“A Tumruhna Nasa Tak Chu Ka Ngaisâng Thlâwt”

GERMAN mi lehkha ziak ṭhîn leh kum 1999-a Thu Leh Hla lama Nobel Prize dawngtu Günter Grass-a chuan kum 2006 khân ama chanchin ziahna lehkhabu a chhuah a. Chutah chuan, German sipaia tel tûra lâk a nih lai chanchin a sawi a ni. Chu lehkhabuah tho chuan nasa taka a thinlung hnehtu mi pakhat chungchâng a sawi bawk a, kum 60 chuang a ral hnuah pawh a la hre reng a ni. Chu chu tihduhdahna hnuaia ding nghet tlat mi pakhat chungchâng a ni.

Nî tin chhuak chanchinbu, Frankfurter Allgemeine Zeitung-a, amah biangbiakna tihchhuahah Grass-a chuan chu mi danglam tak silai chelek duh lotu chu a hre chhuak a. A sawi dânin chu pa chu “a hun laia lâr tak Nazi emaw, Communist emaw, Socialist emaw te ngaih dân pawmtu a ni lo. Ani chu Jehova Thuhretute zînga pakhat a ni.” Grass-a chuan chu Thuhretu pa hming chu a hre tawh lo va, Chutiang-thil-ti-ve-duh-lova tiin hming lem a vuahsak a ni. Jehova Thuhretute chanchin zir chîktute chuan chu pa chu Joachim Alfermann-a a ni tih an finfiah a. Eng tik lai pawha vuak leh zahthlâk taka siam a ni a; chu mi hnuah chuan tân inah khung hran a ni. Mahse, Alfermann-a chu a ding nghet tlat a, silai chelek chu a hnial tlat bawk.

Grass-a chuan: “A tumruhna nasa tak chu ka ngaisâng thlâwt. Heti hian ka inzâwt ṭhîn, ‘Engtin nge hêng zawng zawng hi a tawrh theih le? Engtin nge a tih bîk le?’ tiin,” a ti. Pathian laka a rinawmna tihchhiatsak tuma rei tak beih a nih hnuah, a tâwpah chuan Alfermann-a chu Stutthof concentration camp-ah February 1944 khân thawn a ni a. April 1945-ah chhuah zalên a ni a, indona a tuar chhuak a, 1998-a a thih thlengin Jehova Thuhretu rinawm tak a ni reng a ni.

Alfermann-a chu German ram leh Nazi ho awpna ramtea an rinna avânga tihduhdahna tuar Thuhretu 13,400 vêl zînga pakhat mai a ni a. Anni chuan Bible kawhhmuhna chu an zui a, politics lamah tualdâwihin silai an chelek duh lo a ni. (Matthaia 26:52; Johana 18:36) Thuhretu 4,200 vêl chu concentration camp-ahte dah an ni a; tin, mi 1,490-te chuan an nun an chân a ni. Tûn thleng pawh hian, an din nghehna chuan Thuhretu ni lo mi dang tam tak chu a hnehin, an ngaihsân a hlawh a ni. (w07 10/15)

[Phêk 32-naa milem]

Joachim Alfermann-a