Jehova Thu Chu A Nung

Hosea Bu Aṭanga Thu Pawimawh Hrilhfiahna

ISRAEL hnam sâwm hmâr lam lalramah chuan biakna dik chu hmuh tûr a awm mang meuh tawh lo va. Jeroboama II-na rorêlna hnuaiah chuan Israel ram chu hausa hle mah se, a thih hnuah chuan a chuai leh ta thuai a. Buaina leh politics lama ngelngheh lohna a awm zui ta reng mai a ni. A hnua lal parukte zînga palite chu thah an ni a. (2 Lalte 14:29; 15:​8-30; 17:​1-6) B.C.E. 804-a inṭan Hosea hrilh lâwkna chuan kum 59 chhûng a awh a, hêng lungngaihna hun thleng hi a huap a ni.

Jehova’n Israel hnam luhlul takte a ngaihsak dân chu Hosea-te nupa inkâra thilthleng hian chiang takin a târ lang a ni. Hosea thuchah kenah chuan Israel dik lohna laihlan leh Israel leh Juda lalram chunga rorêlna thu puan chhuahte a tel a. Hosea chuan ṭawngkam nêm leh mite hriatthiamna nei tak te, ṭawngkam chang leh chiang fiah tak te hmangin a hming chawi lehkhabuah hêng thu zawng zawng hi a lo ziak a. Pathian thâwk khum Thu a nih angin, a thute chu a nung a, thil a ti thei a ni.​—⁠Hebrai 4:⁠12.

“NUPUIAH NAWHCHIZUAR NEI LA”

(Hosea 1:1–3:⁠5)

Jehova chuan Hosea chu: “Kal la, nupuiah nawhchizuar chu nei la,” tiin a hrilh a. (Hosea 1:⁠2) Hosea chuan thu chu zâwmin, Gomeri lakah chuan fapa a nei a. Chu mi hnua Gomeri’n fa pahnih a hrin chu mi dang laka mi a ni. An hming, Lo-ruhamai leh Lo-ammia tih awmzia chuan Jehova’n Israel mite laka khawngaihna a lantîr tawh lohzia leh a mi rinawm lote a hnâwlzia a târ lang.

Engtin nge Jehova chuan hel hmang a mite chu a ngaih chiah le? Hosea chu: “Kal leh ta la, hmeichhia, mi dang duh lai, uirenu chu va hmangaih rawh, Israel thlahte chu pathian dang . . . ngaina mah se, LALPAN a hmangaih reng ang bawk hian,” tiin a hrilh a ni.​—⁠Hosea 3:⁠1.

Bible Chungchânga Zawhnate Chhânna:

1:1​—⁠Engvângin nge Hosea chuan a rawngbâwl chhûnga Judai rama lal palite hming a sawi lan laiin, Israel lal pakhat hming chauh a sawi lan? Hei hi Davida thlah kal chho zêlte chauh chu Pathian hnam thlante chunga rorêl tûra dikna nei anga ngaih an nih vâng a ni. Hmâr lam lalrama lalte chu Judai rama lalte angin Davida thlah kal zêl an ni ve lo.

1:​2-9​—⁠Hosea chuan nawhchizuar nupuiah a nei tak tak em? Aw, Hosea chuan hmeichhia a hnua uirê chu nupuiah a nei tak tak a ni. He zâwlnei thusawi a enga mah hian a in chhûngkhur nun a sawi chu mumang emaw, inlârna emaw anga ngaih theih chhan tûr a pe lo.

1:7​—⁠Engtik lai khân nge Juda chhûngte chu lainatna lantîr leh chhan chhuah an nih? He thu hi B.C.E. 732, Lal Hezekia hun lai khân a thleng famkim a ni. Chutih hun lai chuan, Jehova chuan Assuria hovin Jerusalem rûn an tumna chu an sipai 1,85,000 zan khat thilthua vântirhkoh pakhat thahtîrin a titâwp a. (2 Lalte 19:​34, 35) Chutichuan, Jehova chuan Juda chu “thal ngul emaw, khandaih emaw, indona emaw, sakawr emaw, sakawr chungchuang mi emawa” chhan chhuak lovin, vântirhkoh hmangin a chhan chhuak a ni.

1:​10, 11​—⁠B.C.E. 740-a Israel hmâr lam lalram a tlûk chhiat avângin, engtin nge Israel fate chu Juda fate nên ‘an pun khâwm’? B.C.E. 607-a Judai rama awmte Babulon sala hruai an nih hma khân, hmâr lam lalrama mi tam takte chu Judai ramah an pêm a. (2 Chronicles 11:​13-17; 30:​6-12, 18-20, 25) B.C.E. 537-a Juda sal tângte an rama an kîr leh  khân, Israel hmâr lam lalrama mi thlahte chu kîr lehte zîngah chuan an tel a ni.​—⁠Ezra 2:⁠70.

2:​21-23​—⁠Jehova’n: “Ani chu ka tân leiah ka chîng [Jezreel] ang a; Lainatdawnglovi chu ka lainat ang,” tih a sawi khân eng nge a sawi lâwk? Gomeri’n Hosea fapa a hrinsak hmasa ber hming chu Jezreela a ni a. (Hosea 1:​2-4) Chu hming awmzia, “Pathianin Chi A Theh Ang” tih chu B.C.E. 537-a Jehova’n mi rinawm a la bângte a lâk khâwmna leh Judai rama thlai chi ang maia a theh tûr thu hrilh lâwkna a ni. Kum 70 lai mai rauhsan tawh ram chuan tûnah chuan buh te, uain te, leh hriak te a thar tawh dâwn a. Hla thu anga sawiin, hrilh lâwkna thu chuan hêng thil ṭhate hian leiin a ṭhatnate chhuah tûrin a ngên ang a; tin, lei chuan ruahtui chu vân hnênah a ngên bawk ang tih a sawi. Tichuan, vân pawhin Pathian hnênah ruah paitu chhûmte a dîl bawk dâwn a ni. Hêng zawng zawngte hi a la bâng kîr lehte ṭha taka enkawl nân a ni ang. Tirhkoh Paula leh Petera chuan Hosea 2:23 hi thlarau lam Israelte lâk khâwmna sawi nân an hmang a ni.​—⁠Rom 9:​25, 26; 1 Petera 2:⁠10.

Kan Zir Tûrte:

1:​2-9; 3:​1, 2. Pathian duhzâwng zâwm tûra Hosea inpêkna hi ngaihtuah teh! Ani chuan Pathian duh dân ang ngeiin a nupui chu a ṭhen lo. Pathian duhzâwng tih chungchângah hian, eng chena thui nge mahni duhzâwng chân kan inhuam le?

1:​6-9. Jehova chuan tisa lama uirêna a huat ang chiahin, thlarau lama uirêna pawh a hua.

1:​7, 10, 11; 2:​14-23. Israel leh Judai ram chungchânga Jehova thu hrilh lâwk chu a thleng famkim. Jehova thu chu engtik lai pawhin a thleng dik ziah a ni.

2:​16, 19, 21-23; 3:​1-4. Jehova chuan inchhîrna dik tak lantîrtute chu ngaihdam a duh. (Nehemia 9:17) Jehova angin, mi dangte nêna kan indâwrnaah lainatna leh khawngaihna kan nei tûr a ni.

‘JEHOVA CHUAN BEIHNA TUR A NEI’

(Hosea 4:1–13:⁠16)

“LALPA chuan ram luahtute beihna tûr a nei.” Engvângin nge? “He ramah hian thutak leh khawngaihna leh Pathian hriatna a awm loh avângin.” (Hosea 4:⁠1) Israel mi phatsantute chu mi bum leh thisen chhuahnaahte an inhnam hnawih a, tisa lam leh thlarau lamah an uirê bawk. Anmahni ṭanpuitu atâna Pathian lam hawi ai chuan, “Aigupta lamah an au thûl a, Assuria lamah an kal thûl” a ni.​—⁠Hosea 7:⁠11.

Jehova chuan: “Israel-ho chu lem zawhin an awm a ni,” tia sawiin a rorêlna thu a puang chhuak a. (Hosea 8:⁠8) Judai lalram chuan thil a tisual a ni. Hosea 12:2 chuan: “LALPA chuan Juda chungah pawh lungawi lohna tûr a nei bawk, Jakoba chu a awm dân ang zia zêlin a hrem ang,” a ti. Mahse, Pathian chuan: “Seol kut ata anni chu ka tlan ang a; thihna ata anni chu ka chhan chhuak ang” tia a tiam avângin, din thar leh ngei an ni dâwn tih a chiang a ni.​—⁠Hosea 13:​14, New World Translation.

Bible Chungchânga Zawhnate Chhânna:

6:​1-3​—⁠“Hawh u, LALPA hnênah i kîr leh ang u,” tia sawitu chu tunge ni? Israel mi rinawm lote chu Jehova hnêna kîr leh tûrin an infuih tawn a ni ngei ang. Chutiang a nih chuan, inchhîrna der an lantîr mai a ni. An hmangaihna chu “zîng ṭiauchhûm leh dai ral ta thuai ṭhîn ang” mai a ni si a. (Hosea 6:⁠4) Kawng lehlamah chuan, Hosea’n mite chu Jehova lama kîr leh tûra a ngenna pawh a ni thei bawk ang. Enga pawh chu ni se, Israel hnam sâwm lalram luahtu Israel mi luhlul takte chuan inchhîrna dik tak lantîr a, Jehova hnêna an kîr leh tak zet a ngai a ni.

7:4​—⁠Eng kawngin nge Israel uirete chu ‘thuk ur lum’ ang an nih? He khaikhinna thu hian an rilrua thil sual tih châkna a nasatzia chu a târ lang a ni.

Kan Zir Tûrte:

4:​1, 6. Jehova duhsakna kan hlawh duh chuan amah hriatna kan la lût zêl ang a, kan thil zir ang chuan kan nung ngei tûr a ni bawk.

4:​9-13. Jehova chuan mipat hmeichhiatna hmang khaw lotute leh biakna thianghlim lova telte chu a hrem ngei ngei dâwn.​—⁠Hosea 1:⁠4.

 5:⁠1. Pathian mite zînga hma hruaitute chuan kal pênna chu an hnâwl fithla ṭhak tûr a ni. Chuti a nih loh chuan, anni chuan ṭhenkhat chu biakna dik lo lamah an thlêmin, an tân ‘thang leh lên zârte’ a lo ni mai ang.

6:​1-4; 7:​14, 16. Ṭawngkam chauhva inchhîr chu a chapo thlâkin, awmzia a nei lo a ni. Pathian khawngaihna dawng tûr chuan thil tisualtu chuan thinlung tak zeta inchhîrna a lantîr tûr a ni a, chu chu “Chungnungbera” biakna chawisân lama kîr lehna hmanga lantîr a ni. A thiltihte chuan Pathian tehna sâng takte a mil tûr a ni.​—⁠Hosea 7:⁠16.

6:⁠6. Thil sual tih hi Pathian hmangaih lohna leh a laka rinawm lohna târ langtu a ni. Thlarau lama inthâwina engzât mahin he tlâkchhamna hi a phuhru thei lo.

8:​7, 13; 10:13. “Miin a theh apiang, chu mi vêk chu a seng bawk dâwn si a,” tih thubul dikzia chu Israel milem betute chungah hian a thleng dik chiah a ni.​—⁠Galatia 6:⁠7.

8:8; 9:17; 13:16. Hmâr lam lalram chungchânga hrilh lâwkna chu a khawpui Samari Assuria-in a lâk khân a thleng dik a ni. (2 Lalte 17:​3-6) Pathianin a sawi chu a ti ngei ang tih leh a lo sawi tawh chu a tipuitling ngei ang tih chu kan ring tlat thei a ni.​—⁠Number 23:⁠19.

8:14. Jehova chuan B.C.E. 607 khân Babulon mite hmangin “[Juda] khawpuiahte chuan mei” a tîr a, Jerusalem leh Judai ram tihchhiat tûr a lo sawi lâwk tawh chu a thlentîr a ni. (2 Chronicles 36:19) Pathian Thu chu a thleng dik lo ngai lo.​—⁠Josua 23:⁠14.

9:10. Israel mite chu Pathian dik hnênah an inpumpêk nachungin, “Baal-peor hmunah an lo kal a, thil zahthlâk takah chuan an impumpêk ta a.” An entîrna siam ṭha lo tak vaukhâna kan awm a, Jehova hnêna kan inpumpêkna bawhchhiatna lak ata kan invên chuan kan fing tihna a ni ang.​—⁠1 Korinth 10:⁠11.

10:​1, 2, 12. Pathian chu vervêkna tel lo thinlungin chibai kan bûk tûr a ni. ‘Felna kan tuh chuan, Pathian khawngaihna kan seng ang.’

10:⁠5. Beth-aven (“Khawlohna In” tihna) hi Bethel (“Pathian In”) koh nâna hman a ni a, hei hian ngaihnêpna a lantîr a ni. Beth-aven sebâwng no chu hmun dangah lâk sawn a nih chuan Samari mite chuan an biaka ber an chân tâk avângin an sûn a ni. Nunna nei lo milim, amah ngei pawh invênghim thei lo rinchhan chu a va âtthlâk tak êm!​—⁠Sâm 135:​15-18; Jeremia 10:​3-5.

11:​1-4. Jehova chuan a mite chu hmangaih takin a dâwr ziah ṭhîn. Pathian laka intukluh hi a khirh ngai lo.

11:​8-11; 13:14. Jehova’n a mite biakna dika tun din leh chungchânga a thusawi chu ‘engmah tih nei lovin a hnênah a kîr leh lo.’ (Isaia 55:11) B.C.E. 537 khân, Babulon sal tânna chu a tâwp a, a la bângte chu Jerusalemah an kîr leh a ni. (Ezra 2:1; 3:​1-3) Jehova’n a zâwlnei hmanga a sawi tawh apiang chu mathei lovin a thleng ngei ngei ang.

12:⁠6. Khawngaihna leh dikna lantîr te, Jehova hnêna innghah fo te chu kan tum nghet tlat tûr a ni.

13:⁠6. Israel mite chu ‘an tlai a, an tlai chu an thinlungin an chapo phah a. Tichuan [Jehova] an theihnghilh ta a ni.’ Mahni inchawimawi duhna engpawh lakah chuan kan invên a ngai a ni.

“LALPA KAWNGTE CHU A DIK”

(Hosea 14:​1-9)

Hosea chuan: “Aw Israel, LALPA i Pathian lamah chuan kîr leh rawh i khawlohna avâng ngeiin i tlûk tâk hi,” tiin a ngên a. Mite chu Jehova hnêna: “A ṭha apiang chu pawm ang che; tichuan kan hmui rahte chu bâwngpa aiah kan rawn hlân ang e,” tia sawi tûrin a fuih a ni.​—⁠Hosea 14:​1, 2.

Thil sual titu inlamlêt chuan Jehova lam pana lo kalin, a kawngte a zawh tûr a ni a, a hnênah fakna inthawinate a hlân tûr a ni bawk. Engvângin nge? “LALPA kawngte chu a dik a, mi dikte chuan an zawh dâwn” avângin. (Hosea 14:⁠9) Mi tam takin “LALPA leh a ṭhatna chu khûr chungin an pan” dâwn avângin kan va lâwm tak êm!​—⁠Hosea 3:⁠5. (w07 9/15)