“Tar Hunah Pawh An La Rah Fo Vang”

MEDITERRANEAN tuipui kam rama chêng mi tam takte chuan an in chhehvêl ram âwlah chuan tûm thing an phun ṭhîn a. Hêng thingte hi a mawi avâng leh a rah a tui êm avânga hriat hlawh tak a ni. Chu bâkah, kum za chuang lai a rah fo ṭhîn bawk.

Hmân lai Lal Solomona chuan Shulam nula hmêl ṭha tak tlâwntlai ṭhatzia chu tûm thing nên inang angin hla thuin a hril a. (Hla Thlan Khâwmte 7:⁠7) Bible hun laia thing chanchin sawina Plants of the Bible tih lehkhabu chuan: “Tûm thing sawi nâna Hebrai thu mal hman chu ‘tàmâr’ a ni a. . . . Judate tân duhawmna leh mawina chhinchhiahna a lo ni a, hmeichhe hming atân an hmang fo ṭhîn,” a ti. Entîr nân, Solomona unaunu hmêlṭha tak mai chu Tamari tia koh a ni. (2 Samuela 13:⁠1) Nu leh pa ṭhenkhat chuan chu hming chu tûn thleng hian an fanute an la puttîr reng a ni.

Hmeichhe hmêlṭha takte chauh chu tûm thing nêna tehkhin an ni lo. Fakna hla phuahtu chu heti hian a zai a: “Mi fel chu tûm angin a duah hluah hluah ang a: Lebanon tlânga sidar thing angin a ṭhang uak uak ang. LALPA ina phunte chu kan Pathian biak in hung chhûng kawtlaiah chuan an duah hluah hluah ang. Tar hnuah pawh an la rah fo vang a; Tui pai ṭeuhvin an hring hluah hluah ang,” tiin.​—⁠Sâm 92:​12-14.

Tehkhin thua sawi chuan, an upat huna Pathian rawng rinawm taka bâwltute chu tûm thing mawi tak nên chuan inanna tam tak an nei a ni. Bible chuan: “Lu ṭuak chu ropuina lallukhum a ni, felna kawnga hmuh a nih hian,” a ti. (Thufingte 16:​31, NW) An upat rual chuan an chakna chu chuai zêl mah se, thlarau lama an chakna chu Pathian Thu, Bible zir ziahna hmangin an nei reng thei a ni. (Sâm 1:​1-3; Jeremia 17:​7, 8) An thusawi duhawm takte leh an entawn tûr siam ṭha takte avâng chuan mi rinawm tarte chu mi dangte tâna chakna nasa tak an ni a, tûm thing ang maiin a kum a kumin an rah fo a ni.​—⁠Tita 2:​2-5; Hebrai 13:​15, 16. (w07 9/15)