Chhûng Lam Aṭanga Hriattîrna Aw Chu Ngaithla Rawh
Chhûng Lam Aṭanga Hriattîrna Aw Chu Ngaithla Rawh
“[Pathian] dân nei lo Jentailten mahni thinlung pianpuia dân thilte chu . . . dânah an innei chawp si a.”—ROM 2:13-16.
1, 2. (a) Mi dangte ngaihsakna avângin, mi tam takin eng thil nge an tih? (b) Pathian Thu-a entîrna engte’n nge mi dangte ngaihsakna târ lang?
KUM 20 mi mipa pakhat chu rêl chawlh hmuna a awm laiin a phûngzâwl natna a chhuak thut a, rêl kawngah chuan a tla thla ta mai a. A lo hmutu mi pakhat chuan a fanu kaih lai chu thlahin, chu pa awmnaah chuan a zuang thla a. Chu phûngzâwlpa chu rêl ke inkâra tui luan kawrah chuan a pawt lût a, an lu chunga rêl ding tûr chîk tuar tuarin a tai palh loh nân a bawhbet tlat a ni. Ṭhenkhat chuan a chhan chhuaktupa chu pasalṭha tiin an ko mai thei; mahse, ani chuan: “Thil dik kan ti tûr a ni. Ka khawngaih avânga ti ka ni a. Mite ngaihsân emaw, intihropui emaw nâna ti ka ni lo,” tiin a sawi.
2 Mi dangte ṭanpui nâna mahni nun thâp tuemaw chu i hre mai thei a. Mi tam takte chuan Khawvêl Indopui II-na lai khân an hriat ngai lohte an thukru a ni. Tirhkoh Paula leh mi dang 275, Sicily bul Meliti hmuna lawng kehchhiatna tuarte chu hre chhuak bawk teh. Tualchhûnga mite chuan chûng an hmêl hriat lohte chu ṭanpuiin, an chungah ‘khawngaihna namên lo’ an lantîr a ni. (Tirhkohte 27:27–28:22) A nih loh leh, nun thâpna êm ni lo mah se, Israel hmeichhe naupangin amah mantu Suria mi ṭhatna tûr a ngaihtuahna kha eng nge ni ve? (2 Lalte 5:1-4) Isua sawi Samari mi ṭha tehkhin thu lâr tak mai hi ngaihtuah bawk teh. Puithiam leh Levia mi chuan an Judapui thi lek leka chu an ngaihsak lo va; mahse, Samari mi chuan nasa takin a ṭanpui thung. He tehkhin thu hian kum zabi tam tak chhûng chu mi tam takte rilru a khawih hle a ni.—Luka 10:29-37.
3, 4. Mite’n mahni hmasial lova an nun thâpa chêt an thawhna chuan chanchhâwnna ngaih dân chungchâng eng nge min hrilh?
3 Dik takin, ‘hun khirh takah’ kan awm a; mi tam takte chu “mi kawlhsen” leh “ṭha duh hauh lo te” an ni. (2 Timothea 3:1-3) Chutichung pawhin, ngilnei tak leh dik taka thiltihte chu kan la hmuin, chûng chu kan la hlâwkpui hial a ni lâwm ni? Mahni nun thâp hial pawha mi dangte ṭanpui duhna hi thil tlânglâwn tak a nih avângin, ṭhenkhat chuan chu chu mihring nihnaa bet tel ve rêngah an ngai hial a ni.
4 Chutianga mahni’n tawrh pawh inhuama mi dangte ṭanpui duhna chu hnam hrang hrangah hmuh tûr a awm a, chu chuan mihringte hi “a ruh no no chhuak” tih ngaih dân mila nung ramsa aṭanga lo piang an ni lo tih a târ lang. America mi scientist Francis S. Collins-a chuan: “Mahni hmasial lohna chuan chanchhâwnna ringtute tân harsatna a siam a ni. . . . Kan taksa chu mahni hmasial tûra ruahman lâwk a nih si chuan, hmasial lohna chu hrilhfiah theih a ni lo vang,” a ti a. “Mi ṭhenkhatte chuan anmahni mi leh sa ni lote leh inanna pakhat mah an neihpui lohte pawh chu mahni nun pe khawp hialin an ṭanpui a. . . . Chu chu Darwin-a ngaih dân hmanga sawifiah theih a nih a rinawm lo hle,” tiin a sawi belh bawk.
“Chhia leh Ṭha Hriatna Aw Chhuah Chu”
5. Eng nge mihringah hian hmuh ni fo ṭhîn?
5 Professor Collins-a chuan mahni hmasial lohna pêng pakhat chu târ langin: “Chhia leh ṭha hriatna aw chhuah chuan lâwmman beisei tûr engmah a awm lo chung pawha mi dangte ṭanpui tûrin min ko a ni,” a ti. * “Chhia leh ṭha hriatna” a sawi lan chuan tirhkoh Paula’n: “Dân nei lo Jentailten mahni thinlung pianpuia Dân thilte chu an tihin, chûng chuan mahni dânah an innei chawp si a, an thinlungah Dân thilte thiltih ziak a ni tih an entîr a, chu chu an chhia leh ṭha hriatnain a hriatpui a, an rilrute chu a inhnial a, thiam loh a chantîr thûl a, thiam a chantîr thûl a,” tia a sawi kha min hriatchhuahtîr thei a ni.—Rom 2:13-16.
6. Engvângin nge mi zawng zawngte’n an nun dânah Siamtu chungah mawhphurhna an neih?
6 Paula chuan Rom khuaa Kristiante hnêna a lehkha thawnah Pathian a awm tih leh a miziate chu thil hmuh theihte aṭanga a chian avângin, mihringte chuan an nun dânah Pathian chungah hian mawh an phur a ni tih a târ lang a. Chu mawhphurhna chu “khawvêl siam tirh ata” a awm reng tawh a ni. (Rom 1:18-20; Sâm 19:1-4) Dik takin, mi tam takte chu anmahni Siamtu ngaihthahin, khawlo takin an nung a. Mahse, Pathian duhzâwng chu mihringte’n a dikna an pawm leh an thilsual tihte an sim hi a ni. (Rom 1:22–2:6) Judate chuan sim chhan tûr hnial rual loh an nei—chu chu Mosia kaltlanga Pathian Dân pêk an neih vâng a ni. Mahse, “Pathian thute” kawltîr ni lote pawh chuan Pathian a awm tih chu an hre tûr a ni.—Rom 2:8-13; 3:2.
7, 8. Thil dik hriatna hi engtin nge hmun tina a awm a, hei hian eng nge a târ lan?
7 Mi zawng zawngin Pathian an pawm a, chu mi mila thil an tih chhan tûr rin tlâk tak chu chhûngrila thil dik leh dik lo hriat theihna an nei hi a ni. Dikna kan neih hi chhia leh ṭha hriatna kan neihzia târ langtu a ni. Hei hi han mitthla teh: Naupang ṭhenkhat chu pipûa uai tûrin an intlar ṭhap mai a. Tichuan, naupang pakhat chuan naupang dang intlarte chu ngaihsak lovin a tlar hmasaah chuan a va ding tawp mai a. Tam takte chuan, ‘I thiltih dân hi a dik lo!’ an lo ti hlawm a ni. Awle, ‘Engati nge naupang tam takte pawh chuan thil dik leh dik lo hriatna chu an lantîr nghâl theih?’ tiin han inzâwt teh. Chutianga an tihna chuan chhûngrila nungchang ṭha an hriatzia a lantîr a ni. Paula chuan: “Dân nei lo Jentailten mahni thinlung pianpuia Dân thilte chu an tihin,” tiin a ziak a. Thil thleng khât tak ang maiin, “an ti ngai a nih pawhin” a ti lo. “An tihin,” a nih loh leh “an tih hunah” tiin a sawi a, chu chuan thil thleng ngun tak a nih thu a târ lang. Chu chu “thinlung pianpuia Dân thilte” a ni a, a awmzia chu chhûngrila nungchang ṭha an hriatna chuan Pathian dân ziak kan chhiarte mila thil ti tûrin a chêttîr tihna a ni.
8 He nungchang ṭha hriatna hi ram tam takah hmuh theih a ni. Cambridge-a professor pakhat chuan Babulon mite, Aigupta mite, Grik mite, Australia rama hnam ṭhenkhat lo awm hmasate leh America rama lo chêng hmasate nunphungah chuan “inawpbehna, tualthahna, bumna leh dâwt sawinate demna a awm a, chutih rual chuan tarte, naupangte, leh chak lote chungah lainatna nei tûra thupêk” pawh a tel tih a ziak a. Tin, Professor Collins-a chuan: “A chhia leh a ṭha hriatna hi khawvêl pum puia mihring zawng zawngte hian an nei vek a ni,” tiin a ziak a ni. Chu chuan Rom 2:14 a hriat chhuahtîr che lo maw?
I Chhia leh Ṭha Hriatna —Engtin Nge Hna A Thawh?
9. Eng nge chhia leh ṭha hriatna chu ni a, engtin nge chu chuan thil i tih hmain a ṭanpui theih che?
9 Bible chuan chhia leh ṭha hriatna hi i thiltih a dik leh dik loh endik theihna leh bûk theihna a ni tih a târ lang a. Chu chu i kawng zawh a dik leh dik loh hrilhtu che chhûng lam aṭanga hriattîrna aw ang mai a ni. Paula chuan a chhûng lama hriattîrtu chu heti hian a sawi: “Thlarau Thianghlim zârah chuan ka chhia leh ṭha hriatna pawh hian mi hriatpui a,” tiin. (Rom 9:1) Entîr nân, thil dik leh dik lo tih leh tih loh chungchâng i ngaihtuah hian, he âw hian a hun hmain thu a sawi thei a. I chhia leh ṭha hriatna chuan nakina i chêt dân tûr bûk tawn tûrin a ṭanpui thei che a, chutianga thil i tih chuan i hlim dâwn leh dâwn loh tûrte pawh a hrilh mai thei che a ni.
10. Eng kawngin nge chhia leh ṭha hriatna hian hna a thawh?
10 A tlângpui thuin, i chhia leh ṭha hriatna chuan thil engemaw i tih hnuah hna a thawk ṭan ṭhîn a. Lal Saula lak ata a râl tlân lai khân Davida chu Pathian hriak thih lal zah lohna lantîrtu thil engemaw ti thei dinhmunah a ding a, a ti ta rêng bawk a ni. A hnuah, a thiltih chuan “Davida rilru a chhun hle a.” (1 Samuela 24:1-5; Sâm 32:3, 5) He mi Bible chângah hian “chhia leh ṭha hriatna” tih thu mal chu hman a ni lo; mahse, chu chu Davida rilru tihrehawmtu chu a ni—a chhia leh ṭha hriatnain thiam loh a chantîr avângin. Kan vai hian chutianga chhia leh ṭha hriatnain thiam loh min chantîrna chu kan nei ṭheuh va. Thil engemaw kan ti a, a hnuah kan chêt dân chu ngaihtuah lêtin kan rilru a hah a, a buai hle a ni. Chhiah chawi tûr pe lo mi ṭhenkhat chu an chhia leh ṭha hriatnain a tihbuai êm avângin, a hnuah an pe leh ta ṭhîn a. Mi dangte thung chuan an kawppuite hnênah an uirêna sual chu an inpuang bawk. (Hebrai 13:4) Mahse, miin a chhia leh ṭha hriatna mila thil a tih hian chu chuan lungâwina leh thlamuanna a pe thei a ni.
11. Engvângin nge ‘min hruaitu atâna kan chhia leh ṭha hriatna ngawr ngawr rin’ chu a hlauhawm theih? Entîrna pe rawh.
11 Chuti a nih chuan, ‘min hruaitu atâna kan chhia leh ṭha hriatna ngawr ngawr rin’ tûr a ni em? Kan chhia leh ṭha hriatna thusawi ngaihthlâk chu a ṭangkai a; mahse, a âw chuan nasa takin min hruai khaw lo thei a ni. Ni e, “kan chhûng lam mihring” aw chuan min hruai khaw lo thei a ni. (2 Korinth 4:16) Entîrna pakhat hi ngaihtuah teh. Bible chuan Krista zuitu sakhaw mi tak Stephana chu “rinna leh thlarau thianghlima khat” a nih thu min hrilh a. Juda mi ṭhenkhatte chuan Stephana chu Jerusalem khaw pâwnah hruai chhuakin, an dêng hlum ta a. Saula (a hnua tirhkoh Paula lo ni ta) chu a kiang hnaiah dingin, Stephana “thih chu a remti” a ni. Chûng Judate chuan thil dik ti nia an inhriat tlat avângin, an chhia leh ṭha hriatna chuan a tibuai eih lo. Chu chu Saula chungchângah pawh a ni ve ngei ang; chu mi hnuah chuan “Lalpa zirtîrho a vau thu leh thah a tum thu a la chhâk chhuak ta cheu” si a. Chutih hun lai chuan a chhia leh ṭha hriatnain aw dik tak a chhuah lo tih a chiang hle.—Tirhkohte 6:8; 7:57-60; 9:1.
12. Eng nge kan chhia leh ṭha hriatnain min thunun theih dân kawng khat chu?
12 Saula chhia leh ṭha hriatna thununtu chu eng nge ni thei ang? Pakhatah chuan a ṭhenrual hnaite vâng a ni thei ang. Kan zînga tam takte hian mi tuemaw a pa âw ang tak mai neitu chu phone-ah kan be tawh ṭhîn a. Engemaw chenah chuan, inthlah chhâwnna avângin mi tuemaw chuan a pa âw ang chu a nei thei; mahse, a pa ṭawng dân phung a la pawh a ni thei bawk. Chutiang chiah chuan, Saula chu Isua hawtu leh a zirtîrnate dotu Juda hote nêna an inhnaihna chuan amah chu a thunun a ni thei ang. (Johana 11:47-50; 18:14; Tirhkohte 5:27, 28, 33) Ni e, Saula ṭhian kawmte chuan chhûng lam aṭanga âw, a chhia leh ṭha hriatna chu an thunun a ni ngei ang.
13. Engtin nge awmna hmunin chhia leh ṭha hriatna a nghawng theih?
13 Chênna hmun azirin mi aw phawi emaw, ṭawng hman emaw a danglam thei ang bawk hian, hnam emaw chênna hmun emaw chuan chhia leh ṭha hriatna pawh chu a thunun thei bawk. (Matthaia 26:73) Chu chu hmân lai Assuria-ho chunga thilthleng pawh a ni ngei ang. Anni chu râlhrât tak an ni a, chu chu an râllâkte an sawisak lai lem an kerte chuan a târ lang a ni. (Nahuma 2:11, 12; 3:1) Jona hun laia Ninevi khuaa mite chu “an ding leh vei pawh thliar thei lote” anga sawi an ni a. Chu chu, Pathian thlîrna aṭangin thil tih âwm leh âwm lo thliar hrang theihna tûr tehna dik an nei lo tihna a ni. Chu boruak chuan Ninevi khuaa seiliante chhia leh ṭha hriatna a nghawng dân tûr chu han ngaihtuah teh! (Jona 3:4, 5; 4:11) Chutiangin tûn laiah pawh, mi chhia leh ṭha hriatna chu a kianga awmte rilru put hmang chuan a nghawng thei a ni.
Chhûng Lam Aṭanga Hriattîrtu Aw Chu Tifiah Zual Rawh
14. Engtin nge kan chhia leh ṭha hriatna chuan Genesis 1:27-a thu chu a târ lan?
14 Jehova’n Adama leh Evi chu chhia leh ṭha hriat theihna a pe a, an hnên aṭangin chu chu kan rochung a ni. Genesis 1:27 chuan mihringte hi Pathian anpuia siam kan nih thu min hrilh a. Chu chu Pathian ruangâm anga siam kan ni tihna a ni lo, ani chu thlarau a ni a, keini chu tisa nei kan ni si a. Pathian anpuia siam kan nihna chu nungchang ṭha hriatna leh chhia leh ṭha hriatna huamin, a mizia angte chu kan nei ve tihna a ni. Hei hian kan chhia leh ṭha hriatna kan tihfiah lehzual theih dân leh rin tlâk zâwka kan siam theih dân a târ lang. Chu chu Siamtu chanchin zir belh a, amah hnaih lehzual hi a ni.
15. Kan Pa hriatna kan hlâwkpui theih dân kawng khat chu eng nge ni?
15 Bible chuan Jehova chu mi zawng zawngte tâna Pa a nih dân a târ lang a. (Isaia 64:8) Kristian mi rinawmte chuan an beiseina chu vân lam a ni emaw, lei paradis-a chên a ni emaw pawh ni se, Pathian chu Pa tiin an ko thei a ni. (Matthaia 6:9) Kan Pa hnaih lehzual chu kan duh tûr a ni a, tichuan a thil thlîr dân leh a tehnate chu kan zir ang. (Jakoba 4:8) Mahse, mi tam takte chuan chutianga tih chu an duh lo. Anni chu Isua’n an hnêna: “Nangnin eng tikah mah a aw in hre ngai lo va, a hmêl pawh in hmu ngai hek lo. A thu pawh in rilruah in pai reng lo,” a tihna Judate ang chu an ni. (Johana 5:37, 38) Pathian aw dik tak chu kan la hre ngai lo va; mahse, a thute kan rilruah pai rengin amah ang kan lo ni thei a, a ngaih dân ang kan nei thei a ni.
16. Josefa chanchin chuan kan chhia leh ṭha hriatna sâwizawi leh ngaihthlâk a pawimawhzia engtin nge a târ lan?
16 Potiphara ina Josefa awm dân chanchin ziak chuan Pathian ang kan ni thei tih leh a ngaihtuahna ang kan nei thei tih a târ lang. Josefa chu Potiphara nupuiin mutpuiah a thlêm a. Bible bu a enga mah ziak a la nih hma leh Thu Sâwm Pêk pawh chu pêk a la nih hmaa awm a ni nachungin, Josefa chuan chu thlêmna chu hnâwlin: “Engtin nge he sual lian tak hi tiin Pathian chungah thil ka tihsual theih ang?” a ti a ni. (Genesis 39:9) A chhûngte tihlâwm a duh vâng maia chutianga chhâng a ni lo; a chhûngte chu hmun hla takah an awm si a. Pathian tihlâwm chu a duh bera chu a ni. Josefa chuan inneihna chungchânga Pathian tehna—mipa pakhat tân hmeichhe pakhat, an pahnih chuan “tisa pumkhat” an ni tih chu a hria a ni. Abimeleka’n Rebeki chu pawmlai nei a nih thu leh nupuia neih chu a dik lo vang a, a mite chungah thil ṭha lo a thlen dâwn tih a hriat chhuah huna a awm dân chu a hriat ngei a rinawm. Tin, Jehova chuan chu mi chungchânga a rah chhuah chu malsâwmin, uirêna a thlîr dân chu a târ lang a ni. Josefa’n chutiang thilthleng zawng zawngte a hriatna chuan a rochun chhia leh ṭha hriatnain a turna chu a tihngheh a rinawm a, chu chuan mipat hmeichhiatna hman khaw lohna chu hnâwl tûrin a chêttîr a ni.—Genesis 2:24; 12:17-19; 20:1-18; 26:7-14.
17. Kan Pa anna chungchângah Josefa aiin engvângin nge dinhmun ṭha zâwka kan awm?
17 Tûnah hi chuan dinhmun ṭha zâwkah kan awm teh meuh mai. Kan Pa thil ngaihtuah leh a ngaih dân te, a thil pawmte leh a khapte thlenga kan zir theih nân, Bible chu a bu pumin kan nei tawh a. Pathian lehkha thu kan hriat chian poh leh Pathian kan hnaih zual zêlin amah kan ang lehzual ang. Chutianga kan tih chuan, min turtu kan chhia leh ṭha hriatna chuan kan Pa ngaihtuahna a hnaih lehzual ang a. A duhzâwng nên a inmil lehzual deuh deuh dâwn a ni.—Ephesi 5:1-5.
18. Hun kal tawha min thununtu chu eng pawh ni se, kan chhia leh ṭha hriatna rin tlâk zâwk a lo nih theih nân eng nge kan tih theih?
18 Kan awmna hmunin chhia leh ṭha hriatna a tih danglam chungchâng eng nge ni ve le? Kan chhûngte ngaihtuahna leh an thiltihte, leh kan seilenna hmuna mite ngaihtuahna leh thiltihte chuan min ti danglam mai thei. Chuvângin, kan chhia leh ṭha hriatna thu min hrilh chu danbeh tlat a ni emaw, a dik hlel emaw thei a. Chu chuan kan bula awmte “aw phawi” ang chu a zui ve thei a ni. Kan hun kal tawh chu kan thlâk danglam thei lo ngei mai; mahse, kan chhia leh ṭha hriatna a ṭha zâwnga thunun thei tûr ṭhian kawm leh awmna hmun thlan chu kan tum tlat thei a ni. A pawimawh ber chu, Kristian inpumpêk tak, hun rei tak ata tawha an Pa ang nih tumte bula awm ziah hi a ni. Kohhran inkhâwm leh inkhâwm ṭan hma leh bân hnua inkawmna chuan chutianga tih theihna hun ṭha tak chu min pe a. Kristianpuite Bible ṭanchhan ngaihtuahna leh an chhân lêt dânte chu kan hmu thei a, an chhia leh ṭha hriatnain Pathian thlîr dân leh a kawngte a târ lan avânga a aw an ngaihthlâk nghâl dânte pawh chu kan hmu thei bawk a ni. A tâwpah chuan, hei hian kan chhia leh ṭha hriatna ngei pawh Bible thu bulte nêna inmiltîr tûrin min ṭanpui thei a, chu chuan Pathian anpui min nihtîr lehzual a ni. Kan chhia leh ṭha hriatna chu kan Pa thu bulte nêna kan inmiltîr a, Kristianpuite’n thununna ṭha kan zui hian, kan chhia leh ṭha hriatna chu a lo rin tlâk zâwk ang a, a thil sawi chu ngaihthlâk kan duh lehzual ang.—Isaia 30:21.
19. Eng chhia leh ṭha hriatna pêngte’n nge kan ngaihsak phu?
19 Amaherawhchu, ṭhenkhat chuan ni tin mai hian an chhia leh ṭha hriatna thu âwih tûrin an bei nasa hle a. A dawta thuziak chuan Kristiante dinhmun tawh ṭhenkhat chu a rawn sawi ang. Chûng dinhmunte kan bih chian chuan chhia leh ṭha hriatnain hmun a luah te, mi dang chhia leh ṭha hriatna laka a danglam theih dân te, leh a aw chhuah kan âwih lehzual theih dânte chu kan hmu chiang lehzual ang.—Hebrai 6:11, 12. (w07 10/15)
[Footnote]
^ par. 5 Chutiang bawk chuan, Owen Gingerich-a, Harvard University-a professor chuan: “Mahni hmasial lohna chuan . . . ramsa chi hrang hrangte chîkna aṭanga science lam thiamnain a chhân theih loh zawhna a tichhuak ngei ang. A chhânna rin tlâk zâwk chu thil dang daihah a innghat thei a, chu chu Pathian pêk mihring nihna miziaah a ni a, chutah chuan chhia leh ṭha hriatna a tel a ni,” tiin a ziak.
Eng Nge I Zir?
• Engvângin nge dik leh dik lo hriat theihna, a nih loh leh chhia leh ṭha hriatna chu hnam tinah hmuh a nih?
• Engvângin nge kan chhia leh ṭha hriatna ngawr ngawr kan inkaihhruaitîr loh vang?
• Chhûng lam aṭanga aw kan hriat ṭhat lehzual theih dân kawng ṭhenkhat chu eng nge ni?
[Zirlai Atâna Zawhnate]
[Phêk 8-naa milem]
Kan chhia leh ṭha hriatna chu kan sâwizawi thei