Thlarau Lama Puitlinna Neih Tumin

ISUA chuan Tlâng Chunga Thusawi hmingthang takah: “Mahni thlarau lam mamawh ngaihven mite chu an eng a thâwl e,” tiin a sawi a. (Matthaia 5:​3, New World Translation) Chu thusawi chu i pawmpui mai thei. Hmun tina awm mite hian thlarau lama puitlin a ngaihzia an hria a, an han zawn hmuh chuan chu chuan hlimna a neihtîr an ring a ni. A nih leh “thlarau lama puitlinna” tih chu eng tihna nge ni?

Dictionary pakhat chuan thlarau lama puitlinna tih chu “sakhaw lama tehnate kan mamawhzia hriatna leh vawn tlatna” tiin leh “thlarau mi nihna,” titein a hrilhfiah a. Chuvângin, “thlarau lama puitlinna,” “thlarau mi nihna,” a nih loh leh “thlarau lam thil duh mi” tihte chu thil thuhmun sawina anga ngaih a ni. A awmzia ti chiang lehzual tûrin he khaikhinna hi ngaihtuah teh: Sumdâwnna lam thila mi thiam chu sumdâwng thiam tia sawi a ni a. Chutiang bawk chuan, thlarau lam thil emaw, sakhaw lam thil emaw ngaihlutu chu thlarau lam thil duh mi tia koh a ni.

Chuti a nih chuan engtin nge thlarau lama puitlinna dik tak chu neih theih a nih? Sakhaw tin deuhthaw hian thlarau lama puitlinna kawng chu hria niin inchhâl ṭheuh mah se, kaihhruaina an pêk chu sakhaw awm zât tluk zetin a tam a ni. Protestant chuan harhna inkhâwm an neihna aṭanga chhandam niin an inchhâl a. Katholic chuan Mass an neihna aṭangin Pathian nêna inrem an tum thung a. Buddhist chuan khûnkhân taka ngaihtuahna hmangin thlarau lama harh chhuahna an zawng a. Hindu chuan mahni inphatna aṭanga pian nawn kual zêlna chhuahsan chu an tum thung. Hêng zawng zawng hian thlarau lama puitlinna dik tak a thlen em? Hêng zînga pakhat tal hian a thlen em?

Mi tam tak tân chuan hêng zawhnate chhânna hi ‘Thlen lo’ tih a ni. Anni chuan thlarau lama puitlinna tih awmzia chu “tel si lova rinna” niin an ring a, chu chu, eng kohhranah mah tel lova pathian rinna tihna a ni. Mi dangte erawh chuan thlarau lama puitlinna chu sakhaw lama thiltawn lam ni lovin, rilru chhûngrila thlamuanna neih duhna leh nun awmze nei tak neih châkna niin an ngai thung. Anni chuan thlarau lama puitlinna neih tumte’n sakhua an mamawh rêng rêng lo an ti tlat a. Anmahni chhûngril lam chu an inenfiah a ngai zâwk a ni an ti. Ziaktu pakhat chuan heti hian a sawi: “Thlarau lama puitlinna dik tak chu keimahni chhûngril thûk taka thil awm a ni a. Hei hi i chhehvêla awm khawvêl leh mite i hmangaih dân leh in indâwr dân a ni. Chu chu kohhran aṭang emaw, sakhua aṭang emawa zawn hmuh theih a ni lo,” tiin.

Mite’n thlarau lama puitlinna an ngaih dân chu a inang lo tih a chiang hle. Lehkhabu sâng tam takte chuan thlarau lam nun kawng kawhhmuh niin a inchhâl a; mahse, a chhiartute chu an lungawi tâwk lovin, a ngaihna hre lovin an awm fo ṭhîn. Amaherawhchu, thlarau lam thila kaihhruaina rin tlâk petu lehkhabu pakhat a awm a. Chu chu Pathian thâwk khum a nihzia târ lanna nei lehkhabu a ni. (2 Timothea 3:16) Chu lehkhabu, Bible-in thlarau lama puitlinna tih awmzia leh a hlutna a sawite chu i lo en ang u le. (w07 8/1)