In Fate Chu Jehova Hmangaih Tûrin Zirtîr Rawh U
In Fate Chu Jehova Hmangaih Tûrin Zirtîr Rawh U
“Vânglai fate chu mi chak kuta thal awmte ang hi an ni.”—SAM 127:4.
1, 2. Engvângin nge fate chu “mi chak kuta thal awmte” ang an nih?
THAL kah thiam mi pakhat chu a tum kâp fuh tûrin a inbuatsaih a. Thal chu a hruiah fîmkhur taka vuahin, a thal ngul chu a han kuai a. Kawih a harsa hle chung pawhin, a kah tum chu a han tinzâwn tê tê phawt a ni. Tichuan, a han kâp ta! Thal chuan a tum chu a fuh ang em? A chhânna chu thil tam takah a innghat a, chûng zîngah chuan thal kâptu thiam dân te, thli tleh dân te, leh thal ṭhat leh ṭhat loh te a tel a ni.
2 Lal Solomona chuan fate chu “mi chak kuta thal awmte” nên a tehkhin a. (Sâm 127:4) He tehkhin thu a hman theih dân hi han ngaihtuah teh. Thal kâptu chuan a thal ngula thal chu rei tak chhûng a kawl lo. A tum fuh tûr chuan a tum a tinzâwn zawh veleh a thlah nghâl a ngai a ni. Chutiang bawkin, nu leh pate chuan an fate hnêna tih tak zeta Jehova hmangaihna tuh tûrin hun tam tak an nei lo. Kum rei lo te hnuah chuan, naupangte chu an lo puitlingin, in an chhuahsan mai ṭhîn a ni. (Matthaia 19:5) An tum chu an fuh ang em? A awmzia chu naupangte chuan in an chhuahsan hnuah pawh Pathian chu hmangaihin, a rawng an la bâwl zawm zêl ang em? tihna a ni. A chhânna chuan thil tam tak a kaihhnawih a. Chûng zînga pathum chu nu leh pa tlinna te, an seilenna boruak te, leh ‘thal,’ a nih loh leh naupangin zirtîrna a dawn a chhân lêt dân te a ni. Hêngte hi kimchang lehzualin i lo bih chiang ang u. A hmasain, nu leh pate tlinna ṭhenkhat chu kan ngaihtuah ang.
Nu leh Pa Tlingte Chuan Entawn Tûr Ṭha An Siam
3. Engvângin nge nu leh pate thusawi chu thiltihin a zui ang?
3 Isua chuan a thu hrilh chu nunpuiin, nu leh pate tân entawn tûr a siam a. (Johana 13:15) Kawng leh lamah chuan, “sawi” zawng sawi ṭhîn a, “ti si ṭhîn lo” Pharisaite chu a dem a ni. (Matthaia 23:3) Fate chu Jehova hmangaih tûra chêttîr tûr chuan, nu leh pate thusawi leh thiltih chu a inmil tûr a ni. Thiltihin a zui loh thusawi chu hrui nei lo thal ngul angin a hman tlâk loh.—1 Johana 3:18.
4. Eng zawhnate nge nu leh pate chu an inzawh ṭheuh vang?
4 Engvângin nge nu leh pate entawn tûr siam chu a pawimawh êm êm? Puitlingte chuan Isua entawn tûr siam aṭanga Pathian hmangaih dân an zir thei ang bawkin, naupangte chuan an nu leh pate entawn tûr ṭha zuiin Jehova hmangaih dân an zir thei a ni. Naupang ṭhian kawmte chuan naupang chu a tichak theiin, a “nungchang ṭha an tikhawlo” thei bawk. (1 Korinth 15:33) Naupang tân a dam chhûng hun a tam zâwk, leh a bîk takin a naupan laia a kawm ngeih ber leh a nun thununtu ber chu a nu leh pate a ni. Chuvâng chuan, nu leh pate chu: ‘Eng ang ṭhian nge ka nih? Ka entawn tûr siam chuan ka fa chu nungchang ṭha nei tûrin a fuih em? Ṭawngṭai leh Bible zirna ang chi thil pawimawh takahte hian eng ang entawn tûr nge ka siam? tiin an inzâwt ṭheuh tûr a ni.
Nu leh Pa Tlingte Chuan An Fate An Ṭawngṭaipui
5. Eng nge naupangte chuan an nu leh pate ṭawngṭaina aṭanga an zir theih?
5 I fate chuan i ṭawngṭaina an ngaihthlâk aṭangin Jehova chungchâng tam tak an zir thei a. Chaw einaa Pathian hnêna lâwmthu i sawi a, Bible zirnaa i ṭawngṭai chuan eng thu tâwp nge an siam ang? Anni chuan Jehova’n kan taksa mamawh min pe a—chu chu a chunga kan lâwm chhan tûr a ni a—tin, thlarau lam thutak min zirtîr bawk tih an hria ang. Chûngte chu zir tûr thil pawimawh tak a ni.—Jakoba 1:17.
6. Engtin nge nu leh pate chuan an fate chu Jehova’n anmahni a ngaihsakzia hre tûrin an ṭanpui theih?
6 Amaherawhchu, chaw ei hun leh Bible zir hun ni lo hun dangah i chhûngte i ṭawngṭaipui a, nangmah leh i fate nghawngtu thilte i sawipui chuan, a sâwt lehzual ang a. Jehova chu in chhûngkaw zînga tel, nangmahni ngaihsak êm êmtu anga ngai tûrin i fate chu i ṭanpui a ni ang. (Ephesi 6:18; 1 Petera 5:6, 7) Pa pakhat chuan: “Kan fanu chu a pian hlim aṭangin kan ṭawngṭaipui a. A lo ṭhan chhoh chuan, ṭhian kawm leh amah nghawngtu thil dang chungchângte chu kan ṭawngṭainaah kan telh a ni. Pasal nei tûra in a chhuahsan thlengin, amah ṭawngṭaipui lovin ni khat mah kan liamtîr lo,” a ti. Nî tin i fate chu i ṭawngṭaipui ve thei ang em? Jehova chu an taksa lam leh thlarau lam mamawhte chauh ni lo, an rilru lam mamawh ngaihsaktu Ṭhian anga thlîr tûrin i fate chu i ṭanpui thei ang em?—Philippi 4:6, 7.
7. Nu leh pate chuan thil engemaw bîk atâna ṭawngṭai tûr chuan eng nge an hriat ngai?
7 Thil engemaw bîk atâna ṭawngṭai tûr chuan, i fa nuna thilthlengte i hriat a ngai a. Fanu pahnih enkawl sei liantu pa pakhat thusawi hi lo chhinchhiah rawh: “Chawlhkâr tâwp apiangin, zawhna pahnih ka inzâwt ṭhîn: ‘Tûn chawlhkâr chhûng hian ka fate’n eng thil nge an ngaihtuah? Tin, an nî tin nunah eng thil ṭha nge thleng?’ tiin,” tih chu. Nu leh pate u, chûng zawhna chu in inzâwt vein, a chhânna ṭhenkhat chu in fate nêna in ṭawngṭainaah in telh thei em? Chutianga in tih chuan, ṭawngṭaina Ngaithlatu Jehova hnêna ṭawngṭai dân tûr mai ni lovin, amah hmangaih dân tûr pawh in zirtîr a ni ang.—Sâm 65:2.
Nu leh Pa Tlingte Chuan Zirna Lama Chîn Dân Ṭha Nei Tûrin An Fuih
8. Engvângin nge nu leh pate chuan an fate chu Pathian Thu zir tih ṭhana nei tûrin an ṭanpui ang?
8 Engtin nge Bible zirna chungchânga nu leh pate rilru put hmang chuan Pathian nêna an fate inlaichînna chu a nghawng? Inlaichînna engpawh chu ṭhang chho tûr leh tlo tûr chuan, an inbe tawn chauh ni lovin, an inngaithla tawn tûr a ni bawk. Jehova thu kan ngaihthlâk dân kawng khat chu ‘bawi rinawm’ tihchhuah thu leh hlate ṭanpuinaa Bible zirna neih a ni. (Matthaia 24:45-47; Thufingte 4:1, 2) Chuvâng chuan, nu leh pate chuan an fate’n Jehova nêna inlaichînna nghet leh duhawm tak an neih nâna ṭanpui tûrin, Pathian Thu zir chu tih ṭhana nei tûrin an fuih tûr a ni.
9. Engtin nge naupangte chu zirna lama chîn dân ṭha nei tûra ṭanpui theih an nih?
9 Engtin nge naupangte chu zirna lama chîn dân ṭha nei tûra ṭanpui theih an nih? Hetah pawh hian nu leh pate entîrna chu zirtîrtu ṭha ber a ni. I fate chuan mahnia Bible chhiar leh zirna tui taka i neih lai an hmu ṭhîn em? I fate enkawlin i buai hle ngei ang a, chuvângin Bible chhiar nân leh zir nân hun i nei thei lo niin i inhre mai thei. Mahse heti hian inzâwt rawh, ‘Ka fate’n hunbi neia TV ka en lai min hmu ṭhîn em?,’ tiin. Chutiang a nih chuan, mahnia zirna neih chungchânga entawn tûr ṭha siam tûrin, chûng hun ṭhenkhat chu i hmang thei ang em?
10, 11. Engvângin nge nu leh pate chuan chhûngkuaa Bible sawihona an neih ziah ang?
10 Jehova thu ngaithla tûra nu leh pate’n an fate an zirtîr theih dân kawng ṭangkai dang leh chu hunbi neia chhûngkuaa Bible chungchâng sawihona neih hi a ni. (Isaia 30:21) Mahse, ṭhenkhat chuan, ‘Nu leh pate’n kohhran inkhâwmnaa an hruai ziah tho chuan engvângin nge naupangte’n chhûngkuaa Bible zirna an mamawh?’ tiin an zâwt mai thei. Chhan ṭha tam tak a awm a ni. Jehova chuan nu leh pate chu an fate zirtîr tûrin mawhphurhna bul ber a pe a. (Thufingte 1:8; Ephesi 6:4) Chhûngkuaa Bible zirna chuan biakna chu vântlâng hmuha tih ṭhin sakhaw serh leh sâng mai ni lovin, chhûngkaw nuna tel a nihzia naupangte chu a hriattîr a ni.—Deuteronomy 6:6-9.
11 Chu bâkah, ṭha taka kaihhruai chhûngkuaa zirna chuan nu leh pate chu thlarau lam thil leh nungchang lam thila an fate ngaih dân hriat theihna hun remchâng a pe bawk. Entîr nân, nu leh pate chuan an fate an la naupan deuh lai chuan Ka Bible Thawnthu Lehkhabu * ang chi thu hle hla chhuahte chu an hmang thei a. Bible zirna ṭanpuitu he lehkhabua paragraph tin deuh thawah chuan, nu leh pate chuan an fate chu an ngaih dân sawi tûrin an sâwm thei a ni. Lehkhabua târ lan Bible chângte chu chhûtpuiin, nu leh pate chuan an fate chu ‘chhia leh ṭha fiah tûra’ an hriat theihnate sâwizawi tûrin an ṭanpui thei a ni.—Hebrai 5:14.
12. Engtin nge nu leh pate chuan chhûngkaw zirna chu naupang mamawh mila an siam rem theih a, he mi chungchângah hian eng nge ṭangkai i tih?
12 In fate chu an lo ṭhan chhoh ang zêlin, zirna chu an mamawh ang milin siamrem rawh. Nupa tuak khat chuan an fanu tleirâwlte’n school-a lâmnaa tel tûra an dîl chuan, anni chu Bible hmanga chhût tûra ṭanpui an duh a. Pa ber chuan heti hian a sawi: “Kan fanute hnênah chhûngkuaa zirna kan neih leh hunah kan nu nên chuan naupang lema chang a, anni chu nu leh pa lema chang tûrin kan hrilh a. Nu emaw, Pa emawa chang tûr zâwk chu anmahni rêl tûrah kan dah a; mahse, an pahnih chuan school-a lâmna chungchânga kaihhruaina pe tûrin zir bingna an nei dûn tûr a ni,” tiin. Eng nge a rah chhuah? “Kan fanute’n (nu leh pa lema changa) lâmnaa tel a fin thlâk loh chhan an Bible ṭanchhan chhût dân (fate anga châng keini) min han hrilhfiah chuan, an puitlinzia chu mak kan ti hle mai,” a ti a. Tichuan, “Chu thiltih aia tih theih tûr thil dang pawm tlâk an rawtte chuan kan rilru a khawih lehzual a. Hêngte hian an ngaihtuahna leh châkzâwngte hriat thiamna hlu tak min pe a ni,” tiin a sawi belh a ni. Hunbi neia chhûngkaw zirna nei ziah tûr leh chhûngkaw mamawh mil tak nihtîr tûr chuan thawh rim leh suangtuahna hman a ngai tih chu a dik ngei mai; mahse, a lâwmmante chuan thawh rim a phu a ni.—Thufingte 23:15.
Boruak Muanawm Tak Siam Rawh
13, 14. (a) Engtin nge nu leh pate chuan in chhûng boruak muanawm tak chu an siam theih? (b) Nu leh pate’n an thil tihsual an pawmna chuan hlâwkna eng nge a neih theih?
13 Thal kâptu chuan a thal chu boruak muanawm taka a tin a, a kah chuan a tum chu a fuh duh bîk ang. Chutiang bawkin, nu leh pate chuan in chhûng boruak muanawm tak an siam chuan, an fate chuan Jehova hmangaih dân an zir a beisei awm zâwk a ni. “Felna rah chu remna siamtute tân remnain tuh a ni,” tiin Jakoba chuan a ziak. (Jakoba 3:18) Engtin nge nu leh pate chuan in chhûnga boruak muanawm tak an siam theih? Nupate tân an inlaichînna nghet chu vawn reng a ngai a. In hmangaih tawna inzah tawn nupate chuan an fate chu Jehova pawh tiam a, mi dangte hmangaih tûr leh zah tûra zirtîr theihna hun remchâng ṭha zâwk an nei a ni. (Galatia 6:7; Ephesi 5:33) Hmangaihna leh inzahna chuan remna a siam a. Nupa inrem takte chuan chhûngkuaa awm thei inngeih lohnate chu an chingfel thei zâwk a ni.
14 Inneihna ṭha famkim a awm lo ang chiahin, tûnah rih chuan leiah hian chhûngkaw ṭha famkim pawh a awm thei lo va. Nu leh pate chuan an fate an dâwrnaah thlarau rah lantîr loh palh châng an nei mai thei. (Galatia 5:22, 23) Chutiang thil chu a thlen hunah, eng nge nu leh pate chuan an tih ang? An thil tihsual an pawm chuan, chu chuan naupangin anmahni a zahna chu a tinêp ang em? Tirhkoh Paula entîrna hi han ngaihtuah teh. Ani chu mi tam takte tân thlarau lama pa ang a ni a. (1 Korinth 4:15) Mahse, a thil tihsual chu tlâng hriatah a pawm a ni. (Rom 7:21-25) Chutichung pawh chuan, a inngaihtlâwmna leh a dikna chuan amah kan zahna a tikiam lo va, a belhchhah zâwk mah a ni. Paula chuan tlin lohna a nei chung pawhin, Korinth khuaa kohhrante hnênah huai takin: “Mi zirtute ni rawh u, kei pawh Krista zirtu ka ni ang bawk hian,” tiin a ziak ngam a ni. (1 Korinth 11:1) Nang pawhin i thil tihsual i pawm chuan, i fate’n i tlin lohna chu an chhinchhiah reng lo vang.
15, 16. Engvângin nge nu leh pate chuan an fate chu Kristian unaute hmangaih tûra an zirtîr ang a, chu chu eng anga tih theih nge a nih?
15 Nu leh pate chuan an fate’n Jehova hmangaihnaa an ṭhan chhona tûr boruak siam tûrin eng dang nge an tih theih? Tirhkoh Johana chuan: “Miin, ‘Pathian ka hmangaih e,’ tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?,” tiin a ziak a ni. (1 Johana 4:20, 21) Chuvângin, i fate chu an Kristian unaute hmangaih tûra i zirtîr hian Pathian hmangaih tûrin i zirtîr tihna a ni. Nu leh pate chuan, ‘Kohhran chungchâng ka sawite chu mi tichak zâwng nge a sawisêl zâwng?’ tiin an inzâwt tûr a ni. Engtin nge chu chu i hriat theih ang? Inkhâwm leh kohhrana mite chungchâng in fate thusawi chu ngaithla rawh. An thusawiah chuan in ngaihtuahnate a lang tih in hre thei ang.
16 Nu leh pate chuan an fate’n thlarau lama an unaute an hmangaih nân eng nge an tih theih? Fapa tleirâwl pahnih nei Peter-a chuan: “Kan fapate pahnih an la naupan lai aṭangin, thlarau lama mi puitlingte chu chaw kan ei puiin, kan inah hun kan hmanpui ṭhîn a, chutianga tih chu nuam kan ti hle a ni. Kan fate chu Jehova hmangaihtute nêna inkâwmin an ṭhang chho va, tûnah chuan Pathian rawngbâwl chu nun hlimawm ber a ni tih an hmu tawh a ni,” a ti. Fanu pa nga nei Dennis-a chuan, “Kan fanute chu kohhrana pioneer thawk upa lamte kâwm ngeih tûrin kan fuih a, a remchân apiangin bial kantute leh an nupuite chu chaw ei-ah kan sâwm ṭhîn a ni,” a ti bawk. Nang pawhin, i fate’n kohhran chu in chhûngkaw zauh belhna anga thlîr tûrin hma i la ve thei ang em?—Marka 10:29, 30.
Naupang Mawhphurhna
17. A tâwpah chuan fate chuan eng thu tlûkna nge an siam a ngaih?
17 Thal kâptu tehkhin thu kha ngaihtuah leh ta la. Themthiam hle mah se, a thal kah chu a kawi emaw, a inherh emaw chuan a tum chu a fuh a rinawm lo. Nu leh pate chuan thal kawi anga sawi theih naupang ngaihtuahna sual chu tihngîlsak tumin theih tâwp an chhuah ngei ang. Mahse, naupangte chuan a tâwpah chuan he khawvêl duhzâwng an inelhkâwitîr dâwn nge, Jehova chu kawng an ‘inkawhhmuhtîr,’ a nih loh leh an inelhngîltîr zâwk dâwn tih an rêl thlu tûr a ni.—Thufingte 3:5, 6; Rom 12:2.
18. Naupang duh thlanna chuan mi dang chungah eng nghawng nge a neih theih?
18 Nu leh pate chuan an fate chu ‘Lalpa thununna leh zilhnaa enkawl’ tûra mawhphurhna rit tak an neih laiin, a puitlin huna eng ang mi nge a nih dâwn tih chungchânga thu tlûkna chu naupang siam tûr a ni. (Ephesi 6:4) Chuvâng chuan, fate u, heti hian inzâwt rawh u, ‘Ka nu leh pate’n hmangaih taka min pêk zirtîrna chu kan pawm ang em?’ tiin. I pawm dâwn a nih chuan, nun kawng ṭha ber chu i thlang tihna a ni ang. In nu leh pate chu in tilâwm hle ang a. A pawimawh berah chuan, Jehova thinlung in tilâwm dâwn a ni.—Thufingte 27:11. (w07 9/1)
[Footnote]
^ par. 11 Jehova Thuhretute tihchhuah a ni.
I Hre Chhuak Em?
• Engtin nge nu leh pate chuan ṭawngṭai leh Bible zirna chungchângah entawn tûr ṭha an siam theih?
• Engtin nge nu leh pate chuan chhûngkaw boruak muanawm tak chu an siam theih?
• Eng duhthlanna nge fate’n an hmachhawn a, engtin nge an duh thlanna chuan mi dangte a nghawng ang?
[Zirlai Atâna Zawhnate]
[Phêk 29-naa milem]
Mahnia inzirnaah i fate tân entawn tûr ṭha i siam em?
[Phêk 30-naa milem]
Chhûngkaw boruak muanawm tak chuan hlimna a siam