“In Pain Mi A Khawngaih”
“In Pain Mi A Khawngaih”
“In Pain mi a khawngaih angin mi khawngaih ve rawh u.”—LUKA 6:36.
1, 2. Lehkhaziaktute, Pharisaite, leh a hnung zuitute hnêna Isua thusawite chuan khawngaihna hi mize duhawm tak a ni tih engtin nge a lantîr?
MOSIA kal tlanga Dân pêkah chuan dân chi hrang hrang 600 vêl a awm a. Mosia Dânin a phûtte chu tih ngai mah se, khawngaihna lantîr chu thil pawimawh tak a ni bawk. Mi dangte khawngaihna nei lo Pharisaite hnêna Isua thusawi hi ngaihtuah teh. Ṭum hnih lai mai chu Isua chuan: “Inthâwina duh lovin khawngaihna ka duh e,” tia Pathian thupêk chhuah sawiin a zilh a ni. * (Matthaia 9:10-13; 12:1-7; Hosea 6:6) Isua chuan a rawngbâwl tâwp hnaih lamah: “Nangni lehkhaziaktu leh Pharisai vervêkte u, in chung a pik e! pudina te, mohuri te, zira te chu sâwmah pakhat in pe ṭhîn a, dân thu pawimawh zâwk—felna te, khawngaihna te, rinawmna te chu—in ngaihthah si ṭhîn,” tiin a sawi a ni.—Matthaia 23:23.
2 Isua chuan khawngaihna chu mize pawimawh takah a ruat tih phat rual a ni lo. A hnung zuitute hnênah: “In Pain mi a khawngaih angin mi khawngaih ve rawh u,” tiin a hrilh a ni. (Luka 6:36) Amaherawhchu, he mi kawnga “Pathian awm dân latute ni” tûr chuan khawngaihna dik tak nihna chu kan hre tûr a ni. (Ephesi 5:1) Chu bâkah, khawngaihna hlâwknate hriatthiamna chuan kan nuna he mizia hi lantîr lehzual tûrin min pui ang.
Retheite Khawngaihna
3. Engvângin nge khawngaihna dik tak zir tûrin Jehova lam kan hawi ang?
3 Fakna hla phuahtu chu: “LALPA chu mi khawngaih thei, lainatnaa khat; thinnel, ngilneihna nasa tak nei a ni. LALPA chu engkim chungah pawh a ṭha a ni; a lainatnate chu a thil siam zawng zawng chungah a awm,” tiin a zai a. (Sâm 145:8, 9) Jehova chu “khawngaihnate Pa leh thlamuanna zawng zawng Pathian” a ni. (2 Korinth 1:3) Khawngaihna chu mi dangte lainat taka cheibâwlna hmanga lantîr a ni a. Hei hi Pathian mize pui pakhat a ni. A entîrna leh kan hnêna kaihhruaina min pêkte chuan khawngaihna dik tak min zirtîr a ni.
4. Isaia 49:15 chuan khawngaihna chungchâng eng nge min zirtîr?
4 Isaia 49:15-a chhin chhiah angin, Jehova chuan: “Hmeichhiain a fapa, a rîla rah chu, khawngaih lohna tûrin a nau a hnute hne lai chu a theihnghilh thei em ni?,” tiin a sawi a ni. Jehova mi khawngaih thei tak nihtîrtu chu naupang enkawltu nuin a fa a lainatna nêna khaikhin a ni a. Nautê chu a ril a ṭam emaw, thil dang a mamawh emaw pawh a ni thei. Nu chuan a khawngaihna emaw, lainatna emaw avângin fa sên mamawh chu a ngaihsak a. Jehova chuan khawngaihna a lantîrate chungah chuan chutiang lainatna thinlung chu a pu a ni.
5. Engtin nge Jehova ngei chuan Israelte lakah ‘khawngaihna a ngah’ tih a lantîr?
5 Mite lainatna neih chu a fak tlâk hle a; mahse, ṭanpui ngaite tâna ṭangkai tûr thil tihsak chu a fak tlâk lehzual a ni. Kum 3,500 vêl kaltaa Jehova’n amah betute Aigupta sala an tân laia a chhân lêt dân kha han ngaihtuah teh. Mosia hnênah chuan: “Aigupta rama ka mi awmte chu an hrehawmzia ka hmu reng asin, anmahni vêngtute avânga an au thâwmte chu ka lo hria a; an lungngaihnate chu ka hre reng si a; tichuan Aigupta ho lak ata chhanhim tûr leh chu mi ram ata chu hruai chhuaka . . . ram ṭha tak leh zau tak, hnutetui leh khawizu luanna rama hruai lût tûrin ka lo chhuak ta a ni,” tiin a hrilh a ni. (Exodus 3:7, 8) Jehova chuan Israel mite Aigupta kut ata a chhan chhuah hnu kum 500 vêlah: “Israel-ho chu Aigupta aṭangin ka hruai chhuak a, Aigupta mite kut ata leh a hnuaichhiahtu che u ram zawng zawng ata ka chhan chhuak che u a,” tiin a hriatnawntîr a. (1 Samuela 10:18) Israel mite chuan Pathian tehna dikte an pênsan avângin, dinhmun hrehawm tak an tawng fo va. Mahse, Jehova chuan a lainat a, vawi tam tak a chhan chhuak a ni. (Rorêltute 2:11-16; 2 Chronicles 36:15) Hei hian hmangaihna Pathianin ṭanpui ngai te, dinhmun hlauhawma awm te, a nih loh leh harsatna tâwk te a chhân lêt dân chu a târ lang. Jehova chuan ‘khawngaihna a ngah’ a ni.—Ephesi 2:4.
6. Engtin nge Isua Krista chuan khawngaihna lantîrna kawngah a Pa a entawn?
6 Isua Krista chuan he leia a awm lai khân khawngaihna lantîrna kawngah a Pa chu sawisêlbovin a entawn a. Mitdel pahnihin: “Davida fapa, min khawngaih rawh,” tia an rawn ngen khân Isua’n engtin nge a tih? Isua chu mak tak maia an mit tihmensak tûrin an ngên a ni. Chutiang chuan a tihsak ta ngei a, mahse chu thilmak chu a tihsak satliah mai lo. Bible chuan: “Isuan a khawngaih êm êm a, an mit a dek a; tichuan an hmu thei ta nghâl a,” a ti. (Matthaia 20:30-34) Khawngaihna chuan Isua chu mitdel te, ramhuai zâwl te, phâr te a tihdamtîr a; tin, fate’n hrehawm an tawrh avânga nu leh pate rilru hahna tikiangtu thilmak tam takte chu a tihtîr bawk a ni.—Matthaia 9:27; 15:22; 17:15; Marka 5:18, 19; Luka 17:12, 13.
7. Pathian Jehova leh a Fapa entîrna chuan khawngaihna chungchângah eng nge min zirtîr?
7 Pathian Jehova leh Isua Krista entawn tûr siam chuan khawngaihnain hmêlhmang pahnih a nei tih a târ lang—mi retheite lainatna leh tawrhpuina, leh a dawngtu chhâwktu tûr thiltihna te chu. Mi khawngaih thei ni tûr chuan a pahniha neih a ngai a ni. Bible-ah chuan khawngaihna chu ṭanpui ngaite chunga lainatna thiltih sawi nâna hman a ni deuh ber a. Chuti a nih si chuan, engtin nge khawngaihna chu rorêlna lam thilah lantîr a nih? Chutah chuan thil ṭha lo nia ngaih theih tûr hremna pêk loh ang chi te a tel em?
Bawhchhetute Khawngaihna
8, 9. Bat-sebi nêna thil sual an tih hnua Davida chunga lantîr khawngaihnaah chuan eng nge tel?
8 Zâwlnei Nathana’n Bat-sebi nêna uirêna chungchânga hmân lai Israel Lal Davida a hmachhawn hnua thil thleng hi han ngaihtuah teh. Inchhîr takin, Davida chu: “Aw Pathian i ngilneih êm avângin mi khawngaih la: i lainatna nasat avângin ka bawhchhiatnate hi thai bo vang che. Ka khawlohnate hi mi silfaisak var la, ka sual hi mi tlenfaisak ang che. Ka bawhchhiatnate hi ka hre ta si a: ka sual hi ka hmâah a awm fo ṭhîn a ni. I chungah, i chung chauhvah thil ka tisual a, i mithmuha thil sual chu ka lo ti ta a,” tiin a ṭawngṭai a ni.—Sâm 51:1-4.
9 Davida chuan pawi a ti hle a. Jehova chuan a sualna chu a ngaidam a, amah leh Bat-sebi chu an dawn tûr aia nêp zâwk hremna chu a dawntîr a ni. Mosia Dân ang chuan Davida leh Bat-sebi chu tihhlum ve ve tûr an ni. (Deuteronomy 22:22) An sualna sawhkhâwk an pumpelh vek lo nachungin, an nunna erawh zuahsak an ni a. (2 Samuela 12:13) Pathian khawngaihnaah chuan sual ngaihdamna a tel a. Amaherawhchu, a âwm tâwk chuan a hrem tho tho a ni.
10. Jehova chu rorêlna kawngah mi khawngaih thei tak a ni chung pawhin, engvângin nge a khawngaihna chu kan pâwngpaw rinchhan ngawt loh vang?
10 ‘Mi pakhat [Adama] avânga sual khawvêla a luh’ avâng leh ‘sual man chu thihna a nih si’ avângin, mihring zawng zawngte chuan thih an phu a. (Rom 5:12; 6:23) Jehova’n ro a rêl huna khawngaihna a lantîr avângin kan va lâwm tak êm! Amaherawhchu, Pathian khawngaihna pâwngpaw rinchhan ngawt lo tûrin kan fîmkhur tûr a ni. “[Jehova] kawng zawng zawng chu a dik a ni,” tiin Deuteronomy 32:4 (NW) chuan a sawi. Khawngaihna lantîr a tum hunah pawh Pathian chuan a rorêl dikna tehna famkim chu a ngaihthah mai lo.
11. Jehova chuan Davida leh Bat-sebi thil sual tih a chinfelnaah rorêl dikna pawh a hmang tel tih engtin nge a lantîr?
11 Davida leh Bat-sebi chungchângah chuan, thi tûra an chung thu rêlna tihnêpsak a nih hmain, an sual ngaihdamna a awm hmasak a ngai a. Israel rorêltute chu sual ngaihdam theihna pêk an ni lo. Chu thu buai chu an chinfel tûr ni ta se la chuan, thi tûra thiam loh chantîr bâk tih theih dang an nei lo vang. Chu chu Dânin a phût a ni si a. Amaherawhchu, Jehova chuan Davida hnêna thu a lo thlun tawh avângin, a sualna ngaihdam chhan tûr a awm leh awm loh chu a zawng a. (2 Samuela 7:12-16) Chuvângin, Pathian Jehova, “lei chung zawng zawnga rorêltu” leh ‘thinlung fiah ṭhîntu’ chuan chu buaina chu amah ngeia chinfel a thlang ta a ni. (Genesis 18:25; 1 Chronicles 29:17) Pathian chuan Davida thinlung chu a en dik thei a, inchhîrna dik tak a neih leh neih loh a bûk theiin, chuta ṭang chuan a ngaidam ta a ni.
12. Sualna nei mihringte chuan engtin nge Pathian khawngaihna an hlâwkpui theih?
12 Jehova’n kan sual rochun avânga thihna kan tawh tûr lak ata chhuah theihna tûr kawng siala khawngaihna a lantîr chu a rorêl dikna nên a inrem a ni. Jehova chuan a rorêl dikna chu bawhchhe lova sual ngaidam thei tûrin, a Fapa, Isua Krista tlanna inthâwina chu a pe a—chu chu khawngaihna lantîr tawh azawnga ropui ber chu a ni. (Matthaia 20:28; Rom 6:22, 23) Sual kan rochun avânga a hremna thihna lak ata min chhan chhuak thei Pathian khawngaihna hlâwkpui tûr chuan ‘Fapaah rinna kan lantîr’ ngei tûr a ni.—Johana 3:16, 36.
Khawngaihna leh Rorêl Dikna Pathian
13, 14. Pathian khawngaihna chuan a rorêl dikna chu a tinêp em? Hrilhfiah rawh.
13 Jehova khawngaihna chuan a rorêl dikna a bawhchhiat loh laiin, a rorêl dikna chu engtin emaw tak a khawih danglam em? Khawngaihna chuan Pathian rorêlna nghawng chhuah tûr chu a tinêp em? Tinêp lo.
14 Zâwlnei Hosea kal tlangin Jehova chuan Israel mite chu: “Kumkhuain ka tân ka hual tlat ang che; felna te, rorêlna te, khawngaihna te, lainatna tein ka tân ka hual ang che,” tiin a hrilh a. (Hosea 2:19) Hêng thute hian Jehova khawngaihna lantîr chu rorêl dikna tiama a mize dangte nên a inmil a ni tih a lantîr chiang hle. Jehova chu “Pathian lainatnaa khat, mi khawngaih thei tak, . . . khawlohna te, bawhchhiatna te, suahsualna te ngaidam ṭhîn; thiam lova ruatte chhuah mai ngai lo,” a ni. (Exodus 34:6, 7) Jehova chu khawngaihna leh rorêl dikna Pathian a ni. A chungchângah hian Bible chuan: “Lungpuia chu, a thiltih a fel famkim; a kawng zawng zawng chu a dik a ni,” a ti a. (Deuteronomy 32:4, NW) Pathian rorêl dikna chu a khawngaihna ang bawkin a fel famkim a ni. He mize pahnihah hian pakhat zâwk hi a dang ai hian a chungnun zâwk lo va, pakhat hian a dangin nghawng a neih tûr chu a tinêp hek lo. Hêng mize pahnihte hian inmil thlapin hna an thawk dûn zâwk a ni.
15, 16. (a) Engin nge Pathian rorêl dikna chu a nun râwng lo tih târ lang? (b) Jehova’n he khawvêl suaksual chunga ro a rêl hunah, amah betute chuan eng nge an rin tlat theih?
15 Jehova rorêl dikna chu a nun râwng lo. Rorêl dikna tih chuan dân lam thil a hril tlângpui ṭhîn a, rorêlna chu thil sual titute an phu ang ngeia hremna a ni tlângpui bawk. Amaherawhchu, Pathian rorêl dikna erawh chuan a phute tâna chhandamna pawh a thlen thei a ni. Entîr nân, Sodom leh Gomorra khawpuia mi suaksualte tihboral an nih khân, thlahtu Lota leh a fanu pahnihte chu an him a ni.—Genesis 19:12-26.
16 Jehova’n he khawvêl suaksual chunga ro a rêl hunah chuan, betu dik “mipui tam tak,” ‘an puante Berâm No thisena sua tivâr tute’ chu chhandam an ni ang a. Chuvângin, “hrehawm nasa tak ata” an chhuak ang.—Thu Puan 7:9-14.
Engvângin Nge Mi Khawngaih Thei Kan Nih Ang?
17. Khawngaihna neih chhan tûr bulpui chu eng nge ni?
17 Jehova leh Isua Krista entawn tûr siam chuan khawngaihna dik tak chu min zirtîr tak zet a ni. Thufingte 19:17 chuan: “Mi rethei khawngaih chuan LALPA a pûktîr a ni a, a thiltih ṭhat chu a rûl ang,” tia sawiin, khawngaihna neih chhan tûr bulpui chu min hrilh a. Jehova chu kan indâwr tawnna kawnga amah leh a Fapa entawna khawngaihna kan lantîr hian a lâwm a ni. (1 Korinth 11:1) Tin, khawngaihnain khawngaihna bawk a hrin avângin, mi dangte chu khawngaihna nei tûrin a fuih bawk.—Luka 6:38.
18. Engvângin nge mi khawngaih thei nih kan tum tlat ang?
18 Khawngaihna hi mize ṭha tam tak inzawm khâwm a ni a. Chutah chuan hmangaihna te, ngilneihna te, leh ṭhatna te a tel a ni. Lainatna emaw, tawrhpuina emaw chu khawngaihna thiltih awmtîrtu bul a ni a. Pathian khawngaihna chuan rorêl dikna chu tinêp lo mah se, Jehova chu thinnel tak a ni a, thil sual titute an inlamlêtna tûrin hun ṭhahnem tâwk dawhthei takin a pe a ni. (2 Petera 3:9, 10) Chuvângin, khawngaihna chu chhelna leh dawhtheihna nên a inkûngkaih a ni. Khawngaihna lantîrna thiltih pakhat chuan mize duhawm tam tak—Pathian thlarau rah pêng chi hrang hrangte—inzawm khâwm a nih avângin, khawngaihna thiltih chu hêng miziate neih theihna hun remchâng ṭha tak a lo ni. (Galatia 5:22, 23) Mi khawngaih thei tak nih tum tlat chu a va pawimawh êm!
“Mi Khawngaih Thei Takte Chu An Eng A Thâwl E”
19, 20. Eng kawngin nge khawngaihna chu rorêlna aiin a chungnun zâwk?
19 Zirtîr Jakoba chuan khawngaihna chu kan nuna mize pawimawh tak kan nihtîr chhan tûr min hrilh a. Heti hian a ziak a ni: “Khawngaihna hi rorêlna aiin a chungnung zâwk a ni,” tiin. (Jakoba 2:13b) Jakoba sawi chu Jehova betute’n mi dang hnêna an lantîr khawngaihna a ni a. Rorêlna aia a chungnun zâwk dân chu, miin ‘Pathian hnêna mahni chanchin a sawi’ hun a lo thlen chuan, Jehova chuan chu miin khawngaihna nêna mi dangte a dâwr dân chu ngaihtuah telin, A Fapa tlanna inthâwina ṭanchhanin a ngaidam hi a ni. (Rom 14:12) Bat-sebi laka thil sual tihna chungchânga Davida chunga khawngaihna lantîr a nih chhan pakhat chu, amah ngei pawh mi khawngaih thei tak a nih vâng a ni tih rinhlelh rual a ni lo. (1 Samuela 24:4-7) Kawng lehlamah chuan, “mi chunga khawngaihna nei lo chu khawngaihna tel lovin rorêlsakin a awm ang.” (Jakoba 2:13a) Pathianin “khawngaihna nei lo” mite chu “thi zia rêng” anga a ruat hi thil mak a ni lo ve!—Rom 1:31, 32.
20 Isua chuan Tlâng chunga a Thusawiah: “Mi khawngaih thei takte chu an eng a thâwl e, khawngaih an la hlawh dâwn si a,” a ti a. (Matthaia 5:7) Hêng thute hian Pathian khawngaihna zawngtute chu mi khawngaih thei an ni ngei tûr a ni tih a va târ lang chiang tak êm! A dawta thuziak chuan kan nî tin nuna khawngaihna kan lantîr theih dân a rawn sawi ang. (w07 9/15)
[Footnote]
^ par. 1 Mizo Bible-ah chuan, “khawngaihna” tia lehlin atîra ziak thu mal chu “lainatna” ti pawha lehlin a ni.
Eng Nge I Zir?
• Eng nge khawngaihna chu?
• Eng kawngin nge khawngaihna chu târ lan a nih?
• Eng kawngin nge Jehova chu khawngaihna leh rorêl dikna Pathian a nih?
• Engvângin nge mi khawngaih thei tak kan nih ang?
[Zirlai Atâna Zawhnate]
[Phêk 9-naa milem]
Retheite chunga Jehova lainatna thinlung chu nuin a fa sên a lainatna ang a ni
[Phêk 12-naa milem]
Jehova chuan Davida laka khawngaihna lantîrin a rorêl dikna a palzût em?