Zirtîr Siamtîr Thei Tûr Che Miziate Chu Nei Rawh
Zirtîr Siamtîr Thei Tûr Che Miziate Chu Nei Rawh
“Kal ula, hnam tina mi zirtîrahte siam ula.”—MATTHAIA 28:19.
1. Hun kal tawhahte khân Pathian chhiahhlawh ṭhenkhatte’n eng ang thiamnate leh rilru put hmangte nge an neih ngai?
JEHOVA chhiahhlawhte chuan a duhzâwng tih tîr thei tûr thiamna leh rilru put hmang an neih a ngai fo va. Entîr nân, Pathian thupêk angin Abrahama leh Sari chuan Ur khawpui hausa tak chu an kalsan a, a tâwpah chuan puan ina awmte neih ngai mizia leh thiamnate chu an neih a ngai a ni. (Hebrai 11:8, 9, 15) Israelte Ram Tiama kaihruai tûr chuan, Josua tân huaisenna, Jehova rinngheh tlatna, leh a Dân hriatna te neih chu a ngai a. (Josua 1:7-9) Tin, Bezalela leh Oholiaba te neihsa kut themthiamna chu Pathian thlarauvin a belhchhahsak avângin, hêng mite hi biak bûk sak leh a kaihhnawih hna thawhnaah leh enkawlnaah an hlawhtling a ni.—Exodus 31:1-11.
2. Zirtîr siam hna nêna inkûngkaihin eng zawhnate nge kan sawiho vang?
2 Kum zabi tam tak a liam hnuah Isua Krista chuan a zirtîrte hnênah: “Kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tiin hna thawh tûr a pe a. (Matthaia 28:19, 20) Hetiang khawpa hna lian hi mite hnêna pêk a la ni ngai lo. Zirtîr siam hna thawk tûr hian eng miziate nge ngai? Chûng miziate chu engtin nge kan neih theih ang?
Pathian Hmangaihna Thûk Tak Târ Lang Rawh
3. Zirtîr siam tûra thupêk chuan eng hun remchâng nge min pêk?
3 Mite bia a, Pathian dik be tûra an rilru hneh tûr chuan Jehova hmangaihna thûk tak kan neih a ngai a. Israelte khân Pathian an hmangaihna chu a thupêkte tih tak zeta zâwmin, inthawina pawm tlâk hlânin, leh amah chawimawina hlaa sain an lantîr thei a ni. (Deuteronomy 10:12, 13; 30:19, 20; Sâm 21:13; 96:1, 2; 138:5) Zirtîr siamtute kan nih angin keini pawhin Pathian dânte chu kan zâwm a; mahse, Jehova kan hmangaihna chu mi dangte hnêna a chanchin leh a thiltumte chungchâng hrilhin kan lantîr bawk a ni. Pathian min pêk kan beiseina chungchânga kan rilru dik tak sawi tûrin ṭawngkam ṭha thlanga rin tlatna nêna kan sawi a ngai a ni.—1 Thessalonika 1:5; 1 Petera 3:15.
4. Engvângin nge Isua chuan mite hnêna Jehova chungchâng zirtîr chu nuam a tih?
4 Isua chuan Jehova a hmangaih êm avângin, Pathian thiltumte, Lalram, leh biakna dik chungchâng sawi chu nuam a ti hle a ni. (Luka 8:1; Johana 4:23, 24, 31) Ani chuan: “Mitîrtu duhzâwng tih leh, a hna thawh zawh tûr hi ka chaw a ni,” a ti. (Johana 4:34) Hêng fakna hla phuahtu thu: “‘Aw ka Pathian, i duhzawng tih hi ka lâwmzâwng tak a ni; a ni, i dân thu chu ka thinlungah a awm reng e,’ . . . Inkhâwmna ropui takah chuan felna chanchin ṭha ka tlângaupui a; Aw LALPA, ngai teh, ka kâ hi ka ui lo vang tih i hria e,” tihte hi Isua sawia hmehbel a ni.—Sâm 40:8, 9; Hebrai 10:7-10.
5, 6. Zirtîr siamtu tân eng mizia bul ber nge neih ngai?
5 Pathian hmangaihnain a tur avângin, thutak zirtu mi tharte chuan rin tlatna nêna Jehova leh Lalram chanchin an sawi a, chu chuan mi dangte chu Pathian Lehkha Thu enfiah tûrin a hmin thei a ni. (Johana 1:41) Pathian hmangaihna chu zirtîr siamna hnaa tel tûra min turtu mize bul ber a ni. Chuvângin, a Thu chhiar ziahin leh ngun taka chhût ziahin chu hmangaihna chu i tinung reng ang u.—1 Timothea 4:6, 15; Thu Puan 2:4.
6 Isua Krista’n Jehova a hmangaihna chuan zirtîrtu taima tak ni tûrin a ṭanpui tih rinhlelh rual a ni lo. Mahse, chu chauh chu Lalram chanchin puangtu thiam tak a nih chhan a ni lo. A nih chuan, eng mizia dangin nge Isua chu zirtîr siamtu hlawhtling tak nihtîr?
Mite Ngaihsakna Lantîr Rawh
7, 8. Isua’n mite chu engtin nge a thlîr?
7 Isua chuan mite a ngaihsakin, an hmakhua a ngaihzia a lantîr a. Mihring anga a lo pian hma Pathian bula “mi themthiam” anga a awm chhûng pawh khân, mihringte nêna inkûngkaih thilte chu a ngaina hle a ni. (Thufingte 8:30, 31) Leia mihringa a lo awm khân, Isua chuan mite chu a khawngaih a, amah pantute chu a tihahdam a ni. (Matthaia 11:28-30) Isua chuan Jehova hmangaihna leh khawngaihna chu a lantîr a, chu chuan Pathian dik awmchhun biakna lamah mite chu a hîp a. Ani chuan mi chi tinrêngte leh an dinhmun a ngaihsakzia a lantîr avângin, anni chuan a thu an ngaithla a ni.—Luka 7:36-50; 18:15-17; 19:1-10.
8 Mi pakhatin chatuana nunna a chan theih nâna a thiltih tûr a zawh khân, “Isuan amah chu a en a, a hmangaih ta a.” (Marka 10:17-21) Bethani khuaa Isua zirtîr ṭhenkhat chungchângah, heti hian kan chhiar a ni: “Isuan Marthi te, a laizâwn te, Lazara te a hmangaih a,” tiin. (Johana 11:1, 5) Isua’n mite a ngaihsak êm avângin, a mamawh chawlhhahdamna pawh chânin mipuite a zirtîr a ni. (Marka 6:30-34) Mihringpuite tâna chutianga ngaihsakna nasa tak lantîrna chuan Isua chu biakna dika mite hîpna kawngah mi thiam ber a nihtîr a ni.
9. Paula chuan zirtîr siamtu a nih angin eng rilru put hmang nge a neih?
9 Tirhkoh Paula pawhin thu a hrilhnate chu a ngaihsak êm êm a. Thessalonika khuaa awm Kristian rawn ni tate hnênah: “Kan duhzâwng tak in lo nih tâk avâng khân, kan duh ngawih ngawih che u a, Pathian chanchin ṭha chauh ni lovin, keimahni nun pawh pêk hial che u kan peih kha,” tiin a hrilh a ni. Paula thawhrimna duhawm tak avângin, Thessalonika khuaa mi ṭhenkhat chuan ‘milem hawisanin Pathian lam an hawi’ phah a ni. (1 Thessalonika 1:9, 10; 2:8) Isua leh Paula te anga mite ngaihsakna dik tak kan neih chuan, “chatuana nun duhna rilru dik tak nei” te thinlunga chanchin ṭha kan thlen avânga hlimna lo awm chu kan tawng ve ang.—Tirhkohte 13:48, NW.
Mahni Inpêkna Rilru Lantîr Rawh
10, 11. Zirtîr siam kan tum hian engvângin nge mahni inpêkna rilru chu neih a ngaih?
10 Zirtîr siam thiam takte chuan mahni inpêkna rilru an nei a. Anni chuan hausakna chu thil pawimawh berah a dah lo a ni. Isua chuan a zirtîrte hnênah: “Sum ngahte chu Pathian rama luh a va harsa dâwn êm!” a ti a. A zirtîrte’n chu chu an hriatin, mak an ti hle a; mahse, Isua chuan: “Naute u, sum ringte tân Pathian rama luh a va harsa ṭhîn em! Mi hausa Pathian rama luh aiin sanghâwngsei, hriau benga luh tlang a awl zâwk,” tiin a sawi belh a ni. (Marka 10:23-25) Isua chuan a hnungzuitute chu zirtîr siamna lama an rilru an pêk theih nân nun tluangtlam tak chu a kawhhmuh a ni. (Matthaia 6:22-24, 33) Engvângin nge mahni inphatna rilru chuan zirtîr siamnaah min ṭanpui?
11 Isua thupêk zawng zawngte zirtîr tûr chuan ṭan lâk a ngai hle a. Zirtîr siamtu chuan ngaihventu chu chawlhkâr tina Bible zirpui a tum tlângpui ṭhîn. Mi rilru ṭha pute an hmuh tam lehzual theih nân, hunbi kima an ei zawnna hnathawh chu hunbi neia thawkin an inthlâk danglam a. Kristian sâng têlte chuan an awmna biala ṭawng chi hrang hmangte hnêna thu an hrilh theih nân ṭawng dang an zir bawk a. Zirtîr siamtu dang lehte chuan an in kalsanin, hmun dangah emaw, ram dangah emaw insawnin buh seng hnaah an thawk tam lehzual bawk a ni. (Matthaia 9:37) Hêng zawng zawng atân hian mahni inpêkna rilru neih chu a ngai a. Mahse, zirtîr siam thiam tak ni tûr chuan chu aia tam chu a la ngai cheu.
Hun Khawhral Si Lovin Dawhthei Rawh
12, 13. Engvângin nge zirtîr siamnaah dawhtheihna a pawimawh êm êm?
12 Dawhtheihna chu zirtîr siam tûra min ṭanpuitu mize dang leh chu a ni a. Kan Kristian thuchah ken chu hmanhmawh taka pêk chhuah ngai a ni a; mahse, zirtîr siam tûr chuan hun tam tâwk pêk leh dawhtheihna neih a ngai ṭhîn. (1 Korinth 7:29) Isua chu a unaupa Jakoba lakah a dawhthei hle a. Ani chuan Isua thu hrilh rawngbâwlna chu hre hneh hlein lang mah se, hun rei tak chhûng chu a zirtîr a nihna tûr chu thil engemawin a dang a ni. (Johana 7:5) Amaherawhchu, C.E. 33-a Krista thih hun leh a hnu lawka Pentikost inkâr vêlah chuan, Jakoba chu zirtîr a lo ni ta a ni; Pathian Lehkha Thu chuan Jakoba chu a nu, a unaute, leh tirhkoh dangte nêna ṭawngṭai tûra awmkhâwm anga a târ lan avângin. (Tirhkohte 1:13, 14) Jakoba chuan thlarau lamah nasa takin hma a sâwn a, a hnuah chuan Kristian kohhranah mawhphurhna sâng tak a chelh ta a ni.—Tirhkohte 15:13; 1 Korinth 15:7.
13 Lo neitute angin, Kristiante chuan thil ṭhang har tak—Pathian Thu hriat thiamna, Jehova hmangaihna, leh Krista ang rilru put hmang—te chu an chîng fo a ni. He mi atân hian dawhtheih a ngai a. Jakoba chuan: “Unaute u, Lalpa lo kal leh hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnûng chu a hmuh hma loh chuan chhel takin lei rah hlu tak chu a nghâk ṭhîn. Nangni pawh chhel takin awm rawh u; in thinlung tinghet rawh u; Lalpa lo awm lehna chu a hnai tawh si a,” tiin a ziak a ni. (Jakoba 5:7, 8) Jakoba chuan ringtute chu ‘Lalpa lo kal leh hma zawng chhel taka awm tûr,’ a nih loh leh dawhthei taka awm tûrin a fuih a ni. Isua chuan a zirtîrte’n thil an hriat thiam loh hunah, dawhthei takin a hrilhfiah a, tehkhin thute a hmang bawk a ni. (Matthaia 13:10-23; Luka 19:11; 21:7; Tirhkohte 1:6-8) Tûna Lalpa a lo awm leh hunah pawh hian zirtîr siam kan tumna kawngah chutiang bawk dawhtheihna kan neih chu a ngai a. Kan huna Isua hnungzuitu lo ni tate chu dawhthei taka zirtîr an ngai a ni.—Johana 14:9.
14. Dawhtheihna nei mah i la, engtin nge zirtîr siamtu anga kan hun chu fing taka kan hman theih?
14 Dawhtheihna nei mah ila, kan Bible zirpui a tam zâwkte chungah chuan thu chuan rah a chhuah ṭhîn lo. (Matthaia 13:18-23) Chuvângin, anmahni ṭanpui tûra a awm tâwka ṭan kan lâk hnuah chuan, chutiang mite tâna hun khawhral tawh lovin, Bible thutak hlut tûr âwm mi dangte chu kan zawng a ni. (Thuhriltu 3:1, 6) A dik a dik chuan, Bible thutak ngaisângte pawhin an thlîr dân te, an rilru put hmang te, leh an nuna thil dah pawimawh te thlâk tûrin ṭanpui zawm zêl an ngai mai thei a. Isua’n rilru put hmang dik nei nghâl thei lo a zirtîrte chunga a dawhtheih ang chiah khân, kan dawhthei ve a ni.—Marka 9:33-37; 10:35-45.
Zirtîr Thiamna Nei Chhovin
15, 16. Engvângin nge zirtîr kan siamnaah tluangtlam tak nihtîr leh inpuahchah ṭhat chu a pawimawh?
15 Zirtîr siamnaa hlawhtling tûr chuan Pathian hmangaihna, mite ngaihsakna, mahni inpêkna rilru, leh dawhtheihna te chu thil pawimawh a ni a. Zirtîr thiamna chuan chiang tak leh tluangtlam taka thu min hrilhfiahtîr theih avângin, chu pawh chu kan neih chhoh a ngai bawk a ni. Entîr nân, Zirtîrtu Ropui, Isua Krista thusawite chuan a fiah êm avângin thil a tithei hle a ni. Isua thusawi hêngte hi i hriat chhuah a rinawm: “Vânah . . . chuan, in tân rote khâwlkhâwm zâwk rawh u.” “Ui hnênahte thil thianghlim chu pe suh u.” “Finna chu a thiltih aṭangin a dikzia a lang a ni.” “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tihte chu. (Matthaia 6:20; 7:6; 11:19; 22:21) Isua chuan thu tâwi tê chauh a sawi tihna zawng a ni hauh lo. Ani chuan fiah taka zirtîrin, a âwm hunah thilte chu a hrilhfiah a ni. Engtin nge Isua zirtîr dân chu i entawn theih ang?
16 Fîmkhur taka inpuahchah chu tluangtlam leh fiah taka min zirtîr theitu ber a ni a. Zirtîr siamtu inpuahchah lo chu a ṭawng tam duh ṭhîn. Ani chuan a thil hriat zawng zawng a sawi a, a ṭawng nasat avângin, thu pawimawh lai a hliahkhuh thei a ni. Chu mi nêna inkalh takin, inpuahchah ṭha zirtîr siamtu chuan a zirtîra chu ngaihtuah chungin a thu chu a chhût ngun a, a ṭûl ang chauh chu fiah takin a sawi ṭhîn. (Thufingte 15:28; 1 Korinth 2:1, 2) Ani chuan zirlai thu hriat tawh zât leh zirpui laia a thu pawimawh lai sawi uar tûrte chu a ngaihtuah a. Zirtîr siamtu chuan thu sawiho lai chungchângah thu ngaihven awm tam tak a hre ngei ang a; mahse, chiang fiah tak ni tûr chuan thu pawimawh lo lai paih ṭhen a ngai a ni.
17. Engtin nge mite chu Pathian Lehkha Thu chhût tûra kan ṭanpui theih?
17 Isua pawh khân mite chu thil nih dân hrilh mai lovin, ngaihtuah tûrin a ṭanpui bawk. Entîr nân, ṭumkhat chu: “Simon, engtin nge i ngaih? leia lalten chhiah emaw, sum neih man emaw, tu lakah nge an lâk ṭhin? an fate lakah nge, mi hrang lakah?” tiin a zâwt a ni. (Matthaia 17:25) In lama Bible zirpuina kan neih chhûngin Bible hrilhfiah chu nuam kan tih êm avângin, zirlaiin ama ngaih dân a sawi emaw, kan thil zir a hrilhfiah emaw nân insûmtheihna kan neih a ngai thei a ni. A tlângpui thu chuan, mite chu zawhna tam tak kan zâwt tûr tihna a ni lo. Thiam tak, tehkhin thu ṭha takte, leh ngun taka ngaihtuah zawhnate hmang chuan kan Bible ṭanchhan thu leh hlaa Pathian Thu awmte hlut tûrin kan ṭanpui thei a ni.
18. Zirtîr thiamnaah chuan eng nge tel?
18 Pathian Thu chuan “zirtîrna dik” chungchâng a sawi a, a tîra hman ṭawngah chuan hei hian zirtîr thiamna a kâwk a ni. (Tita 1:9) Chutiang zirtîr thiamnaah chuan mi chu thil nih dân sawi chhuak thei tûra ṭanpuina aia tam a tel a. Bible zirlai chu thutak leh thutak ni lo, a ṭha leh ṭha lo, finna leh âtna te danglamzia hre thiam tûra ṭanpui chu kan tum tûr a ni. Hetia kan tih a, a thinlunga Jehova hmangaihna tuh kan tum tlat chuan, ani chuan Pathian thu a awih chhan tûr a hmu thiam ang.
Zirtîr Siamnaah Ṭhahnemngai Takin Tel Rawh
19. Engtin nge Kristian zawng zawng chu zirtîr siamnaah an tel?
19 Kristian kohhran chu zirtîr siamna inawpna pâwl a ni a. Mi thar chu zirtîr a lo nih hian, Bible zir tûra amah zawng chhuaktu leh ṭanpuitu Jehova Thuhretu chauh chu lâwm chhan tûr neitu awmchhun a ni lo. Naupang bo zawng tûra pâwl dinah chuan, bo zawngtute zînga mi pakhat chauhvin a hmu chhuak pawh a ni thei. Mahse, naupang chu a nu leh pate nêna an inhmuh leh hunah chuan, a zawngtu pâwla tel zawng zawng chu an hlim vek a ni. (Luka 15:6, 7) Chutiang bawkin, zirtîr siamna chu kohhrana thawh tlân a ni a. Kristian zawng zawng chu Isua zirtîr lo ni tûrte zawnnaah an tel ṭheuh a ni. Tin, mi thar chu Kingdom Hall-a a rawn inkhâwm ṭan hian, chuta awm Kristian zawng zawng chuan biakna dik a hlutna tihpunnaah thawh an nei ṭheuh a ni. (1 Korinth 14:24, 25) Chuvâng chuan, kum tina zirtîr thar sâng tam tak siam a nih avângin, Kristian zawng zawngte chu an hlim thei a ni.
20. Mi dangte hnêna Bible thutak zirtîr i duh chuan eng nge i tih ang?
20 Kristian rinawm tam tak chuan mi tuemaw hnêna Jehova leh biakna dik chungchâng zirtîr chu nuam an ti hle a. Mahse, theih tâwp an chhuah chung pawhin, chutiang chuan an tithei lo mai thei. Chu chu i dinhmun a nih chuan, Jehova i hmangaihna chu tithûk zêlin, mite chu ngaihsak la, mahni inpêkna neiin, dawhtheihna nei la; tin, zirtîr thiamna chu neih chhoh tum ang che. A pawimawh ber chu, thutak zirtîr i duhna chungchângah ṭawngṭai rawh. (Thuhriltu 11:1) Jehova rawngbâwlnaa i thiltih engkim chuan Pathian chawimawi zirtîr siamna hna a ṭanpui tih hriatna aṭangin thlamuanna hmu ang che. (w07 11/15)
I Hrilhfiah Thei Em?
• Engvângin nge Zirtîr siamna chuan Pathian kan hmangaihna a fiah?
• Zirtîr siamtute tân eng miziate nge neih ngai?
• Zirtîr thiamnaah eng nge tel?
[Zirlai Atâna Zawhnate]
[Phêk 21-naa milem]
Kristiante chuan zirtîr siamin, Pathian an hmangaihna thûk tak chu an târ lang
[Phêk 23-naa milem]
Engvângin nge zirtîr siamtute chuan mi dangte an ngaihsak ang?
[Phêk 24-naa milem]
Zirtîr siamtute tâna mamawh mize ṭhenkhat chu engte nge ni?
[Phêk 25-naa milem]
Kristian zawng zawng chuan zirtîr siamna rah chhuah ṭha chu an phûrpui hle