Nuna Thiltum Lungawithlâk Tak Chu Um Rawh
Nuna Thiltum Lungawithlâk Tak Chu Um Rawh
“Engkim, thaw thei tawh phawt chuan LALPA chu fak rawh se.”—SAM 150:6.
1. Ṭhalai pakhatin nunna thiltum a zawn dân sawi rawh.
“MITE ṭanpui nâna ka nun hman ka duh avângin damdawi lam thiamna ka zir a. Doctor nihna chhuanawm tak leh sum leh pai lâkluhna chuan min tihhlim ka ring bawk a ni,” tiin Korea rama seilian Seung Jin-a chuan a sawi a. * Mahse, ani chuan: “Mite ṭanpui tûrin doctor-te chuan tihtheih an nei tlêm hle tih a tâwpa ka hriat chhuah chuan, ka beidawng hle a. Tichuan, lemziak lam chu ka zir a; mahse, ka lemziakte chu mite tâna a ṭangkai vak loh avângin mahni hmasial nia inhriatna ka nei a. Zirtîrtu-ah ka ṭang leh a; mahse, thil nihphung chauh ka zirtîr thei a, hlimna tak tak thlentu kaihhruaina ka pe thei lo tih ka hre chhuak thuai a ni,” a ti. Mi dang tam takte ang bawkin, Seung Jin-a chuan nuna thiltum awmze nei tak chu a zawng a ni.
2. (a) Nuna thiltum nei tih awmzia chu eng nge ni? (b) Engtin nge Siamtuin thiltum neiin leiah hian min dah tih chu kan hriat theih?
2 Nuna thiltum dik tak nei tih chu nun chhan nei, tum bîk nei, leh thawh rim chhan nei tihna a ni a. Mihringte chuan chutiang thiltum chu an nei thei tak zet em? Nei thei tehrêng mai! Finna te, chhia leh ṭha hriatna te, leh thil chhût theihna te pêk kan nihna chuan Siamtuin thiltum ṭha tak neiin he leiah hian min dah a ni tih a chiang hle. Chuvâng chuan, Siamtu thiltum nêna inmila kan nun chauhvin thiltum dik tak chu kan zawng hmu thei ang a, kan puitlin thei bawk ang.
3. Mihringte tâna Pathian thiltumah hian eng nge tel?
3 Bible chuan kan tâna Pathian thiltumah chuan thil tam tak a tel tih a târ lang. Entîr nân, mak taka siam kan nihna pawh hi Pathian tân mahni hmasial lo hmangaihna lantîrna a ni tak zet a ni. (Sâm 40:5; 139:14) Chuvângin, Pathian thiltum mila nung tih awmzia chu Pathian ang bawka mahni hma sial lova mi dangte hmangaih tihna a ni a. (1 Johana 4:7-11) Tin, Pathian kaihhruainate zâwm tihna a ni bawk, chu chuan a thiltum duhawm tak mila nung tûrin min ṭanpui a ni.—Thuhriltu 12:13; 1 Johana 5:3.
4. (a) Nuna thiltum dik tak nei tûrin eng nge ngai? (b) Thiltum ûm theih azawnga sâng ber chu eng nge ni?
4 Mihringte chu hlim taka nung a, anmahni leh thil siam dangte nên pawha inrem taka awm chu Pathian thiltum a ni bawk. (Genesis 1:26; 2:15) A nih leh kan hlim a, kan him a, inrem taka awm tûr chuan eng nge kan tih ngai? Naupang tâna hlim leh him nia inhre tûr chuan a nu leh pa a bul hnaia an awm a ngai ang chiahin, nun awmze nei tak leh thiltum dik tak hmu tûr chuan vâna kan Pa nêna inlaichînna ṭha kan neih a ngai a ni. (Hebrai 12:9) Pathian chuan amah kan hnaih a phalin leh kan ṭawngṭaina ngaithlain chutiang pafa inlaichînna chu kan neih theihah a siam a. (Jakoba 4:8; 1 Johana 5:14, 15) Rinnaa Pathian nêna kan ‘lên dun’ a, a ṭhian kan nih chuan, vâna kan Pa kan tilâwmin, kan chawimawi thei a ni. (Genesis 6:9; Thufingte 23:15, 16; Jakoba 2:23) Chu chu thiltum ûm theih azawnga sâng ber a ni a. Fakna hla phuahtu chuan: “Engkim, thaw thei tawh phawt chuan LALPA chu fak rawh se,” tiin a ziak a ni.—Sâm 150:6.
Nuna I Thiltum Chu Eng Nge Ni?
5. Engvângin nge khawvêl hausakna lam dah hmasak chu a finthlâk loh?
5 Kan tâna Pathian thiltum zîngah chuan mahni leh kan chhûngte ṭha taka enkawl a tel a. Chutah chuan taksa lam leh thlarau lam mamawh ngaihsak a tel bawk a ni. Mahse, chutia enkawlnaah chuan hnathawh leh thil dangte’n thil pawimawh zâwk thlarau lam thil a hliahkhuh loh nân inbûk tâwk a ngai a ni. (Matthaia 4:4; 6:33) Lungchhiatthlâk takin, mi tam tak chuan an nun pumhlûm deuh thaw chu khawvêl thil ûm nân ringawt an hmang a. Mahse, kan mamawh zawng zawng khawvêl thila phuhrûk tum chu a finthlâk lo. Tûn hnai maia Asia rama mi hausate ngaih dân lâk khâwmna chuan, mi tam tak chuan “an hausakna avângin khawtlânga challang leh hlawhtling nia inhriatna nei mah se, him lo nia inhriatna leh lungkhamna an nei” tih a târ lang a ni.—Thuhriltu 5:11.
6. Khawvêl hausakna ûm chungchângah Isua’n eng zilhna thu nge a pêk?
6 Isua chuan “hausakna bumna” chungchâng a sawi a. (Marka 4:19) Engtin nge hausakna chu bumna a nih? Mite chu tihlim tûr angin a lang a; mahse, a tihlim si lo. “Tangka sum ngainatu chuan tangka sumah duhtâwk a hmu lo vang,” tiin Lal fing Solomona chuan a sawi. (Thuhriltu 5:10) Mahse, khawvêl hausakna lam ûm chung siin, thinlung zawng zawnga Pathian rawng bâwl chu thil theih a ni em? Ni lo ve. Isua chuan: “Tuman hotu pahnih rawng an bâwl kawp thei lo; pakhat huain pakhat an duh ang, a nih loh leh pakhat ṭanin pakhat an hmusit ang. Pathian leh sum rawng in bâwl kawp thei lo ve,” tiin a hrilhfiah a ni. Isua chuan a hnungzuitute chu leia rote khâwl khâwm lo va, ‘kan dîl hmaa kan mamawh hre rengtu’ Pathian nêna hming ṭha chhera ‘vânah rote khâwl khâwm’ zâwk tûrin a fuih a ni.—Matthaia 6:8, 19-25.
7. Engtin nge ‘nunna taktak chu kan vawn’ theih ang?
7 Tirhkoh Paula chuan a hnathawhpui Timothea hnêna a lehkha thawnah he mi chungchânga zilhna khauh tak ṭhenkhat chu a pe a. Timothea hnênah chuan: “Hausate hi . . . sum rinawm lovah hian an beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk tûrin zilh rawh; . . . thil phala thawhlâwm peih tûrin, nunna, nunna taktak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh,” tiin a hrilh a ni.—1 Timothea 6:17-19.
Eng Nge “Nunna Taktak” Chu?
8. (a) Engvângin nge mi tam takte chuan hausak leh nihna sâng chelh chu an tum tlat? (b) Chûng mite chuan eng nge an hriat loh?
8 Mi tam zâwkte rilruah chuan, “nunna taktak” han tih hian, nun chen tak takna hausakna leh nawmsip bâwlna lam a lang a. Asia ram pakhata chanchin thar chhuahna magazine chuan: “Cinema emaw, TV emaw entute chuan an thil hmuhte ît dân an zir a, an thil neih theih tûr angte suangtuah vak dân an zir bawk a ni,” a ti. Mi tam tak chuan hausak leh nihna sâng chelh chu nuna an thiltum berah an siam a ni. Mi tam tak chuan chûng thilte an ûm avângin an vânglai hun te, an hrisêlna te, an chhûngkua te, leh an thlarau lam hrisêlna te an hloh va. Hêng hausaknate leh nawmsip bâwlnate hi “khawvêl thlarau” târ lanna mai a ni tih ngaihtuahtu an awm mang meuh tawh lo. Chu thlarau chu leia mi tam takte Pathian thiltum kalh tûra chêttîrtu thil ngaihtuah dân phung a ni. (1 Korinth 2:12; Ephesi 2:2) Tûn laia mi tam tak an hlim lo pawh hi a mak lo ve!—Thufingte 18:11; 23:4, 5.
9. Eng nge mihringte’n an tihpuitlin theih ngai dâwn loh va, engvângin nge?
9 Mi dangte ṭhatna atâna ṭâm te, natna te, leh rorêlna fel lo te nuai bo tum mi inpe takte thawh rimna chungchâng hi eng nge ni ve? An thawh rimna leh an inpêkna fak tlâk tak chu mi tam takin an hlâwkpui a. Mahse, theih tâwp an chhuah chung pawhin, he khawvêl hi an siam ṭha thei ngai lo vang. Engvângin nge? A nihna takah chuan ‘khawvêl pumhlûm hi mi sual [Setana] thu thua a awm’ avâng leh ani chuan inthlâkthleng a duh loh avângin.—1 Johana 5:19.
10. Engtikah nge mi rinawmte chuan “nunna taktak” chu an chen ang?
10 Miin tûn khawvêla nun bâk beisei tûr a neih loh chuan a va lungchhiatthlâk dâwn êm! Paula chuan: “Tûn dam chhûng chauhva Krista chunga beiseina kan neih chuan mi zawng zawnga khawngaihthlâk ber kan lo ni ang,” tiin a ziak a. “I eiin i in ang u hmiang, naktûkah kan thi dâwn alâwm,” tih chu tûna kan nun hi nunna awmchhun a ni tih ringtute rilru put hmang a ni. (1 Korinth 15:19, 32) Mahse, nakin hun beisei tûr a awm a ni, “[Pathian] thutiam ang chuan vân tharte leh lei thar, a chhûnga felna awmte chu kan beisei a ni.” (2 Petera 3:13) Chutih hunah chuan, Kristiante chuan “nunna taktak,” ṭha famkima “chatuan nunna” chu vânah a ni emaw, Pathian Lalram sawrkârna hnuaiah a ni emaw an nei thei ang!—1 Timothea 6:12.
11. Engvângin nge Pathian Ram atâna thawh rimna chu thiltum awmze nei tak a nih?
11 Pathian Ram chauhvin mihringte buaina chu hlawhtling takin a chingfel famkim thei dâwn a. Chuvâng chuan, Pathian Ram atâna thawh rim hi mite thiltum ûm theih zînga awmze nei ber a ni. (Johana 4:34) He hna kan thawh lai hian, kan Pa vâna mi nêna inlaichînna hlu tak chu kan nei bawk a. Tin, nuna thiltum inang ûmtu thlarau lam unau maktaduai têlte nêna rawngbâwlhona nuam tak kan nei bawk a ni.
Inpêkna Dik Siam Rawh
12. Tûn lai khawvêl nun leh “nunna taktak” chu khaikhin rawh.
12 Tûn lai khawvêl hi “a châknate chawpin a boral mêk a ni” tih Bible chuan a sawi a. Chu boralnaah chuan Setana khawvêl a hmingthanna leh a hausakna nên lam engmah zuah a ni lo vang; mahse, “Pathian duhzâwng titu erawh chu kumkhuain a awm reng ang.” (1 Johana 2:15-17) Sum rinawm lo te, rei lo te chhûng ropuina te, leh he khawvêl nawmsakna pâwnlâng te ang lo takin, inpêkna dik kan siam phawt chuan “nunna taktak”—Pathian Rama chatuan nunna—chu a kumhlun a, chu chuan kan inpêkna a phu a ni.
13. Engtin nge nupa tuak khat chuan inpêkna dik an siam?
13 Henry-a leh Suzanne-i te hi han ngaihtuah teh. An nuna Lalram dah hmasatu zawng zawng chuan Pathian ṭanpuina an dawng ang tih Pathian thutiam chu an ring tlat a. (Matthaia 6:33) Chuvângin, an pahniha hnathawh ai chuan an fanute pahnih nêna thlarau lam thiltumte an ûm nâna hun tam zâwk an pêk theih nân in man tlâwm taka khawsak chu an thlang a ni. (Hebrai 13:15, 16) Anmahni duhsaktu ṭhian ṭha pakhat chuan an duhthlanna chu a hre thiam thei hlawl lo. Ani chuan Suzanne-i hnênah: “Ṭhiani, in ṭha zâwka awm i duh ngai a nih chuan, thil engemaw chu i chân a ngai a ni,” a ti a. Mahse, Henry-a leh Suzanne-i chuan Jehova dah hmasaknain “nunna tûna awm sa leh la awm leh tûr pêk tiamna a neih” chu an hria a ni. (1 Timothea 4:8; Tita 2:12, 13) An fanute chu hunbi kima chanchin ṭha hriltu ṭhahnemngai tak niin an seilian a. An chhûngkuain, thil ṭha chân nei niin an inhre lo va; “nunna taktak” an ûmna chu nasa takin an hlâwkpui zâwk a ni.—Philippi 3:8; 1 Timothea 6:6-8.
‘Khawvêl Hi Hmang Lutuk’ Suh
14. Kan thiltum dik tak theihnghilhna chuan eng chhiatna nge a thlen theih?
14 Amaherawhchu, kan thiltum dik tak theihnghilh a, “nunna taktak” kan vawnna thlah chu a hlauhawm tak zet a. “Dam chhûng khawsak lungkhamnate, hausaknate, nawmsaknate chuan [min] dîp” a hlauhawm a ni. (Luka 8:14) Chin tâwk nei lova hausakna îtna leh ‘dam chhûng khawsak ngaihtuahna’ chuan a lutuka he khawvêl hmanna a thlen thei a. (Luka 21:34) Lungchhiatthlâk takin, ṭhenkhat chu tûn laia hluar tak hausak duhnaah inhmang zovin, “rinna chu an kal bosan a, anmahni leh anmahni lungngaihna tam takin an inchhun tlang ta chuk a,” Jehova nêna an inlaichînna hlu tak pawh an hloh hial a ni. ‘Chatuan nunna vawn’ loh man chu a va han to tak êm!—1 Timothea 6:9, 10, 12; Thufingte 28:20.
15. Engtin nge chhûngkaw pakhat chuan ‘khawvêl hman lutuk loh’ chu an hlâwkpui?
15 Paula chuan “khawvêl hmangtute chu hmang lutuk lova an awm theihna tûrin,” thurâwn a pe a. (1 Korinth 7:29-31) Keith-a leh Bonnie-i te chuan he thurâwn hi an zâwm a ni. Keith-a chuan: “Ha leh ka chhûng lam zirna school-a ka zir zawh chuan Jehova Thuhretute zînga mi ka ni nghâl a. Duhthlan tûr ka nei ta. Dam lo tam tak enkawlin, sum tam tak ka la lût thei a; mahse, chutianga ka tih chuan kan thlarau lam nun chu a tibuai dâwn si. Thlarau lam atân leh a tâwpa fanu panga lai awmna kan chhûngkaw thlarau lam leh rilru lam atâna hun tam zâwk ka neih theih nân dam lo enkawl chin tâwk neih chu ka thlang ta a ni. Sum leh pai chu achuang aliamin nei ngai mang lo mah i la, inren dân kan zir a, kan mamawh chu englai pawhin kan nei reng a ni. Kan chhûngkaw nun chu a nuam hle a, kan inpawh tawnin, kan hlim tlâng hle bawk. Atâwpah chuan, hunbi kima rawngbâwlnaah kan tel ta vek a. Tûnah chuan kan fanute chuan hlim takin pasal an nei vek tawh a, pathumte chuan fate an nei a ni. An chhûngkua pawhin Jehova thiltum an dah hmasak zêl avângin an hlim tlâng ve hle,” a ti.
I Nunah Pathian Thiltum Dah Hmasa Rawh
16, 17. Bible-in mi themthiamte entîrna engte nge a pêk a, engtia hriat reng nge an nih?
16 Bible chuan Pathian thiltum atâna nungte leh nung lote entîrna chu min pe a. Chutiang entîrna aṭanga zir tûrte chu mi zawng zawng, eng ang dinhmuna dingte tân pawh a ni. (Rom 15:4; 1 Korinth 10:6, 11) Nimroda khân khawpui ropui tak a din a; mahse, Jehova dodâl nâna ti a ni. (Genesis 10:8, 9) Mi dang tam takte erawh chuan entawn tûr ṭha an siam a. Entîr nân, Mosia chuan Aigupta rama mi lian a nihna chelh reng chu a thiltum a nihtîr lo va. Pathian pêk a mawhphurhna chu hlut zâwkin, chûng chu “Aigupta ram rote ai chuan sum ropui zâwkah a ruat a.” (Hebrai 11:26) Doctor Luka chuan Paula leh mi dangte natna chu a enkawlsak ngei a rinawm a. Mahse, chanchin ṭha hriltu leh Bible ziaktu a nihna aṭangin mi dangte tân thil ṭha ber a ti a ni. Paula pawh chu, Dân hre mi anga hriat a ni lo va, “Jentailte tirhkoh,” missionary anga hriat a ni zâwk bawk.—Rom 11:13, 14.
17 Davida chu sipai hotu emaw, rimawi tum thiam leh hla phuah thiam emaw ang ni lovin, “[Pathian] thinlung ang pu mi” nia hriat a ni. (1 Samuela 13:14) Daniela chu Babulon rama sawrkâr hotu lian ang ni lovin, rinawm taka Jehova rawngbâwltu zâwlnei angin; Estheri chu Persia lalnu ang ni lovin, huaisenna leh rinna kawnga entawn tûr angin; Petera, Andria, Jakoba, leh Johana te chu sangha mantu hlawhtling tak ang ni lovin, Isua tirhkohte angin kan hria a ni. Entîrna ṭha ber atân, Isua chu “thingrem siamtu” tiin kan hre lo va, “Krista” tiin kan hre zâwk a ni. (Marka 6:3; Matthaia 16:16) Hêng mite hian an themthiamna te, an neihnunna te, a nih loh leh an nihna te chu engpawh ni se, an nun chu an hnathawhah ni lovin, Pathian rawng an bâwlnaah a innghat zâwk tûr a ni tih an hre chiang hle. Anni chuan Pathian ṭih hmeichhia leh mipa nih chu an neih theih thiltum ṭha ber leh hlâwk ber a ni tih an hria a ni.
18. Engtin nge Kristian ṭhalai pakhat chuan a nun hman a tum a, eng nge a hriat thiam tâk?
18 A tîra kan sawi Seung Jin-a chuan a tâwpah chuan hei hi a hre thiam ve ta a. Ani chuan: “Ka chakna zawng zawng chu damdawi lam, lem ziakna lam, a nih loh leh zirtîrtu lam hna thawka inhman zawh vek ai chuan, Pathian hnêna ka inpumpêkna mila ka nun hman chu ka tum ta zâwk a. Tûnah chuan Bible zirtîrtu mamawh zualna hmunah rawngbâwlin, mite chu chatuan nunna kawng zawh tûrin ka ṭanpui mêk a ni. Hunbi kimna rawngbâwl chu a phurawm vak ka lo ring ngai lo va. Hnam dân hrang mite nêna thawk dûn tûra ka mizia leh ka thiamna tihhmasâwn ka tum avângin, tûna ka nun chu a phurawm lehzual a. Jehova thiltum kan thiltuma neih chu nun awmze nei tak neih theihna kawng awmchhun a ni tih ka hmu a ni,” tiin a hrilhfiah a ni.
19. Engtin nge nuna thiltum dik tak chu kan hmuh theih?
19 Kristiante kan nih angin, nun chhanhim thei hriatna leh chhandam beiseina pêk kan ni a. (Johana 17:3) A nih chuan ‘Pathian khawngaihna chu sâwtpui lovin’ i awm lo vang u. (2 Korinth 6:1) Kan dam chhûng nî leh kum hlu takte chu Jehova fak nân i hmang zâwk ang u. Tûna hlimna tak tak leh nakina chatuan nunna thlentu hriatna chu i sem darh ang u. Chutianga kan tih chuan, Isua thusawi: “Englo lâk aiin pêkin lukhâwng a nei zâwk,” tih thu dikzia chu kan tawng dâwn a ni. (Tirhkohte 20:35) Tin, nuna thiltum dik tak chu kan hmu bawk ang. (w07 10/1)
[Footnote]
^ par. 1 Hming ṭhenkhatte chu thlâk danglam a ni.
I Hrilhfiah Thei Em?
• Eng nge nuna kan neih theih thiltum sâng ber chu?
• Engvângin nge hausakna atâna nun chu a finthlâk loh?
• Eng nge Pathian tiam “nunna taktak” chu?
• Engtin nge Pathian thiltum atâna kan nun kan hman theih?
[Zirlai Atâna Zawhnate]
[Phêk 21-naa milemte]
Kristiante chuan inpêkna dik an siam a ngai