Obadia, Jona, leh Mika Bu Aṭanga Thu Pawimawh Hrilhfiahna
Jehova Thu Chu A Nung
Obadia, Jona, leh Mika Bu Aṭanga Thu Pawimawh Hrilhfiahna
“OBADIA inlârna hmuh chu.” (Obadia 1) Hêng thute hian Bible-a Obadia bu chu a inṭan a. B.C.E. 607-a a ziak zawh he lehkhabu-ah hian zâwlnei chuan a hming bâk chu a chanchin engmah a sawi tel lo. Zâwlnei Jona chuan a hma kum zabi hnih chuanga a ziak zawh lehkhabuah chuan a missionary hna nêna inkûngkaih a thiltawn chu zêp nei lovin a sawi a ni. Kum 60 chhûng awh Mika hrilh lâwkna chu Obadia leh Jona te hun inkârah a tla a, chu chu B.C.E. 777 aṭangin B.C.E. 717 chhûng a ni. Mika’n a chanchin a sawi awmchhun chu “Moreseth [khaw] mi” a nih thu leh ‘Juda lal Jothama te, Ahaza te, Hezekia te lal laiin’ Jehova thu a hnêna a lo thlen thu chauh a ni. (Mika 1:1) Zâwlnei chuan a thuchah pawimawhzia sawi uar nâna a hman tehkhin thute chuan thingtlâng nun a hriat chianzia a târ lang a ni.
EDOM CHU ‘KUMKHUAA TIHBORALIN A AWM ANG’
(Obadia 1-21)
Edom chungchângah Obadia chuan: “I unaupa Jakoba chunga i pâwngnêkna avângin zahnain a khuh ang che a, kumkhuaa tihboralin i awm ang,” a ti a. Edom-hovin tûn hnai maia Jakoba fate—Israelte—chunga an tharum thawhna chu zâwlnei rilruah a la chiang hle. B.C.E. 607-a Babulon-hovin Jerusalem an tihchhiat khân, Edom-ho chuan ‘lehlama dingin’ “hnam dang mite” nêna inthurualin an rûn a ni.—Obadia 10, 11.
Chu mi nêna inkalhin, Jakoba chhûngte chu din thar lehnain a nghâk mêk a. Obadia hrilh lâwkna chuan heti hian a ti: “Zion tlângah erawh chuan, tlân chhuakte chu an awm ang a, a thianghlim ang,” tiin.—Obadia 17.
Bible Chungchânga Zawhnate Chhânna:
5-8—Edom chhiatna chu zâna philhmang lo kalte leh grêp seng khâwmtu lo kalte nêna khaikhinna chuan eng nge a entîr? Edomah rûkrute an lo kal chuan, an duh tâwk thil chauh an la ang a. Thlai seng khâwmtute an lo kal chuan a ṭo lâk atân a ṭhen an hnutchhiah ang. Mahse, Edom a tlâwm hunah chuan a rote chu ngun taka dap chhuah vek a ni ang a, “mi inrem taka [a] awmpuite”—a thurualpuite ngei, Babulon mite—chuan an rawk dâwn a ni.—Jeremia 49:9, 10.
10—Engtin nge Edom chu “kumkhuaa tihboralin” a awm? Edom hnam chungchâng sawi lâwk a nih ang ngeiin, lei hmun khata sawrkâr neia awm chu hnam chu a mang ṭhak a ni. B.C.E. kum zabi rukna laihâwl vêlah Babulon Lal Nabonidus-a’n Edom chu a la a. B.C.E. kum zabi linaah chuan, Edom ram chu Nabataean mite’n an luah a, Edom mite chuan Judai ram chhim lam, a hnua Idumai ram tia hriat tâk Chhim Ramah chuan awmhmun an khuar a. C.E. 70-a Rom-in Jerusalem an tihchhiat khân, Edom mite chu an mang ta vek a ni.
Kan Zir Tûrte:
3, 4. Edom-ho chu tlâng sâng bumboh tak leh kawr ruam thûk tak tak awmna hmuna an khawsakna chuan hmêlmate beih theih lohvah a siam a, chu chuan him hle nia inhriatna neiin ngaih ṭha takin a awmtîr a ni thei ang. Mahse, Jehova rorêlna chu pumpelh theih rual a ni lo.
8, 9, 15. Mihring finna leh chakna chuan “LALPA nî” a lo thlen hunah vênhimna a pe lo.—Jeremia 49:7, 22.
12-14. Edom mite chanchin chu Pathian chhiahhlawhte’n harsatna an hmachhawn huna lo lâwmte tân vaukhânna a ni. Jehova chuan a mite tihretheih chu a ngai ho mai mai lo.
17-20. Jakoba thlahte chungchânga he din thar lehna hrilh lâwkna hi B.C.E. 537-a Babulon aṭanga a la bângte Jerusalema an kîr leh khân a thleng famkim ṭan a. Jehova thu hrilh lâwk rêng rêng chu a lo thleng dik ziah a. A thutiamte chu kan ring tlat thei a ni.
“NINEVI HI TIHBORAL A NI DAWN”
(Jona 1:1–4:11)
Jona chuan ‘Ninevi khua, khawpui ropui taka kal a, a chung thu tlângaupui tûra’ Pathian thupêk zâwm lovin, chu mi pan lohna lamah chuan a tlân bo va. Jehova chuan “thli na tak mai tuifinriatah” chuan tlehtîrin, leh “sangha lian tak” hmangin Jona chu a vawihnihna atâna Assuria khawpuia kal tûrin a kaihruai a ni.—Jona 1:2, 4, 17; 3:1, 2.
Jona chu Ninevi khuaah chuan a lût a: “Tûn achin ni sawmliah, Ninevi hi tihboral a ni dâwn e,” tiin thuchah chu pehhêl lovin a puang chhuak a. (Jona 3:4) A thu hrilhna chuan a beisei loh ang a rah chhuah avângin, Jona chu “a thinrim a.” Jehova’n Jona chu “ûm” kûng hmangin khawngaihna a zirtîr a ni.—Jona 4:1, 6.
Bible Chungchânga Zawhnate Chhânna:
3:3—Ninevi khaw zau zâwng chu “ni thum kal” a ni tak zet em? Ni e. Hmân lai chuan Ninevi khawpui chu a chhehvêla awm khaw tê dang hmâr lama Khorsabad aṭanga chhim lama Nimrud thleng a huam tel nia hriat a ni a. Ninevi khawpui nêna inzawm chûng khawtê zawng zawng teh kual chu kilometer 100 [mêl 60] lai a ni.
3:4—Ninevi khuaa thu hril tûrin Jona khân Assuria ṭawng a zir a ngai em? Jona chuan Assuria ṭawng a thiam sa mai thei a, a nih loh pawhin ṭawng theihna mak tak a dawng pawh a ni thei bawk. Thil ni thei dang leh chu a thuchah ken chu Hebrai ṭawngin a kaitawi ang a, tuemawin a lehlinsak pawh a ni thei bawk ang. Hei hi thil nih dân a nih phei chuan, a thusawi chuan a thuchah ken chungchâng hriat châkna a neihtîr lehzual ngei ang.
Kan Zir Tûrte:
1:1-3. Lalram thu hrilhna leh zirtîr siam rawngbâwlnaa tel theih lohna tûra tih tûr dang ruahman luihna chuan rilru put hmang a dik lohzia a târ lang. Chutianga titu tuemaw chu Pathian pêk chanvo tlân chhiatsan anga sawi theih a ni.
1:1, 2; 3:10. Jehova khawngaihna chu hnam khat emaw, chi khat emaw, ho khat emaw tân chauh a ni lo. “LALPA chu engkim chungah pawh a ṭha a ni; a lainatnate chu a thil siam zawng zawng chungah a awm.”—Sâm 145:9.
1:17; 2:10. Sangha lian kawchhûnga ni thum leh zan thum Jona awmna chuan Isua thih leh thawhlehna a kâwk a ni.—Matthaia 12:39, 40; 16:21.
1:17; 2:10; 4:6. Jehova chuan Jona chu tuifinriat so but but lakah a chhan chhuak a. Tin, Pathian chuan “ûm a lo ruat a, chu chu Jona chungah a zâmtîr a, a hrehawmna ata chhan chhuak tûra a lu zâr hliahtu atân.” Tûn laia Jehova betute chuan an Pathian leh a ngilneihna chu anmahni vênghim tûr leh chhan chhuak tûrin an ring tlat thei a ni.—Sâm 13:5; 40:11.
2:1, 2, 9, 10. Jehova chuan a chhiahhlawhte ṭawngṭaina a ngaithla a, an dîlna chu a ngaihsak a ni.—Sâm 120:1; 130:1, 2.
3:8, 10. Pathian dik chuan thleng tûra a sawi chhiatna chu “a lamlêt,” a nih loh leh a rilru a thlâk a, “a ti ta lo.” Engvângin nge? Ninevi mite chuan “an kawng ṭha lo chu an hawisan” avângin. Chutiang bawkin, tûn laiah pawh thilsual titu chuan inlamlêt tak zetna a lantîr chuan Pathian thiam loh chantîr rorêlna chu a pumpelh thei a ni.
4:1-4. Mihring tumahin Pathian khawngaihna lantîr chen tûr an bituksak thei lo. Jehova khawngaihna lantîr dân kawngte sawisêl lo tûrin kan fîmkhur tûr a ni.
4:11. Jehova chuan Ninevi khaw mi 1,20,000 te a khawngaih anga “an ding leh vei pawh thliar thei lote” a khawngaih avângin, dawhthei takin lei pum puiah Lalram thuchah a hrilhtîr a ni. Kan thu hrilhna biala awmte chu kan khawngaihin, Lalram thu hrilhna leh zirtîr siamnaah ṭhahnemngai takin kan tel tûr a ni lâwm ni?—2 Petera 3:9.
‘INTIKAWLH NASA ZUAL TUR AN NI’
(Mika 1:1–7:20)
Mika chuan Israelte leh Judate sualna chu a hai lang a, an khawpuite tihṭiauna leh din thar lehna thutiam chu a sawi lâwk a ni. Samari chu “phûla thil chhe awm khâwm angin” a awm ang. Israelte leh Judate chuan an milem biakna avângin, ‘inziah kawlhna,’ a nih loh leh zahthlâk taka awm an phu hliah hliah a ni. Sala hruaina hmangin, an inziah kawlhna chu ‘mulukawlh lû angin’ tihkawlh nasat zual tûr a ni. Jehova chuan: “Aw Jakobho, . . . ka ko khâwm ngei ang che u,” tiin thu a tiam a. (Mika 1:6, 16, 2:12) Hruaitu bawlhhlawhte leh zâwlnei sualte avângin, Jerusalem pawh chu “thil chhe awm khâwm a ni ang.” Mahse, Jehova chuan a mite chu “a khâwm” ang. “Bethlehem Ephratha” aṭangin “Israelho rorêltu tûr chu . . . a lo chhuak ang.”—Mika 3:12; 4:12; 5:2.
Jehova chu Israelte lakah a dik hlel deuh vem? A thil phûtte chu a khirh lutuk em? Chutiang chu a ni lo. Jehova’n a amah chibai bûktute hnên aṭanga a phût awmchhun chu ‘dik taka tih a, khawngaihna ngainat’ leh an Pathian nêna ‘thuhnuairawlh taka’ lên dun a ni. (Mika 6:8) Mahse, Mika dam rualpuite chu an sual êm avângin, “an zînga mi ṭha ber chu buar ang a ni a: mi dik ber pawh chu hnim hlîng nei aiin a chhe zâwk” hial a, an kianga lo kal apiang chu an tina a ni. Mahse zâwlnei chuan: “[Jehova ang] Pathian tu nge awm?” tiin a zâwt a. Pathian chuan a mite chungah khawngaihna a lantîr leh ang a, “an sualna zawng zawngte chu tuifinriat mawng thûk takahte chuan [a] paih lût ang.”—Mika 7:4, 18, 19.
Bible Chungchânga Zawhnate Chhânna:
2:12—Engtik khân nge ‘Israel mi la awm chhunte hruai khâwmna’ chungchâng hrilh lâwkna chu a thlen famkim? A thlen famkimna hmasa zâwk chu B.C.E. 537-a Juda mi la awm chhunte Babulon sal tânna ata anmahni rama an kîr leh khân a ni a. Tûn laiah hian, chu hrilh lâwkna chu “Pathian Israelte” chungah a thleng famkim a ni. (Galatia 6:16) Kum 1919 aṭangin, hriak thih Kristiante chu ‘berâm anga dah khâwm’ an ni a. A bîk takin, kum 1935-a “berâm dang” zînga “mipui tam tak” hian an fin aṭangin, an “sa mur mur” a. (Johana 10:16; Thu Puan 7:9) Ṭhahnemngai takin biakna dik an chawisâng tlâng a ni.
4:1-4—“Ni hnuhnûngahte chuan” engtin nge Jehova’n ‘chi tam tak kârah ro a rêl a, hnam chak tak pawh a zilhhau’? “Chi tam tak” tih leh “hnam chak tak” tih ṭawngkamte hian hnamte emaw, sawrkâr ding laite emaw a kâwk lo. Hêng ṭawngkamte hian hnam zawng zawng zîng aṭanga lo chhuaka Jehova betu lo ni tate a kâwk zâwk a ni. Jehova chuan thlarau lam thilah an chungah ro a rêl a, anni chu a zilhhau bawk a ni.
Kan Zir Tûrte:
1:6, 9; 3:12; 5:2. Samari chu B.C.E. 740-ah Assuria-in a tichhia a—chu chu Mika dam lai ngeiin a thleng a ni. (2 Lalte 17:5, 6) Assuria mite chu Hezekia lal laiin Jerusalem thlengin an lo kal a. (2 Lalte 18:13) B.C.E. 607-ah Babulon mite chuan Jerusalem an hâl a ni. (2 Chronicles 36:19) Hrilh lâwk tawh ang ngeiin, Messia chu “Bethlehem Ephratha” khuaah a lo piang bawk. (Matthaia 2:3-6) Jehova hrilh lâwkna chu a thleng famkim lo ngai lo.
2:1, 2. Pathian rawngbâwl nia inchhâl siin, “a ram leh a felna” aia hausakna kan zawn hmasak chuan a va hlauhawm dâwn êm!—Matthaia 6:33; 1 Timothea 6:9, 10.
3:1-3, 5. Jehova chuan a mite zînga hruaitute chu dik taka thilti tûrin a beisei.
3:4. Ka ṭawngṭaina Jehova’n a ngaihthlâk kan duh chuan, sual kan ti emaw, kawng chi hnihin kan nung emaw tûr a ni lo.
3:8. Rorêlna thuchah pawh tiamin, chanchin ṭha hril tûra kan hna neih chu Jehova thlarau thianghlima tihchak kan nih chauhvin kan thawk zo thei a ni.
5:5. He Messia chungchâng hrilh lâwkna hian Pathian mite chu an hmêlmate’n an beih hunah “berâmpu pasarih [famkimna entîrna]” leh “mi ropui pariat”—mi puitlin ṭhahnem tâwk tak—chu Jehova mite zînga hma hruai tûrin din an ni dâwn tih min tiam a ni.
5:7, 8. Mi tam tak tân chuan, tûn laia hriak thih Kristiante chu Pathian malsâwmna “LALPA aṭanga dai tla ang” an ni. Chutiang a nih chhan chu Lalram thuchah puang chhuak tûra hriak thihte a hman vâng a ni a. “Berâm dang” chuan thu hrilh rawngbâwlnaa hriak thihte thatho taka thlâwpin, mite chu Pathian nêna inlaichînna nei tûrin an ṭanpui a ni. (Johana 10:16) Mi dangte hnêna hahdamna dik tak thlentu, he hnaa tel hi chanvo hlu a va ni tak êm!
6:3, 4. Pathian Jehova chu kan entawn tûr a ni a, kawm ngeih harsa emaw, thlarau lama chak lo emaw te chungah ngilnei tak leh lainatna nei tak kan ni tûr a ni.
7:7. He khawvêl suaksual tâwpna huna buainate kan hmachhawn hian, kan lunghnual mai tûr a ni lo. Mika angin, ‘Pathian nghah’ peihna chu kan lantîr zâwk tûr a ni.
7:18, 19. Jehova’n kan khawlohnate ngaihdam a peih angin, kan chunga thil tisualtute chu kan ngaidam ve tûr a ni.
‘Jehova Hmingin Kal’ Zêl Rawh
Pathian leh a mite dodâltute chu ‘kumkhuaa tihboralin an awm ang.’ (Obadia 10) Amaherawhchu, Pathian vaukhânna zâwmin leh ‘kawng ṭha lo hawisanin’ Jehova thinurna chu kan lamlêttîr thei a ni. (Jona 3:10) “Ni hnuhnûngahte chuan,” biakna dik chu sakhaw dik lo zawng zawng chunga chawisân a ni a, chutah chuan thuâwihte chu an lût nguah nguah a ni. (Mika 4:1; 2 Timothea 3:1) Chuvângin, “kan Pathian Jehova hmingin kumkhuain, chatuan thleng pawhin kal” zêl i tum tlat ang u.—Mika 4:5, NW.
Obadia te, Jona te, leh Mika lehkhabute hian zir tûr hlu min va pe tak êm! Kum 2,500 aia tama ziak tawh mah ni se, a thuchah chu tûn laiah pawh “a nung a, thil a ti thei” a ni.—Hebrai 4:12. (w07 11/1)