‘Pathian Lamah I Hausa’ em?
‘Pathian Lamah I Hausa’ em?
“Mahni tâna sum khâwla Pathian lama ngah [a nih loh leh, hausa] si lo chu, chuti chu a ni ṭhîn.”—LUKA 12:21.
1, 2. (a) Mite chuan eng atân nge nasa taka inpêk an hreh loh? (b) Eng harsatna leh hlauhawmte nge Kristiante’n an hmachhawn a ngaih?
HMASANG ata tawh mi tam takte chuan hausak tumin hna an thawk rim ṭhîn hle a. Entîr nân, kum zabi 19-a Australia, South Africa, Canada, leh United States-ah te rangkachak khur thar hmuh chhuah a nih khân, chûng chuan hmun hla taka awm hausak tum mi tam tak chu an hriat ngai lohna ram leh a châng phei chuan ei tûr leh riahna hmun tûr pawh awm lohna hmunahte a feh chhuahtîr a, anni chuan an in lum leh an hmangaih takte pawh an kalsan hreh lo hial a ni. Ni e, mi tam takte chuan an thinlungin a duh tak hausakna ûm tûr chuan an nun an thâp hreh lo va, chu mi atân chuan nasa takin an inpe a ni.
2 Tûn laia mi tam takte chu chutianga ro tak tak zawnnaah tel lo mah se, an inchâwm nân an thawh rim a ngai a. Tûn lai khawvêla ei zawn chu a harsain, thawh rim a ngai a, phurrit tak a tling a ni. Ei tûr te, thawmhnaw hâk tûr te, leh awmna tûr inte chauh ngaihtuah chu thil awl tak a nih avângin, thil pawimawh zâwkte chu ngaihthah emaw, theihnghilh emaw a ni hial ṭhîn. (Rom 14:17) Isua chuan mihring rilru put hmang chiang taka târ langtu tehkhin thu a sawi a. Chu chu Luka 12:16-21-ah kan hmu thei a ni.
3. Isua tehkhin thu Luka 12:16-21-a chhinchhiah chu tawi têin sawi rawh.
3 Thuziak hmasaa chipchiar ang reng taka kan zîr tawh awhna laka invên a ngaihzia nêna inzawmin Isua chuan he tehkhin thu hi a sawi a ni. Awhna laka vaukhânna thu a sawi hnuah, Isua chuan mi hausa, thil ṭhaa buh in khat tlat tawh duhtâwk lova, buh in ṭhiat a, thil ṭha tam zâwk a dah theih nâna a aia lian zâwk satu chungchâng a sawi a. Châwl hahdama nuamsa taka awm inpeih tawha a inhriat meuh chuan, Pathianin a nun a tâwp dâwn tawh a, a thil ṭha chhêk khâwm zawng zawngte chu mi dang ta a nih tûr thu a hrilh a ni. Tichuan, Isua chuan: “Mahni tâna sum khâwla Pathian lama ngah [a nih loh leh, hausa] si lo chu, chuti chu a ni ṭhîn,” tiin a thusawi chu a titâwp a ni. (Luka 12:21) He tehkhin thu aṭang hian eng nge kan zir theih? Engtin nge zir tûr kan hmuhte chu kan nunpui theih ang?
Harsatna Tâwktu Mi Pakhat
4. Isua tehkhin thua mi chu mi eng ang nge ni?
4 Ram tam takah chuan, he Isua tehkhin thu sawi hi hriat lâr tak a ni a. Isua chuan a tehkhin thu chu: “Mi hausa tu emaw a lo a hlâwk êm êm a,” tiin a sawi ṭan mai a. Chu pa chuan a hausakna chu bumna emaw, dik lo tak emawa a neih a ni a ti lo. Thu danga sawi chuan, mi sual anga târ lan a ni lo a ni. Isua sawi dân aṭang chuan, he tehkhin thua mi hi mi taima tak nia ngaih theih a ni ang. A lo berah chuan, he pa hian a nakin hun atâna ruahmanna a neiin, a inkhêk khâwl a; chu chu a nupui fanaute ṭhatna tûr ngaihtuah vânga ti pawh a ni thei ang. Chuvângin, khawvêl lam taka thlîr chuan, tehkhin thua mi chu mahni mawhphurhna hlen tuma taima taka hna thawktu anga sawi theih a ni dâwn a ni.
5. Eng harsatna nge Isua tehkhin thua mi chuan a hmachhawn?
5 Engpawh chu ni se, Isua chuan tehkhin thua mi chu mi hausa tiin a ko va, a awmzia chu thil tam tak a nei tawh sa reng tihna a ni. Amaherawhchu, Isua sawi angin chu mihausa pa chuan harsatna a tâwk a. A ram chuan a beisei aia tam daih, a mamawh leh a enkawl theih aia tam daih a thar chhuak tih a sawi a ni. Eng nge a tih tûr chu ni ta ang?
6. Tûn laia Pathian chhiahhlawh tam takte’n eng duh tlan tûrte nge an hmachhawn?
6 Tûn laia Jehova chhiahhlawh tam takte pawhin tehkhin thua mi hausa pa harsatna tawh ang chu an tâwk ve a ni. Kristian dikte chuan hnathawktu rinawm leh taima tak nih an tum tlat ṭhîn a. (Kolossa 3:22, 23) Hnathawktu an ni emaw, an mahniin sumdâwnna an nei emaw pawh ni se, an hlawhtling hle ṭhîn a, an thiltihah ti ṭha ber pâwl an ni hial bawk ṭhîn. Hnathawhna lama kaisântîr an nih dâwn emaw, sumdâwnna ṭha a lo awm emaw hian thu tlûkna an siam a ngai ṭhîn a. Chu kaisântîrna chu an pawmin, sum tam zâwk an hailût dâwn em ni ang? Chutiang chiah chuan, Thuhretu ṭhalai tam tak chu lehkha zirna lamah an thiam thei hle a. Chu mi avâng chuan zirna ṭha hmingthang taka zir chhunzawm zêl theihna lawmman emaw, pawisa chawi ngai lova lehkha zir theihna sholarship emaw pêk an ni mai thei. Mi tam zâwkin an thlan tûr kawng chu zawhin, chûng thilte chu an pawm mai dâwn em ni?
7. Engtin nge Isua tehkhin thua mi chuan a harsatna a sutkian?
7 Isua tehkhin thu-ah khân lo kîr leh ta ila, mi hausa pa chuan a thlai tharte chhêk khâwmna tûr nei lo khawpa a thar ṭhat khân eng nge a tih? Buh inte chu ṭhiat a, a aia lian zâwk sa a, chutah chuan a buh thar leh thil ṭha a chuangliama a neih zawng zawngte chhêk khâwm chu a titlu a. Chu a ruahmanna siam chuan him tâwk nia inhriatna leh lungâwina a pe a ni ngei ang, ani chuan: “Ka thlarau hnênah, ‘Thlarau kum tam tak chhûng atân sum tam tak i khâwl hi; châwl la, eiin bâr la, hlim takin awm rawh ka ti ang,’” tiin a inngaihtuah a ni.—Luka 12:19.
Engvângin Nge “Mi ” A Nih?
8. Isua tehkhin thua mi chuan eng thil pawimawh tak nge a hmaih?
8 Amaherawhchu, Isua sawi angin mi hausa pa ruahmanna siam chuan himna suak a pe a. A thiltih chu thil tihâwm tak niin lang mah se, thil pawimawh tak mai pakhat—Pathian duhzâwng tih—chu a hmaih a ni. Amah chauh a inngaihtuah a, ei-ina hun nuam tak a hman tûr ringawt chu a ngaihtuah a. “Sum tam tak” a neih avângin “kum tam tak” chhûng dam bawk tûrah a inhria a ni. Mahse, vânduaithlâk tak maiin, chutiang chuan thil a thleng ta si lo. Isua’n a hmaa a lo sawi tawh ang khân, “Sum ngah hi mihring dam chhan a ni lo.” (Luka 12:15) Chu mi zânah ngei chuan Pathianin: “Mi â pa, zaninah hian i [nunna] an lâksak dâwn che a ni; i thil dehchhuahte kha tu ta nge ni ta ang le?” tia a sawi avângin, chu pa hnathawh chhan zawng zawng chu a tâwp ta thut mai a ni.—Luka 12:20.
9. Engvângin nge tehkhin thua mi chu mi â tia koh a nih?
9 Hetah tak hian Isua tehkhin thua a pawimawhna lai ber chu kan lo thleng ta. Pathian chuan chu pa chu mi â tiin a ko va. Exegetical Dictionary of the New Testament sawi dânin chutiang chi Grik thu mal chuan “hriatthiamna tlâkchhamzia a târ lang fo ṭhîn” tih a hrilhfiah a ni. He tehkhin thu-ah hian Pathian chuan “mi hausa nakin hun ruahmanna siam a ṭangkai lohzia” a lai lang tih chu dictionary chuan a sawi belh a ni. He “mi â” tih thu mal hi rilru lama mi fingvâr lo sawina a ni lo va, “Pathian chunga a innghahzia pawm duh lotu” sawina a ni. Mi hausa pa hnêna Isua thusawi chuan a hnua kum zabi khatnaa Asia Minor-a Laodikei kohhrana Kristiante hnêna a thusawi: “Ka hausa a, sum ka ngah a, engmah ka tlachham lo ve, i tih avâng leh nang mi rethei, khawngaihthlâk, pachhia, mitdel, saruak chu i ni tih i inhriat loh avângin,” tih chu min hriatchhuahtîr a ni.—Thu Puan 3:17.
10. Engvângin nge “sum tam tak” neih chu “kum tam tak” chhûng nung tûra tiam kamna a nih loh?
10 Tehkhin thuin a zir tîr chu ngun takin kan ngaihtuah tûr a ni. Tehkhin thua mi angin, “sum tam tak” kan neih nâna taima taka hna thawk siin, “kum tam tak” chhûng nun theihna tûra thil ṭûlte chu kan tih hmaih em? (Johana 3:16; 17:3) Bible chuan: “Thinur nî chuan sum leh paiin ṭangkaina a nei lo vang,” tin, “a sum ring mi chu a vuai ang” tiin a sawi a ni. (Thufingte 11:4, 28) Chuvângin, Isua chuan tehkhin thu a sawiah he zilhna hnuhnûng ber: “Mahni tâna sum khâwla Pathian lama ngah [a nih loh leh, hausa] si lo chu, chuti chu a ni ṭhîn,” tih hi a telh a ni.—Luka 12:21.
11. Engvângin nge thil neih chunga beiseina leh himna nghah chuan hlutna a neih loh?
11 Isua’n “chuti chu a ni ṭhîn” a tih khân, tehkhin thua mi hausa chunga thilthleng ang chu an nuna hausakna lam ringawt buaipui a, an beiseina leh himna chu hausaknaa nghattute chungah a thleng dâwn a tihna a ni. ‘Mahni tâna sum khâwl’ chu a sualna lai a ni chiah lo, ‘Pathian lama hausak’ loh chu a sualna lai a ni zâwk. Zirtîr Jakoba chuan: “Tûnah ngai teh u khai, nangni, ‘Vawiinah emaw, naktukah emaw, chu mi khawpuiah chuan ka kal ang a, chutah chuan kum khat ka va thang ang a, kan sum dâwng ang a, hlâwkna kan hmu ang,’ titute u. Naktûkah chuan engnge lo awm dâwn in hre si lo. In nunna chu engnge ni? Chhûm rei lo tê lo lang a, ral leh ta mai ṭhîn ang hi in ni si a. Chutichuan, ‘Lalpan rem a tih chuan kan dam ang a, chu mi kha mi kan ti ang,’ in ti tûr hi a ni,” tia ziakin chutiang vaukhânna ang tho chu a pe a ni. (Jakoba 4:13-15) Mi chu eng anga hausa pawh ni se, a thil neihte chu eng anga tam pawh ni se, Pathian lama a hausak loh chuan chûng zawng zawngte chuan hlutna a nei lo vang. Chuti a nih chuan, Pathian lama hausa tih awmzia chu eng nge ni?
Pathian Lama Hausa Tûrin
12. Eng tihnain nge Pathian lama hausa min nihtîr ang?
12 Isua thusawiah chuan, Pathian lama hausakna chu mahni tâna sum leh pai chhêk khâwm, a nih loh leh hausakna ûm nên a inkalh a ni. Chuvângin, Isua sawi chu kan nuna kan thil ngaih pawimawh ber chu hausakna lam emaw, kan thil neihte nawmchen nâna hman emaw lam a ni tûr a ni lo tih a ni. Chu ai chuan, kan thil neihte chu Jehova nêna kan inlaichînna ti ṭha tûr, a nih loh leh tichak tûr atân kan hmang zâwk tûr a ni. Chutianga tihna chuan Pathian lama hausa min nihtîr ngei ang. Engvângin nge? A chhan chu a hnên aṭanga malsâwmna tam tak dawn theihna kawng a hawn vâng a ni. Bible chuan: “LALPA malsâwmna chuan a tihausa ṭhîn a, lungngaihna a belhchhah ṭhîn lo,” tiin min hrilh a ni.—Thufingte 10:22.
13. Engtin nge Jehova malsâwmna chuan mi a ‘tihhausak’?
13 Jehova’n a mite mal a sâwm hian, a ṭha ber a pe ziah ṭhîn. (Jakoba 1:17) Entîr nân, Jehova’n Israelte chênna tûr hmun a pêk khân, “hnutetui leh khawizu luanna ram” a pe a. Aigupta ram pawh chutiang ram anga sawi ni mah se, Jehova’n Israel mite a pêk chu ram chu thil pawimawh tak pakhatah tal a danglam a ni. Mosia chuan, chu ram chu “LALPA in Pathian zawn chhuah ram” tiin Israel mite chu a hrilh a. Thu danga sawi chuan, Jehova’n a enkawl dâwn avângin an hmuingîl dâwn tihna a ni. Israel mite chu Jehova chunga an rinawm chhûng chuan, ani chuan nasa takin mal a sâwm a, an chhehvêl hnamte aia chungnung zâwk daihin an nung a ni. Ni e, Jehova malsâwmna chu a ni mi “tihausa ṭhîn” chu!—Number 16:13; Deuteronomy 4:5-8; 11:8-15.
14. Pathian lama hausate chuan eng thil nge an tawn?
14 “Pathian lama hausa” tih chu “Pathian mit hmuha hausa” (Today’s English Version leh The New Testament in Modern English, by J. B. Phillips) ti pawha lehlin a ni bawk. Mi hausate chuan mi dangte mit hmuha an lan dân chu an ngaihtuah tlângpui ṭhîn a. Hei hi an nun dân phungah a lang fo ṭhîn. Anni chuan Bible-in “dam chhûng ropuina lem te” tia a kohte hmanga mite rilru hneh chu an duh a ni. (1 Johana 2:16) Chutiang nêna inkalh takin, Pathian lama hausate chuan Pathian pawm, a duhsakna, leh a ngilneihna chu nasa takin an dawng a, amah nêna mi mal inlaichînna duhawm tak an nei bawk. Chutiang chanvo hlu tak neihna chuan sum leh pai lama hausaknain a pêk theih loh hlimna leh him nia inhriatna chu a pe a ni. (Isaia 40:11) Zawhna lo awm ta chu, Pathian lama hausa tûrin eng nge kan tih ngai?, tih hi a ni.
Pathian Mithmuha Hausa
15. Pathian lama hausa tûrin eng nge kan tih ngai?
15 Isua tehkhin thua mi chuan ama hausak nân ringawt ruahmanna siamin, a thawk rim hle a; mi â tia koh a ni. Chuvângin, Pathian lama hausa tûr chuan Pathian mithmuha ṭangkai leh hlu thiltihtea kan thawh rim leh kan tel kim vek a ngai a ni. Chu mi zîngah chuan Isua’n: “Kal ula, hnam tina mi zirtîrahte siam ula,” tia a sawi hi a tel a. (Matthaia 28:19) Kan hun, tha leh zung, leh kan theihnate keimahni hlâwkpui nân ni lova, Lalram thu hrilhna leh zirtîr siam nâna hman chu sum indah khâwl angin a sawi theih ang. Tûna kan hmuh tûr thiltawnte’n a târ lan angin, chutianga tite chuan thlarau lamah hlâwkna nasa tak an hmu a ni.—Thufingte 19:17.
16, 17. Pathian mit hmuha hausa nihtîrtu nun kawng târ lan nân eng thiltawnte nge i sawi theih?
16 Khawchhak ram pakhata Kristian pa pakhat chungchâng hi han ngaihtuah teh. Computer lama mi thiam a ni a, hlawh ṭha tak a nei a ni. Amaherawhchu, a hnathawh chuan a hun zawng zawng mai chu luah khatin, thlarau lamah pachhe hle nia inhriatna a neihtîr a. A tâwpah chuan, a hna thawhna lama inpêk chhunzawm zêl ai chuan a bânsan ta zâwk a, a thlarau lam mamawhte leh mawhphurhnate atâna hun tam zâwk a neih theih nân vûr siamin, kawtthlêrah a hralh ta a ni. Tûn hmaa a hnathawhpuite chuan an nuihzat a, mahse engtin nge a awm tâk zêl? “Computer nêna hna ka thawh lai ai khân sum leh pai lama ka dinhmun chu a ṭha zâwk daih a ni. Ka hna thawh hmasaknaa ka neih rilru hahna leh lungngaihnate chu ka neih loh avângin ka hlim zâwk a. Tin, a pawimawh ber chu, Jehova hnaih lehzuala inhriatna ka nei hi a ni,” a ti. Chu inthlâk thlengna avâng chuan hunbi kimin rawng a bâwl thei a, tûnah chuan a awmna rama Jehova Thuhretute branch office-ah rawngbâwlin a awm mêk a ni. Jehova malsâwmna chuan mi “a tihausa” tak zet a ni.
17 Entîrna dang leh chu, lehkha thiamna ngaih hlut êm êmna chhûngkuaa sei lian hmeichhe pakhat chanchin a ni. France, Mexico, leh Switzerland-ah te university kalin, hna ṭha tak neih theihna hun remchâng a nei a ni. “Ka hlawhtling hle a, hmingthanna leh chanvo ṭhate chu pêk ka ni; mahse, chhûng lamah chuan ruak nia inhriatna leh lungâwi tâwk lohna nasa tak ka nei,” tiin a sawi. Tichuan, Jehova chanchin a zir ta a. “Thlarau lama ka han ṭhan chhoh zêl chuan, Jehova tihlâwm ka duhna leh a thil min pêkte tlêm têa rulhlêt ka duhna chuan ka kawng zawh tûr—hunbi kima rawngbâwlna chu chiang taka hmu tûrin min ṭanpui a ni,” tiin a sawi. A hnathawh chu a bânsan a, baptisma a chang ta thuai a. Kum 20 kalta chhûng zawng khân hlim takin hunbi kimin rawng a bâwl a ni. “Ṭhenkhat chuan ka thiamna neihte chu ka khawhral mai mai niin an hria a, mahse ka hlimzia an hmu a, ka nunpui thu bulte chu an ngaisâng a ni. Ni tin mai hian Jehova hnênah a pawm tlâk ka nih theih nân inngaitlâwm tûra min ṭanpui tûrin ka ṭawngṭai ṭhîn a ni,” a ti.
18. Paula angin, engtin nge Pathian lamah kan hausak theih ang?
18 Saula, a hnua tirhkoh Paula ni ta chuan hna ṭha tak thawh tûr a nei a. Mahse, a hnuah chuan heti hian a ziak a ni: “Ka Lalpa Krista Isua hriatna ropui bîkzia avângin thil engkim pawh chânnaah ka ruat a ni,” tiin. (Philippi 3:7, 8) Paula tân chuan Krista avânga a neih hausakna chu khawvêlin a pêk theih hausakna chuan a tluk lo rêng rêng. Chutiang bawk chuan, mahni hmasial thiltum engpawh chu bânsanin leh Pathian ngaihsak nun ûmin, keini pawhin Pathian mit hmuha hausa nun chu kan nei ve thei a ni. Pathian Thu chuan: “Inngaihtlâwmna leh LALPA ṭih man chu sum te, chawimawina te, nunna te, a ni,” tih min tiam si a.—Thufingte 22:4. (w07 8/1)
I Hrilhfiah Thei Em?
• Isua tehkhin thua mi hausa khân eng harsatna nge a neih?
• Engvângin nge tehkhin thua mi chu mi â tia koh a nih?
• Pathian lama hausa tih chu eng tihna nge ni?
• Engtin nge Pathian lamah kan hausak theih ang?
[Zirlai Atâna Zawhnate]