Thang Kamtu Thang Ata Chhan Chhuahna

“[Jehova] chuan thang kamtu thang lakah . . . chuan a chhanhim dâwn che a ni.”​—⁠SAM 91:⁠3.

1. Tunge “thang kamtu” chu ni a, engvângin nge a hlauhawm?

KRISTIAN dik zawng zawng chuan mihringte aia chungnung zâwk leh vervêk zâwk suamhmang chu an hma chhawn vek a. Sâm 91:​3-na chuan amah chu “thang kamtu,” tiin a sawi a ni. Chu hmêlma chu tunge ni? Chu chu Diabol-Setana a nihzia he magazine hian June 1, 1883 chhuak aṭang tawh khân a târ lang a. Thang kamtuin thanga sava awh a tum ang chiahin, he hmêlma hlauhawm tak hian vervêk takin Jehova mite chu hruai bo leh awhtîr a tum a ni.

2. Engvângin nge Setana chu thang kamtu anga sawi a nih?

² Hmân lai chuan savate chu a hrâm mawi avâng te, a rawng mawi tak avâng te, leh a sa ei atân leh inthawi nân tea man a ni ṭhîn a. Mahse, savate chu dân narâna fîmkhur tak leh ṭî tak a nih avângin man a harsa a. Chuvâng chuan, Bible hun laia thang kamtu chuan a man duh savate zia leh thil tih ṭhin dân te chu fîmkhur takin a zir phawt ṭhîn. Tichuan, a man theihna tûr thang chu a siam ta a ni. Setana chu thang kamtu anga sawiin, Bible chuan a tih dânte hrethiam tûrin min ṭanpui a. Diabola chuan min chîk ṭheuh a ni. Ani chuan kan thil tih ṭhin dânte leh kan miziate chu enin, a nung chunga min man theih nân fing vervêk takin thangte chu a kam a. (2 Timothea 2:26) Setana mana kan awm chuan Pathian nêna kan inlaichînna a chhia ang a, chu chuan a tâwpa tihboralna a thlen thei a ni. Chuvâng chuan, kan invênhim nân “thang kamtu” thiltih dân chi hrang hrang chu kan hriat a ngai a ni.

3, 4. Eng hunah nge Setana thiltih dân chu sakeibaknei leh rûlrial tih dân a an?

³ Tehkhinna ṭawngkam hmangin, fakna hla phuahtu pawhin Setana thiltih dân chu sakeibaknei vâng lai emaw, rûlrial emaw nên a tehkhin a. (Sâm 91:13) Sakeibaknei angin Setana’n a châng chuan Jehova mite chu tihduhdahna  emaw, sawrkâr lam aṭanga dodâlna emaw hmangin hmaichhanah a bei a. (Sâm 94:20) Chutiang sakeibaknei anga beihna chuan ṭhenkhat chu a titlu mai thei. Amaherawhchu, a tam zâwkah chuan, chûng hmaichhana beihnate chuan tum loh zâwngin nghawng a nei ṭhîn a, Pathian mite chu a tipumkhat ṭhîn a ni. Mahse, eng nge rûlrial anga Setana beihna vervêk zâwk chu?

⁴ Diabola chuan mihringte aia chungnung zâwk a finna chu hmun birua rûl tûr neiin mi a beih anga vervêk taka min beih nân a hmang a. Hetiang kawng hian, Pathian mi ṭhenkhat rilru chu a hrai a, Pathian duhzâwng ni lova, ama duhzâwng ti tûra bumin, rah duhawm lo tak a hring a ni. Setana ngamthlêmnate kan hai lo hi a lâwmawm hle. (2 Korinth 2:11) Tûnah chuan, “thang kamtu” hman thang hlauhawm tak palite chu i lo ngaihtuah ang u.

Mihring Hlauhna

5. Engvângin nge ‘midang ngaih dân pawisak luatna’ thang chu a hlawhtlin êm êm?

⁵ “Thang kamtu” chuan rualpâwl leh mi dangte duhsak nih duhna mihring nih phung pângngai chu a hria a. Kristiante chu anmahni hualvêla awm mite ngaihtuahna leh rilru veizâwngte ngai mawh lo an ni bîk lo. Chu chu hriain, Diabola chuan remchângah a hmang a ni. Entîr nân, ‘midang ngaih dân pawisak luatna’ chu thang anga hmangin, chutah chuan Pathian mi ṭhenkhatte chu a âwk a. (Thufingte 29:25) Mihring hlauh avânga Pathian chhiahhlawhte’n Jehova khap thilte an tih emaw, Pathian Thuin ti tûra thu a pêkte an tih loh emaw chuan, “thang kamtu” thangah an âwk tihna a ni.​—⁠Ezekiela 33:8; Jakoba 4:⁠17.

6. Eng entîrnain nge ṭhalai chu “thang kamtu” thanga a awh theih dân târ lang?

⁶ Entîr nân, ṭhalai pakhat chuan a school kalpuite nêksâwrna hnuaia tlâwmin, zial a zu thei a. Chu mi nîa school kal tûra in a chhuahsan lai kha chuan, zial zûk chu ngaih pawh a ngaihtuah lo mai thei. Mahse, a hnu lawkah chuan a hrisêlna atâna ṭha lo leh Pathian tilâwm lo thil chu a ti ta a. (2 Korinth 7:⁠1) Engtin nge thlêma a awm? Ṭhian ṭha lo a kâwmin, an zînga tlâktlum loh chu a hlau pawh a ni thei a ni. Ṭhalaite u, “thang kamtu” chu inthlêmtîrin, inmantîr lul suh u! A nung chunga man in nih loh nân, thil ho têah pawh rinawm rawh u. Ṭhian sual kâwm lo tûra Bible vaukhânna chu zâwm bawk rawh u.​—⁠1 Korinth 15:⁠33.

7. Engtin nge Setana chuan nu leh pa ṭhenkhat chu an thlarau lama inbûk tâwkna a hlohtîr?

⁷ Kristian nu leh pa taima takte chuan an chhûngkaw tân tisa lam mamawh ngaihsak tûra Pathian Lehkha Thua an mawhphurhna chu an ngai pawimawh hle a. (1 Timothea 5:⁠8) Amaherawhchu, Setana chuan he mi chungchânga Kristiante inbûk tâwkna paih bo chu a tum a ni. Anmahni ruaitu an pute hnên aṭanga hna thawh belh tûra tur luihna avângin inkhâwm an ṭhulh deuh reng pawh a ni thei a. An unaute nêna Jehova be thei tûra district inkhâwmpui hunpui zawng zawnga an tel kim theih nân chawlh an dîl ngam lo pawh a ni thei bawk. He thang laka invênhimna chu ‘Jehova rinchhan’ hi a ni. (Thufingte 3:​5, 6) Chu bâkah, Jehova chhûngte kan ni vek tih leh ani chuan min ngaihsak tûrin mawhphurhna a inpe tih hriatrengna chuan inbûk tâwk reng tûrin min ṭanpui ang. Nu leh pa te u, Jehova duhzâwng intih hian nangmahni leh  inchhûngte chu kawng engemaw takin a ngaihsak dâwn che u tih rinna in nei em? Nge ni, mihring hlauhna hian Diabola duhzâwng ti tûrin a âwk zâwk dâwn che u? Hêng zawhnate hi ngun taka ngaihtuah tûrin kan fuih che u a ni.

Hausak Atchilhna Thang

8. Eng kawngin nge Setana’n hausak âtchilh tûra thlêmna chu a hman?

⁸ Setana chuan hausak âtchilhna chu min awh nân a hmang bawk a. He khawvêl sumdâwnna chuan hausak thutna tûr ruahmannate chu a vawrhlâr hle a, chu chuan Pathian mite zînga ṭhenkhat pawh a bum hial thei a ni. A châng chuan mite chu: “Thawk rim rawh. I neihnun hunah chuan, i hahchâwlin, i nun i chên thei ang a. Pioneer-te pawh i thawk thei dâwn alâwm,” tia fuih an ni thei. Chûng thute chu Kristian kohhrana mi ṭhenkhat, an unaute hausakna hlâwkpuitute ngaihtuahna lawi lo a ni thei. Chutiang fuihna chu fîmkhur takin ngaihtuah ang che u. Chu chuan Isua tehkhin thua mi hausa “â” ngaihtuahna ang chu a târ lang a ni lâwm ni?​—⁠Luka 12:​16-21.

9. Engvângin nge Kristian ṭhenkhat chu thil îtna thanga an awh?

⁹ Setana chuan mite chu thil îtna neihtîr thei tûr zâwngin a kal hmang suaksual chu a thunun a. Chu îtna chuan a tâwpah Kristian nun luhchilhin, thu chu a dîp a, “rah lovin” a awmtîr a ni. (Marka 4:19) Bible chuan ei tûr leh silh tûr neia lungawi tûrin min fuih a. (1 Timothea 6:⁠8) Mahse, he fuihna hi an nunpui loh avângin mi tam tak chu “thang kamtu” thangah an âwk a ni. Chapona chuan nun phung engemaw tak zui tûrin a tur che a ni thei ang em? Eng nge keini kan an ve le? Thil neih kan duhna chuan biakna dik chu hmun pawimawh lo zâwk a chantîr em? (Hagaia 1:​2-8) Lungchhiatthlâk takin, ei leh bâr lama harsatna a thlen chhûng hian, ṭhenkhat chuan an neihsa nunphung vawng reng tûrin an thlarau lam thil chu an chân phal a ni. Chutiang hausak âtchilhna rilru put hmang chu “thang kamtu” duhzâwng tak a lo ni!

Intihhlimna Ṭha Lo Thang Chu

10. Kristian tinte chuan mahni inenfiahna eng nge an neih ang?

¹⁰ “Thang kamtu” thiltih dân dang leh chu mite thil ṭha leh ṭha lo hriat theihna pângngai tihchhiatsak hi a ni a. Sodom leh Gomorra khuaa awm ang rilru put hmang chuan intihhlimna lam hawi sumdâwnna chu nasa takin a thunun a. TV leh magazine-a chanchin puan chhuahte thlengin tharum thawhna leh mipat hmeichhiatna lam hriat châkna awmte chu a phuhru a ni. Chanchin puan chhuahnaa intihhlimna anga lang thil tam takte chuan mite “chhia leh ṭha fiah” theihna chu a tikhaw lo va. (Hebrai 5:14) Mahse, zâwlnei Isaia kal tlanga Jehova thu: “Thil ṭha lo chu thil ṭha tia, thil ṭha chu thil ṭha lo ti . . . ṭhîntute chu an chung a pêk e!,” tih chu hre chhuak rawh. (Isaia 5:20) “Thang kamtu” chuan chutiang intihhlimna ṭha lo hmang chuan i ngaihtuahna chu i hriat loh hlânin a tikhaw lo vem? Mahni inenfiah chu a pawimawh hle a ni.​—⁠2 Korinth 13:⁠5.

11. He magazine-ah hian TV-a hunbi neia chhuak thawnthu tawite chungchângah eng vaukhânna nge pêk a nih?

 ¹¹ Kum 25 vêl kaltaah khân, Vênnainsâng chuan rinnaa chhûngte chu TV serial-te chungchângah vaukhânna duhawm tak a lo pe tawh a. * Thawnthu tâwi hunbi neia chhuah ṭhin lâr tak takte’n fing vervêk taka nghawng a neih dân chungchâng a sawi a ni: “Hmangaihna dik zawnna chu nungchang engpawh thiam chantîr nâna hman a ni a. Entîr nân, sâwn pai ṭhalai pakhat chuan a ṭhiannu hnênah: ‘Mahse, Victor-a chu ka hmangaih alâwm. Pawi ka ti lo. . . . Ka tân chuan a fa pai pawh hi thil hlu ber a ni ringawt!’ a ti a. Mi thawidam thei tak rimawi ri chuan a nungchang bawlhhlawhna chu sual lutuk anga ngaih a tiharsa a ni. Nang pawhin Victor-a chu i duh ve a. Hmeichhia chu i khawngaih bawk a. An nungchang ṭhat lohna chu i ‘hre thiam’ a ni. Thlîrtu pakhat, a hnua lo harh chhuak chuan, ‘Thiam kan chantîr thei hi chu a mak a ni. Nungchang bawlhhlawhna hi a ṭha lo tih kan hria a. . . . Mahse, rilruin an nungchang ṭha lo chu ka lo pawmpui tih ka hre chhuak a ni,’ tiin a sawi,” tiin.

12. Eng thiltein nge TV program ṭhenkhat chungchânga vaukhânna chu tûn lai atâna thil inâwm tak a nihzia târ lang?

¹² Chûng thuziakte tihchhuah a nih aṭang chuan, hetiang rilru tibawlhhlawh thei thilte chu a pung tial tial a. Hmun tam takah chuan chutiang program-te chu nilêng zankhuain a hmuh theih a ni. Mipa, hmeichhia, leh ṭhalai tam tak chuan chutiang intihhlimna hmang chuan an ngaihtuahna leh thinlung chu an châwm fo va. Mahse, ngaihtuahna dik lo nên hian mahni kan inbum tûr a ni lo. Chûng intihhlimna ṭha lote chu a taka hmuh theih khawvêla thilthlengte aiin a hlauhawm lo zâwk anga ngaih chu a dik thei lo a ni. Kristian pakhat chuan a ina a sâwm luh ngai loh tûr mite tihhlima awm a thlan chu thiam a inchantîr thei tak zet ang em?

13, 14. Engtin nge mi ṭhenkhatin TV chungchânga vaukhânna an hlâwkpui dân an sawi?

¹³ “Bawi rinawm, fing tak” pêk chhuah, chu vaukhânna zawm chu mi tam tak chuan an hlâwkpui a. (Matthaia 24:​45-47) Bible ṭanchhan zilhna chiang tak an chhiar hnu chuan, ṭhenkhat chuan thuziakte’n anmahni chunga nghawng a neih dân sawi tûrin lehkha an ziak a ni. * Hmeichhe pakhat chu heti hian a inpuang a: “Kum 13 chhûng chu TV-a thawnthu tâwi hunbi neia chhuak ṭhînte ngawl chu ka vei a. Kristian inkhâwmnaa tel leh thlawhhma rawngbâwlnaa a châng chânga ka tel chuan him tâwk tûrah ka inngai a ni. Mahse, TV-a thawnthu tâwi chhuakte rilru put hmang ang, i pasalin a cheibâwl ṭha lo che emaw, a hmangaih lo che emaw nia i inhriat chuan uirêna chu ama thiam loh vâng vek a ni tia inthiam chawp theihna rilru put hmang chu ka chhawm a ni. Tichuan, mahni ‘inthiam chawp thei’ nia ka inhriat hunah kawng ṭha lo chu ka zawh a, Jehova leh ka kawppui lakah thil ka tisual ta a ni,” tiin. Chu hmeichhia chu hnawh chhuah a ni a. A tâwpah chuan, a thiltih dik lohzia inhre chhuakin, a inlamlêt a, lâkluh a ni leh ta a ni. TV-a thawnthu tâwi chhuak ṭhînte laka vaukhânna thuziakte chuan Jehova thil huatte hmanga intihhlimna hnâwl thei tûrin chakna a pe a ni.​—⁠Amosa 5:​14, 15.

¹⁴ A nun nghawnga awm chhiartu dang leh chuan: “Thuziakte chu ka han chhiar chuan, Jehova lamah ka thinlung a pumhlum tawh lo tih ka hriat chhuah avângin ka ṭap a. Ka Pathian hnênah chuan hêng serial-te bâwihah ka tâng tawh lo vang tih ka tiam a ni,” a ti. Kristian hmeichhe pakhat chuan hêng thuziakte chunga a lâwmzia a sawi hnuah, a ngawl a vei tih chu pawmin, heti hian a ziak a: “Jehova nêna kan inlaichînna a nghawng theih leh theih loh . . . ka ngaihtuah a. Engtin nge ‘chûngte’ chu ṭhiana nei chung rengin Jehova chu ṭhiana ka neih theih ang?,” tiin. Kum 25 kalta khân chutiang TV-a thil chhuahte chuan thinlung a tihkhaw loh chuan, tûn laiah eng nghawng nge an neih ang le? (2 Timothea 3:13) TV-a chhuak ṭhîn thawnthu tâwi a ni emaw, tharum thawhna video game-te a ni emaw, a nih loh leh music video bawlhhlawhte emaw pawh ni se, Setana intihhlimna ṭha lo thang rêng rêng chu kan hre tûr a ni.

 Inhmuh Thiam Lohna Thang

15. Engtin nge ṭhenkhat chu Diabola thangah an awh?

¹⁵ Setana chuan Jehova mite zînga inṭhen hranna awmtîr tûrin inhmuh thiam lohna thang chu a hmang a. Rawngbâwlnaa kan chanvo chelh chu engpawh ni se, he mi thangah hian kan âwk thei a ni. Ṭhenkhat chu Jehova awmtîr thlarau lama hausakna ropui tak leh remna leh muanna chu inhmuh thiam lohna an tihchhiattîr avângin, Diabola thangah an âwk a ni.​—⁠Sâm 133:​1-3.

16. Engtin nge Setana chuan vervêk takin kan inlungrualna kehchhiattîr a tum?

¹⁶ Khawvêl Indopui I-na chhûng khân, Setana chuan Jehova inawpna pâwl lei lam pêng chu tihchimit tumin hmaichhanah a bei a, mahse a hlawhtling lo. (Thu Puan 11:​7-13) Chuta ṭang chuan kan inlungrualna tikehchhe tûrin vervêk takin a bei a. Inhmuh thiam lohna avânga inlungrual lohna kan awmtîr hian, “thang kamtu” hnênah ke nghahchhan tûr kan pe tihna a ni. Tichuan, kan mi mal nunah leh kohhranah thlarau thianghlim luanna tûr kan dang thei a. Chutiang thil a thlen chuan, kohhran remna leh lungrualna kehchhiatna tawh phawt chuan thu hrilhna a dîpdâl avângin, Setana chu a lâwm hle ang.​—⁠Ephesi 4:​27, 30-32.

17. Inhmuh thiam lohna neite chu chingfel tûrin engin nge ṭanpui thei ang?

¹⁷ I Kristianpui nêna inhmuh thiam lohna in neih hunah eng nge i tih theih? Dinhmun chu a inang lo ngei mai a. Buaina chuan lo chhuah chhan tûr tam tak a nei thei a; mahse, chinfel lohva awm reng chhan tûr rêng a nei lo. (Matthaia 5:​23, 24; 18:​15-17) Pathian Lehkha Thua zilhna thute chu thâwk khum a ni a, a famkim a ni. Bible thu bulte chu nunpui a nih phawt chuan, a hlawhchham ngai lo. Rah ṭha a chhuah fo ṭhîn!

18. Engvângin nge Jehova awm dân lâkna chuan inhmuh thiam lohna kan chinfelnaa min ṭanpui ang?

¹⁸ Jehova chu ‘ngaihdam peih’ tak a ni a, “ngaihdamna” dik tak a pe a ni. (Sâm 86:5; 130:⁠4) Jehova awm dân kan lâk hian a fa duh takte kan nihzia kan târ lang a. (Ephesi 5:⁠1) Sual nei vek kan ni a, Jehova ngaihdamna kan mamawh tak zet a ni. Chuvâng chuan, tuemaw ngaihdam duh lohna kan neih chuan kan fîmkhur tûr a ni a. Isua tehkhin thua chhiahhlawh, a puin a leiba a ngaihdam tawh huna a hnêna tlêmte batu ngaidam duh lo ang kha kan ni thei a. A pu hrilh hriat a nih chuan bâwih ngaidam duh lotu chu tân inah a khung ta a ni. Isua chuan tehkhin thu chu heti hian a titâwp a ni: “Mi tinin thinlung taka in unaute in ngaihdam loh chuan ka Pa vâna mi pawhin chutiang bawkin in chungah a ti ve ang,” tiin. (Matthaia 18:​21-35) Chu tehkhin thu chhût ngunna leh Jehova’n vawi tam tak min ngaihdamzia ngaihtuahna chuan kan unaute nêna inhmuh thiam lohna chinfel kan tum hunah min ṭanpui ngei ang!​—⁠Sâm 19:⁠14.

“Chungnungbera Bihrûkna Hmuna” Him Taka Awmin

19, 20. Hêng hun hlauhawma kan awm chhûng hian engtin nge Jehova ‘bihrûkna hmun’ leh ‘a hlim’ chu kan thlîr ang?

¹⁹ Hun hlauhawm takah kan nung a. Jehova humhimna nei lo ilang chuan Setana’n mi tiboral vek tawh ang. Chuvâng chuan “thang kamtu” thanga âwk lo tûr chuan, entîr nei hmun him, ‘Chungnungbera bihrûkna hmuna awmin,’ “Engkimtitheia hlimah” chuan kan awm reng tûr a ni.​—⁠Sâm 91:⁠1.

²⁰ Jehova hriattîrna leh kaihhruaina chu khuahkhirhna ang ni lovin, inhumhimna angin i thlîr reng ang u. Kan vai hian suamhmang mihringte aia fing zâwk chu kan hmachhawn ṭheuh va. Jehova ṭanpuina tel lo chuan, tumah hi a thanga âwk lova chhuak thei kan awm lo vang. (Sâm 124:​7, 8) Chuvâng chuan “thang kamtu” thang ata min chhan chhuak tûrin Jehova i dîl ang u!​—⁠Matthaia 6:13. (w07 10/1)

[Footnote-te]

I Hre Chhuak Em?

• Engvângin nge ‘midang ngaih dân pawisak luatna’ chu thang hlauhawm tak a nih?

• Engtin nge Diabola chuan hausak âtchilhna chu mi thlêm nân a hman?

• Engtin nge Setana chuan mi ṭhenkhat chu intihhlimna ṭha lo thanga a awh?

• Kan inpumkhatna tikehchhe tûrin Diabola’n eng thang nge a hman?

[Zirlai Atâna Zawhnate]

[Phêk 28-naa milem]

Ṭhenkhat chu ‘mi dang ngaih dân pawisak luatna’ thangah an âwk

[Phêk 29-naa milem]

Jehova thil huatte hmangin i intihhlim em?