Thlarau Lama Puitlinna Dik Engtin Nge I Neih Theih Ang?
Thlarau Lama Puitlinna Dik Engtin Nge I Neih Theih Ang?
“TISA lam thilte duh chu thihna a ni si a, thlarau lam thil duh erawh chu nunna leh thlamuanna a ni,” tiin tirhkoh Paula chuan a ziak a. (Rom 8:6) Hêng thute hmang hian tirhkoh chuan thlarau mi nih hi mi mal duh thlanna mai emaw, rilru put hmang mai emaw a ni lo tih a sawi lang a ni. A tak takah chuan hei hi thihna leh nunna thil a ni. Amaherawhchu, eng kawngin nge thlarau mi chuan “nunna leh thlamuanna,” a nih loh leh remna a dawn? Bible sawi dân chuan, chutiang mi chuan tûnah ngei hian remna—mahnia thlamuanna leh Pathian nêna inremna—a nei a, nakina chatuana nunna a chang bawk ang. (Rom 6:23; Philippi 4:7) Isua’n: “Mahni thlarau lam mamawh ngaihven mite chu an eng a thâwl e,” tia a sawi pawh hi a mak lo ve!—Matthaia 5:3, NW.
He magazine i chhiarna mai pawh hian thlarau lam thil i ngaihvenzia a târ lang a—tin, chu chu a finthlâk a ni. Mahse, he mi chungchânga thlîr dân hi a inang lo thei hle a, chuvâng chuan: ‘Eng nge thlarau lama puitlinna dik tak chu ni? Engtin nge miin a neih theih ang?’ tiin i ngaihtuah mai thei a ni.
“Krista Rilru”
Thlarau lam thil duh a pawimawhna leh a hlâwknate a sawi bâkah, tirhkoh Paula chuan thlarau lama puitlinna dik tak chungchâng sawi tûr tam tak a nei a ni. Hmân lai Korinth khawpuia Kristiante hnênah, Paula chuan tisa lam châkna zuitu, khawvêl mi leh thlarau lam thil ngaihlutu, thlarau lam thilte duh mi inan lohna chu a hrilhfiah a. Ani chuan: “Khawvêl mi chuan Pathian thlarau lam thilte chu a lâwm ṭhîn lo, ani ngaih chuan âtthlâk a ni si a,” tiin a ziak a ni. Kawng leh lamah chuan, thlarau lam mi chuan “Krista rilru” a pu niin Paula chuan a sawi thung.—1 Korinth 2:14-16.
“Krista rilru” pu tih awmzia ber chu, ‘Krista rilru put hmang ang pu” tihna a ni. (Rom 15:5, 6; Philippi 2:5) Kawng danga sawi chuan, thlarau mi chu Isua ngaihtuahna ang nei leh A hniakhnung zuitu ti pawhin a sawi theih ang. (1 Petera 2:21; 4:1) Mi chuan Krista rilru ang a put nasat poh leh thlarau lamah a puitling lehzual a, “nunna leh thlamuanna” chu a nei hnai lehzual a ni.—Rom 13:14.
“Krista Rilru” Hriat Theih Dân
Amaherawhchu, Krista rilru nei tûr chuan chu rilru put hmang chu hriat a ngai hmasa a ni. Chuvângin, thlarau lama puitlinna neih chhohna rahbi hmasa ber chu Isua rilru put hmang hriat hi a ni. Mahse, kum 2,000 lai liam taa awm mi tuemaw rilru chu engtin nge kan hriat theih ang? Aw le, entîr nân, engtin nge in rama mi ropuite chanchin chu i hriat? An chanchin chhiarna aṭanga i hriat ngei a rinawm. Chutiang bawk chuan, Isua chanchin ziaka chhinchhiahte chhiar chu Krista rilru hriat theihna kawng pawimawh tak chu a ni.—Johana 17:3.
Isua chungchângah chuan Bible thuziak nung tak pali—Matthaia, Marka, Luka, leh Johana ziak Chanchin Ṭhate chu a awm a. Hêng thuziakte ngun taka chhiarna hian Isua thil ngaihtuah dân te, a rilru chhûngril tak tak te, leh a thiltih phêna amah chêttîrtu te chu hre thiam tûrin a ṭanpui ang che. Isua chanchin i chhiarte ngun taka i ngaihtuah hunah, eng ang mi chiah nge a nih i rilruin i mitthla thei a ni. Krista hnung zuitu niin inhre reng tawh mah la, chutianga chhiarna leh ngun taka ngaihtuahna chuan “kan Lalpa leh Chhandamtu Isua Krista khawngaihnaah leh hriatnaah chuan lo ṭhang lian” zêl tûrin a ṭanpui ang che.—2 Petera 3:18.
Chu chu rilrua vawng rengin, Isua chu thlarau lama puitling tak nihtîrtu hmu chhuak tûrin Chanchin Ṭha ziaka thu ṭhenkhat chu i lo bih chiang ang u. Tichuan, a entawn tûr siam i zui theih dân tûr chu inzâwt bawk ang che.—Johana 13:15.
Thlarau Lama Puitlinna leh “Thlarau Rah”
Chanchin Ṭha ziaktu Luka chuan Isua’n baptisma a chan khân Pathian thlarau thianghlim chu a chungah leih a nih thu leh ‘thlarau thianghlima a khah’ thu a sawi. (Luka 3:21, 22; 4:1, 2) Isua chuan Pathian thlarau thianghlim kaihhruaia awm a pawimawhzia chu amah zuitute rilruah a tuh nghet hle a ni. (Luka 11:9-13) Engvângin nge chu chu thil pawimawh tak a nih? Pathian thlarau chuan miin Krista rilru ang nei tûra mihring rilru tihdanglam theihna a neih avângin. (Rom 12:1, 2) Thlarau thianghlim chuan mi chu hetiang mizia “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te” hi a neihtîr a. Hêng miziate—Bible-in “thlarau rah” tia a sawite—hian mi chu thlarau mi tak a ni tih a târ lang. (Galatia 5:22, 23) A tawi zâwnga sawi chuan, thlarau lam thil duh mi chu Pathian thlarauvin a kaihhruai mi chu a ni.
Isua chuan thlarau rah chu a rawngbâwl chhûng zawngin a lantîr a. Hmangaihna, ngilneihna, leh ṭhatna ang chi miziate chu mi hnuaihnung anga mipuiin an ngaihte a cheibâwl dânah chuan a bîk takin a lang chiang a ni. (Matthaia 9:36) Entîr nân, tirhkoh Johana sawi thilthleng hi chhinchhiah teh. Heti hian kan chhiar: “Isuan a kal pahin a pian tirh ata mitdel pakhat a hmu a,” tiin. Isua zirtîrte pawh chuan chu pa chu an hmu a; mahse, mi sual angin an hmu a ni. Anni chuan: “Tuin nge thil tisual, he mi hian nge a nu leh pain?” tiin an zâwt a. Chu mitdel pa vêngte pawh chuan an hmu a; mahse, kutdawh a ni tih bâk chu an hmu lo. Anni chuan: “He mi hi ṭhu chunga kutdawh ṭhîna kha a ni lo vem ni,” an ti a. Amaherawhchu, Isua chuan mitdel pa chu ṭanpui ngai mi pakhat angin a hmu a. Ani chu biain, a tidam ta a ni.—Johana 9:1-8.
He thilthleng hian Krista rilru eng nge a hrilh che? A hmasain, Isua chuan mi hnuaihnungte a ngaihthah mai lova, lainat takin a cheibâwl tih min hrilh a. A pahnihnaah chuan, mi dangte ṭanpui tûrin hma a la hmasa tih min hrilh bawk. He Isua entawn tûr siam hi zui niin i inhria em? Mite chu Isua thlîr dân anga thlîrin, nun ṭha zâwk an neih theih nâna ṭanpuina an mamawh ang chu pein leh hma lam hun ṭha zâwk beiseina chu i pe em? Nge ni, dinhmun ṭha chelhtute duhsakin, chelh lo tute ngaihthah mai i tum zâwk? A hmasa zâwk ang hi i nih chuan, Isua entawn tûr siam chu i zui ṭha hle tihna a ni ang.—Sâm 72:12-14.
Thlarau Lama Puitlinna leh Ṭawngṭaina
Chanchin Ṭha ziakte chuan Isua chu ṭawngṭaiin Pathian lam a hawi fo tih a târ lang a. (Marka 1:35; Luka 5:16; 22:41) He leia rawng a bâwl chhûng khân, Isua chuan ṭawngṭai nân hun a insiam lui tlat a ni. A zirtîr Matthaia chuan: “Mipuite chu a ṭintir hnuin [Isua chu] ṭawngṭai tûrin tlângah chuan a han kal hrang a,” tiin a ziak. (Matthaia 14:23) Chutianga a Pa vâna mi nêna inbiak pawhna an neih aṭangin Isua chuan chakna a nei a ni. (Matthaia 26:36-44) Tûn laiah pawh, thlarau lam thil duhtute chuan chutiang bawkin Pathian nêna inbiak pawh theihna hun remchâng chu an zawng a, chu chuan Siamtu nêna an inlaichînna a tinghet zualin, an ngaihtuahna chu Krista ngaihtuahna ang zual sauh tûrin a ṭanpui dâwn tih an hria a ni.
Isua chuan ṭawngṭai nân hun rei tak a hmang fo va. (Johana 17:1-26) Entîr nân, a tirhkoh lo ni tûr mi 12 te a thlan hmain, Isua chu “a chhuak a, ṭawngṭai tûrin tlângah a kal a, Pathian hnênah a ṭawngṭai zankhua a.” (Luka 6:12) Zankhuaa ṭawngṭai ngai kher lo mah se, thlarau lam thil duhte chuan Isua entawn tûr siam chu an zui a ni. An nuna thu tlûkna lian tham tak an siam hmain, Pathian hnênah vawi tam tak an ṭawngṭai a, thlarau lama tipuitling lehzual thei tûr duhthlannate an siamnaah thlarau thianghlim kaihhruaina an zawng a ni.
Isua chuan ṭawngṭainaa kan entawn ngei tûr thinlung chhûngril tak aṭanga ṭawngṭai dân chu min kawhhmuh bawk. A thih hma zâna a ṭawngṭai dân chungchânga Luka ziak chu chhinchhiah teh. “A thlaphâng êm êm a, ṭhahnemngai lehzualin a ṭawngṭai a; a thlan chu thi far lian tak angin leiah a far a.” (Luka 22:44) Isua chu ṭhahnemngai takin a ṭawngṭai tawh ṭhîn a, amaherawhchu he mi ṭum hi chuan leia a awm chhûng zawng zawnga fiahna nasa ber a tawh avângin, “ṭhahnemngai lehzualin” a ṭawngṭai a—tin, a ṭawngṭaina chu chhân a ni. (Hebrai 5:7) Thlarau lam thil duhte chuan Isua tih dân chu an zui a. Fiahna nasa bîk takte an tawh hian Pathian hnênah thlarau thianghlim te, a kaihhruaina te, leh a ṭanpuina te dîlin “ṭhahnemngai lehzualin” an ṭawngṭai a ni.
Isua chu ṭawngṭai mi tak a nih avângin, a zirtîrte’n he mi kawnga amah entawn an duh hi thilmak a ni lo. Chuvângin, a hnênah: “Lalpa, ṭawngṭai dân . . . min zirtîr ve ta che,” an ti a. (Luka 11:1) Tûn laiah pawh chutiang chiah chuan, thlarau lam thil ngaihlutute leh Pathian thlarau thianghlim kaihhruaia awm duhte chuan an ṭawngṭai dânah Isua tih dân chu an zui a. Thlarau lama puitlinna dik tak leh ṭawngṭaina chu a kal kawp tlat a ni.
Thlarau Lama Puitlinna leh Chanchin Ṭha Hrilhna
Chanchin Ṭha Marka ziakah chuan, Isua’n dam lo tam takte chu zan rei thlenga a tihdam thu kan hmu a. A tûk zîng khawvâr hma daiha a hranga a ṭawngṭai lai chuan, a zirtîrte chu a kiangah lo kalin, mi tam takin amah an zawn thu an rawn hrilh a, tihdamna dawn an duh a nih a rinawm hle. Amaherawhchu, Isua chuan: “Hmun dangah khaw hnaiahte chuan i kal ang u, chûngahte pawh chuan thu ka hrilh theihna tûrin,” tiin a hrilh a ni. Tichuan, Isua chuan a chhan a hrilhfiah a: “Chu chu ka rawn chhuah chhan a ni si a,” tiin. (Marka 1:32-38; Luka 4:43) Isua tân chuan mite tihdam chu pawimawh tho mah se, Pathian Ram chanchin ṭha hrilh chu hnapui ber a ni.—Marka 1:14, 15.
Tûn laiah hian, Pathian Ram chanchin hrilh chu Krista rilru put hmang neite chhinchhiahna a la ni reng a. Isua chuan a hnung zui duh zawng zawngte hnênah: “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tiin thu a pe a ni. (Matthaia 28:19, 20) Chu bâkah, Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a hrilh lâwk bawk. (Matthaia 24:14) Pathian Thu chuan thu hrilhna hi thlarau thianghlim chakna hmanga thawh a ni tih a târ lan avângin, chu hnaa ṭhahnemngai taka tel chu thlarau lama puitlinna dik tak lantîrna a ni.—Tirhkohte 1:8.
Khawvêl pum puia Lalram thuchah mite hnêna hrilh tûr chuan, mi maktaduai tam takte’n inlungrual taka an thawhho a ngai a. (Johana 17:20, 21) He hna thawktute hi thlarau lam thil duh mi mai ni lovin, khawvêl puma ṭha taka an inrêlbâwl a ngai bawk a ni. Krista hniakhnung zuia, khawvêl pum puia chanchin ṭha hriltute chu i hria em?
Eng Nge I An?
Thlarau mi dik tak târ langtu mize dang pawh a la awm teh meuh mai a; mahse, hêng kan sawi tâk thilahte hian eng nge i an? Chu mi hre tûr chuan, heti hian inzâwt ang che: ‘Pathian Thu, Bible chu ka chhiar ziahin, ka thil chhiarte chu ngun takin ka ngaihtuah em? Ka nunah thlarau rahte chu ka lantîr em? Ṭawngṭai ziah mi ka ni em? Khawvêl pum puia Pathian Ram chanchin ṭha hriltute zînga tel chu ka duh em?’ tiin.
Ngun taka mahni i inenfiahna chuan thlarau lama i puitlin dân hre tîrin a ṭanpui thei che a ni. “Nunna leh thlamuanna” chu i ta a nih theihna tûrin, tûnah ngei hian thiltih ngaite chu ti tûrin kan fuih a che.—Rom 8:6; Matthaia 7:13, 14; 2 Petera 1:5-11. (w07 8/1)
[Phêk 7-naa bâwm/milemte]
THLARAU LAMA PUITLINNA CHHINCHHIAHNATE
◆ Pathian Thu ngainatna neih
◆ Thlarau rahte lantîr
◆ Pathian hnêna tih tak zeta ṭawngṭai ziah
◆ Mi dangte Lalram chanchin ṭha hrilh
[Phêk 5-naa milem]
Bible chuan “Krista rilru” hre tûrin a ṭanpui che