Naupangte Tâna Zir Tûr Pawimawh Tak

GLADYS-I chuan Argentina rama Mendoza khawpuia School pakhatah hna a thawk a. Ni khat chu classroom pakhat a kal pelh lai chuan zirtîrtu pakhatin pâwl li zirlaite chu Ka Bible Thawnthu Lehkhabu * a chhiarsak lai a hmu a. Gladys-i chuan zirtîrtu hnênah Jehova Thuhretute zînga mi a nih thu hrilhin, chu lehkhabu hman ṭangkai theih ber dân a hriattîr theih thu a hrilh a ni. Gladys-i thil hrilhfiah chuan a rilru a khawih êm avângin, chu lehkhabu chu an zirlai zînga telh ve ziah chu a duh ta hial a ni. Amaherawhchu, school thu neitute hnên aṭanga phalna a hmuh a ngai a. Phalna pêk a nih tâkah chuan, a lâwm hle a ni.

A hnua school-a naupangte lehkhabu chhiar tûra fuihna nî, Book Day neihah chuan chu zirtîrtu nu chuan a naupangte chu lehkhabua bung khat zêl class hmaah a chhiartîr a ni. He an hun hman dân an duh hlawm hle avângin, chu zirtîrtu nu chu tualchhûng TV-a lang tûrin an kâwm a. School naupangte nungchang chungchâng an han sawi chhuah tâkah chuan, a kâwmtu chuan zirtîrtu nu hnênah, “Engtin nge i class chhûnga naupangte chu thu âwih taka i siam theih?” tiin a zâwt a. Ani chuan Ka Bible Thawnthu Lehkhabu tih thu leh hla chhuah a hman thu a hrilhfiah a ni. Class chhûngah sakhaw lam thil zirtîr lo mah se, he lehkhabu hmang hian nungchang hlu tak mi dang zahna te, thinnelna te, inpumkhatna te, thawhhona te, thuâwihna te, leh hmangaihna te an rilrua a tuhsak thu a sawi belh a. Hêng hi naupangte zir tûr zir lai pawimawh tak a ni tih an pawm tlâng vek a ni.

Chutiang nungchang hlute chu i fate neihtîr i duh em? Jehova Thuhretu tuemaw ber hnênah Ka Bible Thawnthu Lehkhabu tih thu leh hla chhuah rilru la tak mai chu i dîl thei ang. (w07 7/1)

[Footnote]