Naktûk Thlîrin Nung Rawh

“ATUK atân lung kham suh u,” tiin Isua Krista chuan Galili rama tlâng chunga a thusawi hmingthang takah a sawi a. Ani chuan: “Atûk chuan ama tân a lungkham chawp dâwn si a,” tiin a sawi zawm a ni.​—⁠Matthaia 6:⁠34.

“Atûk chuan ama tân a lungkham chawp dâwn” tih hêng thute awmzia hi eng nge nia i rin? Vawiin atân chauhva nung a, atûk ngaihthah tûr tihna a ni em? Chu chu Isua leh a hnungzuitute rin dân nên a mil tak tak em?

“Lungkham Suh U”

Isua thu Matthaia 6:​25-32-a hmuh hi chhiar chhuak ang che. A thusawi a ṭhen laiah chuan: “‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u. . . . Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vâna mi chuan a châwm si a. . . . Nangni zîngah lungkham avângin tuinnge mahni dung lam tawng khata tisâng chuang thei? Tin, silhfên thu engahnge in lungkham ni? Ram tûktinpâr ṭhanzia hi ṭha takin ngaihtuah rawh u; hna an thawk lo, la pawh an kai hek lo. . . . Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni,” tiin a sawi a ni.

Isua’n chu a thusawi chu thurâwn pahnih nên a titâwp a. A hmasa chu: “[Pathian] ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tih a ni a. A dawta mi chu: “Chutichuan atûk atân lungkham suh u, atûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni,” tih a ni.​—⁠Matthaia 6:​33, 34.

In Mamawh Chu In Pa’n A Hria

Isua chuan lo nei mite pawh tiamin, a zirtîrte chu ‘buh tuh lo tûr, ât lo tûr, leh buh ina seng lo tûrin’ a fuih niin i ring em? A nih loh leh an mamawh silhfên tûr neih nân ‘hna thawh leh la kaih’ a phal lo niin i hria em? (Thufingte 21:5; 24:​30-34; Thuhriltu 11:⁠4) Chutiang chu ni lo ve. Hna an thawh loh chuan, eiin tûr emaw, silhfên tûr emaw nei lovin “buh seng laiin kut [an] dawh” ngei ang.​—⁠Thufingte 20:⁠4.

Lungkhamna chungchâng hi nge nge ni ve le? Isua’n a thusawi ngaithlatute chu lungkhamna nei miah lovin an awm dâwn a tihna a ni em? Chu chu thil awm thei a ni lo vang. Isua ngei pawhin man a nih hma zân khân rilru lama lungngaihna leh lungkhamna nasa tak a tâwk si a.​—⁠Luka 22:⁠44.

 Isua chuan thudik awmsa a sawina mai a ni. Nasa taka lungkhamna chuan i hmachhawn buaina engmah chingfel tûrin a ṭanpui ngai lo vang che. Entîr nân, dam rei zâwk tûr pawhin a ṭanpui bawk hek lo vang che. Isua chuan i ‘dung lam tawng khatin a tisâng,’ a nih loh leh i nunna tawng khatin a pawtsei chuang lo vang tih a sawi. (Matthaia 6:27) A dik a dik chuan, hun rei tak chhûng lungkhamna chuan i nunna a titâwi thei zâwk mah a ni.

A thurâwn pêk chu a hman tlâk hle. Kan thil lungkham zînga tam takte hi a thleng tak tak ngai mang lo. British politics lama mi lâr Winston Churchill-a chuan Khawvêl Indopui II-na hun thim takah he mi chungchâng hi a hre chhuak a. Chutih laia a thil lungkham ṭhenkhat chungchâng chu heti hian a ziak a ni: “Chûng lungkhamna zawng zawngte ka ngaihtuah lêt chuan, putar pakhatin a thih hma lawka a nunah thleng tak tak ngai lo lungkhamna tam tak a neih thu a sawina thawnthu chu ka hre chhuak a ni,” tiin. A bîk takin nêksâwrna leh buaina kan hmachhawnte’n awlsam taka lungkhamna nasa tak min siam theih hian, nî tin hi a lo thlen ang zêla hmachhawn chu a finthlâkna lai a awm tak meuh a ni.

‘Pathian Ram Chu Zawng Hmasa Rawh’

Dik takin, Isua chuan a thu ngaithlatute taksa lam hrisêlna leh rilru lam ṭhatna aia tam zâwk chu a ngaihtuah a. Ani chuan nun atâna mamawh thilte lungkhamna leh nasa taka hausak leh nawmsit bâwl châkna chuan thil pawimawh zâwk a dîpdâl thei tih a hria a. (Philippi 1:​10, 11) ‘Nun atâna mamawh thilte neih aia pawimawh zâwk chu eng nge awm thei ang?’ tiin i ngaihtuah mai thei. Kan Pathian biakna nêna inkûngkaih thlarau lam thilte hi a pawimawh zâwk a ni. Isua chuan kan nuna thil pawimawh ber chu ‘Pathian ram leh a felna zawn hmasak’ a ni tûr a ni tih a sawi uar a ni.​—⁠Matthaia 6:⁠33.

Isua hun lai chuan, mi tam tak chuan hausakna lam chu nasa takin an ûm a. Hausakna chhêk khâwm chu an thil ngaih pawimawh ber a ni. Mahse, Isua chuan a thu ngaithlatute chu thlîr dân dang nei tûrin a fuih a. Pathian hnêna inpumpêk hnam an nih angin an “tih tûr” chu ‘Pathian ṭih a, a thupêkte vawn’ hi a ni.​—⁠Thuhriltu 12:⁠13.

Hausakna ringawt ngaihtuahna​—⁠“khawvêl lungkhamna leh hausakna bumna”​—⁠chuan a thu ngaithlatute thlarau lam chu a tichhe thei a. (Matthaia 13:22) Tirhkoh Paula chuan: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” tiin a ziak a. (1 Timothea 6:⁠9) He ‘thang’ pumpelh tûra anmahni ṭanpui nân, Isua chuan a hnung zuitute chu an Pa  vâna miin an mamawh zawng zawng a hria tih a hrilh a. Pathian chuan “chunglêng savate” a châwm angin, anni pawh a châwm dâwn a ni. (Matthaia 6:​26, 32) Lungkhamna inchîmbuaitîr ai chuan, an thil mamawhte nei thei tûra an tihtheih ang an tih hnuah thil engkim Jehova kutah an nghat hmiah tûr a ni.​—⁠Philippi 4:​6, 7.

Isua’n “atûk chuan ama tân a lungkham chawp dâwn si a” a tih khân, naktûka thil lo thleng mai theite nasa taka lungkham avânga vawiina kan buaina belhchhah loh tûr a tihna mai a ni a. Bible lehlin dang chuan hêng thute hi: “Naktûk atân lungngai duh suh; naktûk chuan ama tân lungngaih tûr tam tak a nei dâwn si. Nî tina hrehawmna hi belhchhah a ngai lo ve,” tiin a dah a ni.​—⁠Matthaia 6:​34, Today’s English Version.

“I Ram Lo Thleng Rawh Se”

Mahse, naktûka thilthleng tûr nasa taka lungkham loh leh ngaihthah ṭhak chu a inang lo hle. Isua chuan a zirtîrte chu nakin hun ngaihthah tûrin a fuih ngai lo. Nakin hun tûr ngaihsak hle tûrin a fuih zâwk mah a ni. Tûna an mamawh mêk​—⁠an nî tin chaw​—⁠atân an dîl tûr a ni a. Mahse, nakin hun tûr thil​—⁠Pathian Ram lo thleng tûr leh Pathian duhzâwng leia tih ni tûrin​—⁠an dîl phawt tûr a ni.​—⁠Matthaia 6:​9-11.

Nova dam laia mite ang kan ni tûr a ni lo. ‘An eiin an bâr a, nupui pasal inneiin’ an buai êm êm a, thil lo thleng tûr chungchângah “engmah an hre lo” a ni. Eng nge a rah chhuah? ‘Tui a lo lêt a, an zain a la bo vek a ni.’ (Matthaia 24:​36-42) Tirhkoh Petera chuan naktûk tûr thlîra kan nun a ṭûlzia min hriattîr nân, chu thilthleng dik tak chu a hmang a. “Chûng thilte chu chutianga boral vek tûr a ni tih in hriat avângin Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?,” tiin a ziak a ni.​—⁠2 Petera 3:​5-7, 11, 12.

Vânah Rote Khâwl Khâwm Rawh

Ni e, Jehova ni lo thleng tûr chu i “beisei” reng ang u. Chutianga tihna chuan kan hun te, tha leh zung te, themthiamna te, sum leh pai te, leh theihnate kan hman dân chu nasa takin a nghawng dâwn a ni. ‘Pathian ngaihsakna’ lantîr nâna hun nei mang meuh lo tûr khawpin khawvêl thil​—⁠nunna atâna mamawh a ni emaw, nawn chenna a ni emaw​—⁠ûmnaah kan inhmang lutuk tûr a ni lo. Vawiin atân chauh ngaihtuahna chuan rah chhuah nghâl mai tûr angin a lang mai thei; mahse, chûng a rah chhuahte zînga a ṭha ber pawh chuan rei a daih ṭhîn lo. Isua chuan leiah ni lovin, ‘vâna kan tân rote khâwl khâwm’ chu a finthlâk zâwk hle tih a sawi.​—⁠Matthaia 6:​19, 20.

Isua’n he thu hi nakin hun tûr nasa taka ruahmantu mi pakhat chungchâng tehkhin thu-ah a sawi uar a. Chûng a ruahmannaah chuan Pathian a tel lo. Chu pa chuan thlai a thar ṭha hle a. Ani chuan châwl a, ei in a, hlim taka a awm theih nân a buh inte chu ṭhiat a, a aia lian chu sak a rêl thlu a. Chutah chuan eng thil dik lo nge awm? A hna thawh rah a chen hmain a thihsan a. Chu aia chhe zâwk chu Pathian nêna inlaichînna a nei lo kha a ni. Isua chuan: “Mahni tâna sum khâwla Pathian lama ngah si lo chu, chuti chu a ni ṭhîn,” tia sawiin a tehkhin thu chu a titâwp a ni.​—⁠Luka 12:​15-21; Thufingte 19:⁠21.

Eng Nge I Tih Theih?

Isua thusawia mi thil tihsual ang chuan tisual ve suh. Atûk atâna Pathian thiltum chu zawng chhuak la, chu mi-ah chuan i nun chu nghat rawh. Pathian chuan a thiltih tum chungchângah mihringte chu engmah hre lovin a dah lo. “Dik takin Lalpa PATHIAN chuan a rawngbâwltu, a zâwlneite hnênah a thurûk hrilh lovin engmah a ti lo vang,” tiin hmân lai zâwlnei Amosa chuan a ziak a ni. (Amosa 3:⁠7) Jehova’n a zâwlneite hnêna a thurûk hrilh chu a thâwk khum Thu, Bible-ah i tân hmuh theihin a awm a ni.​—⁠2 Timothea 3:​16, 17.

Bible-in thurûk min hrilh pakhat chu lei pumpui nasa taka nghawngtu tûr nakin lawka thil lo thleng tûr hi a ni. Isua chuan: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo,” a ti. (Matthaia 24:21) Chu thil chu thleng lo tûrin mihring tumahin an dang thei lo. Betu dikte tân chuan chu thil thleng lo tûra dan duh chhan tûr pawh a awm bawk lo. Engvângin nge? He thilthleng tûr hian leia sualna awm zawng zawng a nuaibo dâwn avâng leh, “vân thar leh lei thar,” ​—⁠vân lam sawrkârna thar leh lei lam mipui thar​—⁠a chhawm luh bawk dâwn avângin. Chu khawvêl tharah chuan Pathian chuan mite “mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”​—⁠Thu Puan 21:​1-4.

Chuti a nih chuan, chu mi chungchâng Bible thusawi enfiah tûra tûna hun kan inpêk chu a âwm hle a ni lâwm ni? Chutianga ti tûrin ṭanpuina i mamawh em? Jehova Thuhretute hnênah ṭanpuina dîl rawh. A nih loh pawhin, he magazine chhuahtute hnênah hian lehkha thawn ang che. Vawiin atân chauh ni lovin, nakin hun ropui tak atân pawh nung ngei ang che. (w07 10/15)

[Phêk 5-naa milemte]

“Lungkham suh u . . . Atûk chuan ama tân a lungkham chawp dâwn si a.”