Engin Nge I Nun Awmzia Neihtîr?

KENNY-A chu sumdâwng hlawhtling tak a ni a, ram dang siam car man to tak khalhin, khawpuia mi hausate chênna hmunah in chhâwng sâng chung zâwla sak in nuam tak a nei a ni. Skydiver thiam tak a nih angin, lei aṭanga feet sâng têla sâng aṭanga han tlâk thlâk vang vangte chu nuam a ti hle a ni. Chûng thilte chuan nun lungawithlâk tak a neihtîr em? The Wall Street Journal chanchinbu sawi dânin, ani chuan: “Tûnah hian kum 45 ka ni ta, hmalam hun beiseina tak tak ka nei lo . . . Ka nun hian awmzia a nei lo hle,” a ti a ni.

Elyn-i chu vûr tleng thiam tak ni tûrin a thawk rim hle a. A tâwpah chuan vûr tleng thiam hriat hlawh tak a lo ni ta a ni. Elyn-i chuan a duh tak hmingthanna chu a nei ta. Mahse, heti hian lungngai takin a sawi chhuak a ni: “Khawiah nge hlimna ka neih tûr zawng zawngte kha a awm zawh tâk? Mal ngawih ngawihin ka inhria. Ka lo upa tial tial ang a, sum leh pai nei ngah hle mah ila, hêng chauh hi ka nun chhan a nih si chuan ka nun chu a ruak ngawt ang,” tiin.

Hideo-a chu a lemziak thiamna avânga  hmingthang tak a ni a, a nun chu lemziak nân a hmang ṭhak a ni. A lemziakte chu a hralh lo; hralh chhuahna chuan a lemziak hlutna a tihnêp a ring a ni. A thih dâwn hnaih lam kum 98 mi a nih chuan, a lemziak zawng zawng deuhthaw chu thil hlui dah khâwmna (museum)-a dah atân a pe ta a ni. A nun pumhlûm chu lemziak thiamna lamah chuan a pe ṭhak a. Mahse, sawisêlbovin lem a ziak thei ngai dâwn lo tih a hriat avângin, a lungawi lo hle a ni.

Mi ṭhenkhat chu mi dangte ṭanpui tûrin an inpe ṭhak bawk. Entîr nân, Hollywood-a cinema siamna lama thuneitu lian tak pakhat hi han ngaihtuah teh. United States rama film company lian berte zînga pakhata vice president a nih angin, mi lâr tak takte zîngah a khawsa a, in nuam tak leh man to takah chuan a chêng bawk a ni. Chawlh hmanga Cambodia ram a tlawh ṭum chuan, Phnom Penh khawpuia thil eina hmuna tlai chaw a ei lai chuan hmeichhe naupang pakhat hian kut a rawn dawh a. Ani chuan Dollar khat leh thil in tûr a lo pe a. Chu hmeichhe naupang chu a lungawi tâwk hle a ni. Amaherawhchu, a tûk zânah pawh chu hmeichhe naupang chuan a hmun ngaiah kut a lo dawh leh a. Ani chuan a pâwnlânga ṭanpui aia tam thil tih a ngai tih chu a hre ta a ni.

Kum khat a liam hnu chuan, chu thuneitu lian tak chuan a hna thlâk a rêlthlu a​—⁠intihhlimna lam atâna a thawhna aṭang chuan Cambodia rama mi retheite ṭanpui tûr chuan a thawk chhuak ta a ni. Awmna tûr te, chaw ei tûr te, leh lehkha zirna te awm nghâl vekna school chu a din ta a. Mahse, rilru buai takin a khawsa reng a​—⁠a thil tihhlawhtlinte avânga hlimna leh lungâwina a neih rual rualin a chinfel ngai harsatna tam takte avâng chuan a lungngaiin beidawng hle.

Kan sawi tâk mi palite hian an nuna an thiltih duh chu hre hle niin an inngai a. Mahse, an thiltih duh an han puitlin meuh chuan lungawina an nei si lo. A nih leh nang eng atân nge i nun? I nunah hian eng nge i dah pawimawh ber? Tûna i nun i hman dân avângin a hnuah i inchhîr leh lo vang tih i chiang em? (w07 11/15)