Thlarau Thianghlim Lakah Thil Sual I Ti Em?
Thlarau Thianghlim Lakah Thil Sual I Ti Em?
“Thihna khawp sual a awm.”—1 JOHANA 5:16.
1, 2. Engtin nge Pathian thlarau thianghlim lakah thil sual tih theih a ni tih kan hriat?
GERMAN rama nu pakhat chuan Pathian rawng a bâwl reng chung pawhin: “Thlarau thianghlim laka thil sual ti nia inhriatna chuan min timangang hle,” tiin a ziak a ni. Kristian chuan Pathian thlarau thianghlim, a nih loh leh a chakna chevêl reng lakah thil sual a ti thei em?
2 Ni e, Jehova thlarau thianghlim lakah thil sual chu tih theih a ni. Isua Krista chuan: “Mi an sualna tinrêngah leh an Pathian sawichhiatna tinrêngah chuan ngaihdam an ni ang: thlarau meuh sawichhiatna erawh chu ngaihdamsak a ni lo vang,” a ti a. (Matthaia 12:31) “Thutak hriatna famkim chu kan chan hnua thil kan tihsual luih si chuan sualte tâna inthawina a awm tawh hauh lo vang a, rorêlna hlauhawm tak lo thleng tûr . . . kan hmabâk a ni mai,” tia vaukhân kan ni bawk a. (Hebrai 10:26, 27) Tin, tirhkoh Johana chuan: “Thihna khawp sual a awm,” tiin a ziak bawk a ni. (1 Johana 5:16) Mahse, sual khûnkhân tak titu hi em ni “thihna khawp sual” a tih leh tih loh chungchânga thu tlûkna siam tûr chu?
Simna Chuan Ngaihdamna A Thlen
3. Kan thil sual tih avânga kan lungngaih hle chuan, chu chu eng tihna nge a nih theih?
3 Jehova chu thil sual titute chunga rorêltu ber a ni a. Dik tak chuan, a hnênah mahni chanchin kan sawi ṭheuh tûr a ni a, ani chuan englai pawhin thil dik a ti a ni. (Genesis 18:25; Rom 14:12) Jehova chu ngaihdam theih loh sual kan tih leh tih loh chungchânga thu tlûkna siamtu a ni a, a thlarau chu kan hnên aṭangin a la kîr thei a ni. (Sâm 51:11) Amaherawhchu, kan thil sual tih avânga kan lungngaih hle chuan, kan sim tak zet tihna a ni thei a ni. Mahse, eng hi nge simna dik tak chu?
4. (a) Engtin nge simna chu i sawifiah ang? (b) Engvângin nge Sâm 103:10-14 thute hi a thlamuanthlâk êm êm?
4 Sim tih awmzia chu thil sual tihtawh emaw, tih tum emaw chunga rilru put hmang thlâkthleng hi a ni. Chu chu kan lungngaih vâng emaw, kan inchhîr vâng emawin thil sual tihna kawng kan hawisan tihna a ni. Sual khûnkhân tak kan tih a; mahse, kan sim tak zet tih lantîr nâna a ṭûl anga hma kan lâk tawh chuan, fakna hla phuahtu hla thute aṭang hian thlamuanna kan hmu thei a ni: “[Jehova chuan] kan sualnate angin kan chungah a ti lo va, kan khawlohnate angin min thungrûl hek lo. Vân khi lei chung sâng taka a awm angin, amah ṭihtute chunga a ngilneihna chu a nasa a ni. Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a. Pain a fate a khawngaih ang hian, LALPA chuan amah ṭihtute chu a khawngaih ṭhîn. Kan taksa siam dân hi a hriat a, vaivut mai kan ni tih a hriat reng avângin,” tih hi.—Sâm 103:10-14.
5, 6. Johana thawn khat 3:19-22 thu pawimawh lai chu sawi la, chu tirhkoh thusawite awmzia chu hrilhfiah rawh.
5 Tirhkoh Johana thute pawh hi a thlamuanthlâk hle bawk: “Chu miah chuan thutaka mi kan ni tih kan inhria ang a, kan rilruin thiam loh min chantîrna kawngah chuan ama mithmuh ngeiah kan rilru kan thlêm dai bawk ang; Pathian chu kan rilru aiin a ropui zâwk a, engkim a hre si a. Duh takte u, kan rilruin thiam loh min chantîr loh chuan Pathian lamah kan huai a ni; tichuan a thupêkte kan zawm a, a mithmuha thil lâwmawm kan tih ṭhin avângin, kan dîl apiang a hnên ata kan hmu zêl ṭhîn a ni,” tih hi.—1 Johana 3:19-22.
6 Unau inhmangaihna kan lantîrna leh thil sual tih fo lohna hmangin “thutaka mi kan ni tih kan inhria” a ni. (Sâm 119:11) Chhan engemaw avânga thiam loh kan inchantîr a nih chuan “Pathian chu kan rilru aiin a ropui zâwk a, engkim a hre si a” tih chu kan hre reng tûr a ni. Jehova chuan ‘unaute kan hmangaih tak takna’ te, sual kan dona te, leh a duhzâwng ti tûra kan thawhrimna te chu a hriat avângin kan chungah zahngaihna a lantîr a ni. (1 Petera 1:22) Jehova kan rinchhan a, unaute hmangaihna kan lantîr a, duhrêng vânga sual kan tih luih loh chuan kan rilruin ‘thiam loh min chantîr lo vang.’ ‘Pathian lama huai’ taka ṭawngṭai theihna kan neiin, a thupêkte kan zawm avângin ani chuan min chhâng ang.
Thlarau Lakah Thil Sual An Ti
7. Eng thilin nge sual chu ngaihdam theih a nih leh nih loh hril?
7 Eng ang sualte nge ngaihdam a nih loh? He zawhna chhâng tûr hian, Bible-a entîrna ṭhenkhat i lo ngaihtuah ang u. Hei hian thil sual khûnkhân tak avânga nasa takin lungngai mah ila kan sim phawt chuan min thlamuan ngei tûr a ni. Sual ngaihdam theih a nih leh nih loh chu thil sual tihah a innghat thui lutuk lo; a tihtîrtu, a thinlung dinhmun, leh duhrêng vânga tihna a tel chenah a innghat zâwk mah a ni.
8. Engtin nge kum zabi khatnaa Juda sakhaw hruaitu ṭhenkhat chuan thlarau thianghlim laka thil sual an tih?
8 Kum zabi khatnaa Isua Krista dodâltu Juda sakhaw hruaitu sual takte chuan thlarau thianghlim lakah thil sual an ti a. Anni chuan Isua’n Jehova chawimawitu thilmakte a tih khân, amahah Pathian thlarauvin hna a thawk tih an hmu a ni. Mahse, chûng Krista hmêlmate chuan chu thiltihtheihna chu Diabol-Setana thiltihtheihnaah an puh tlat a. Isua sawi angin, chûng Pathian thlarau thianghlim sawichhetute chuan “tûn dam chhûngah pawh, hun lo la thleng tûrah pawh” ngaihdam theih loh tûr thil sual an ti a ni.—Matthaia 12:22-32.
9. Pathian sawichhiatna chu eng nge ni, chu mi chungchângah Isua’n eng nge a sawi?
9 Pathian sawichhiatna tih chu ṭawngkam mi tichhe thei tak, hming tihliau thei tak, a nih loh leh ṭha lo tak hmanna a ni a. Thlarau thianghlim lo Chhuahna chu Pathian a nih avângin, a thlarau thianghlim kalhzâwnga thusawi chu Jehova kalhzâwnga thusawi ang chiah a ni. Sim duh lova chutiang ṭawngkam hman reng chu ngaihdam theih a ni lo. Chutiang sualna chungchânga Isua thusawi chuan Pathian thlarau thianghlim hnathawh duhrêng vânga dodâltute a kâwk tih a târ lang. Jehova thlarauvin Isuaa hna a thawh chu amah dodâltute chuan Diabola thiltihtheihna nia an sawi avângin, thlarau chu an sawichhia a ni. Chuvâng chuan, Isua chuan: “Tupawh thlarau thianghlim meuh sawichhia erawh chuan engtikah mah ngaihdamna a hmu lo vang a, chatuan sualna kawngah chuan thiam lohvin a lo awm zâwk ang,” tiin a puang chhuak a ni.—Marka 3:20-29.
10. Engvângin nge Isua’n Juda chu “boral fapa” tia a koh?
10 Juda Iskariota chungchâng hi ngaihtuah bawk teh. Rinawm lohna kawng chu zawhin, amah an kawltîr tangka ipa mi chu a ru chhuak a ni. (Johana 12:5, 6) A hnuah chuan Juda rorêltute hnêna va kalin, tangka 30-a Isua mantîr dân chu a ruahman a. Juda chuan a phatsan hnuah inthiam lovin, a inchhîr ngei mai; mahse, a thil sual tih luihna chu a sim ngai lo a ni. Chuti chuan, Juda chuan thawhlehna a phu lo. Chuvângin, Isua’n “boral fapa” tiin a ko a ni.—Johana 17:12; Matthaia 26:14-16.
Thlarau Lakah Thil Sual An Ti Lo
11-13. Engtin nge Lal Davida chuan Bat-sebi chungchângah thil sual a tih a, Pathianin anmahni chungchâng a chinfel dân aṭangin eng thlamuanna nge kan neih theih?
11 A châng chuan, an sual khûnkhân tak chu inpuang a, kohhran upate hnên aṭanga thlarau lam ṭanpuina dawngtu Kristiante chu Pathian dân kalha thil sual an tih chuan a la timangang reng thei a. (Jakoba 5:14) Hetiang hian kan mangang a nih chuan, Pathian Lehkha Thua an sualna ngaihdamsakte chungchâng ngaihtuah chu kan ṭangkaipui thei ang.
12 Lal Davida chuan Uria nupui, Bat-sebi chungchângah nasa takin thil a tisual a. He nu hmêlṭha tak inbual chu a bul hnai in chungzâwl aṭanga hmuin, Davida chuan a lal inah a hruai a, a chêtsualpui a ni. A hnua a rai tih a hriat chuan, uirêna hliahkhuh nân Uria chu a nupui mutpui tûrin ruahmanna a siam a. Chu thiltum a hlawhtlin tâk lohvah chuan, lal chuan Uria chu indona hmuna a thih theih nân ruahmanna a siam ta a ni. Chu mi hnuah chuan, Bat-sebi chu Davida nupui a lo ni a, fapa a hrinsak chu a thi a ni.—2 Samuela 11:1-27.
13 Jehova chuan Davida leh Bat-sebi chungthu chu a rêl a. Pathian chuan Davida chu a ngaidam a, a simna leh amah nêna lalram thuthlung a lo siam tawh avânga ngaidam a nih ngei a rinawm. (2 Samuela 7:11-16; 12:7-14) Bat-sebi chuan Lal Solomona nu nihna leh Isua Krista thlahtu nihna chanvo hlu a neih avângin, simna rilru put hmang a nei a ni ngei ang. (Matthaia 1:1, 6, 16) Thil sual kan ti a nih chuan, Jehova’n kan simna rilru put hmang chu a hmu tih hriat chu a ṭha a ni.
14. Engtin nge Pathian ngaihdamna nasatzia chu Lal Manasea chungchângah a lan?
14 Jehova ngaihdamna a nasatzia chu Juda Lal Manasea chungchâng chuan a târ lang bawk. Ani chuan Jehova mithmuhah thil sual a ti a. Manasea chuan Baala tân maichâm a din a, “vâna awm zawng zawng khi” a bia a, biak in hung chhûng kawtlai pahnihah chuan pathian dik lote tân maichâmte a siam bawk a ni. Tin, meiah a fate a luhtîr a, thlarau zâwlna thiltihte chîng tûrin a fuih a, Judai ram leh Jerusalema awmte chu thil a tihsualtîr a, “LALPAN Israelte hmaa a tihboral tâk hnamte ai mahin thil an tisual zâwk” a ni. Pathian zâwlneite vaukhânna thusawi chu ngaihthlâksak a ni lo. A tâwpah chuan, Asuria lal chuan Manasea chu a man a. Mana a awm lai chuan, Manasea chuan a sim a, inngaitlâwm takin Pathian hnênah a ṭawngṭai reng a; ani chuan a ngaidamin, Jerusalema a lalna chu a chantîr leh a, chutah chuan Manasea chuan biakna dik chu a dinchantîr ta a ni.—2 Chronicles 33:2-17.
15. Tirhkoh Petera nunna thilthleng engin nge Jehova’n “a ngaidam nasa” tih târ lang?
15 Kum zabi tam tak a liam hnuah, tirhkoh Petera chuan Isua phatsanin thil sual nasa tak a ti a. (Marka 14:30, 66-72) Mahse, Jehova’n Petera chu “a ngaidam nasa” a ni. (Isaia 55:7) Engvângin nge? Petera chuan a sim tak zet vâng a ni. (Luka 22:62) Ni 50 hnu Pentikost nîah chuan Pathian ngaihdamna finfiahna chiang tak a awm a, chutah chuan Petera’n Isua chanchin huai taka hrilh theihna chanvo dang lam bîk tak chu a nei a ni. (Tirhkohte 2:14-36) Tûn laia sim tak zettu Kristiante chu Pathianin a ngaidam lo zâwk ang tih rinna tûr chhan a awm em? “LALPA, nangin khawlohnate i chhinchhiah chuan, Aw, LALPA, tunge ding ang le? Nimahsela i hnênah ngaihdamna [dik] a awm a ni,” tiin fakna hla phuahtu chu a zai a ni.—Sâm 130:3, 4.
Thlarau Thianghlim Laka Thil Sual Ti Nia Inhriatna Avânga Lungkhamna Chu Tikiam Rawh
16. Eng ang dinhmunah nge Pathianin ngaihdamna a pêk?
16 Entîrna kan hmuh tâkte chuan thlarau thianghlim laka thil sual ti nia inhriatna avânga kan lungkhamna chu tikiam tûrin min ṭanpui tûr a ni. Chûng entîrnate chuan thil sual tia simtute chu Jehova’n a ngaidam tih a târ lang. A pawimawh ber chu tih tak zeta Pathian hnêna ṭawngṭai a ni. Thil sual kan tih chuan Isua tlanna inthawina te, Jehova ngilneihna te, kan rochun ṭhat famkim lohna te, leh rinawm taka kan rawngbâwlna chanchin te ṭanchhanin ngaihdam kan dîl thei a. Jehova khawngaihna chu hriain, min ngaidam ngei dâwn tih ring tlat chungin ngaihdam kan dîl thei a ni.—Ephesi 1:7.
17. Thil sual kan tiha thlarau lama ṭanpuina kan mamawh chuan eng nge tih tûr a nih?
17 Thil sual kan tih a, kan sualna chuan thlarau lama min tihchauh avângin ṭawngṭai thei lo ta ila engtin nge ni ang? He mi chungchângah hian zirtîr Jakoba chuan: “[Chutiang mi chuan] kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin a ziak a ni.—Jakoba 5:14, 15.
18. Engvângin nge mi chu kohhran aṭanga hnawh chhuah a nih pawhin, a sualna chu ngaihdam theih loh a nih kher loh?
18 Thil sual titu chuan a sim duh loh avânga kohhran aṭanga hnawh chhuah a nih pawhin, a sualna chu ngaihdam theih loh a ni kher chuang lo. Korinth khuaa hriak thih pakhatin thil sual a tih avânga hnawh chhuah a nih chungchângah, Paula chuan: “Chutiang mi tân chuan mi tam takin an hrem chu a tâwk tawh a ni. Chutichuan hrem leh tawh ahnêkin in ngaidamin in thlamuan zâwk tûr a ni, chutilochuan eng emaw tiin mi chutiang chu a lungngaih lutuknain a lem zo dah ang e,” tiin a ziak a. (2 Korinth 2:6-8; 1 Korinth 5:1-5) Mahse, thlarau lama chak leh tûr chuan, thil sual titute chuan Kristian upate hnên aṭanga Bible ṭanchhan thlarau lam ṭanpuina chu a pawmin, an sim tak zet tih chu an lantîr tûr a ni a. “Sim hming pu tlâkin rah” an chhuah tûr a ni.—Luka 3:8.
19. Engin nge ‘rinna chak tak’ nei reng tûra min ṭanpui thei?
19 Thlarau thianghlim laka thil sual ti nia inhriatna chu engin nge awmtîr? Fîmkhur lutuk vâng emaw, hrisêl lohna vâng emaw a ni thei. Chutiang dinhmunah chuan ṭawngṭai leh chawlh hahdam belh chu a ṭangkai mai thei a ni. A bîk takin, Setana chu Pathian rawngbâwlna min tâwptîr khawpin, kan intihlunghnualtîr tûr a ni lo. Jehova chuan mi suaksual thihnaah lâwmna a neih loh avângin, a chhiahhlawh tupawh chânnaah chuan lâwmna a nei lo tih a chiang hle. Chuvângin thlarau laka thil sual ti nia inhriatna kan nei a nih chuan, Sâm bua thlamuanna thute pawh tiamin, Pathian Thu hmangin kan inchâwm chhunzawm zêl tûr a ni. Kohhran inkhâwmna leh Lalram thu hrilhnaah kan tel zêl pawh a ngai bawk. Chutianga tihna chuan ‘rinna chak tak’ nei tûr leh ngaihdam theih loh thil sual ti nia inhriatna avânga lungkhamna laka zalên tûrin min ṭanpui ang.—Tita 2:2.
20. Eng chhût dânin nge mi chu thlarau thianghlim lakah thil sual a ti lo tih hre thiam tûra ṭanpui ang?
20 Thlarau thianghlim laka thil sual ti nia inhriate chu heti hian an inzâwt thei a ni: ‘Thlarau thianghlim ka sawichhia em? Ka sualna chu ka sim tak zet em? Pathian ngaihdamna ka ring em? Thlarau lam êng hnâwltu kalpêng ka ni em?’ tiin. Chutiang mite chuan Pathian thlarau thianghlim an sawichhe lo va, kalpêng an ni lo bawk tih an hriat ngei a rinawm a ni. An sim a, Jehova ngaihdamnaah rinna nghet tak an nei bawk. Chutiang a nih chuan, Jehova thlarau thianghlim laka thil sual an ti lo tihna a ni.
21. A dawta thuziakah eng zawhnate nge sawiho a nih ang?
21 Thlarau thianghlim lakah thil sual kan ti lo tih hriat chu a va hahdamthlâk tak êm! Mahse, he mi thu nêna inkûngkaih zawhnate chu a dawta thuziakah sawiho a ni ang. Entîr nân, hetiang hian kan inzâwt thei a ni: ‘Pathian thlarau thianghlim kaihhruaiin ka awm tak zet em? A rah chhuahte chu ka nunah a lang em?’ tiin. (w07 7/15)
Eng Nge I Chhânna Chu?
• Engvângin nge thlarau thianghlim lakah thil sual tih theih a ni kan tih theih?
• Sim tih awmzia chu eng nge ni?
• Isua leia a awm lai khân, tuin nge thlarau laka thil sual ti?
• Engtin nge ngaihdam theih loh thil sual tia inhriatna avânga lungkhamna chu hneh theih a nih?
[Zirlai Atâna Zawhnate]