Vawiin Atân Chauh Em Ni I Nun?

“NAKIN hun tûr ka ngaihtuah ngai lo. A lo thleng rang ṭhîn êm a.” He thu sawi chhâwn hlawh tak hi scientist hmingthang tak Albert Einstein-a thusawi nia ngaih a ni. Mi tam tak pawhin hetiang bawk ngaih dân hi an sawi chhuak a. Anni chuan: “Engah nge nakin hun atân kan lungkham ang?” an ti mai thei. A nih loh leh: “I nî tin thiltihte chu chhunzawm zêl mai rawh.” “Vawiin atân nung rawh.” “Naktûk chu theihnghilh rawh,” tia an sawi chu i hre mai thei bawk a ni.

Dik takin, chutiang ngaih dân chu thil thar a ni lo. “Eiin bâr la, hlim takin awm rawh. Thil dang zawng chu engmah a ni lo.” Hei hi hmân laia Epikuria te thu châng vawn a ni a. Tirhkoh Paula dam rualpui ṭhenkhat chuan chutiang ngaih dân chu an vuan a. “I eiin i in ang u hmiang, naktûkah kan thi dâwn alâwm,” tih chu an thil thlîr dân a ni. (1 Korinth 15:32) Anni chuan he nun tawi tak hi kan neih theih nun awmchhun nia an rin avângin, nun chu a theih ang tâwka hman tûr a ni tih ngaih dân an vawrh lâr a ni.

Leia chêng mi maktaduai têlte tân chuan, a theih ang tâwka nun hmang tih awmzia chu a hleihluaka hlimhlâwp ûm tihna a ni lo. Tûn lai dinhmun râpthlâk takah hian, mi tam tak chuan ei hmuh nân nasa taka ṭan an lâk reng a ngai a. “Naktûk” chu tawrh theih rual loh leh beisei bo nia a lan fo avângin, engah nge nakin hun tûr chu an ngaihtuah tehrêng ang?

Naktûk Atân Ruahmanna Kan Siam Lâwk Tûr A Ni Em?

Dinhmun harsa vak lote tân pawh naktûk atâna ruahmanna siam chuan awmzia a nei tlêm hle niin a lang a. “Engah nge lungkham a ngaih?” tiin an zâwt mai thei a ni. Ṭhenkhat chuan ruahmanna siamtute chu a tâwpah an lungawi lovin, an lunghnual thei alâwm, tiin an ngaihtuah mai thei a. Hmân laia thlahtu Joba pawh chu amah leh a chhûngte tâna hlimna thlentu tûr a thil ruahmante chu a “thlâwn zo” tih a hriat chuan a lungngai hle a ni.​—⁠Joba 17:11; Thuhriltu 9:⁠11.

Scotland mi hla phuah thiam Robert Burns-a chuan kan dinhmun chu leileta a bu tihchhiatsak palh thlawhhma sazu tê nên a tehkhin a. Sazu tê chu a awmna tihchhiat a nih hnu chuan a nun chhan him nân a tlân chhia a ni. Hla phuah thiam chuan ‘Ni e, kan thunun theih miah loh thilthlengte kan hmachhawn hian thiltihtheihna rêng nei lo niin kan inhre zîng hle a, chu chuan uluk taka kan lo duan tawh thilte pawh engmah lovah a chantîr fo a ni,’ a ti.

 A nih chuan nakin hun atâna ruahmanna siam lâwk chuan awmzia a nei lo tihna a ni em? Hurricane thlipui emaw, leilung chhiatna dang emaw a thlen hunah, ruahman lâwkna ṭha tak a awm loh chuan a sawhkhâwk chu a nasa hle thei. Entîr nân, tumahin Hurricane Katrina thlipui chu an dang thei lo ngei mai. Mahse, hriat lâwkna leh ruahman lâwkna ṭha zâwk a awm chuan, New Orelands khawpui leh chuta chêng mite a nghawng dân chu a ziaawm zâwk hle dâwn lo vem ni?

Eng nge i ngaih dân? Vawiin atân chauhva nun a, naktûk ngaihthahna chuan awmzia a nei tak tak em? A dawta thuziak hian he mi chungchâng a sawi hi ngaihtuah ang che. (w07 10/15)

[Phêk 3-naa milemte]

“Eiin bâr la, hlim takin awm rawh. Thil dang zawng chu engmah a ni lo.”