Jehova Thusawi A Thlâwn Ngai Lo
Jehova Thusawi A Thlâwn Ngai Lo
“LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo . . . in chungah a lo thleng ta vek a.”—JOSUA 23:14.
1. Josua chu tunge ni a, a thih dâwn hnaihah eng nge a tih?
SIPAI lal thothâng ṭha tak leh hlauh nei lo, rinna nghet tak nei mi rinawm a ni a. Mosia nên an lêng dûn a, Jehova chuan thlalêr hlauhawm tak ata hnutetui leh khawizu luanna rama Israelte hruai lût tûrin a thlang a ni. He mi zahkai tak Josua hian a thih dâwn hnaihah chuan Israel upate hnênah rilru khawih tak thuchah a sawi a. Rinhlelh rual lohvin, chu a thusawi chuan a ngaithlatute rinna chu a tichak sawt ngei ang a. Kan rinna pawh a tichak thei bawk a ni.
2, 3. Josua’n Israel upate hnêna thu a sawi khân, Israel dinhmun chu eng ang nge ni a, eng thu nge Josua chuan a sawi?
2 Bible-a sawi dân ang hian thil awm dân chu han mitthla teh: “Heti hi a ni a, kum eng emaw zât lai a lo vei hnu a, LALPAN Israel-hote chu an kiang vêla hmêlma zawng zawngte laka muanna a pêk hnu chuan Josua pawh chu a lo upain, a lo tar ta hle a: tichuan Josuan Israel-hote zawng zawngte, an upate leh an puipate, an rorêltute leh an hotute chu a kohtîr a, an hnênah, ‘Kei zawng ka lo upain, ka lo tar ta,’” a ti a ni.—Josua 23:1, 2.
3 Josua chu kum 110 a tling ṭêp tawh a, a dam chhûngin Pathian mite chanchina hun phûrawm ber mai a thleng a. Pathian thiltih ropui takte chu a mit ngeiin a hmu tawh a, Jehova thutiam tam takte thlen famkimna pawh chu a hmu tawh bawk. Chuvângin, a thil lo tawn tawhte avâng chuan: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” tiin rin tlatna nên a sawi thei a ni.—Josua 23:14.
4. Jehova’n Israelte hnênah eng thutiam nge a pêk?
4 Josua dam chhûnga thleng dik Jehova thu chu eng nge ni? Jehova’n Israel mite a tiam thil pathum kan ngaihtuah dâwn a ni. Pakhatna, Pathianin an sal tânna ata a chhan chhuak ang. Pahnihna, anni chu a vênghim ang. Pathumna, anni chu a chhawmdâwl ang tihte hi a ni. Jehova chuan tûn laia a mite hnênah pawh chutiang tho chu a tiam a, keini pawhin, chûng chu kan dam chhûngin a lo thleng famkim tih kan hmu a ni. Amaherawhchu, tûn lai huna Jehova thil tihte kan sawiho hmain, Josua hun laia a thiltihte chu ilo ngaihtuah hmasa ang u.
Jehova Chuan A Mite A Chhan Chhuak
5, 6. Engtin nge Jehova’n Israel mite chu Aigupta lak ata a chhan chhuah a, chu chuan eng nge a lantîr?
5 Israel mite’n Aigupta sala an tânna avânga Pathian an auh khân, Jehova chuan a lo hria a. (Exodus 2:23-25) Hnim buk alh kârah Jehova chuan Mosia hnênah: “Aigupta-ho lak ata [ka mite] chhanhim tûr leh chu mi ata chu hruai chhuaka . . . ram ṭha tak leh zau tak, hnutetui leh khawizu luanna rama hruai lût tûrin ka lo chhuak ta a ni,” tiin a hrilh a ni. (Exodus 3:8) Jehova’n chutiang thil a thlentîr lai hmuh chu a va han phûrawm dâwn êm! Pharaoa’n Israel mite’n Aigupta ram an chhuahsan a phal loh khân, Mosia chuan Pathianin Nile Lui chu thisenah a chantîr dâwn tih a hrilh a. Jehova thusawi chu a thleng dik ngei a ni. Nile Luia tui chu thisenah a chang ta tak tak a. Sanghate chu an thi a, lui tui chu in tlâk a ni ta lo. (Exodus 7:14-21) Pharaoa chuan a rilru a la tisak ta fo va, Jehova chuan pakhat tê têa a lo thlen dân tûr hrilh lâwk vekin, hripui chi kua a thlen belhtîr ta a ni. (Exodus, bung 8-12) Pharaoa chuan hripui chi sâwmnain Aigupta fa tîr apiang a tihhlum hnuah chuan Israel mite chu chhuak tûrin thu a pe ta a—an chhuahsan ta rêng a ni.—Exodus 12:29-32.
6 Chu chhan chhuahna chuan Israel mite chu Jehova hnam thlan nihtîr theihna kawng a hawng a ni. Chu chuan Jehova chu thutiamte Tipuitlingtu, a thusawite thlâwn ngai lo angin a chawimawi a. Hnam dang pathiante aia Jehova a chungnun zâwkzia a târ lang bawk a ni. Chu chhan chhuahna chanchin chhiarna chuan kan rinna a tichak sauh va. Chu thilthleng a tak ngeia han tawn chu eng nge a an dâwn han ngaihtuah teh! Josua chuan Jehova chu rinhlelh rual lovin “leilung zawng zawng chunga Chungnungber” a nihzia a hmu ta a ni.—Sâm 83:18.
Jehova Chuan A Mite A Vênghim
7. Engtin nge Jehova’n Israel mite chu Pharaoa sipai kut ata a vênhim?
7 Thutiam pahnihna—Jehova chuan a mite a vênghim ang tih chungchâng chu eng nge ni ve? He thutiam hi Jehova’n Aigupta ata a chhan chhuak ang a, Ram Tiamah a luhtîr dâwn tih a tiamah khân a tel a ni. Pharaoa’n thinrim tak chunga a sipai chak tak leh sakawr tawlailîr za tam tak nêna Israel mite a ûm lai kha han ngaihtuah lêt leh teh. Israel mite chu tlângte leh tuipui inkâra danchêp anga an han lan zet phei chuan, chu mi chapo tak mai chu a va han inring tâwk dâwn êm! Chutah chiah chuan Pathian chu rawn inrawlhin, a mite chhanhim tûrin Aigupta leh Israel mite inkârah chhûm a dintîr ta a ni. Aigupta mite awmna lam chu a thim a; Israel mite awmna lam erawh chu a êng thung a. Chhûm chuan Aigupta mite hmalam panna tûr a dâl laiin, Mosia chuan a tiang chu a han lekkâng a, Tuipui Sen chu a inṭhen ta phawk mai a; Israel mite tân tlân chhuahna a siamsak rualin Aigupta mite tân thangah a chang ta a ni. Jehova chuan Pharaoa sipai chak tak maite chu tihlum phiarin, A mite chu a vênghim a ni.—Exodus 14:19-28.
8. Israel mite chuan thlalêrah leh Ram Tiam an luh hunah eng ang vênhimna nge an dawn?
8 Tuipui Sen an kân hnuah, Israel mite chu ‘thlalêr zau tak leh râpthlâk tak, rûl chuk na mite leh khawmual kaikuangte awmna, tui awm lohna, ram ro’ tia sawi ramah chuan an vâkvai a. (Deuteronomy 8:15) Chutah pawh chuan Jehova chuan a mite chu a vênghim a ni. Ram Tiama an luh chungchâng ve thung hi eng nge ni le? Kanaan sipai chak takte chuan an do a. Mahse, Jehova chuan Josua hnênah: “Tho la, nang leh hêng mipuiho zawng zawngte nên hian Jordan lui hi kân ula, anmahni, Israela thlahte ka pêk ramah chuan kal rawh u. I dam chhûng zawng tumah rêng rêngin an chelh lo vang che: Mosia hnêna ka awm ang khân i hnênah pawh ka awm ve dâwn e: ka tithlâwn lovang chia, kal pawh ka kalsan tawp lo vang che,” tiin a hrilh a ni. (Josua 1:2, 5) Chûng Jehova thusawite chu thlâwn rêng a awm lo. Kum ruk vêl chhûngin Josua chuan lal 31 lai chu hnehin Ram Tiam hmun zau tak chu a la a ni. (Josua 12:7-24) Chu hnehna chu Jehova vênhimna tel lo chuan thil theih a ni hauh lo vang.
Jehova Chuan A Mite A Chhawmdâwl
9, 10. Engtin nge Jehova’n a mite chu thlalêrah a chhawmdâwl?
9 Tûnah chuan thutiam pathumna—Jehova chuan a mite a chhawmdâwl ang tih chu han ngaihtuah teh. Aigupta mite laka chhan chhuah an nih hnu lawkah, Pathian chuan Israel mite hnênah heti hian a tiam a ni: “Ngai rawh, vân aṭangin in tân chhang ka rawn sûrtîr ang e; tichuan mipuiten ni tin ni khat atâna chanvo tâwk chauh zêl chu va chhar ṭhîn rawh se,” tiin. A sawi ang chiah chuan Pathianin ‘vân aṭangin chhang’ a pe a ni. “Chu chu Israel thlahten an han hmuh chuan, ‘Engnge maw ni chu le?’ an inti hlawm a.” Chu chu Jehova’n chhang pêk a tiam manna chu a ni.—Exodus 16:4, 13-15.
10 Jehova chuan Israel mite chu kum 40 chhûng thlalêra an thang lai khân chaw leh tui pein a chhawmdâwl a. A enkawl avângin an silhfênte chu a chul lo va, an kete pawh a vûng hek lo. (Deuteronomy 8:3, 4) Josua chuan chûng thil zawng zawng chu a hmu vek a ni. Jehova chuan an hnêna a tiam ang ngeiin a mite chu a chhan chhuak a, a vênghim a, a chhawmdâwl bawk a ni.
Tûn Lai Huna Chhan Chhuahna
11. Kum 1914 khân Brooklyn, New York-ah eng thil nge thleng a, eng hun nge lo thleng ta?
11 Kan hunah hian eng nge ni ve? October 2, 1914 Zirtâwpni zîngah, Charles Taze Russell-a, chutih hun laia Bible zirlaite zînga hmahruaitu chu New York Brooklyn Bethel-a chaw eina pindanah a lût a. Hlim takin “Chibai u le,” a ti a. Tichuan, a ṭhutnaa a ṭhut hmain, lâwm takin: “Jentailte ni chu a kin ta; an lalte chuan an ni an hmang zo ta,” tiin a puang a ni. Lei leh Vâna Lalchungnungber Jehova’n a mite tâna thil a tih hun chu a lo inher chhuak leh ta. Chutiang chuan thil a rawn ti ta rêng a nih chu!
12. Eng chhan chhuahna nge kum 1919-ah thleng a, chu chuan eng atân nge kawng a hawn?
12 Chu mi aṭanga kum nga chauh a ral hnuah, Jehova chuan a mite chu Babulon Khaw Ropui,” khawvêl sakhaw dik lo lalram thiltithei tak lak ata chu a chhan chhuak a. (Thu Puan 18:2) Kan zîngah hian chu chhan chhuahna phûrawm tak mai hmu phâk khawpa upa kan tam lo hle. Mahse, a rah chhuah chu chiang takin kan hmu thei a ni. Jehova chuan biakna thianghlim chu din thar lehin, amah be duhtute chu a inpumkhattîr leh a. Hei hi zâwlnei Isaia kaltlanga hrilh lâwk tawh a ni: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan hnam tinrêngte chu an kal nguah nguah ang,” tiin.—Isaia 2:2.
13. Jehova mite zînga punna eng nge i hmuh?
13 Isaia thute chu lo thleng lovin a thlâwn mai lo. Kum 1919 khân hriak thih a la bângte chuan khawvêl pum puiah huaisen taka thu hrilhna campaign an nei ṭan a, chu chuan Pathian dik biakna chu a chawisâng a ni. Kum 1930 chho bâwrvêlah chuan “berâm dang” chu lâk khâwm an ni tih a lo chiang chho ta a. (Johana 10:16) Biakna dik chu a hmasain mi sâng têlin, chutah a nuai têlin, tûnah erawh chuan mi maktaduai têlte chuan an thlâwp ta! Tirhkoh Johana inlârna hmuhah phei chuan anni chu “mipui tam tak tuma chhiar sên loh, hnam tin zînga mite, chi tin zînga mi te, mi tin zînga mi te, ṭawng tin zînga mite” anga sawi an ni. (Thu Puan 7:9) I dam chhûng hian eng nge i hmuh ve? Thutak i zir ṭantirh lai khân Jehova Thuhretu eng zât nge he leiah hian awm? Tûnah chuan Jehova rawngbâwltute chu 6,700,000 aiin an tam tawh a ni. Jehova chuan a mite chu Babulon Khaw Ropui aṭanga chhan chhuakin, tûna khawvêl pum huapa kan hmuh punna phûrawm tak atân hian kawng a sial a ni.
14. Eng chhan chhuahna nge lo la awm dâwn?
14 Chhan chhuahna thiltih dang leh chu kan hmaa lo la thleng tûr a ni a, chu chuan leia mi zawng zawngte a huap ang. Jehova chuan a thiltihtheihna ropui taka lantîrin, amah dotu zawng zawngte chu a tiboral vek ang a, a mite chu chhan chhuakin, felna khawvêl tharah a luhtîr dâwn a ni. Suahsualna tâwpna hmuh leh mihring chanchina hun ropui ber inher chhuak hmuh chu a va ropui dâwn ve le!—Thu Puan 21:1-4.
Kan Hun Laia Jehova Vênhimna
15. Engvângin nge tûn laiah hian Jehova vênhimna mamawh a nih?
15 Josua hun laia Israel mite’n Jehova vênhimna an mamawh tih kan hmu tawh a. Tûn laia Jehova mite hian an mamawh ve em? Mamawh chiang e! Isua chuan a hnungzuitute chu: “Hrehawm tuar tûrin an mantîr ang che u a, an tihlum ang che u; ka hming avângin hnam zawng zawng huat in ni ang,” tiin a lo vaukhân a. (Matthaia 24:9) Kum tam tak chhûng chu Jehova Thuhretute chuan ram tam takah dodâlna nasa tak leh râwng taka tihduhdahnate an tuar a. Mahse, Jehova chuan a mite chu a ṭanpui a ni. (Rom 8:31) A Thu chuan engmah—‘min beihna tûra hriam chher rêng rêng’—chuan kan Lalram thu hrilhna leh zirtîr siamna chu a titâwp lo vang tih min tiam a ni.—Isaia 54:17.
16. Jehova’n a mite a vênhimzia finfiahna eng nge i hmuh?
16 Khawvêlin a haw hle chung pawhin, Jehova mite chu an pung chak hle a. Jehova Thuhretute chu ram 236-ah nasa takin an pung a—chu chu kan kehchhiat emaw, kan ngawih bo emaw duhtute lakah Jehova chuan min vênghim a ni tih lantîrtu a ni. I dam chhûnga Pathian mite nasa taka dodâltu politics hruaitu emaw, sakhaw hruaitu emaw hmingte chu i hre thei em? An chungah eng thil nge thleng? Anni chu khawiah nge an awm tâk? A tam zâwkte chu Mosia leh Josua hun laia Pharaoa ang mai khân engmah lovah chantîr an ni zo tawh a ni. Tûn laia rinawm taka thi ta Pathian chhiahhlawh te chungah eng nge thleng? Anni chu Jehova hriatrengnaah vênhimin an awm a ni. An tân chuan hmun him zâwk dang a awm thei lo. Chiang takin, vênhimna chungchânga Jehova thute chu a thleng dik hle a ni.
Jehova Chuan Tûn Laia A Mite A Chhawmdâwl
17. Jehova chuan thlarau lam chaw chungchângah eng thutiam nge a pêk?
17 Jehova chuan a mite chu thlalêrah a lo chhawmdâwl tawh a, tûn laiah pawh a chhawmdâwl bawk a ni. “Bawi rinawm, fing tak” chuan thlarau lamah min châwm a. (Matthaia 24:45) Kum zabi tam tak chhûng thuhrûk thlarau lam thutak hriatna chu kan dawng a ni. Vântirhkoh chuan Daniela chu: “Thu chu thup la, lehkhabu chu châr tlat rawh, tâwpna hun thlengin: mi tam tak an tlân vêl ang a, hriatnate a pung dâwn a ni,” tiin a hrilh a ni.—Daniela 12:4.
18. Engvângin nge tûn laiah hriatna dik chu a pung tia sawi theih a nih?
18 Tûnah chuan tâwpna hunah kan awm a, Pathian hriatna chu a pung ngei a ni. Khawvêl pumah hian thlarau thianghlim chuan thutak duhtute chu Pathian dik leh a thiltumte hriatna dik lamah a hruai a. Tûn lai khawvêlah hian Bible hmuh tûr tam tak a awm a, Bible chhûnga thutak hlu tak awmte hre thiam tûra ṭanpuitu thu leh hla chhuahte pawh tam tak a awm a ni. Entîr nân, What Does the Bible Really Teach? * tih zir tûr thuchhuah chhûnga thu awmte chu han ngaihtuah teh. A chhûnga bung hrang hrangte zîngah chuan: “Pathian Chungchânga Thu Dik Chu Eng Nge Ni?,” “Mitthite Chu Khawiah Nge An Awm?,” “Pathian Ram Chu Eng Nge Ni?,” tih leh “Engvângin Nge Pathianin Hrehawm Tawrhna Awm A Phal?,” tihte a tel a ni. Mihringte chuan chutiang zawhnate chu kum sâng tam tak chhûng an lo ngaihtuah tawh a. Tûnah chuan a chhânna chu hmuh theih maiin a awm ta. Kum zabi tam tak chhûng hre lova awmna leh Kristianna ram kalpêngte zirtîrna suak dawn hnuah pawh Pathian Thu chuan hnehna changin, Jehova rawngbâwl duh apiangte chu a chhawmdâwl ta a ni.
19. Eng thutiam thlen famkimna nge i hmuh a, engtin nge thu tâwp i siam?
19 Kan mit ngeia kan hmuh aṭang chuan: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo . . . in chungah a lo thleng ta vek a, pakhat mah thlâwn a awm lo ve,” tiin chiang takin kan sawi thei a ni. (Josua 23:14) Jehova chuan a chhiahhlawhte chu a chhan chhuak a, a vênghimin, a chhawmdâwl bawk a ni. A thutiam a hun ruat taka thleng famkim lo pakhat tal sawi tûr i hria em? Chu chu thil awm thei a ni lo. Pathian Thu rin tlâk tak chu kan ring tlat si a.
20. Engvângin nge nakin hun chu rin nghehna nêna kan thlîr ang?
20 Eng hmabâk nge awm? Kan zînga a tam zâwkte hi chuan lei paradis nuam taka nun chu kan beisei thei tih Jehova chuan min hrilh a. Kan zînga tlêm tê hian vâna Krista nêna rorêl tûrin beiseina an nei thung a ni. Kan beiseina chu eng pawh ni se, Josua anga rinawm chhan tûr kan nei chiang hle. Kan beiseite a taka chan hun chu a lo thleng ngei ang. Chutih hunah chuan Jehova thutiam tawh zawng zawngte chu thlîr lêtin, keini pawhin: “A lo thleng ta vek a,” tiin kan sawi ve thei ngei ang. (w07 11/1)
[Footnote]
^ par. 18 Jehova Thuhretute tihchhuah a ni.
I Hrilhfiah Thei Em?
• Josua chuan Jehova thutiam a eng ber thlen famkimna nge a hmuh?
• Pathian thutiam a eng ber thlen famkimna nge i hmuh?
• Pathian thusawi chungchângah eng nge kan hriat chian theih?
[Zirlai Atâna Zawhnate]
[Phêk 25-naa milem]
Jehova chuan tûn laia a mite chu a ngaihsak