Pathianin A Hmu Reng Che Em?

SIAMTU Ropui, Jehova chuan khaw hmuh theihna a nei em? Nei teh meuh mai! Bible chuan: “Mit siamtu chuan a hmu lo vang em ni?” a ti a ni. (Sâm 94:⁠9) Jehova khaw hmuhna chu mihringte khaw hmuhna aiin a ṭha zâwk fê a. Kan pâwn lam lan dân a hmu mai ni lovin, ani chu ‘thinlung fiahtu’ a ni a; kan ‘thinlung a bûk tawn’ thei a ni. (Thufingte 17:3; 21:⁠2) Ni e, Pathian chuan kan ngaihtuahna te, min chêttîrtu te, leh chhûngrila kan châkna te chu a bûk thei a ni.

Jehova chuan nuna harsatna ka tawhte chu a hria a, ṭanpui kan dîlnate chu a chhâng a ni. Fakna hla phuahtu chuan: “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn. LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tiin a ziak a ni. (Sâm 34:​15, 18) Jehova chuan kan dinhmun a hre thiamin, rilru tak zeta kan ṭawngṭaina a chhâng tih hriat chu a va thlamuanthlâk tak êm!

Pathian Jehova chuan a rûk têa thiltih eng pawh chu a hre vek a. “Kan chanchin kan thlenna tûra mithmuhah chuan engkim saruak leh inhawng sain a awm zâwk a ni.” (Hebrai 4:13) Chuvângin, kan thiltih chu a ṭha emaw, ṭha lo emaw pawh ni se, Pathian chuan engkim a hmu vek a. (Thufingte 15:⁠3) Entîr nân, Genesis 6:​8, 9 chuan “Nova erawh chuan LALPA mit a tlung” a ti a; tin, ani chu “Pathian nên an lêng dûn ṭhîn” a ti bawk. Ni e, Nova chuan thu a âwih avâng leh Pathian tehna felte a nunpui avângin Jehova duhsakna leh malsâwmna a dawng a ni. (Genesis 6:22) Inkalh takin, Nova hun laia mite chu tharum thawh chîng leh nungchang lama bawlhhlawh tak an ni a. Pathian chuan chu dinhmun chu a hmuh hmaih lo. Ani chuan “leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a.” A tâwpah chuan, Jehova chuan mi suaksualte chungah boralna a thlentîr a, Nova leh a chhûngkua erawh chu a humhim thung.​—⁠Genesis 6:5; 7:⁠23.

Jehova chuan a pawm che ang em? Jehova mitte chu “a lama rilru dik tak putute chunga a chakzia tilang tûrin khawvêl zawng zawngah . . . a lêng ruai ruai ṭhîn” tak zet a ni. (2 Chronicles 16:⁠9) Rei lo tê achinah lei ata mi suaksual zawng zawng chu a paih chhuak leh ang a, rilrua thuhnuairawlhtute chu a chhan chhuak thuai dâwn a ni.​—⁠Sâm 37:​10, 11. (w07 8/1)