Chhiartute Zawhna

Jehova Thuhretu tân Thuhretu ni lo a chhûngte emaw, a hmêlhriatte emaw inneihnaa tel chu a dik em?

Inneihna chu hun hlimawm tak a ni a, Kristian chuan chu hun hlimawm taka tel a duh chu a thiam awm hle. Inneihnaa sâwm tel naupangte chuan an nu leh pate emaw, anmahni enkawltute emaw thu chu an zâwm tûr a ni. (Ephesi 6:​1-3) Mahse, Jehova Thuhretute zînga mi ni lo pa ber chuan a Kristian nupui chu biak in (church)-a neih tûr inneihnaa kalpui tûrin sâwm ta se la engtin nge ni ang? Unaunu chhia leh ṭha hriatna chuan inneihna nêna inkûngkaih sakhaw thiltiha tel loh tum tlat chungin thlîrtu ang maia va tel ve mai mai chu a remti mai thei a ni.

Chuti a nih chuan, a tlângpui thuin chutiang inneihnaa tel leh tel loh chu mi mal thu tlûkna siam tûr tihna a ni. Amaherawhchu, Kristian tinte chuan Thuhretu ni lote inneihnaa kal tûra thu tlûkna an siam hian Jehova chunga an mawhphurhna chu hriain, Bible thu bul eng engemawte an ngaihtuah tûr a ni.

Kristian rilruah chuan Pathian pawm tlâk nih duhna chu a lian ber tûr a ni a. Isua chuan: “Pathian chu thlarau a ni; a chibai bûktuten thlarau leh tih tak zetin chibai an bûk tûr a ni,” a ti. (Johana 4:24) Chuvângin, Jehova Thuhretute chu rinpawlhna thiltih ṭawngṭaite, serh leh sângte, a nih loh leh Bible thutak nêna inkalh thiltih ang chi-ahte hian an tel ve lo a ni.​—⁠2 Korinth 6:​14-17.

Kristian chuan a thu tlûkna siamin mi dangte a nghawng thei bawk tih chu a hria a. Chutiang inneihnaa kal i tum a nih chuan, mo lawmna thiltiha i tel kim leh si lohna hian i chhûngte chu a tilungni lo ang em? Rinpuite a nghawng dân tûr pawh chu ngaihtuah tel a ngai a ni. (Rom 14:13) Thuhretu ni lote inneihnaa tel chu nangma’n pawi i ti lo emaw, i chhûngte’n pawi an ti lo emaw pawh ni se, chu chuan thlarau lama unaute chungah nghawng ṭha lo tak a nei thei ang em? Chu chuan ṭhenkhatte chhia leh ṭha hriatna chu a hliam thei ang em?

Thuhretu ni lo chhûngte inneihna chuan harsatna a siam thei a. Mo ṭhiana ṭang tûra tih ni ta la engtin nge ni ang? A nih loh leh Thuhretu ni lo i kawppui chuan thiltih engkima tel chu duh ta se engtin nge ni ang? Inneihna chu rorêltu emaw, sawrkâr thuneitu emaw hmaa tih dân anga inneihna a nih chuan, chuta tel chu inneihna hriatpuitu ang lek a ni thei.

Amaherawhchu, inneihna chu sakhaw biakna ina neih emaw, sakhaw hruaitu inneihtîrna emaw a nih chuan ngaihtuah tûr dang a awm thei a ni. Bible zirtîr i chhia leh ṭha hriatna zui tûr leh i sakhaw vawn kalha thiltih emaw, inneihnaa telte zahthlâk taka siam emaw pumpelh tûr chuan, tel loh mai chu i thlang thei a ni. (Thufingte 22:⁠3) A hma aṭanga Bible ṭanchhan i rinna chu hrilhfiahin, i tel duh chen i hrilhfiah emaw, kawng dang i rawt emaw thei a, chu chuan nangmah leh i chhûngte chu nasa taka lungngaihna a pumpelhtîr thei a ni.

Thil zawng zawng ṭha taka bûk tawn a nih hnuah chuan, Kristian ṭhenkhat chuan thlîrtu ang leka Thuhretu ni lote inneihnaa tel chu a sual lo vang tiin thu tâwp an siam mai thei a. Mahse, Kristian chuan inneihnaa telnain Pathian thu bulte kalha thiltih châkna a neihtîr thei ang tih a hriat chuan, a ṭangkaina chu a hlauhawmnain a bûk hneh zâwk tih thu tlûkna a siam thei a ni. Inneihna hun serha kal lo va, sâwm a nih anga a hnua mo lawmnaa kal a tihtlûk chuan, engkim chu ‘Pathian ropuina tûr hlîra tih’ a tum tlat tûr a ni. (1 Korinth 10:31) Chutianga thu tlûkna siamnaah chuan “mi tinin mahni phur an phur ṭheuh” tûr a ni. (Galatia 6:⁠5) Chuvângin, thu tlûkna engpawh siam la Pathian Jehova hmaa chhia leh ṭha hriatna ṭha neih chu a pawimawh hle tih hre reng ang che. (w07 11/15)