Tûn Laia Pathian Thiltum Umna

‘A nungte chu anmahni tân an nun tawh lohna tûrin [Krista] chu mi zawng zawng thih aiin a thi.’​—⁠2 KORINTH 5:⁠15.

1. Rawngbâwlnaa missionary pakhat thiltawn chu sawi rawh.

“KAN motor chu tualchhûng indona a tâwp hnua Africa thingtlâng khaw hla taka lût hmasa ber a ni a. Chuta awm kohhran tereuh tê chu kan be pawp thei lo va, unaute mamawh kan va hriat a ngai a ni. Ei tûr, thuamhnaw, leh Bible thu leh hla chhuah bâkah, Jehovah’s Witnesses​—⁠The Organization Behind the Name * tih video chu kan keng bawk a. Chu mi en tûr chuan ngaihventu tam tak chu khaw chhûnga ‘ennawm chhuahna hmunah’​—⁠VCR pakhat leh TV pakhat awmna di in lian takah​—⁠an rawn kal khâwm chiam avângin, kan chhuah nawn leh a ngai hial a ni. Chhuah apiangin Bible zirpui tûr tam tak kan hmuh belh a. Kan thawh rimnate chu a manhla tih a chiang hle,” tiin missionary pakhat Aaron-a chuan a sawi. *

2. (a) Engvângin nge Kristiante chuan an nun chu Pathian rawngbâwl nâna hman an tum tlat? (b) Tûnah eng zawhnate nge kan ngaihtuah ang?

² Engvângin nge Aaron-a leh a ṭhiante chuan chutianga rim taka rawng an bâwl? Isua tlanna inthawina chunga an lâwm avângin Pathian hnênah an nun an pumpêk tawh a, Pathian thiltum mila an nun hman an duh vâng a ni. Anmahni ang bawkin, Kristian inpumpêk zawng zawngte chuan ‘mahni tâna nun tawh loh’ leh ‘chanchin ṭha avânga’ an theih ang apiang tih chu an tum tlat a ni. (2 Korinth 5:15; 1 Korinth 9:23) Anni chuan he kal hmang hi a tâwp hunah, khawvêla sum leh pai leh nihna zawng  zawng chuan hlutna rêng a nei dâwn lo tih an hria a. Nunna leh hrisêlna an neih ang ang chu Pathian thiltum nêna inmila hman an duh a ni. (Thuhriltu 12:⁠1) Chu chu engtin nge kan tih theih ang? Chutianga ti tûra mamawh huaisenna leh chakna chu khawiah nge kan hmuh ang? Tin, eng ang rawngbâwl theihna hun remchângte nge kan tân awm?

Hmasâwn Chho Zêl Tûra Hma Lâkna

3. Pathian duhzâwng tihnaah eng rahbi bulte nge tel?

³ Kristian dikte tân chuan, Pathian duhzâwng tih chu dam chhûng hna a ni a. Chu chu Theocratic Rawngbâwlna School-a hming ziah luh te, nî tina Bible chhiar te, thu hrilhnaa tel te, leh baptisma chang tûra hmasâwn te ang chi rahbi bulte aṭangin a inṭan tlângpui ṭhîn. Hma kan sâwn ang zêlin, tirhkoh Paula thute chu rilruah kan vawng a ni: “Mi zawng zawng hnênah i sâwtna a lan theih nân chûng thilahte chuan taima la, chûngah chuan inhmang zo rawh,” tih chu. (1 Timothea 4:15) Chutiang hmasâwnna chu mahni intihlârna a ni lo va, hmasial lo taka Pathian duhzâwng tih kan tumzia târ lanna a ni zâwk. Chutiang kawng zawhna chuan kan nun kawng engkimah Pathian kan inkaihhruaitîr tih a târ lang a, ani chuan kan tihtheih tûr aia ṭha zâwk daihin a kaihruai a ni.​—⁠Sâm 32:⁠8.

4. Engtin nge ṭûl lo taka hlauhna chu kan dah bo theih?

⁴ Amaherawhchu, thu tlûkna siam hrehna emaw, mahni inngaihtuah lutukna emaw chuan Pathian rawngbâwlnaa kan hmasâwnna tûr chu a dâl thei a. (Thuhriltu 11:⁠4) Chuvâng chuan, Pathian leh mi dangte rawngbâwlsaknaa hlimna dik tak kan hmuh theih hmain, kan hlauhna chu kan hneh phawt tûr a ni. Entîr nân, Erik-a chuan ṭawng dang hmanna kohhrana rawng bâwl chu a rilrûk a. Mahse, a lungngai a ni: ‘An zîngah chuan ka tlatlum ve ang em? Unaute chu ka ngaina ang em? Anni chuan min ngaina ve ang em?’ tiin. “A tâwpah chuan mahni aiin unaute ka ngaihtuah zâwk tûr a ni tih ka hre chhuak a. Chûng thilte lungkham tawh lo va, theih ang tâwka mahni inpe tûrin thu ka titlu ta zâwk a. Ṭanpuina dîla ṭawngṭaiin, hma ka la ta a ni. Tûnah chuan, ka rawngbâwlnaah ka hlim hle a ni,” tiin a sawi. (Rom 4:20) Ni e, hmasial lo taka Pathian leh mi dangte rawng kan bâwl nasat dân azirin, hlimna leh lungâwina kan hmu ang.

5. Engvângin nge Pathian thiltum ûmnaah fîmkhur taka thil duan a ṭûl? Entîrna pe rawh.

⁵ Pathian thiltumte hlawhtling taka ûm tûr chuan kan thiltih tûrte fîmkhur taka duan lâwk a ngai bawk a. He khawvêl bâwiha min siam thei leh Pathian hna thawk ṭha hlei thei lova min siamtu leiba neih ṭeuhna chu kan pumpelh a, chu chu a finthlâk a ni. Bible chuan: “Pûktu chu a pûktîrtu chhiahhlawh a ni,” tiin min hriattîr si a. (Thufingte 22:⁠7) Jehova rinchhan a, thlarau lam thil dah hmasakna chuan chûng thilte chu ngaihtuah tûrin min ṭanpui a ni. Entîr nân, Guoming-a leh a unaunu pahnihte chu a nu nên hian a man to avânga in neih emaw, luah hawh emaw a harsatna leh hna nghet hmuh a harsatna hmunah an khawsa a. Pawisa fîmkhur taka hmangin leh sênso intumsak tawnin, an vaia hna an thawh loh hunah pawh tla chham lovin an khawsa thei a ni. Guoming-a chuan: “Mi pakhat emaw, pahnih emaw chauhvin hlawh neih châng kan nei a. Chutichung pawhin, pioneer kan thawk zawm thei a, ka nu pawh ṭha takin kan enkawl thei a ni. Ka nu chuan nuamsa deuhva a nun theihna tûra kan thlarau lam thil ûmna tihkhaihlak chu a duh loh avângin kan lâwm hle a ni,” a ti.​—⁠2 Korinth 12:14; Hebrai 13:⁠5.

6. Eng entîrnain nge kan nun chu Pathian thiltum nên kan inmiltîr thei tih târ lang?

⁶ Pâwn lam hna thawhna​—⁠sum leh pai lam emaw, thil dang emaw​—⁠atân nasa takin i inhmang a nih chuan, Pathian thiltum dah hmasa tûrin i insiam rem nasat hle a ngai mai thei a. Chutiang inthlâkthlengna chu zan khat thilthua neih theih a ni ṭhîn lo va, i tum hmasak ber ṭuma i tihsual pawhin, chu chu hlawhchhamna anga ngaih tûr lah a ni hek lo. Intihhlimna atâna hun nasa taka hmangtu Koichi-a hi han ngaihtuah teh. A tleirâwl chhuah chhoh lai chuan Bible a zir a; mahse, kum tam tak chhûng chu video game chuan a nun a thunun tlat a ni. Ni khat chu a rilruin: ‘Eng nge ka tih? Kum 30 chuang ka ni tawh a, ka nunah thiltum mumal engmah ka nei si lo!’ tiin a inngaihtuah a. Koichi-a chuan Bible zirna chu a tharthawh leh a, kohhran ṭanpuina a pawm bawk a  ni. Inthlâkthlengna chu muang hle mah se, a beidawng mai lo. Nasa taka ṭawngṭaina leh mi dangte fuihna nên chuan, a tâwpah a thil vei chu a hneh thei ta a ni. (Luka 11:⁠9) Tûnah chuan Koichi-a chuan kohhranho rawngbâwltu niin hlim takin rawng a bâwl mêk a ni.

Inbûk Tâwk Dân Zir Rawh

7. Engvângin nge Pathian duhzâwng tihnaah kan inbûk tâwk a ngaih?

⁷ Pathian thiltum ûmna chuan theih tâwp kan chhuah a phu a. Chutianga kan tihnaah chuan kan inthlahdah emaw, kan thatchhia emaw ngai tûr a ni lo. (Hebrai 6:​11, 12) Chuti chung pawh chuan, Jehova chuan taksa lam, ngaihtuahna lam, a nih loh leh rilru lama kan chauh lutuk chu a duh lo. Mahni chakna mai chuan Pathian hna kan thawk thei lo tih inngaitlâwm taka pawmna chuan amah a chawimawi a, kan inbûk tâwkzia a târ lang bawk a ni. (1 Petera 4:11) Jehova chuan a duhzâwng ti tûra kan mamawh chakna pêk min tiam a; mahse, kan laka a thil beisei lohte tih tumin, kan theih bâkin mahni kan innawr vak tûr a ni lo. (2 Korinth 4:⁠7) Chau lutuk lova Pathian rawng kan bâwl zawm zêl theihna tûrin, kan tha leh zung chu kan hman thiam a ngai a ni.

8. Kristian ṭhalai pakhatin khawvêl leh Pathian tâna theih tâwp chhuah ve ve a tum khân eng thil nge thleng a, eng insiam remna nge a neih?

⁸ Entîr nân, Asia Khawchhak Lama awm Ji Hye-i chuan kum hnih chhûng chu pioneer thawk pahin rilru sên ngai hna hautak a thawk bawk a. “Jehova tân leh ka hna atâna theihtâwp chhuah ve ve ka tum a; mahse, zân khatah dârkâr nga chauh mutna hun ka nei a ni. A tâwpah chuan, thutak atân rilru lam chakna rêng ka nei tawh lo va, Jehova rawngbâwlnaah hlimna ka hmu mang meuh tawh lo a ni,” tiin a sawi. Ji Hye-i chuan a ‘thinlung, a rilru, a thlarau, leh a chakna zawng zawnga’ Jehova rawngbâwl tûrin hna hautak lo zâwk chu a zawng a. (Marka 12:30) Ani chuan: “Ka chhûngte’n sum lalût hnem tûra min nêk reng chung pawhin, Pathian thiltum dah hmasak chu ka tum tlat a. Thawmhnaw mawihnai ang chi thil ṭûl bulpuite atân sum tâwkfang chu ka la hlawh tho va. Han mut tam theih chu a va nuam tak êm! Rawngbâwlnaah kan hlim a, tûnah chuan thlarau lamah pawh ka chak zâwk tawh a. Chu chu khawvêl hîp leh lâk pêna awm thei tûra hun ka pêk loh vâng a ni,” a ti.​—⁠Thuhriltu 4:6; Matthaia 6:​24, 28-30.

9. Engtin nge kan thawh rimna chuan thlawhhmaa mite chu a nghawng theih?

⁹ Mi zawng zawngin hunbi kima thu hriltu  nia rawngbâwl chu an thei vek kher lo va. Tarna te, hrisêl lohna te, a nih loh leh thil danga tlin lohna te i hmachhawn a ngai a nih chuan, Jehova chuan i rinawmna leh thinlung taka a rawng i bâwl theih ang tâwk chu a hlut hle tih hria ang che. (Luka 21:​2, 3) Chu mi avâng chuan, kan thawh rimna chu eng anga tlêm tham pawh ni se, mi dangte chungah nghawng a neih theih dân chu tumah hian kan ngainêp ngai tûr a ni lo. Entîr nân, thu hrilhnaa in tam vak lo kan tlawh a, kan thuchah ken chu tuman an ngaihven lo niin a lang a. Mahse, kan kalsan hnu chuan in neitute chuan kan va tlawh chungchâng chu dârkâr rei tak chhûng emaw, ni tam tak chhûng emaw an sawi thei a, chutiang chu tuman kawngka min hawn lohna inah pawh a thleng thei tlat a ni! Chanchin ṭha a hria apiangte chuan ṭha taka an chhân lêt vêk chu kan beisei lo va; mahse, ṭhenkhat chuan an chhâng lêt dâwn a ni. (Matthaia 13:​19-23) Mi dangte chuan nakina khawvêl dinhmun emaw, an nun emaw a inthlâkthleng hunah an chhâng lêt thei bawk. Eng pawh chu ni se, vântlâng rawngbâwlnaa kan theih ang tâwk tiin, Pathian hna kan thawk a ni. “Pathian hnathawhpuite” kan ni si a.​—⁠1 Korinth 3:⁠9.

10. Kohhrana mi zawng zawngte chuan eng chanvo nge an neih?

¹⁰ Chu bâkah, kan vai hian kan chhûngte leh thlarauva unaute chu kan ṭanpui thei ṭheuh va. (Galatia 6:10) Mi dangte chunga nghawng ṭha kan neih chu thûk tak leh daih rei tak a ni thei a ni. (Thuhriltu 11:​1, 6) Upate leh kohhranho rawngbâwltute’n taima taka an mawhphurhna an hlen hian, thlarau lama kohhran hrisêlna leh nghehna an belhchhah a, kohhran chu Kristian thiltihah a phusa lehzual a ni. ‘Lalpa hna ṭhahnemngai taka thawk fova’ kan awm hian, kan thawhrimna chu “a thlâwn ngai lo” tih kan hre tlat a ni.​—⁠1 Korinth 15:⁠58.

Pathian Thiltum Chu Hnathawh Ber Ang Maiin Um Rawh

11. Tualchhûng kohhrana rawngbâwl bâkah, eng hun remchâng dangte nge kan neih mai theih?

¹¹ Kristiante kan nih angin, nun hlim tak kan nei a, Pathian ropuina tûr hlîra thiltih chu kan duh a ni. (1 Korinth 10:31) Rinawm taka Lalram chanchin ṭha hrilhna leh Isua thupêk zâwm tûra mi dangte zirtîrnaa kan inhman hian min tihlimtu Pathian rawngbâwlna pêng chi hrang hrang kan hmu ang. (Matthaia 24:14; 28:​19, 20) Tualchhûng kohhran ṭanpuina bâkah, thu hriltu mamawh zualna bial dang a ni emaw, ṭawng dang hmanna a ni emaw, a nih loh leh ram dangahte pawh rawngbâwl theihna hun remchângte chu kan nei thei a ni. Upa leh kohhranho rawngbâwltu tling tak, nupui la nei lote chu Ministerial Training School kal tûra sâwm an ni thei a, chuta an zir hnu chuan mahni ram  chhûng emaw, ram dang emawa Kristian puitlingte ṭanpui mamawhna kohhrana rawngbâwl tûra tirh an ni thei a ni. Hunbi kima rawngbâwl nupate chu ram danga rawngbâwl tûra Gilead missionary zirtîrna dawng tûrin an tling thei bawk. Tin, Bethel-a hna chi hrang hrang thawk tûr leh inkhâwmna hmun leh branch office-te sa tûr leh enkawl tûrin mahni inpete chu mamawh reng a ni.

12, 13. (a) Eng ang rawngbâwlna ber nge i ûm dâwn tih engtin nge thu tlûkna i siam theih? (b) Rawngbâwlna chi khata neih thiltawn chu a dang atâna a ṭangkai dân entîrna pe rawh.

¹² Eng ang rawngbâwlna ber nge i ûm dâwn? Jehova hnêna inpumpêk chhiahhlawh i nih angin, englai pawhin amah leh a inawpna pâwl kaihhruaina chu zawng reng rawh. A “thlarau ṭha tak” chuan thu tlûkna dik siam tûrin a ṭanpui ang che. (Nehemia 9:20) Chanvo chi khat chuan chi dang atân kawng a sial fo va, rawngbâwlna chi khat atâna mamawh thiltawn leh themthiamna chu a hnua rawngbâwlna chi dang atân a ṭangkai thei bawk a ni.

¹³ Entîr nân, Dennis-a leh a nupui, Jenny-i te chuan Kingdom Hall sakna an pui ṭhîn a. Hurricane Katrina-in United States chhim lam a nuai hnu khân, chhawmdâwlna hna thawk tûrin an inpe a ni. Dennis-a chuan: “Kan unaute ṭanpui nâna Kingdom Hall saknaa kan neih chhoh themthiamna hman chuan min tihlim hle a. Kan ṭanpuite’n an lâwmzia an sawite chuan kan rilru a khawih hle a ni. Pâwl danga chhawmdâwlna hna thawktute chu in sak ṭhatna hnaah an hlawhtling vak lo hle a. Jehova Thuhretute chuan in 5,300 aia tam leh Kingdom Hall tam tak chu an thawm ṭha emaw, a sa ṭha emaw hman tawh a ni. Mite chuan hei hi an lo hmuin, tûnah chuan kan thuchah ken chu an ngaihsak lehzual a ni,” tiin a sawi.

14. Hunbi kima rawngbâwlna ûm i duh chuan eng eng i tih theih?

¹⁴ Hunbi kima rawngbâwl chu i thiltum ber nihtîrin, Pathian thiltum chu i ûm thei em? I thei a nih chuan, malsâwmna tam tak i dawng ngei dâwn tih a chiang a ni. Tûna i dinhmun chuan a tihtîr thei lo che a nih chuan, i insiam rem thei mai thei a ni. Nehemia’n a châk êm êm hna pawimawh tak a thawh dâwn a: “Aw, LALPA, khawngaih takin . . . i chhiahhlawh hi min hlawhtlintîr la,” tia a ṭawngṭai ang khân ṭawngṭai ve rawh. (Nehemia 1:11) Tichuan, ‘ṭawngṭaina Ngaithlatu’ chu rinchhanin, i dîlna chu thiltihin ûm zui rawh. (Sâm 65:⁠2) Jehova rawng nasa lehzuala bâwl tûra i thawh rimna malsâwm tûr chuan, i thawh rim phawt chu a ngai a ni. Hunbi kima rawngbâwl tûra thu i tihtlûk tawh chuan, chu chu sawhsawn suh. Hunte a liam rualin, i thiltawn chu a pung zêl ang a, i hlimna pawh a pung chho zêl bawk ang.

Nun Manhla Tak Chu

15. (a) Hun rei tak Pathian chhiahhlawh lo ni tawhte biakna leh an chanchin chhiarna chu engtin nge kan hlâwkpui? (b) Nangmah tichaktu nia i hriat nun kawng chanchin pakhat sawi rawh.

¹⁵ Pathian thiltum ûmna aṭangin eng nge i beisei theih? Hun rei tak Jehova chhiahhlawh lo ni tawh, a bîk takin hunbi kima rawngbâwl tawhte chu be rawh. An nun chu a manhlain, awmzia a va nei tak êm! (Thufingte 10:22) Anni chuan dinhmun harsa tak hnuaiah pawh Jehova chuan an thil mamawh takte leh a aia tam pawh a pe lo ngai lo tih an hrilh thei ang che. (Philippi 4:​11-13) Kum 1955 aṭanga 1961 thlengin, Vênnainsâng chuan “Nuna Ka Thiltum Umin,” tih thupui hnuaiah mi rinawmte nun kawng chanchin thuziak inzawm chu a chhuah a. Chuta ṭang chuan, mi za têlte nun kawng chanchin chu chhuah a ni tawh a. Chanchin tinte chuan ṭhahnemngaihna leh hlimna rilru put hmang chu a târ lang a, Bible-a Tirhkohte bua thu chuangte  chu min hriat chhuahtîr a ni. Chûng chanchinte chhiarna chuan ‘Chutianga nun chu alâwm ka duh!’ tia sawi tûrin a chêttîr ang che.

16. Engin nge Kristian nun chu awmze nei tak leh hlim tak nihtîr?

¹⁶ Atîra kan târ lan tâk Aaron-a chuan: “Africa ramah chuan, nuna thiltum zawng tûra ram chhûng dung leh vâng fanga vâk vêl ṭhalaite ka hmu fo va. An thiltum zawng hmu erawh chu an tlêm hle. Mahse, keini chuan hetah hian Lalram chanchin ṭha puang darhin Pathian thiltum kan ûm a, chona kâra nun awmze nei tak chu kan chên a. Lâk aiin pêkin lukhâwng a nei zâwk tih chu a takin kan tawng a ni,” a ti.​—⁠Tirhkohte 20:⁠35.

17. Engvângin nge Pathian thiltum chu tûnah kan ûm ang?

¹⁷ Eng nge i chungchâng ve hi le? Eng thiltum nge i ûm? Thlarau lam thiltum chiang tak i neih loh chuan, hmun âwl chu thil dangin a rawn hnawhkhat mai ang. Engvângin nge duhawm tak anga lang Setana khawvêl atân i nun hlu tak chu i hman ral ang? Nakin lawka “hrehawmna nasa tak” a lo thlen hunah chuan, hausakna te leh khawvêla nihna te chuan hlutna rêng a nei lo vang. Hlutna nei tûr chu Jehova nêna kan inlaichînna hi a ni. Chutih hunah chuan Pathian leh mi dangte rawngbâwla, Pathian thiltum kan ûm tak zet avângin kan va lâwm dâwn êm!​—⁠Matthaia 24:21; Thu Puan 7:​14, 15. (w07 10/1)

[Footnote-te]

I Hrilhfiah Thei Em?

• Engtin nge Jehova’n kan rawngbâwlna chu a ngaih?

• Engtin nge remhriatna leh inbûk tâwkna chuan Pathian leh mi dangte rawngbâwlnaa min ṭanpui?

• Rawngbâwl tûrin kan tân eng hun remchâng nge inhawng?

• Engtin nge tûnah hian nun awmze nei tak chu neih theih a nih?

[Zirlai Atâna Zawhnate]

[Phêk 24-naa milemte]

Thinlung zawng zawnga Jehova rawngbâwl zawm zêl tûr chuan kan inbûk tâwk a ngai

[Phêk 25-naa milemte]

Rawngbâwlna thianghlim chi hrang hrang a awm