Jehova Thu Chu A Nung

Ezekiela Bu Aṭanga Thu Pawimawh Hrilhfiahna​—⁠II

DECEMBER thla, B.C.E. 609 khân a ni. Babulon lal chuan Jerusalem a beihna hnuhnûng ber chu a ṭan der tawh a. Tûna kan hmuh chinah chuan, Babulona hruaite hnêna Ezekiela thuchah ken chu an khawpui duh tak, Jerusalem tlâwmna leh tihchhiatna chungchângah a ni ber a. Mahse, tûnah erawh chuan Ezekiela thu hrilh lâwk chu Pathian mite chunga chhiatna thleng avânga lâwmtu milem be ramte chungpikna thu a lo ni ta. A hnu thla 18-a Jerusalem a tlûk chhiat tâkah chuan, Ezekiela thu hrilh lâwk chu biakna dik din thar lehna ropui tak lamah a inthlâk leh ta a ni.

Ezekiela 25:1–48:​35-ah chuan Israel hual vêltu hnamte chungchâng hrilh lâwkna leh Pathian mite chhan chhuahna chungchâng hrilh lâwkna a tel a. * Ezekiela 29:​17-20 tih chauh lo chu a thu azira ziak a nih rual rualin, a thlen dân indawta rem a ni bawk a. Amaherawhchu, hêng châng li-te hi chu a thu azira ziak chauh a ni. Thâwk khum Pathian Thute zînga mi a nih angin, Ezekiela lehkhabu chuan thuchah ‘nung leh thiltithei tak’ a keng tel a ni.​—⁠Hebrai 4:⁠12.

‘CHU RAM CHU EDEN HUAN ANG A LO NI ANG’

(Ezekiela 25:1–39:⁠29)

Jerusalem tlûk chhiatna an chhân lêt dân tûr chu hmu lâwkin, Jehova chuan Ammon te, Moab te, Edom te, Philistia te, Tura te, leh Sidon te chunga thil lo thleng tûr chu Ezekiela a hrilh lâwktîr a. Aigupta chu rawk a ni ang. “Aigupta lal Pharaoa leh a khua leh a mite” chu sidar thing nêna tehkhin an ni a, chu chu “Babulon lal khandaih” chuan a kit ang.​—⁠Ezekiela 31:​2, 3, 12 leh a bung chunga thuziak; 32:​11, 12.

B.C.E. 607-a Jerusalem tihchhiat a nih hnu thla ruk vêlah, chuta ṭanga tlân chhuak thei pakhat chu lo kalin Ezekiela hnênah: “Khawpui chu hneh a ni ta” tih a rawn hrilh a. Zâwlnei chu sal tângte tân ‘ṭawng thei lo’ a ni tawh lo. (Ezekiela 33:​21, 22) Din thar lehna hrilh lâwkna chungchâng puanchhuah tûr a nei a ni. Jehova chuan ‘an chungah berâmpu pakhat a rawngbâwltu Davida ngei chu a dah ang.’ (Ezekiela 34:23) Edom chu tihṭiauva awm tûr a ni a, mahse a piah lama awm Judai ram chu “Eden huan ang mai” a lo ni leh ang. (Ezekiela 36:35) Jehova chuan a din thar leh a mite chu “Goga” laka vên him a tiam tlat a ni.​—⁠Ezekiela 38:⁠2.

Bible Chungchânga Zawhnate Chhânna:

29:​8-12​—⁠Engtik khân nge Aigupta chu kum 40 chhûng tihṭiauva a awm? B.C.E. 607-a Jerusalem tihchhiat a nih hnuah, zâwlnei Jeremia’n kal lo tûrin vaukhân mah se, Judai rama a la bângte chu Aigupta ramah an tlân chhia a. (Jeremia 24:​1, 8-10; 42:​7-22) Nebukadnezzara chu lo kala Aigupta a rawn lâk avângin, an tlân chhe hlawhtling lo a ni. Kum 40 chhûng Aigupta tihṭiauna chu, chutianga hneh a nih hnuah a inṭan thei ngei ang. Khawvêl lam thilthleng chanchin chhinchhiahna chuan he tihṭiauna chungchâng hi târ lang lo mah se, Jehova chu hrilh lâwkna Hlentu a nih avângin chutiang chuan a thleng ngei a ni tih chu kan ring tlat thei a ni.​—⁠Isaia 55:⁠11.

29:18​—⁠Engtin nge ‘mi tin chhîpte a kawlh phaha mi tin kokî a pilh phah bawk’? Tura khua lâk chu a harsat êm avângin Nebukadnezzara  sipaite chhîp chu an lukhum nêna a innawhna avângin a kawlh phah a, tin in sâng sakna tûr leh kulh sakna tûr bungruate an thiar avângin an kokî a pilh phah bawk a ni.​—⁠Ezekiela 26:​7-12.

Kan Zir Tûrte:

29:​19, 20. Tura mite chu an thliarkâr khawpuiah an thil hlute nêna an tlân chhiat avângin, Lal Nebukadnezzara chuan Tura khua aṭangin râllâka lâk tûr a nei mang meuh lo. Nebukadnezzara chu milem betu lal duhâm leh chapo tak mah ni se, Jehova chuan a rawngbâwl man atân Aigupta chu “a sipai rualte hlawh” atâna pein, lâwmman a pe a ni. Sawrkârin kan tâna thil min tihsakte avânga chhiah chawiin, Pathian dik chu kan entawn tûr a ni lâwm ni? Sawrkâr mi liante nungchang emaw, kan chhiah chawite hman a nih dân emaw chuan chhiah chawi min âwltîr chuang lo.​—⁠Rom 13:​4-7.

33:​7-9. Tûn laia râlvêngtu pâwl​—⁠hriak thih a la bângte​—⁠leh an ṭhiante chuan Lalram chanchin ṭha hrilhna leh lo thleng tûr “hrehawm nasa tak” chungchâng vaukhânna chu an bânsan ngai tûr a ni lo.​—⁠Matthaia 24:⁠21.

33:​10-20. Kan chhandamna chu kawng sual kalsanna leh Pathian thil phûtte mila thiltihah a innghat. Jehova kawng chu “a rual” a ni.

36:​20, 21. An mahni hriat an nihna, “LALPA mite” tih mila an nun loh avângin, Israelte chuan hnam dangte zîngah Pathian hming an tibawrhbâng a. A hming maia Jehova betu kan ni ngai tûr a ni lo.

38:​1-23. Jehova chuan a mite chu Magog rama mi Goga beihna ata a chhan chhuak dâwn tih hriat chu a va thlamuanthlâk tak êm! Goga tih chu “he khawvêl lal,” Diabol-Setana, vân ata paih thlâk a nih hnua kohna hming a ni. Magog ram tih chuan Setana leh a ramhuai hote khuahkhirh an nihna leilung chhehvêl chu a kâwk a ni.​—⁠Johana 12:31; Thu Puan 12:​7-12.

“KA ENTIR TUR CHE LAMAH I RILRU NGHAT TLAT RAWH”

(Ezekiela 40:1–48:⁠35)

Jerusalem tihchhiat a nih hnu kum 14-na a ni a. (Ezekiela 40:⁠1) Kum sawmnga leh paruk chhûng sala tân an la hmabâk a ni. (Jeremia 29:10) Tûnah chuan Ezekiela chu kum 50 a tling ṭêp tawh a. Inlârnaah chuan, Israel ramah hruai a ni. A hnênah chuan: “Mihring fapa, i mit khân en la, i beng chhî la, ka entîr tûr che lamah i rilru nghat tlat rawh,” tia hrilh a ni. (Ezekiela 40:​2-4) Inlârnaa biak in thar a hmuh chuan Ezekiela chu a va phûr dâwn êm!

Ezekiela hmuh biak in ropui tak chuan kawngkapui 6, pindan 30, Hmun Thianghlim, Hmun Thianghlim Ber, maichâm thinga siam pakhat, leh hâlral thilhlan hlanna tûr maichâm pakhat a nei a. Biak in aṭang chuan a hnua luipui lo ni ta tui chu “a luang” a ni. (Ezekiela 47:⁠1) Ezekiela chuan a hnam anga ram ruat an chante pawh inlârnaah chuan a hmu bawk a, ram ruat tinte ramri chu khawchhak aṭanga khawthlang lama kham a ni. Tin,  rorêltuho awmna ram chu Juda leh Benjamin ram chan inkârah chuan a awm a. “LALPA hmun serh” leh LALPA awmna hmun tia koh “khawpui” chu he ram chhûngah hian a awm a ni.​—⁠Ezekiela 48:​9, 10, 15, 35.

Bible Chungchânga Zawhnate Chhânna:

40:​3–47:12​—⁠Inlârnaa biak in chuan eng nge a entîr? Ezekiela’n inlârnaa a hmuh he biak in lian tak mai hi a taka sak a ni lo. Chu chuan Pathian thlarau lam biak in​—⁠tûn laia biakna thianghlim atâna biak in anga ruahmanna chu a entîr a ni. (Ezekiela 40:2; Mika 4:1; Hebrai 8:2; 9:​23, 24) Biak in inlârna chu puithiam nihna siam ṭhat a nih hun ‘ni hnuhnûng’ chhûng hian a thleng famkim a. (2 Timothea 3:1; Ezekiela 44:​10-16; Malakia 3:​1-3) Amaherawhchu, a thlen famkimna tâwp ber erawh chu Paradis-ah a ni. Inlârnaa hmuh biak in chuan Juda sal tângte hnênah biakna dik chu tundin leh a ni ang a, Juda chhûngkaw tinte chuan chu ramah chuan rochun tûr an nei ṭheuh dâwn tih a tiam a ni.

40:​3–43:17​—⁠Biak in tehna chuan pawimawhna eng nge a neih? Biak in tehna chu, biakna thianghlim chungchânga Jehova thiltum a thleng famkim ngei dâwn tih entîrna a ni.

43:​2-4, 7, 9​—⁠Biak in aṭanga dah bo tûr “an lal ruangte” chu eng nge ni? Heta ruang sawite hi milim sawina a ni thei ang. Jerusalem lalte leh mipuite chuan Pathian biak in chu milimin an tibawlhhlawh a​—⁠chutiang chuan chûng chu an lalah an siam a ni.

43:​13-20.​—⁠Ezekiela hmuh maichâm chuan eng nge a entîr? Entîr nei maichâm chuan Isua tlanna inthawina nêna inkûngkaih Pathian duhzâwng a entîr a. He inthawina avâng hian, hriak thihte chu fela puan an ni a, “mipui tam tak” chuan Pathian mit hmuhah dinhmun thianghlim an nei a ni. (Thu Puan 7:​9-14; Rom 5:​1, 2) Chuvâng chu a ni ngei ang, Solomona biak ina awm “tuizêm lianpui,” puithiamte insilna tûra siam chu inlârnaa hmuh biak inah chuan a tel loh ni.​—⁠1 Lalte 7:​23-26.

44:​10-16​—⁠Puithiam chite chuan tunge a entîr lâwk? Puithiam chite chuan kan hun laia hriak thih Kristian pâwlho chu a entîr a. Anmahni tihthianghlimna chu kum 1918-a ‘rawhtuitu leh tithianghlimtu anga’ Jehova a ṭhut khân a thleng a ni. (Malakia 3:​1-5) A thianghlimte emaw, a inlamlêtte emaw chuan rawngbâwl theihna an chang chhunzawm thei a. Chu mi hnu aṭang chuan, “khawvêl bawlhhlawh kai lova insiam” tûrin nasa taka ṭan an lâk a ngai a, chutiang chuan puithiam ni lo hnamte’n a entîr “mipui tam tak” tân entawn tûr an lo ni ta a ni.​—⁠Jakoba 1:27; Thu Puan 7:​9, 10.

45:1; 47:13–48:29​—⁠“Ram” leh chu mi sem darhna chuan eng nge a entîr? Ram chuan Pathian mite rawngbâwlna hmun a entîr a. Jehova betu chu khawi hmunah pawh awm se, biakna dik a vawn chhûng chu ram dintharah chuan a awm a ni. Ram sem darhna chuan khawvêl thara mi rinawm tinin ram rochun tûr an chan hunah a tâwpna ber a tân thlen famkimna a nei ang.​—⁠Isaia 65:​17, 21.

45:​7, 16​—⁠Mite’n puithiamte leh hotute tâna thawhlâwm an thawhna chuan eng nge a entîr? Thlarau lam biak inah chuan, hêng hian thlarau  lama ṭanpuina a kâwk deuh ber a, chutah chuan ṭanpuina inpêk leh thawhhona rilru lantîrna a tel a ni.

47:​1-5​—⁠Ezekiela inlârnaa luitui chuan eng nge a entîr? Tui chuan nunna atâna Jehova thlarau lam thilpêk chu a kâwk a, chutah chuan Bible-a kan hmuh Krista Isua inthawina leh Pathian hriatna chu a tel a ni. (Jeremia 2:13; Johana 4:​7-26; Ephesi 5:​25-27) Lui chu biakna dik pawmtu mi tam takte châwm theih nân a thûk tial tial a. (Isaia 60:22) Chu lui chu Kum Sâng Rorêl chhûngin chak takin a luang ang a, chu luituiah chuan chu mi huna hawn tûr “lehkhabu” aṭanga hriatthiamna pawh chu a tel ang.​—⁠Thu Puan 20:12; 22:​1, 2.

47:12​—⁠Thing rah duh tak hian eng nge a entîr? He entîr nei thingte hian mihringte ṭhat famkimnaa hlângkai tûra ruahman Pathian thlarau lam châwmna a entîr a ni.

48:​15-19, 30-35​—⁠Ezekiela inlârnaa khawpui chuan eng nge a entîr? “LALPA awmna hmun” chu “vântlâng chan,” a nih loh leh hmun thianghlim lovah a awm a, chu chuan lei lam thil a nihzia a entîr. Chu khawpui chuan felna “lei thar” ni tûra insiam tûrte hlâwkpui tûr lei lam inrêlbâwlna a entîr a nih hmêl hle. (2 Petera 3:13) Kil tina kawngka awmte chuan a inhawnzia a entîr a. Pathian mite zînga hotute chu mi pan nuam leh inhawng tak an ni tûr a ni.

Kan Zir Tûrte:

40:​14, 16, 22, 26. Biak in luhna hmuna tûm thing lem awmte chuan nungchang dikte chauh luh phal ani dâwn tih a târ lang. (Sâm 92:12) Hei hian kan dik chauhvin ka biakna chu Jehova pawm tlâk a ni ang tih min zirtîr.

44:23. Tûn laia puithiam pâwl rawngbâwlna avâng hian kan va lâwm tak êm! “Bawi rinawm, fing tak” pâwl chuan Jehova mithmuha thil thianghlim leh thianghlim lo hre thei tûra min ṭanpuitu a hun apianga thlarau lam chaw pêk chhuahnaah hma an hruai a ni.​—⁠Matthaia 24:⁠45.

47:​9, 11. Hriatna​—⁠entîr nei tui nihna pawimawh tak​—⁠chuan kan hunah hian tihdamna mak tak a nei a. Miin chu tui an inna apiangah chuan thlarau lama nunna an nei a ni. (Johana 17:⁠3) Kawng lehlamah chuan, nunna petu tui dawng lo apiang chu “chi khur atân” an ni ang a, chatuana tihboral an ni ang. ‘Thutak thu fel taka hmang tûra theih tâwp kan chhuah’ chu a va pawimawh tak êm!​—⁠2 Timothea 2:⁠15.

“Ka Hming . . . Ka Tithianghlim Dâwn A Ni”

Davida lal thlah kal zêl zînga hnuhnûng ber paih chhuah a nih hnuah, Pathian dik chuan lalna chang tûra “a neitu tak tûr” a lo thlen hma chu hun rei tak chhûng a liam a phal a. Amaherawhchu, Pathian chuan Davida hnêna a thuthlung chu a kalsan lo. (Ezekiela 21:27; 2 Samuela 7:​11-16) Ezekiela hrilh lâwkna chuan “berâmpu” leh “lal” ni tûr “ka rawngbâwltu Davida” tih a sawi tel a ni. (Ezekiela 34:​23, 24; 37:​22, 24, 25) Hei hi tudang ni lovin, Lalram thuneihna changtu Isua Krista ngei hi a ni. (Thu Puan 11:15) Jehova chuan Messia Lalram hmangin ‘a hming ropui tak chu a tithianghlim’ ang.​—⁠Ezekiela 36:⁠23.

Rei lo te hnuah chuan, Pathian hming thianghlim tibawrhbângtu zawng zawng chu tihboral an ni ang a. Mahse, Jehova pawm tlâka amah bia a, chu hming tithianghlimtute chuan chatuana nunna an chang ang. Chuvângin, kan hun laia nunna tui luang zawih zawih chu hmang ṭangkaiin, biakna dik chu kan nuna thil pawimawh ber i nihtîr ang u. (w07 8/1)

[Footnote]

[Phêk 9-naa milem]

Ezekiela hmuh inlârnaa biak in ropui

[Phêk 10-naa milem]

Ezekiela hmuh inlârnaa nunna lui chuan eng nge a entîr?

[Milem Hawhtîrtu]

Pictorial Archive (Near Eastern History) Est.