Jehova Nî Chu Chhelna Nêna Nghâkin
Jehova Nî Chu Chhelna Nêna Nghâkin
“In rinnaah chuan . . . chhelna telh ula.”—2 PETERA 1:5, 6.
1, 2. Chhelna chu eng nge ni a, engvângin nge Kristiante’n an mamawh?
JEHOVA ni ropui chu a hnai tawh hle a. (Joela 1:15; Zephania 1:14) Pathian laka rinawmna vawng reng tum Kristiante kan nih angin, Jehova lalchungnunna thiam chantîr hun chu kan nghâkhlel hle a ni. Chu mi kan nghah chhûng chuan, kan rinna avângin huatna te, sawichhiatna te, tihduhdahna te, leh thihna te pawh kan tuar a. (Matthaia 5:10-12; 10:22; Thu Puan 2:10) Chuvângin chhelna—harsatna dâwl theihna—chu kan mamawh a ni. Tirhkoh Petera chuan: “In rinnaah chuan . . . chhelna telh ula,” tiin min fuih a. (2 Petera 1:5, 6) Isua chuan: “A tâwp thlenga tuar peih [a nih loh leh chhel] apiang chu, chu mi ngei chu chhandamin a awm ang” a tih avângin, kan chhel a ngai a ni.—Matthaia 24:13.
2 Natna te, lusûnna te, leh fiahna dangte pawh kan hmachhawn bawk a. Kan rinna kan hloh chuan Setana chu a va lâwm dâwn êm! (Luka 22:31, 32) Jehova ṭanpuinain fiahna chi hrang hrang chu chhel takin kan tuar thei a ni. (1 Petera 5:6-11) Jehova nî chu chhelna leh rinna chuai thei lo nên kan nghâk thei tih finfiahtu thilthleng dik tak ṭhenkhat chu i han ngaihtuah ang u.
Anni Chu Natnain A Dang Lo
3, 4. Natna nei chungin Jehova rawng rinawm takin kan bâwl thei tih târ langtu entîrna pe rawh.
3 Tûn laiah Pathian chuan thilmak tiin min tidam lo va; mahse, natnate chhel taka tuar thei tûrin chakna min pe a ni. (Sâm 41:1-3) Sharon-i chuan: “Ka hriat theih chin aṭangin, ṭhutna lîr thei (wheelchair) chu ka ṭhian a ni reng a. Ka pian aṭangin thluak lam ṭhat lohna avânga kutkê chak lohna (cerebral palsy) chuan naupan lai hun hlim tak ka hman tûr chu min lâk bosak a ni,” a ti. Jehova leh a thutiam hrisêlna ṭha famkim chungchâng hriatna chuan Sharon-i chu beiseina a pe a. Ṭawng chhuah leh kal vêl chu harsat hle mah se, Kristian rawngbâwlnaah hlimna a hmu a ni. Kum 15 vêl kal ta khân, ani chuan: “Ka natna chuan zual lam a pan zêl mai thei; mahse, Pathian ka rinna leh amah nêna kan inlaichînna chu kan nunna bul ber a ni. Jehova mite zînga mi nih leh a ṭanpuina ka dawng reng chu ka va lâwm tak êm!” a ti.
4 Tirhkoh Paula chuan Thessalonika khuaa Kristiante chu “rilru tête chu fuih” tûrin a hrilh a. (1 Thessalonika 5:14) Chutianga nasa taka lunghnualna chuan rilru beidawnna a awmtîr thei a ni. Kum 1993 khân, Sharon-i chuan heti hian a ziak a: “Hlawhchham ṭhak nia inhriatna neiin, . . . kum thum chhûng rilru beidawnna nasa tak ka nei a. . . . Upate chuan thlamuanna leh fuihna min pe a. . . . Vênnainsâng kal tlangin Jehova chuan rilru beidawnna nasa tak hriatthiamna chu duat takin min zirtîr bawk a. Ni e, ani chuan a mite chu a ngaihsak tak zetin, kan rilru chu a hre thiam a ni,” tiin. (1 Petera 5:6, 7) Sharon-i chuan Jehova nî chu a nghah rualin, Pathian rawng chu rinawm takin a la bâwl reng a ni.
5. Kristiante chuan lungngaihna nasa tak chu chhel takin an tuar thei tih engin nge finfiah?
5 Kristian ṭhenkhat chu nuna an thil lo tawn tawhte avângin nasa takin an lungngai a. Harley-a chuan Khawvêl Indopui II-naa inbeihna nasa tak chu a hmu a, indona râpthlâk tak chu a mangphan ṭhîn a ni. A muthilh laiin: “Fîmkhur rawh! Fîmkhur rawh!” tiin a au chhuak vak vak ṭhîn a. A han ṭhangharh meuh chuan, a thlan chuan a lo bual huh vek tawh ṭhîn a ni. Amaherawhchu, Pathian ngaihsakna nun kawng chu a zawh thei a; a hnuah chuan, chutiang thil a mangphan ṭhin chu zawi zawiin a reh ta a ni.
6. Engtin nge Kristian pakhat chuan rilru lam buaina a hmachhawn?
6 Kristian pakhat, a lutuka rilru awmdân inthlâkna (bipolar disorder) nei chuan in tina thu hrilha kal chu harsa a ti hle a. Mahse, rawngbâwlnaa tel chu ama tân leh ngaithla duhte tân nunna a ni tih a hriat avângin, a tel ṭâng ṭâng a ni. (1 Timothea 4:16) A châng chuan kawngkâ va kik tak ngial pawh a thei lo; mahse, heti hian a sawi: “A tâwpah chuan, ka rilru chu thunun leh theiin, in danga kalin, ka tichhin leh thei a. Rawngbâwlnaa tel chhunzawm zêlin, thlarau lama hrisêlna a âwm tâwka ṭha chu ka vawng reng a ni,” tiin. Inkhâwmnaa tel pawh a tân a harsa a; mahse, he unaupa hian thlarau lama inkawmna hlutzia chu a hria a. Chuvâng chuan, inkhâwm tûr chuan a ṭûl angin hma a la a ni.—Hebrai 10:24, 25.
7. Mi ṭhenkhat chuan vântlâng hmaa thusawi emaw, inkhâwmnaa tel emaw chu hlau mah se, engtin nge chhelna an lantîr?
7 Kristian ṭhenkhat chuan a lutuka hlauh neihna—dinhmun emaw, thil emaw hlauhna nasa tak chu an nei a. Entîr nân, vântlâng hmaa thusawi emaw, inkhâwmnaa tel emaw chu an hlau mai thei a ni. Chûngho tân chuan Kristian inkhâwmnaa chhânna pêk emaw, Theocratic Rawngbâwlna School-a thusawi emaw a harsat dân tûr chu han ngaihtuah teh! Mahse, anni chu an chhel a, inkhâwma an telna leh chhânnate an pêkna chuan min tichak hle a ni.
8. Eng nge rilru lam buaina hmachhawn huna ṭangkai ber?
8 Chawlhhahdam tamna leh mut tamna chuan mi chu rilru lam buaina chhel taka tuar tûrin a ṭanpui thei a. Damdawia inenkawl chu a finthlâk thei bawk a ni. Mahse, a ṭangkai ber chu ṭawngṭaia Pathiana innghah hi a ni. Sâm 55:22 chuan: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” a ti a. Chuti chu, “i thinlung zawng zawngin LALPA ring” ngei ang che.—Thufingte 3:5, 6.
Lusûnna Laka Chhelin
9-11. (a) Kan hmangaih takin min thihsan huna lungngaihna chu chhel taka tuar tûrin engin nge min ṭanpui thei? (b) Engtin nge Anni entîrna chuan lusûnna chhel taka tuar thei tûrin min ṭanpui theih?
9 Thihnain chhûngkuate a ṭhen hian, chu chânna nasa tak chuan mite chu a tilungngai hle thei a. Abrahama chuan a nupui duh tak Sari thi chu a ṭah a ni. (Genesis 23:2) Mi ṭha famkim Isua meuh pawh, a ṭhian Lazara a thihin ‘a ṭap a.’ (Johana 11:35) Chuvâng chuan, i hmangaih tuemaw a thih huna lungngaih chu thil pângngai tak a ni. Amaherawhchu, Kristiante chuan thawhlehna a awm dâwn tih chu an hria a. (Tirhkohte 24:15) Chuvâng chuan, anni chu ‘mi dang beiseina rêng nei lote angin an lungngai lo.’—1 Thessalonika 4:13.
10 Engtin nge lusûnna chu kan hmachhawn theih ang? Tehkhin thu hi a ṭangkai mai thei. Kan ṭhian pakhat a zin chhuah hian, a rawn kîr leh huna hmuh leh kan inbeisei avângin, hun rei tak chhûng kan lungngai lo tlângpui a. Kristian rinawm pakhat thihna chutianga thlîrna chuan, a tholeh dâwn tih kan hriat avângin kan tawrhna chu a tinêp thei a ni.—Thuhriltu 7:1.
11 “Thlamuanna zawng zawng Pathian” chunga innghah pumhlum ṭhakna chuan lusûnna chhel taka tuar thei tûrin min ṭanpui ang. (2 Korinth 1:3, 4) Tin, kum zabi khatnaa hmeithai Anni thiltih ngaihtuah pawh chu a ṭangkai bawk ang. Pasal a neih aṭanga kum sarih lekah hmeithai a lo ni a. Mahse, kum 84 mi a nih pawhin, Pathian biak inah rawngbâwlna thianghlim Jehova hnênah a a la hlân cheu a ni. (Luka 2:36-38) Chutianga inpêkna chuan a lusûnna leh mal nia inhriatna chu chhel taka tuar thei tûrin a ṭanpui ngei ang. Lalram thu hrilhna pawh tiama Kristian thiltiha tel ziahna chuan lusûnna chhel taka tuar thei tûrin min ṭanpui thei a ni.
Fiahna Chi Hrang Hrangte Hmachhawnin
12. Kristian ṭhenkhat chuan chhûngkhaw nun nêna inkûngkaihin eng fiahna nge an tawn?
12 Kristian ṭhenkhatte chuan chhûngkaw nun nêna inkûngkaih fiahnate chhel taka an tawrh a ngai thei a. Entîr nân, khawppui pakhat zâwk zâwk chu a uirê a nih chuan, chu chuan chhûngkuaah nghawng nasa tak a nei thei a. A rinawma zâwk chu a thlabârna leh lungngaihna avângin zân pawh mu thei lovin, thunun theih loh khawpin a ṭap pawh a ni thei. A lungngaih êm avângin thil awlsam tak a tih pawhin, a tisual emaw, a chesual emaw thei a ni. Tin, a ei-in thei lovin, a chêr telh telh thei a, a rilru pawh a buai phah thei a. Chutiang dinhmunah chuan Kristian thiltiha tel pawh a harsa hle thei a ni. Tin, chu chuan naupangte pawh a va nghawng nasa dâwn êm!
13, 14. (a) Biak in hlannaa Solomona ṭawngṭaina aṭangin eng chakna nge kan neih theih? (b) Engvângin nge thlarau thianghlim dîla kan ṭawngṭai?
13 Chutiang chi fiahna kan tawn hunah, Jehova chuan kan mamawh ṭanpuina min pe a. (Sâm 94:19) Jehova biak in hlannaa Lal Solomona ṭawngṭainain a târ lan angin, Pathian chuan a mite ṭawngṭaina a ngaithla a ni. Solomona chuan Pathian hnênah: “I mi Israel zawng zawngte zînga mahni thinlunga hri awma hriaa, he mi in lam hawia kut rawn phar apiangin ṭawngṭaina leh dîlna an rawn hlan rêng rêng chu i awmna vân aṭangin lo ngaithla la, ngaidam la, che la, nang an thinlung hretu, mi tin an awm dân ang zêlin hlawhtîr ang che; (nang zawng, nangmah chauh hi mihring fa zawng zawngte thinlung hretu i ni si a;) kan pute i pêk rama an awm chhûng zawng hian an ṭih theihna tûr chein,” tiin a ṭawngṭai a ni.—1 Lalte 8:38-40.
14 Thlarau thianghlim dîl reng chu a ṭangkai lehzual thei a. (Matthaia 7:7-11) Thlarau rah zîngah chuan hlimna leh remna pawh a tel a ni. (Galatia 5:22, 23) Kan Pa vâna miin kan dîlnate a chhân hian a va hahdamthlâk tak êm! Ani chuan hrehawm tawrhna chu hlimna, lungngaihna chu remnain a thlâkthleng si a.
15. Eng Bible chângtein nge kan lungkhamna chhâwk tûra min ṭanpui thei?
15 Lungngaihna nasa tak kan tawrh hunah lungkhamna engemaw chen a awm chu kan ring tûr a ni. Mahse, hêng Isua thute rilrua kan dahna chuan kan lungkhamna chu a chhâwk thei ngei ang: “‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u. . . . A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tihte hi. (Matthaia 6:25, 33, 34) Tirhkoh Petera chuan ‘[Pathianin] min ngaihsak ṭhin avângin kan manganna zawng zawng ama chungah nghat vek’ tûrin min fuih a ni. (1 Petera 5:6, 7) Buaina chingfel tûra ṭan khawh chu a âwm a. Mahse, kan theih chin kan tih tawh hnuah chuan, lungkhamna chuan min ṭanpui lo va; chu mi chungchânga ṭawngṭaina erawh chuan min ṭanpui thei a ni. “I awm dân tûr chu LALPA chungah nghat la, amah chu ring la, aman a ti vek ang,” tiin fakna hla phuahtu chu a zai a ni.—Sâm 37:5.
16, 17. (a) Engvângin nge lungkhamna laka kan fihlîm ṭhak loh? (b) Philippi 4:6, 7-na kan nunpui chuan eng nge kan tawn ang?
16 Paula chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a ziak a. (Philippi 4:6, 7) A nihna takah chuan, Adama thlah mi ṭha famkim lote tân lungkhamna laka fihlîm ṭhak chu thil theih a ni lo. (Rom 5:12) Esauva nupui Hit mite chu Pathian ngaisak a nu leh a pa, Isaaka leh Rebeki “thinlung tiretheitute an ni.” (Genesis 26:34, 35) Natna pawhin Timothea leh Trophima ang Kristiante chu a tilungkham ngei ang. (1 Timothea 5:23; 2 Timothea 4:20) Paula chuan a rinpuite a lungkham bawk a. (2 Korinth 11:28) Mahse, ‘ṭawngṭaina Ngaithlatu’ chu amah hmangaihtute ṭanpui tûrin a inpeih reng a ni.—Sâm 65:2.
17 Jehova nî chu kan nghah rualin, “thlamuanna Pathian” ṭanpuina leh thlamuanna kan dawng a ni. (Philippi 4:9) Jehova chu “lainatnaa khat, mi khawngaih thei tak” a ni a, ani chu ‘a ṭha a, ngaihdam a peih a,’ tin, ‘vaivut mai kan ni tih a hre reng’ bawk. (Exodus 34:6; Sâm 86:5; 103:13, 14) Chuvâng chuan ‘kan duhnate chu i hriattîr’ ang u, chuti chuan “Pathian thlamuanna”—mihring hriatthiam phâk bâka rilru thlamuanna chu kan nei dâwn a ni.
18. Joba 42:5-a târ lan angin, engtin nge Pathian chu kan ‘hmuh’ theih?
18 Kan ṭawngṭainate chhân a nih hian Pathian chu kan hnênah a awm tih kan hria a. Joba’n fiahnate chhel taka a tawrh chhuah hnu chuan, Jehova chungchângah: “Benga hriatna mai zawngin ka hre tawh chia, mahse, tûnah zawng ka hmu ta che,” tiin a sawi a ni. (Joba 42:5) Hriatthiamna mit, rinna, leh lâwmnain, Pathian min dâwr dânte chu kan ngaihtuah thei a, tûn hmazâwng aiin amah chu kan “hmu” thei a ni. Chutianga inhnaihna chuan thinlung leh rilru thlamuanna min va pe tak êm!
19. Kan ‘manganna zawng zawng Jehova chunga kan nghah vek’ chuan eng nge lo thleng ang?
19 Kan ‘manganna zawng zawng a chunga kan nghah vek’ chuan, kan thinlung leh kan ngaihtuahnate min vênsaktu chhûngrila thlamuanna nên fiahnate chu chhel takin kan tuar thei a. Nuam tihlohna, hlauhna, leh mangannate laka zalenna chu kan entîr nei thinlung chhûngrilah kan tawng ang. Ka rilru chu hrilhhaina emaw, lungkhamna emaw tihbuaiin a awm lo bawk ang.
20, 21. (a) Stephana thiltawn chuan tihduhdahna hmachhawn hunah thlamuanna a awm tih târ lanna eng nge a pêk? (b) Fiahna tawh laia thlamuanna chungchângah tûn laia entîrna sawi rawh.
20 Zirtîr Stephana chuan a rinna fiahna nasa tak a tawh laiin thlamuanna a lantîr a. Thu hrilhna hnuhnûng ber a neih hma chuan, Sanhedrin-a awm zawng zawng chuan “a hmêl chu vântirhkoh hmêl angin an hmu a.” (Tirhkohte 6:15) A hmêlah thlamuanna a lang a ni—vântirhkoh, Pathian thuchah kengtu ang maiin. Stephana’n Isua thihnaa rorêltute thiam lohna a hailang chuan “an thin a khei ta a, Stephana chungah chuan an ha an ṭhial a.” “Ani chu thlarau thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a.” Chu inlârna tihchaka awmin, Stephana chu a thih thlengin a rinawm a ni. (Tirhkohte 7:52-60) Inlârnate chu hmu ve lo mah i la, tihduhdaha kan awm hunah Pathian pêk thlamuanna kan nei thei a ni.
21 Khawvêl Indopui II-na chhûnga Nazi ho kuta thi Kristian ṭhenkhatte rilru ngaihtuahna hi lo chhinchhiah teh. Court-a a thiltawn chu sawiin, mi pakhat chuan: “Thi tûra ka chungthu rêl a ni a. Ka ngaithla a, chu mi hnuah chuan, ‘Thih thlengin rinawm rawh,’ tih leh kan Lalpa thusawi dang ṭhenkhat ka sawi hnu chuan thil engkim a tâwp ta. Mahse, lungngai duh suh u. In ngaihtuah phâk loh khawp tûr rilrua remna leh thlamuanna ka neih avângin!” a ti a. Lu tanchhum tûr Kristian ṭhalai pakhat chuan a nu leh pa hnênah heti hian lehkha a ziak a: “Tûnah hian zan lai a pel der tawh a. Ka rilru thlâk tûrin hun ka la nei a ni. Ah! kan Lalpa ka phatsan hnuah chuan he khawvêlah hian ka hlim leh thei ngai dâwn em ni? Thei hauh lo vang! Mahse, tûnah chuan he khawvêl hi hlim tak leh remnain ka chhuahsan tih inhre chiang thei ta,” tiin. Jehova’n a chhiahhlawh rinawmte a chhawmdâwl tih chu rinhlelh rual a ni lo.
I Chhel Thei!
22, 23. Jehova nî chu chhel taka i nghah rualin, eng nge i rin tlat theih?
22 Kan ngaihtuah tâk ang harsatna chu i tâwk lo mai thei a. Mahse, Pathian ṭih mi Joba’n: “Hmeichhe hrin tawh mihring phawt chu rei lo tê dam, buainaa khat a ni,” tia a sawi chu a dik a ni. (Joba 14:1) Fate thlarau lama kaihhruaina pe tûra nasa taka thawkrimtu nu leh pa pawh i ni mai thei a. Anni chuan school-ah fiahna an tâwk mai thei a; mahse, Jehova leh a felna thu bulte atâna an din ngheh hian i va lâwm ṭhîn tak êm! I hnathawhna hmunah harsatna leh thlêmna i tâwk pawh a ni thei a. Mahse, ‘Lalpa’n i phur nî tina a phurhsak’ che avângin, hêngte leh dinhmun dangte chu chhel takin i tuar thei a ni.—Sâm 68:19.
23 Mi narân ve mai mai niin i inhre mai thei; mahse, Jehova chuan i hnathawh leh a hming chunga hmangaihna i lantîr chu a theihnghilh ngai dâwn lo tih hre reng ang che. (Hebrai 6:10) A ṭanpuina nên chuan rinna fiahnate chu chhel takin i tuar thei a ni. Chuvâng chuan i ṭawngṭaina leh i thiltumah Pathian duhzâwng tih chu telh reng ang che. Chutiang chuan, Jehova nî chu chhel taka i nghah rualin, Pathian malsâwmna leh chhawmdâwlna chu i ring tlat thei a ni. (w07 7/15)
Engtin Nge I Chhân Ang?
• Engvângin nge Kristiante chu an chhel a ngaih?
• Engin nge natna leh lusûnnate chhel taka tuar thei tûra min ṭanpui thei?
• Engtin nge ṭawngṭaina chuan fiahnate chhel taka tuar thei tûrin min ṭanpui?
• Engvângin nge Jehova nî chhelna nêna nghah chu thil theih a nih?
[Zirlai Atâna Zawhnate]