“Pathian Thu Ril” Chu Zawng Rawh

“Thlarau chuan engkim a chhui chhuak si ṭhîn; a ni, Pathian thu ril pawh.”​—⁠1 KORINTH 2:⁠10.

1. Eng Bible thutakte’n nge Bible zirlai mi thar chu tihlim thei?

KRISTIAN kohhrana awm zawng zawng deuh thaw hian thutak kan zir ṭantirh laia kan hlim dân chu kan hre chhuak thei ṭheuh âwm e. Jehova hming a pawimawh chhan te, hrehawm tawrhna awm a phal chhan te, mi ṭhenkhat vâna an kal chhan te, leh mi rinawm zawng zawngte tâna nakin hun tûr te chu kan hmu chhuak a. Tûn hma chuan Bible chu kan chîk tawh ṭhîn pawh a ni mai thei; mahse, hêng thilte hi mihring tam takte laka thup a nih ang bawkin kan lakah pawh thup tlat kha a ni ṭhîn a. Ram hla tak thlîrtu mi pakhat ang kan ni. Hmanrua tel lo chuan chu ram mawina chu a hmu thei mang meuh lo. Mahse, entlangna hmangin chu ram hla tak ram leilung mawina te, thing te, pangpâr te, leh thil siam dangte mawizia chu a vawikhatna atân a hmu ta a ni. Chutiang bawkin, tuemawin Pathian Lehkha Thu hre thiam tûra min ṭanpui ṭan hian, a vawi khatna atân “Pathian thu ril” chu kan hmu ṭan a ni.​—⁠1 Korinth 2:​8-10.

2. Engvângin nge Pathian Thu zirnaa kan neih hlimna chu chatuana kan neih theih?

² Bible thutak hmuh ṭan mai chu kan duh tâwk ang em? “Pathian thu ril” kan tihah hian mi dangte hriat theih loh thlarau thianghlim hmanga Kristiante hnêna târ lan Pathian finna hriat thiamna pawh a tel a ni. (1 Korinth 2:⁠7) Pathian finna chuan hlim taka kan belh chian tûr thil min va pe hnem tak êm! Pathian kawng finthlâkzia chu kan hre kim ngai lo vang. “Pathian thu ril” kan zawn chhun zawm zêl chuan, Bible zirtîrna thu bulte kan zir hmasak ber ṭuma kan neih hlimna chu chatuanin kan nei ang.

3. Engvângin nge kan thurinte kan rin nachhan kan hriat chian hle chu a ṭûl?

³ Engvâng nge chûng “thu ril” chu kan hriat thiam a ṭûl? Kan thurin chauh ni lovin, chu mi kan rin nachhan​—⁠kan thurin nghahchhan lungphûm​—⁠hriat thiamna chuan kan rinna leh kan rinngamna chu a tichak a. Pathian Lehkha Thu chuan “Pathian duhzâwng, a ṭha leh lawm tlâk leh, ṭhat famkim chu [kan ] hriatfiah,” a nih loh leh finfiah theih nân kan ngaihruat thiamna hmang tûrin min ti a ni. (Rom 12:​1, 2) Jehova’n nun kawng engemaw tak zawh tûra min tihchhan hriat thiamna chuan a thu âwih tlat kan tumna chu a tinghet a. Chuvâng chuan, “thu ril” hriatna chuan dân lo anga thilti tûra thlêmna do tûrin chakna min pe a; tin, “thil ṭha tiha ṭhahnemngai” tûrin min chêttîr thei a ni.​—⁠Tita 2:⁠14.

4. Bible zirnaah hian eng nge tel?

 ⁴ Thu rilte hre thiam tûr chuan kan zir a ngai a. Amaherawhchu, thil zir chu thil engemaw a pâwnlânga chhiar mai nên a inang lo. Kan thu hriat thar chu kan hriat tawh sa nêna a inkûngkaih dân ngun taka chût a tel a ni. (2 Timothea 1:13) Tin, thusawi engemaw chutianga sawi a nih chhan hriatna pawh a tel bawk. Bible zirnaah chuan kan thu zirte chu thu tlûkna fing tak siamna leh mi dangte ṭanpuina kawnga kan hman theih dân tûr ngun taka chhûtna a tel tûr a ni. “Pathian Lehkha Thu zawng zawng hi Pathian thâwk khuma pêk” a nih avângin, kan zirnaah chuan ‘Pathian kaa thu tin chhuak’ chu a tel bawk tûr a ni. (2 Timothea 3:​16, 17; Matthaia 4:⁠4) Bible zir tûr chuan taihmâk a ngai mai thei! Mahse, chu chu thil nuam tak a ni theiin, “Pathian thu ril” hriat thiamna chu thil khirh lutuk a ni lo thei bawk.

Jehova Chuan Inngaitlâwmte Chu Hre Thiam Tûrin A Ṭanpui

5. Tuin nge “Pathian thu ril” te hre thiam thei?

⁵ School-a ti ṭha pâwl i nih loh va, zirna nei ṭhang i nih loh pawhin, “Pathian thu ril” chu i hriat thiam phâk bâk ni tûrah i ngai tûr a ni lo. Isua’n leia a rawngbâwl chhûng khân, Jehova chuan A thiltum hriat thiamna chu mi fing leh mi bengvârte hnênah ni lovin, Pathian chhiahhlawhte zirtîrna dawng tûra inngaitlâwm lehkha thiam lo leh mi mâwl takte hnênah a puang a. School-a zirna sâng dawngte nêna khaikhin chuan anni chu nausên ang mai an ni. (Matthaia 11:25; Tirhkohte 4:13) ‘Pathianin a hmangaihtute tâna a thil buatsaihte’ chungchângah, tirhkoh Paula chuan a rinpuite hnênah heti hian a ziak a ni: “Keini erawh chu chûng chu Pathianin thlarauvin min hriattîr ta a ni; thlarau chuan engkim a chhui chhuak si ṭhîn; a ni, Pathian thu ril pawh,” tiin.​—⁠1 Korinth 2:​9, 10.

6. Korinth thawn khat 2:10 hian eng awmzia nge a neih?

⁶ Engtin nge Pathian thlarau chuan “Pathian thu ril pawh” tiama ‘engkim a chhui chhuah ṭhin’? Jehova chuan Kristian tinte hnêna a hranga thutak puan chhuah ai chuan, a thlarau chu a inawpna pâwl kaihruai tûrin a hmang a, chu chuan Pathian mi inlungrualte chu Bible hriat thiamna a pe a ni. (Tirhkohte 20:28; Ephesi 4:​1-6) Khawvêl pum huapa Jehova Thuhretute kohhran zawng zawng chuan Bible zirna inang khat chu an nei a. Kum engemaw zât chhûngin Bible zirtîrnate chu an zir chhuak vek a ni. Thlarau thianghlim chuan “Pathian thu ril” hre thiam tûra neih ngai rilru put hmang nei tûra mite ṭanpui tûrin kohhran kal tlangin hna a thawk a ni.​—⁠Tirhkohte 5:⁠32.

‘Pathian Thu Rila’ Telte Chu

7. Engvângin nge mi tam takin “Pathian thu ril” an hriat thiam loh?

⁷ “Thu ril” tih chu thil harsa ni kher tûrah kan ngai tûr a ni lo. “Pathian thu ril” hriatna chu mi a tam zâwkte laka thup a ni a, chu chu Pathian finna neih a harsat luat vâng ni lovin, Setana chuan mite chu Jehova’n A inawpna pâwl kal tlanga a pêk ṭanpuina hnâwl tûra a bum vâng zâwk a ni.​—⁠2 Korinth 4:​3, 4.

8. Paula’n Ephesi khuaa mite hnêna a lehkha thawn bung thumnaah eng thu ril chungchâng nge a sawi?

⁸ Ephesi khuaa mite hnêna Paula lehkha thawn bung 3-na chuan ‘Pathian thu rilah’ chuan Jehova mi zawng zawng deuhthawin ṭha taka an hriat thiam thutak tam tak a tel tih a târ lang a, chûngah chuan thutiam Thlah nihna te, mihring zîng aṭanga vân lam beiseina nei thlan chhuahna te, leh Messia Lalram te a tel a ni. Paula chuan: “Chu chu tûn laia a tirhkoh thianghlimte leh a zâwlnei thianghlimte hnênah thlarau hriattîrin a awm ta ang hian, tûn hma lam khân mihring fate hnênah hriattîrin a awm ngai lo; chu chu hei hi a ni, . . . Krista Isuaah chuan Jentailte hi roluahpui te, taksa pêngpui te, thutiam dawnpui te an nih hi,” tiin a ziak a. Paula chuan ‘thurûk chatuan aṭanga Pathiana inthupa awm enkawlna chu engnge ni tih mi zawng zawng entîr tûra’ ruat a nih thu a sawi a ni.​—⁠Ephesi 3:​5-9.

9. Engvângin nge “Pathian thu ril” hriat thiam chu chanvo hlu a nih?

⁹ Paula chuan Pathian duhzâwng chu ‘vân hmunahte [pawh] khian lalna leh thuneihnate hnênah Pathian finna tinrêng kohhranho avângin hriattîra a awm’ bawk tûr thu a hrilhfiah zawm a. (Ephesi 3:​10, 11) Kristian kohhranho a dâwrnaa Jehova finna hmuh leh hriat  thiam chu vântirhkohte chuan an hlâwkpui a ni. Vântirhkohte pawhin an ngaihven thilte han hriat thiam tâk mai chu chanvo hlu a va ni êm! (1 Petera 1:​10-12) A dawt lehah, Paula chuan “mi thianghlim zawng zawng nên chuan [Kristian rinna] a zauzia te, a seizia te, a sânzia te, a thûkzia te hriat chian” kan tum tûr a ni tih a sawi a. (Ephesi 3:​11, 14-19) Tûnah chuan kan hriat thiamna tizau thei thu ril entîrna ṭhenkhat i lo ngaihtuah ang u.

Entîrna Thu Rilte

10, 11. Pathian Lehkha Thu-in a sawi dânin, engtik khân nge Isua chu Pathian vân lam ‘hmeichhe’ ‘thlah’ bul ber a lo nih?

¹⁰ Isua chu Genesis 3:​15-a sawi Pathian vân lam ‘hmeichhe’ ‘thlah’ bul ber a ni tih kan hria a. Kan hriat thiamna tizau tûr chuan, heti hian kan inzâwt thei a ni: ‘Engtikah nge Isua chu thutiam Thlah a lo nih? Chu chu mihring anga a lo awm hma khân nge, mihring anga a lo pian khân nge, baptisma a chan khân zâwk?, a nih loh leh thihna ata kaih thawh leh a nih khân?’ tiin.

¹¹ Pathian chuan hrilh lâwknaa a “hmeichhia” anga a sawi, a inawpna pâwl vân lam pêng chuan rûl lu tithitlingtu tûr thlah a hring chhuak dâwn tih a tiam a. Mahse, kum sâng têl a liam zêl a, Pathian hmeichhia chuan Setana leh a hnathawhte tiboral thei tûr khawp thlah chu a hring chhuak lo. Chuvâng chuan, Isaia hrilh lâwkna chuan hmeichhia chu “ching” leh “rilrua lungngai tak” tiin a ko a ni. (Isaia 54:​1, 5, 6) A tâwpah chuan, Isua chu Bethlehem khuaah a lo piang a. Mahse, baptisma a chan hnuah chauh Pathian thlarau lam fa ni tûrin thlarauva hrin a ni a, Jehova chuan: ‘Hei hi ka Fapa duh tak a ni,’ tiin a puang chhuak a ni. (Matthaia 3:17; Johana 3:⁠3) A tâwpah chuan hmeichhe “thlah” bul ber chu a lo lang ta. A hnuah chuan, Isua zuitute pawh hriak thih an niin, thlarauva hrin an ni a. Jehova “hmeichhia,” rei tak chhûng “fa hring ngai lo” chu a tâwpah chuan hlimin a “au chhuak” thei ta a ni.​—⁠Isaia 54:1; Galatia 3:⁠29.

12, 13. Eng Bible chângte hian nge leia hriak thih Kristian zawng zawngte chu “bawi rinawm, fing tak” pâwla din an ni tih târ lang?

¹² Min hriattîr tawh thu ril entîrna pahnihna chu mihring zîng ata mi 1,44,000 thlan chhuah a tum chungchâng hi a ni a. (Thu Puan 14:​1, 4) Isua’n a chhûngte tâna a hun taka “chaw” sem tûra a sawi “bawi rinawm, fing tak” chu eng huna mi pawh ni se, leia hriak thih zawng zawngte sawina a ni tih kan ring a ni. (Matthaia 24:45) Eng Bible thuin nge he hriat thiamna hi a dik tih finfiah? Isua chuan thlarau lam panga a unaute tichaktu Kristian tupawh a sawina a ni thei ang em?

¹³ Pathian chuan Israel hnam hnênah: “Nangni hi mi hriatpuitute in ni, ka chhiahhlawh ka thlana pawh chu,” tiin a hrilh a. (Isaia 43:10) Mahse, C.E. 33, Nisan 11-ah khân, Isua chuan Israel hruaitute chu Pathianin an hnam chu A chhiahhlawh an nihna ata a hnâwl ta tih a hrilh a. Ani chuan: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” a ti a. Isua’n mipui hnênah: “En teh u, in in chu aruaka hnutchhiah che uin a awm ta,” a ti bawk. (Matthaia 21:43; 23:38) Jehova chhiahhlawh an nih angin, Israela chhûngte chu an rinawm lo va, an fing hek lo. (Isaia 29:​13, 14) A hnu lawk, chu mi nî vêkah Isua chuan: “Bawi rinawm, fing tak . . . chu, tu ber nge ni ang le?” tia a zawh khân, ani chuan ‘Pathian chhiahhlawh rinawm ni tûra Israel thlâktu tûr hnam fing chu tu nge ni ang?’ tih a zawhna a ni. Tirhkoh Petera chuan hriak thih Kristian kohhranho hnêna: “Nangni zawng . . . hnam thianghlim, Pathian mite ngei in ni si a,” tia a sawi khân a chhânna chu a pe a ni. (1 Petera 1:4; 2:⁠9) Chu thlarau lam hnam, “Pathian Israelte” chu Jehova chhiahhlawh tharte an lo ni a. (Galatia 6:16) Hmân lai Israel mi zawng zawngte chu “chhiahhlawh” pâwl khata din an nih ang bawkin, eng huna mi pawh ni se leia hriak thih Kristian zawng zawngte chu “bawi rinawm, fing tak” pâwl khata din an ni. Pathian bâwih kal tlanga “chaw” kan dawng hi chanvo ropui a va ni êm!

Mahnia Zirna Neih Chu Hlimawm Tak A Ni Thei

14. Engvângin nge Bible chhiarna mai aia tam, zirna neih chuan hlimna a thlen?

¹⁴ Pathian Lehkha Thu hriat thiamna thar hrilh hriat kan nih hian, chu chuan kan rinna a tihchak avângin kan lâwm hle a ni lâwm ni? Chuvângin, Bible chhiar mai aia tam zâwk, zirna  neih chu hlimawm tak a ni thei. Chutiang a nih avângin, Kristian thu leh hla chhuahte i chhiar hunah, heti hian inzâwt rawh: ‘He hrilhfiahna hi ka lo hriat tawh ṭhin dân nên engtin nge a danglam? He thuziakin a sawi hriatna thar thlâwptu tûr Bible châng dang emaw, thu dang emaw ngaihtuah chhuah theih ka nei em?’ tiin. Zir chîkna neih belh a ngai a nih chuan, a chhânna i mamawh zawhna chu ziak chhuak la, chu chu nakina zir belh atân dah ang che.

15. Eng zirna nge hlimawm tak ni thei a, engtin nge hlâwkna tluantling a nih theih?

¹⁵ Eng ang zirnain nge hriat thiamna thar a pêk che avânga hlimna neihtîr che? Mihringte hlâwkpui atâna Pathian siam thuthlung chi hrang hrangte chipchiar taka zirna chu a bengvârthlâk hle thei a. Isua Krista chungchâng sawina hrilh lâwknate zirna emaw, Bible-a zâwlnei bu zînga a engemaw ber a châng indawt zêla ngaihtuahna emaw chuan kan rinna a tichak thei a ni. Rinna tichak theitu dang chu Jehovah’s Witnesses​—⁠Proclaimers of God’s Kingdom tih lehkhabu hmanga tûn lai Jehova Thuhretute chanchin ennawn hi a ni. * Tin, Vênnainsâng-a “Chhiartute Zawhna” tihchhuah tawhte ennawnna chuan Bible châng hriat thiamna chiang zâwk a pe thei che a. A chhânna pêkte lama min hruai thlengtu Bible châng chhût dânte chu ngaihsak bîk rawh. Chu chuan i “hriat theihnate” sâwizawi tûr leh hriat thiamna nei tûrin a ṭanpui ang che. (Hebrai 5:14) Zirna i neih laiin, i Bible-ah emaw, lehkha phêk dangah emaw chhinchhiahna siam rawh, chutichuan i zirna neih chuan i tân leh i ṭanpui theih tûrte tân hlâwkna tluantling a nei ang.

Naupangte Chu Bible Zirna Nuamti Tûrin Ṭanpui Rawh

16. Engtin nge naupangte chu Bible zirna nuamti tûra i ṭanpui theih?

¹⁶ Nu leh pate chuan an fate thlarau lam châkna chawk tho tûrin tihtheih tam tak an nei a. Naupangte’n thu ril an hriat thiam theih dân chu ngainêp suh. Naupangte chu chhûngkuaa Bible zirna atâna thu pakhat zir bing tûra i ruat a nih chuan an thil hmuh chhuahte chu i zâwt thei a. Chhûngkuaa zirnaah chuan naupangte chu an rinna an humhim theih dân tûr leh an thil zirte a dikzia finfiah tûra ṭanpui tûrin tihchhinna hun a tel thei bawk ang. Chu bâkah, “See the Good Land” * tih brochure chu Bible ram awm dân zirtîr nân leh chawlhkâr tina in Bible chhiarte tihchian nân i hmang thei bawk a ni.

17. Engvângin nge mahnia Bible zirna kan neihnaah inbûk tâwk a ngaih?

¹⁷ Mahnia Bible zirna chu tuiawm tak leh rinna tichaktu a ni thei a; mahse, kohhran inkhâwmte atâna i inpuahchahna dîp lo tûrin fîmkhur rawh. Inkhâwmnate hi Jehova’n “bawi rinawm, fing tak” hmanga min zirtîrna kawng dang a ni. Mahse, zir belhna chuan inkâwmnaah​—⁠entîr nân, Kohhran Lehkhabu Zirnaah emaw, Theocratic Rawngbâwlna School atâna chawlhkâr tin Bible chhiara thu pawimawh hrilhfiahnaah emaw​—⁠chhânna awmze nei tak pe tûrin a ṭanpui ang che.

18. Engvângin nge “Pathian thu ril” zir tûra thawh rim chu thil manhla tak a nih?

¹⁸ Thûk taka Pathian Thu zirna chuan Jehova hnaih tûrin a ṭanpui thei che a. Chutiang zirna hlutzia chu târ langin, Bible chuan: “Finna hi himna a ni si, tangka sum himna a ni bawk; hriatna ṭangkaizia erawh chu, a neitu nun chu finnain a tiharh ṭhîn,” a nih loh leh a humhim ṭhîn a ti. (Thuhriltu 7:12) Chuvâng chuan, thlarau lam thil i hriat thiamna tithûk zual tûra thawh rim chu a manhla a. Bible chuan “Pathian hriatna chu i chhar chhuak ang,” tiin a zawng rengtute chu a tiam a ni.​—⁠Thufingte 2:​4, 5.  (w07 11/1)

[Footnote-te]

I Hrilhfiah Thei Em?

• Engte nge “Pathian thu ril” chu?

• Engvângin nge thu ril kan zirna chu a tâwp ngai tûr a nih loh?

• Engvângin nge “Pathian thu ril” hriat thiam avânga hlimna chu Kristian zawng zawngte tân a nih?

• Engtin nge “Pathian thu ril” chu i hlâwkpui lehzual theih?

[Zirlai Atâna Zawhnate]