah mi tê tak’ a ni. Mahse, a hnuah chuan a thu tlûkna siamte chu chapona leh ngaih dân dik lo chuan a thunun ṭan ta a. (1 Samuela 10:21, 22; 15:17) Ṭumkhat chu, Saula’n Philistia mite a bei dâwn a. Samuela chuan lal hnênah chuan Jehova hnêna inthawina hlân tûra amah nghâk tûr leh kawhhmuhna a pêk belh tûr chu nghâk tûrin a hrilh a. Mahse, Samuela chu lalin a beisei hunah chuan a lo thleng ta lo va, mipuite chu an ṭîn darh ṭan a. Saula’n chu mi a hmuh chuan “hâlral thilhlan chu a hlân a.” Chu chuan Jehova a tilâwm lo. A tâwpa Samuela a lo thlen chuan, lal chuan a thuâwih lohna chu thiam inchantîrin, Samuela hnênah chuan a lo thlen tlai avângin Jehova khawngaihna dîl tûrin halral thilhlan chu ‘hlân lo thei ka ni lo’ a ti a. Lal Saula tân chuan chu hâlral thilhlan hlan chu thilhlan hlântu tûr Samuela nghâk tûra a kaihhruaina dawn aiin a pawimawh zâwk a ni. Samuela chuan a hnênah: “I thiltih dân hi a âtthlâk hle mai: LALPA i Pathian thu pêk, thu a pêk che hi i zâwm lo a ni,” a ti a. Jehova thuâwih lohna chuan Saula chu lal nihna a chântîr ta a ni.—1 Samuela 10:8; 13:5-13.
9. Engtin nge Saula chuan Pathian thuâwih loh chu a tih ṭhin dân a ni tih a lantîr?
9 Lal chu he a thiltawn aṭang hian a inzir em? Zir lo ve! A hnuah, Jehova chuan chhan awm lova Israelte beitu Amalek hnam pum pui chu timang vek tûrin Saula hnênah thu a pe a. Saula chuan an rante thlengin a zuah tûr a ni lo. Ani chuan ‘Amalek mite chu Havila aṭangin Sur thleng beiin’ thupêk chu a zâwm a. Samuela’n amah hmuh tûra a lo kal chuan, lal chu a hnehna chunga lâwm takin: “LALPAN malsâwm che rawh se. LALPA thupêk ang chuan ka ti ta e,” a ti a. Mahse, Saula leh a mite chuan kaihhruaina chiang tak an dawn nêna inkalhin, Lal Agaga leh “berâm ṭha ṭha te, bâwngpa ṭha ṭha te, a thau thau te, berâmno te, a ṭha zawng zawngte” chu a nungin an zuah a. Lal Saula chuan a thuâwih lohna thiltih chu: “LALPA i Pathian hnênah inthawi nân mipuiten berâm ṭha ṭha leh bâwngpa ṭha ṭha an zuah a ni,” tia sawiin thiam a inchantîr a ni.—1 Samuela 15:1-15.
10. Saula’n eng nge a zir loh?
10 Chutah chuan, Samuela chuan Saula hnênah: “LALPA chuan LALPA thu zâwm chu a lâwm angin hâlral thilhlante leh inthawinate hi a lâwm em ni? Ngai teh, inthawina aiin thuâwih chu a ṭha zâwk a, berâmpa thau aiin a thu pawm chu a ṭha zâwk a ni,” a ti a. (1 Samuela 15:22) Jehova chuan chûng rante chu tiboral vek tûra a tihtawh avângin, inthawi nâna pawm tlâk a ni lo.
Engkimah Thuâwih Rawh
11, 12. (a) Engtin nge Jehova chuan biakna kawnga amah tihlâwm kan tumna chu a thlîr? (b) Engtin nge mi pakhat chuan a nihna takah chuan thuâwih lo reng chunga Pathian duhzâwng tia inngaiin, a inbum theih?
11 Jehova chuan a chhiahhlawh rinawm tihduhdahna tuar reng chunga ding nghet tak te, mite’n an ngaihsak lo chung pawha Lalram puang chhuaktu te, eizawn nâna nêksâwrna tâwk chung pawha Kristian inkhâwmnaa tel ziah te a hmuh hian a va lâwm tak êm! Chûng kan thlarau lam nun pawimawh taka thu kan âwihna chuan a thinlung chu a tilâwm a ni. Jehova be tûra ṭan kan lâknate hi hmangaihna avânga tih a nih hian atân a hlu a. Mihringte chuan kan thawhrimna chu an hmu lo mai thei; mahse, Pathian chuan thinlung taka kan inpêkna chu a hmuin, a hre reng a ni.—Matthaia 6:4.
12 Amaherawhchu, Pathian tilâwm tak zet tûr chuan, kan nun pêng tinah a thu kan âwih tûr a ni. Kan nun pêng danga amah kan biak phawt chuan, Pathian thilphût ṭhenkhat pênsan theiah inngaiin mahni kan inbum ngai tûr a ni lo. Entîr nân, mi chuan a hming maia biakna thiltih ṭhenkhat a tih chuan, nungchang bawlhhlawhna emaw, thilsual khûnkhân dang emaw avânga hremna chu pumpelh thei tûrah inngaiin a inbum mai thei a. Chu chu hriat sualna a va ni dâwn êm!—Galatia 6:7, 8.
13. Mahnia a fâla kan awmin, engtin nge Jehova thu kan âwihna chu fiah a nih theih?
13 Chutiang bawkin, heti hian kan inzâwt thei a ni, ‘Ka nî tin nunah, mi mal thil anga langah pawh hian Jehova thu chu ka âwih em?’ tiin. Isua chuan: “Tupawh tlêmte chunga rinawm chu tam tak chungah pawh a rinawm ṭhîn; tupawh tlêmte chunga rinawm lo chu tam tak chungah pawh a rinawm lo ṭhîn a ni,” a ti. (Luka 16:10) Mi dangte’n min hmuh lohna ‘kan in chhûngah’ pawh hian ‘thinlung ṭha famkim puin kan awm’ em? (Sâm 101:2) Ni e, ina kan awm laiin, kan rinawmna chu fiah a ni thei tak zet a. Ina computer an kawl tamna ram tam takah chuan, zahmawh lam lemte chu âwlsam taka hmuh theihin a awm a ni. Kum tlêm tê kal ta khân, mi chuan chutiang lemte chu nungchang bawlhhlawhna lama intihhlimna hmuna a kal loh chuan hmuh tûr a nei lo. Isua thu: “Tupawh ngaih châka hmeichhe melh apiang chu, a thinlungah a uirê tawh reng a ni” tih chu thuâwih takin kan zâwm ang em? Ni e, zahmawh lam lemte a en ringawt pawh chu kan hnâwl ang em? (Matthaia 5:28; Joba 31:1, 9, 10; Sâm 119:37; Thufingte 6:24, 25; Ephesi 5:3-5) Tharum thawhna telna TV program-te chu engtin nge ni ang? ‘Nunrâwnna ngainate hawtu’ kan Pathian nên kan lungrual em? (Sâm 11:5) A nih loh leh mahni chauhva zu a lutuka hmanna chu engtin nge ni ang? Bible chuan zu ruihna chu a dem a; Kristiante chu “uain heh mite” ni lo tûrin a vaukhân bawk a ni.—Tita 2:3-5; Luka 21:34, 35; 1 Timothea 3:3.
14. Eng kawng ṭhenkhatah nge sum leh pai lama Pathian thu kan âwihna chu a lo lan?
14 Kan fîmkhur a ngaihna dang leh chu sum leh pai lam thilah a ni a. Entîr nân, inbumna tling lek lek hausak thutna scheme angah kan inhnamhnawih em? Chhiah chawi pumpelh tûrin dân kalha thil tih châkna kan nei em? Nge ni, “mi zawng zawng hnênah pêk tûr apiang pe rawh u; . . . chhiah chawina tûra hnênah chuan chhiah chawi ula,” tih thupêk chu fîmkhur takin kan zâwm zâwk?—Rom 13:7.
Hmangaihna Aṭanga Lo Chhuak Thuâwihna
15. Engvângin nge Jehova thupêk chu i zawm?
15 Pathian thupêkte zawmna chuan malsâwmna a thlen a. Entîr nân, vaihlo laka inthiarfihlîmna te, nungchang ṭha chhawmna te, leh thisen thianghlimna zahna te chuan natna engemawte lakah min vêng thei a. Chu bâkah, kan nun kawng dangah Bible thutak mila nunna chu ei leh bâr lamah te, khawtlâng lamah te, a nih loh leh chhûngkuaah te chuan kan hlâwkpui thei a ni. (Isaia 48:17) Hêng tisa lama hlâwkna eng pawh hi Pathian dânte chhawr tlâkzia târ langtu malsâwmna angin a thlîr theih ang. Chutichung pawhin, Jehova thu kan âwih chhan bul ber chu amah kan hmangaih vâng a ni. Mahni hmasial vânga Pathian rawng bâwl kan ni lo. (Joba 1:9-11; 2:4, 5) Pathian chuan kan duh apiang thu âwih thei tûrin zalênna min pe a. Jehova tihlâwm kan duh avâng leh thil dik tih kan tum avângin, a thuâwih chu kan thlang a ni.—Rom 6:16-18; 1 Johana 5:3.
16, 17. (a) Engtin nge Isua’n thinlung taka hmangaihna avânga thuâwihna chu a lantîr? (b) Engtin nge Isua kan entawn theih?
16 Isua chuan thinlung taka Jehova hmangaihna aṭanga thuâwihna kawngah entîrna ṭha famkim chu a siam a. (Johana 8:28, 29) Isua’n leia a awm lai khân “a thil tuarahte chuan thu âwih a zîr” a ni. (Hebrai 5:8, 9) Engtin nge? Isua chu “a inngaitlâwm a, thi khawp hiala thu zâwmin a lo awm ta a.” (Philippi 2:7, 8) Isua chuan vâna a awm laiin thu lo âwih reng tawh mah se, leiah hian a thuâwihna chu fiah belh a ni a. Isua chu thlarau lama a unaute tân leh a ringtu mi dangte tân Puithiam Lalber nih chu kawng engkimah a tling a ni tih kan ring thlap thei a ni.—Hebrai 4:15; 1 Johana 2:1, 2.
17 Engtin nge keini chungchâng ve hi le? Pathian duhzâwng anga thuâwihna chu ngai pawimawh berin, Isua kan entawn thei a. (1 Petera 2:21) Nêksâwrna emaw, thlêmna emawin Jehova thupêkte min kalhtîr a tum chung pawh a, Jehova kan hmangaihna chuan A thupêkte zâwm tûra min chêttîrin, a mi malin lungawina kan hmu thei a ni. (Rom 7:18-20) Chutah chuan mi ṭha famkim lo an ni chung pawha biakna dika hmahruaitute kaihhruaina zawm pawh a tel a ni. (Hebrai 13:17) Kan mi mal nuna Pathian thupêkte kan zawm chu Jehova mithmuhah chuan a hlu a ni.
18, 19. Thinlung taka Pathian thu kan âwihna chuan eng nge a rah chhuah?
18 Tûn lai hian Jehova thu kan âwihnaah chuan kan rinawmna vawn nâna tihduhdahna tawrh pawh a tel mai thei a. (Tirhkohte 5:29) Thu hril tûr leh zirtîr siam tûra Jehova thu kan âwihnaah chuan he kal hmang tâwp thlenga kan chhel pawh a ngai bawk a ni. (Matthaia 24:13, 14; 28:19, 20) Khawvêl nêksâwrnain min delh reng chung pawhin, unaute nêna inkhâwm zêl tûr chuan kan chhel a ngai a. Min hmangaihtu Pathian chuan chûng thiltea thuâwih tuma ṭan kan lâkna chu a hria a ni. Amaherawhchu, thu âwih pumhlûm tûrin, thil ṭha ngainatna insiam reng chunga tisa châkna sual kan do leh thil sual kan hawisan chu a ngai a ni.—Rom 12:9.
19 Hmangaihna avâng leh thinlunga lâwmna avânga Jehova rawng kan bâwl hian, kan tân ‘ani chu zawngtute hnêna lâwm man pêk hmang a lo ni.’ (Hebrai 11:6) Inthawina anga mahni inpêkna ṭha neih chu a ngaiin, a duhawm a; mahse, Jehova hmangaihna avânga thuâwihna chuan amah chu a tilâwm ber a ni.—Thufingte 3:1, 2. (w07 6/15)
Engtin Nge I Chhân Ang?
• Engvângin nge Jehova hnêna pêk tûr thil engemaw kan nei kan tih theih?
• Saula’n eng thil sual nge a tih?
• Engtin nge thuâwihna chu inthawina aiin a ṭha zâwk tih i rinzia i târ lan theih?
• Engin nge Jehova thu âwih tûra chêttîr che?
[Zirlai Atâna Zawhnate]
[Phêk 21-naa milem]
Engvângin nge Lal Saula chuan Jehova lawm a hlawh loh?