“Tangkarua Hi Ka Ta A Ni A, Rangkachak Hi Ka Ta A Ni”

VANTLANG Kum Chhiar hma kum zabi ruknaah chuan, Persia Lal Kura chuan Pathian mite chu Babulon sal tânna aṭangin a chhuah zalên a. Mi sâng têlte chu Jehova biak in ram vek tawh sa ṭha tûrin Jerusalemah an kîr leh a ni. Chûng kîr lehte ei leh bâr lam dinhmun chu a thlamuanthlâk lo hle a, an chhehvêla awm mi kawlh takte lahin an in sak ṭhat lehna hna chu an dodâl bawk nên. Chuvângin, hnathawktu ṭhenkhat chuan in sak ṭhatna hna pawimawh tak chu an zo thei ngai ang emaw tih an ngaihtuah a ni.

Zâwlnei Hagaia kal tlangin, Jehova chuan in satute chu A ṭanpui dâwn tih a tiam nawn a. “Hnam tinrêng ka tinghîng ang a, hnam tinrêng thil duhzâwngte chu a lo thleng ang a, he in hi ropuinain ka tikhat ang,” tiin Pathian chuan a sawi a. A sa ṭhatute ei leh bâr lam ngaihtuahna chungchângah, Hagaia chuan he thuchah hi a sawi a ni: “Tangkarua hi ka ta a ni a, rangkachak hi ka ta a ni, tih hi LALPA chhuak a ni,” tiin. (Hagaia 2:​7-9) Hagaia’n hêng thu thlamuanthlâk takte a sawi hnu kum nga chhûngin biak in sak ṭhat leh hna chu zawh fel a ni.​—⁠Ezra 6:​13-15.

Hagaia thute chuan tûn laia Pathian chhiahhlawhte chu Jehova biakna nêna inkûngkaih hna lian tham takte an thawh chhûng hian a chêttîr bawk a. Kum 1879-a bâwih rinawm leh fing tak pâwl chuan, chutih laia Zion’s Watch Tower and Herald of Christ’s Presence tia koh, he thu leh hla chhuah a tihchhuah ṭantirh khân, he thu hi a telh a ni: “‘Zion’s Watch Tower’ chuan, JEHOVA ṭanpuina a dawn kan ring a, chuvângin mihring ṭanpuina a dîl ngai lo vang a, a ngên ngai hek lo vang. ‘Tlânga rangkachak leh tangkarua zawng zawng hi ka ta a ni,’ tituin a ṭûl ang sum a pêk loh hunah, he thu leh hla chhuah hi tihtâwp a hun tawh a ni tih kan hria ang,” tih hi.

He thu leh hla chhuah hi tihtâwp a ni ngai lo va. A chhuak hmasa ber chu Sâpṭawng chauhva chhuah a ni a, copy 6,000 tihchhuah a ni. Tûnah chuan, a chhuak apiang chu ṭawng 161-in chawhrualin copy 28,578,000 chhut chhuah a ni. * Awake! magazine chu ṭawng 81-in chawhrualin copy 34,267,000-a chhut chhuah a ni bawk.

Jehova Thuhretute chuan Vênnainsâng-in a tum ber​—⁠Jehova chu lei leh vâna Lal Chungnungber anga chawimawi leh a Lalram chanchin ṭha puan chhuah​—⁠ang chi hna dang tam tak an thawk a. (Matthaia 24:14; Thu Puan 4:11) Kum 1879-a he thu leh hla chhuahin a au chhuahpui ang rin tlatna chu tûn laia Thuhretute chuan an nei a ni. Anni chuan Pathianin an hna a ṭanpui tih leh a malsâwmna dawng he  hna atân sum leh pai chu a awm reng ang tih an ring nghet a. Mahse, a tak takah chuan eng kawngin nge Jehova Thuhretute rawngbâwlna chu chhawmdâwl a nih? Tin, khawvêl pum huapa chanchin ṭha hril tûrin eng hnate nge an thawh?

Engtin Nge Hna Chu Chhawmdâwl A Nih?

Jehova Thuhretute’n vântlâng hmuha thu an hril hian, “He hna thawk tûr hian hlawh pêk in ni em?” tia zawh an ni fo va. Hlawh pêk an ni lo tih chu an chhânna a ni. An hunte chu phal takin an pe a. Hêng chanchin ṭha hriltute hian lâwmna thinlungin a tur avângin Jehova leh Bible thutiam nakin hun ṭha zâwk chungchâng mi dangte hnêna hrilh nân dârkâr tam tak an hmang a. An tâna Pathian thiltihte leh chanchin ṭhain anmahni nun leh an thlîr dân a tihhmasâwn dânte chu an hlut hle a ni. Chuvâng chuan, hêng thil ṭhate hi mi dangte hrilh ve an duh a. Chutianga an tihnaah Isua thu sawi: “Athlâwnin in hmu a, athlâwnin pe ang che u,” tih thu bul chu an nunpui a ni. (Matthaia 10:⁠8) Dik tak chuan, Jehova leh Isua tâna thuhretu nih an duhna chuan an rinna chu hmun hla taka awmte hnên thlenga hrilh nân mahni sum sêng tûrin a chêttîr a ni.​—⁠Isaia 43:10; Tirhkohte 1:⁠8.

He thu hrilhna hna atân leh thawh chhuah nâna thil hman​—⁠lehkha chhutna khâwlte, office-te, Assembly Hall-te, missionary home-te, leh thil dang dangte​—⁠atân nasa taka insênso a ngai a. Chûng sum leh paite chu khawi aṭangin nge a lo awm? Hêng zawng zawng atâna sum leh pai hi phal taka thawhlâwm thawhte aṭanga  lo lût a ni. Jehova Thuhretute chuan a inawpna pâwl thiltih atân an kohhran mi leh sate hnên aṭangin sum a phût lo va, an thu leh hla chhuah sem chhuahte atân a man an tuk ngai hek lo. Tupawhin an zirtîrna ṭanpui nâna thawhlâwm an thawh duh chuan, Thuhretute chuan lâwm takin an pawm a ni. Khawvêl puma chanchin ṭha hril tûra an thawh rimna zînga pakhat​—⁠ṭawng lehlinna​—⁠chungchâng chauh ilo ngaihtuah ang u.

Ṭawng 437-a Thu leh Hla Tihchhuahna

Jehova Thuhretute tihchhuah thu leh hlate chu kum tam tak chhûng khawvêla lehlin tam ber zînga mi a ni char char a. Tract-te, brochure-te, magazine-te, leh lehkhabute chu ṭawng 437-a leh chhuah a ni. Chanchin ṭha hrilhnaa tel thiltih dangte ang bawkin, ṭawng lehlinna atân sum leh pai tam tham tak hman ral a ngai a. Ṭawng lehlinna ngawr ngawrah pawh hian engte nge tel?

Jehova Thuhretute tihchhuah tûr thu leh hla buatsaihtu editor-te’n Sâpṭawnga thuziak an peih fel hunah, khawvêl hmun tina awm ṭawng letling thiamhote hnênah computer kaltlanga thawn chhuah a ni a. Ṭawng letlingtu pâwl tinte chuan an lehchhuahna ṭawng zêl atân mawh an phur ṭheuh a ni. An thawh lai hna a tam dân leh an leh chhuahna ṭawng a harsat dân a zirin, hêng pâwlte hi mi 5 aṭanga 25 thleng an ni thei a ni.

Thuziak lehlin tawh hnu chu endik (check) leh chhiar chian (proofread) a ni a. A tum ber chu atîra thuziakin a sawi tumte a theih ang tâwka dik tak leh fiah taka lehchhuah a  ni. Hei hian harsatna chi hrang hrang a thlen a. Thu mal engemaw bîk takte awmna thuziakte an lehlin hunah, a lettute leh a chhiar chiangtute (proofreaders) chuan lâkchhuahna ṭawng (Sâpṭawng emaw, lâkchhuahna ṭawng dang French, Russian, leh Spenish ang chite emaw) leh lehchhuahna ṭawngah ngawrh taka zir bingna an neih a ngai thei a. Entîr nân, Awake! chanchinbua thuziak chu khâwl lam thil emaw, hmân lai thilthleng chanchin lam emaw sawina a nih hian, a lettute chuan nasa taka zir bingna an neih a ngai ṭhîn.

Ṭawnglettu tam takte chu Jehova Thuhretute branch office-ahte chuan hunbi kimin emaw, hunbi neiin emaw hna an thawk a. Mi dangte chuan an lehchhuahna ṭawng an hmanna hmunah awmin an letling bawk. Ṭawng letlingtute chuan hlawh an nei lo va. Hunbi kima ṭawng letlingtute chu awmna tûr leh eiin tûr pêk an ni a, an mamawh bulpui atâna an sênsote chu tlêm azâwng rulhsak an ni bawk. Khawvêl pumah hian Thuhretu ṭawng leta rawngbâwl mi 2,800 vêl an awm a. Tûnah chuan Jehova Thuhretute branch office 98 chuan ṭawng lettu pâwlte chu a thleng mêk emaw, hmun danga awmte chu a enkawl mêk emaw a ni. Entîrna pakhat chauh han pe ta ila, Russia ram branch office chuan hunbi kim emaw, hunbi nei emawa ṭawng lettu mi 230 chuangte chu a enkawl a, anni chuan ṭawng 30 aia tam an letling a, chûng zîngah chuan ṭawng hriat hlawh vak lo Chuvash te, Ossetian te, leh Uighur ṭawngte a tel a ni.

Ṭha Lehzuala Ṭawng Lehlinna

Ṭawng dang zir tum apiangin an hriat angin, thu khirh takte dik taka lehchhuah chu a namai lo hle a. A tum ber chu Sâpṭawngin a sawi tum dik taka lehchhuah a ni a, chutih rual ruala lehlin a ni tih pawh hriat mang loh tûra a mâm thei ang bera dah chhuah hi a ni. Chutianga dah chhuak thei tûr chuan thiam a ngai hle. Ṭawng let thiam tak ni tûr chuan mi tharte tân a kum têla beih a ngai a, Jehova Thuhretute chuan chutiang zirtîrna chu a pe zawm zêl a ni. Chûng  zirtîrtute chuan a châng chuan ṭawng lettute chu tlawhin, ṭawng leh dân hmang leh computer hman dânte an thiam lehzual theih nân zirtîrnate an pe ṭhîn a ni.

He zirtîrna hian rah ṭha tak a chhuah a. Entîr nân, Jehova Thuhretute Nicaragua branch office chuan: “Kan Miskito ṭawng lettute chuan a vawi khatna atân Mexico branch aṭanga lo kal zirtîrtu hnên aṭangin lehlin dân leh a kal hmangte zirtîrna an dawng a ni. Hei hian kan ṭawng lettute hnathawh dân nasa takin a khawih danglam a. An ṭawng lehlin pawhin nasa takin hma a sâwn phah a ni,” tiin report a pe a ni.

Thinlung Khawihtu Ṭawngkamte

Mite pianpui ṭawnga Bible leh Bible ṭanchhan thu leh hlate tihchhuah kan tum chhan chu an thinlung khawih nân a ni a, chutiang chu thil awm dân a ni ta rêng a ni. Kum 2006 khân, Bulgaria rama Jehova Thuhretute chu anmahni ṭawnga New World Translation of the Christian Greek Scriptures tihchhuah a nih khân an phûr hle a. Bulgaria branch office chuan lâwmthu sawina tam tak an dawn thu a sawi. “Tûnah chuan Bible chuan mite rilru chauh ni lovin, an thinlung a khawih tak zet ta” tiin Kohhrana mite chuan an sawi a. Sofia khawpuia putar pakhat chuan: “Bible hi kum tak tak chhûng ka lo chhiar tawh a; mahse, hetianga ṭawng lehlin hriat nuam tak leh thinlung thleng nghâl zak thei hi ka la chhiar ngai lo,” a ti. Chutiang bawkin, Albania rama tualchhûng thuhretu pakhat chuan an ṭawnga New World Translation a dawn hnu chuan: “Albania ṭawnga Pathian ṭawngkam chhuak hriat chu a va nuam tak êm! Jehova’n kan ṭawng ngeia min be ta hi chanvo hlu a va ni tak êm!” a ti.

Ṭawng letlingtu pâwl pakhat tân Bible bu pum letling tûr chuan kum engemaw zât a ngai mai thei a. Mahse, mi maktaduai telte’n a vawi khatna atâna Pathian Thu an hriat thiam tak tak hian, an thawh rimna zawng zawng chu a manhla i ti ve lâwm ni?

“Pathian Hnathawhpuite Kan Ni”

Ṭawng lehlin chu chanchin ṭha hlawhtling taka hril tûra ṭûl thiltih tam tak zînga pakhat mai a ni a. Lehkha ziak te, lehkha chhutchhuah te, leh Bible ṭanchhan thu leh hlate thawn chhuah leh Jehova Thuhretute branch office-te, bialte, leh kohhrante nêna inkûngkaih thiltih dang tam tak atân thawh rim leh insênso a ngai hle a ni. Mahse, Pathian mite chu he hna hlen chhuak tûrin “mahni duh thuin an inpe” a ni. (Sâm 110:⁠3) Anni chuan an ṭanpui theihna leh thawhlâwm an thawh theihna chu chanvo hlu-ah an ngai a, chu chu chawimawina angin an thlîr bawk, chuvângin Jehova chuan anni chu a “hnathawhpuite” angin a thlîr a ni.​—⁠1 Korinth 3:​5-9.

“Tangkarua hi ka ta a ni a, rangkachak hi ka ta a ni,” titu chu a hna thawh zawh nân sum leh pai lama kan ṭanpuinaah a innghat lo tih chu a dik a. Mahse, Jehova chuan a chhiahhlawhte hnênah “hnam zawng zawng” hnêna nun chhanhim thei thutak hrilh nâna thawhlâwm thawhtîrin a hming tihthianghlimnaa tel ve theihna chanvo chu a pe a ni. (Matthaia 24:14; 28:​19, 20) Engtikah mah thawh nawn leh ngai tawh loh tûr he hna i theih ang tâwka ṭanpui chu i châk hle a ni lâwm ni? (w07 11/1)

[Footnote]

[Phêk 22-naa bâwm]

“CHUNGTE CHUAN MUK TAKIN THIL MIN NGAIHTUAHTIR A NI”

Kum 14 mi hmeichhe tleirâwl pakhat chuan Jehova Thuhretute Cameroon ram branch office-ah heti hian lehkha a thawn a: “Kumin tâna ka school thil mamawhte ka lei hnuah, nikuma ka zirlaibu pahnih chu francs 2,500 [$5 U.S.]-in ka hralh thei a. Hêng pawisate leh ka pawisa khâwl dang francs 910 [$1.82 U.S.] chu ka rawn thawn e. In hna ṭha thawhte chhunzawm zêl tûrin ka fuih duh che u a. Vênnainsâng leh Awake! magazine-te avâng hian ka lâwm hle. Chûng chuan mûk takin thil min ngaihtuahtîr a ni,” tiin.

[Phêk 22-naa bâwm/milem]

THAWHLAWM DANGDAI TAK

[Phêk 22-naa thu lâk chhuah]

Jehova Thuhretute Mexico rama branch office chuan Chiapas State-a awm, kum ruk mi lâwm nachâng hre tak Manuel-a hnên aṭangin he lehkha hi a dawng a. Lehkha a la ziak thiam loh avângin, a ṭhianpa chuan a ziahsak a. Manuel-a chuan: “Ka pi chuan vawkpui pakhat min pe a. Chu vawkpui chuan no a lo neih chuan a ṭha ber chu ka thlang a, unaute ṭanpuinain ka châwm chho va. Ka vawk hralh man chu hmangaihna nasa tak nên thawhlâwmah ka rawn thawn a ni. Vawk chu kg 100 a tling a, pesos 1,250 [$110 U.S.] ka hmu a ni. Khawngaihin he pawisa hi Jehova tân hmang ang che u,” tiin.

[Phêk 23-naa bâwm]

‘HEI HI BIBLE LEHLIN NAN HMANG RAWH U’

[Phêk 23-naa thu lâk chhuah]

Kum 2005, Ukraine-a Jehova Thuhretute district inkhâwmpuiah khân, Ukraine ṭawngin New World Translation of the Christian Greek Scriptures chu tlângzarh a ni a. A tûkah chuan he lehkha hi inkhâwmpui thawhlâwm bâwmah chhar a ni: “Kum kaw mi ka ni a. Greek Scriptures avângin ka lâwm e. Ka nu chuan ka nau nêna school kal nân bus chuan man tûr hi min pe a. Mahse, ruah a sûr loh ni chuan school chu kein kan kal a, hêng hryvnia 50 [$10 U.S.] hi kan khâwl a ni. Ka nau nên chuan hei hi Ukraine ṭawnga Bible bu pum lehlin nâna in hman kan duh a ni,” tiin.

[Phêk 20, 21-naa bâwm]

Ṭhenkhatin An Thlan Pek Chhuah Dan Kawngte

KHAWVEL PUM HUAP RAWNGBAWLNA THAWHLAWM

Tam tak chuan, “Khawvêl Pum Huap Rawngbâwlna Atâna Thawhlâwm​—⁠Matthaia 24:14.” tih inziak thawhlâwm bâwma an thawh tûr chu an dah hrang, a nih loh leh an bituk a ni.

Thla tinin, kohhrante chuan chûng thawhlâwmte chu an ram chhûng Jehova Thuhretute office-ah an thawn ṭhîn a. Phal taka pêk thawhlâwmte chu hêng office-ah te hian thawn tlang nghâl theih a ni bawk. Branch office address-te chu he magazine phêk 2-naah hian hmuh theih a ni. Cheque hmanga pêk a nih chuan a dawngtu tûr hming ziaknaah “Watch Tower” tih ziah tûr a ni. Rangkachak leh lunghlu emaw, thil hlu dang emaw pawh thawh theih a ni a. Hetiang chi thawhlâwmte hi, thilthlâwnpêk liau liau a nih thu ziakna lehkha nêna thawn tel ngei ngei tûr a ni.

CONDITIONAL-DONATION TRUST RUAHMANNA *

Pawisa chu Watch Tower hman atân kawltîr theih a ni a. Mahse, an dîl leh hunah pêkkîr leh a ni ang. Hriat belh i duh chuan i awmna ram enkawltu branch office bia ang che.

PEK DAN TUR RUAHMANNA SIAM *

Khawvêl pum huap Lalram rawngbâwlna atân pawisa fai pêk theih a nih bâkah, pêk dân dang pawh a awm a. Chûng zîngah chuan hêngte hi a tel a ni:

Zângna Dawmna: Watch Tower chu vânduai palh thila zângna dawmna dawngtu tûr atân emaw, hna bânsan hun/pension huna pawisa dawngtu tûr atân emaw a dah theih a ni.

Bank-a Pawisa Dah: Bank-a pawisa dahte, pawisa dah luhna lehkhate, a nih loh leh hnathawh bânsan huna pawisa lâk tûrte chu Watch Tower kawltîr emaw, thih huna pêk atân emawin tualchhûng bank kalhmang milin a dah theih a ni.

Stock leh Bond-te: Stock leh bond-te chu Watch Tower hnêna thil pêk liau liau angin a pêk theih.

In Hmun Lo Ram: In hmun lo ramte chu thil pêk liau liau anga pêk theih a ni a, chênchilhna in a nih chuan, a petu dam chhûng zawnga awm chhun zawm theihna hauh chungin a pêk theih a ni. In hmun lo ram chungchânga inhlan chhâwnna engpawh neih hmain branch office râwn hmasa ang che.

Gift Annuity: Gift annuity tih chu miin pawisa emaw, dahkham thil emaw chu Jehova Thuhretute hman lai corporation pakhat tâna dah tûra ruahmanna a siam hi a ni a. Tichuan, a petu, a nih loh leh a petuin a ruat tuemaw chuan a dam chhûng zawngin kum tin an inremsiamna zât pawisa chu a dawng ziah dâwn a ni. Gift annuity a siam kum chuan, a petu tân income-tax tihhniamsak a ni ṭhîn.

Thurochhiah leh Pawisa Inkawltîr: In hmun lo ram emaw, pawisa emaw chu dân ang thlapa siam thuro chhiah hmangin Watch Tower hnênah a hlan chhâwn theih a, a nih loh leh pawisa inkawltîrna thuthlung siama a hlâwkna têl tûrin Watch Tower hming chu a pêk theih a ni. Ram ṭhenkhatah chuan, sakhaw pâwlin a hlâwkna a têl tûr pawisa inkawltîrna chuan chhiah chawi lamah ṭangkaina eng engemaw a nei thei.

A hming, “pêk dân tûr ruahmanna siam” tihin a sih hmuh angin, hetiang zâwnga thilpêk pe tûr hian a petu lamah ruahmanna ṭhenkhat siam a ngai a. Hêng pêk dân tûr ruahmanna zînga a engemaw ber hmanga Jehova Thuhretute khawvêl pum huap rawngbâwlna ṭawiâwm duhte ṭanpui nân, brochure pakhat, Charitable Planing to Benefit Kingdom Service Worldwide *, tih chu Sâpṭawng leh Spanish ṭawnga buatsaih a ni. Chu brochure chu tûn la la leh thih huna rochhiah anga thilpêk pe duhte tâna chanchin tam lehzual hriattîrna tûra buatsaih a ni a. Brochure an chhiar zawh hnuah leh dân lama an mi thiamte an râwn hnuah, mi tam tak chuan khawvêl puma Jehova Thuhretute rawngbâwlna chu an ṭanpui thei a, chutih rual chuan chhiah lamah ṭangkaina nasa tak an nei thei bawk a ni.

Chanchin hriat belh nân, a hnuaia address hmangin emaw, i awmna ram enkawltu Jehova Thuhretute office-ah emaw chuan lehkha ziakin emaw, telephone-in emaw Jehova Thuhretute chu i be thei ang.

Jehovah’s Witnesses,

Post Box 6440,

Yelahanka,

Bangalore 560 064,

Karnataka.

Telephone: (080) 28468072

[Footnote-te]