Zirtîr Siamtu Ropui Chu Entawn Rawh
Zirtîr Siamtu Ropui Chu Entawn Rawh
“Eng angin nge in hriat [“in ngaihthlâk dânah,” NW] fîmkhur rawh u.”—LUKA 8:18.
1, 2. Engvângin nge Isua’n a rawngbâwl chhûnga mite a dâwr dân chu i ngaihsak ang?
ISUA KRISTA chuan a hnungzuitute hnênah: “Eng angin nge in hriat [“in ngaihthlâk dânah” NW] fîmkhur rawh u,” a tih khân, Zirtîrtu Ropui leh Zirtîr Siamtu a nihna chu a hlen a. (Luka 8:16-18) He thu bul hi Kristian anga i rawngbâwlnaa hman tûr a ni. Thlarau lama zirtîrna i ngaihthlâk dâna i fîmkhur, a nih loh leh ngun taka i ngaihthlâk chuan, chu chu i nunpui ang a, Lalram puang chhuaktu thiam tak i ni ang. Tûnah chuan Isua aw chu i hre thei lo ngei mai a; mahse, Pathian Lehkha Thuin a târ lan angin, a thusawi leh thiltihte chu i chhiar thei a ni. Isua’n a rawngbâwl chhûnga mite a dâwr dân hian eng nge a târ lan?
2 Isua chu chanchin ṭha hriltu ṭha tak leh Pathian thutak zirtîrtu langsâr ber a ni a. (Luka 8:1; Johana 8:28) Zirtîr siamna hnaah hian thu hrilh leh zirtîr a tel kawp a ni. Thu hrilhna chu thuchah puan chhuahna a nih laiin, Jehova leh a thiltumte zirtîrnaah chuan zirtîr siamtu chuan a zirtîrate nêna inlaichînna a neih a ngai tlângpui a. (Matthaia 28:19, 20) Hei hi Zirtîrtu leh Zirtîr Siamtu Ropui, Isua Krista entawnin a tih theih a ni.—Johana 13:13.
3. Isua entawnna chuan zirtîr siam tûra i thawh rimnaah eng nghawng nge a neih theih?
3 Isua zirtîr dân i entawn chuan, tirhkoh Paula fuihna: “Remchânna lei zêlin, pâwn lama mite lakah chuan fing takin awm rawh u. Mi tin engtia chhân ṭheuh tûr nge ni tih in hriat theih nân in ṭawngka chhuak chu, chia al, khawngaihna tel ni fo rawh se,” tih hi i zui a ni ang. (Kolossa 4:5, 6) Zirtîr siamna hnaa Isua entawnnaah chuan thawh rim a ngai a; mahse, mite chu an mamawh ang zêla ‘chhâng ṭheuh tûra’ a ṭanpui dâwn che avângin, zirtîrtu thiam tak a nihtîr dâwn che a ni.
Isua Chuan Mi Dangte Chu Ṭawng Chhuak Tûrin A Fuih
4. Engvângin nge Isua chu ngaithlatu ṭha a ni kan tih theih?
4 Isua chuan a naupan lai aṭangin, mite thusawi ngaihthlâksak a, an thil thlîr dân sawi chhuak tûrin a fuih ṭhin a. Entîr nân, kum 12 mi a nih khân, a nu leh pate chuan biak ina zirtîrtute zîngah “lo ngaithlaa lo zâwtin” an va hmu a ni. (Luka 2:46) Isua chu a hriatna hmanga zirtîrtute tihrilhhai tûra biak ina kal a ni lo. Zawhnate chu zâwt ve tho mah se, ngaithla tûra kal a ni. Ngaithlatu ṭha nih a duhna chu Pathian leh mihringte duhsakna hlawhtîrtu mize pakhat a ni ngei ang.—Luka 2:52.
5, 6. Engtin nge Isua’n a zirtîrna dawngte thusawi a ngaithla tih kan hriat theih?
5 Baptisma changa Messia anga hriak thih a nih hnu khân, Isua chuan mite ngaihthlâk duhna chu a nei zêl a. Ani chuan a thu zirtîra rilru zawng zawng a pêk avângin a ṭawngkam chhuak ngaithla tûra lo kalte chu a theihnghilh mai lo. A thusawi lai châwl lawkin, an ngaihtuahna chu a zâwt a, an chhânna chu a ngaithla fo a ni. (Matthaia 16:13-15) Entîr nân, Marthi hnênah a nuṭa Lazara a thih hnu khân: “Nung apiangin mi ring chu kumkhuain an thi lo vang,” a ti a. Tichuan: “Chu thu chu i ring em?” tiin a zâwt a ni. Isua chuan Marthi’n: “Ring e, Lalpa, Krista, Pathian Fapa, . . . chu i ni tih ka ring e,” tia a chhânna chu a ngaithla ngei a ni. (Johana 11:26, 27) Chutiang kawnga Marthi’n a rinna a sawi chhuah hriat chu a va lungâwithâk dâwn êm!
6 Zirtîr tam takin Isua an kalsan khân, ani chuan a tirhkohte’n amah an ngaih dân hriat chu a duh a. Chuvâng chuan: “Nangni pawhin kal bo in duh ve em?” tiin a zâwt a ni. Simon Petera chuan: “Lalpa, tu hnênah nge kan kal ang? Nangin chatuana nunna thu i nei alâwm. Nang Pathian mi thianghlim chu i ni tih kan âwih ta a, hriat pawh kan hria e,” tiin a chhâng a. (Johana 6:66-69) Hêng thute hian Isua chu a va tilâwm dâwn êm! Bible zirlaiin chutiang rinna a sawi chhuah chuan a tilâwm ve ngei ang che.
Isua Chuan Zahna Nên A Ngaithla
7. Engvângin nge Samari mi tam takin Isua an rin?
7 Isua zirtîr siamtu thiam tak nihtîrtu dang leh chu mite a ngaihsakna leh an thusawi zah taka a ngaihthlâksakna hi a ni. Entîr nân, ṭum khat chu, Isua’n Sukar bula awm Jakoba tuichhunchhuahah Samari hmeichhe pakhat hnênah thu a hril a. Chutia an inbiak chhûng chuan, Isua’n ṭawng a chuh vek lo, hmeichhe thusawi pawh a ngaithla a ni. Hmeichhe thusawi a ngaihthlâk lai chuan, Isua chuan Pathian biakna a ngaihsakzia chu hmuin, Pathianin thlarau leh thutaka Amah chibai bûktute a zawn thu a hrilh a ni. Isua chuan chu hmeichhe hnênah chuan zahna leh ngaihsakna a lantîr a, chutah hmeichhia chuan mi dangte hnênah Isua chanchin chu a hrilh chhâwn avângin, “chu mi khuaa awm Samari mi tam takin Isua an ring ta a.”—Johana 4:5-29, 39-42.
8. Engtin nge mite’n mahni ngaih dân an sawi duhna chuan rawngbâwlnaa titina ṭan thei tûra a ṭanpui che?
8 A tlângpui thuin mite chuan an ngaih dân sawi chu nuam an ti a. Entîr nân, hmân lai Atheni khuaa awmte chuan an ngaih dân sawi a, thu thar ngaihthlâk chu nuam an ti a ni. Chu chuan tirhkoh Paula chu, chu khawpuia Areopagi-ah hlawhtling takin thu a sawi theihtîr a. (Tirhkohte 17:18-34) Tûn lai rawngbâwlnaah in neitu i titipui ṭan hian, “He mi [thu pakhat khat sawi langin] chungchânga i ngaih dân hriat ka duh avângin ka rawn tlawh che a,” i ti thei a. A ngaih dân chu ngaithla la, chu mi chungchâng sawipui la, a nih loh leh zawhna zâwt rawh. Tichuan chu mi chungchâng Bible-in a sawi dân chu thiam takin kawhhmuh ang che.
Isua Chuan Titi Ṭan Dân A Hria
9. Isua’n Kleopa leh a ṭhianpa hnêna ‘Pathian Lehkha Thute a hrilhfiah’ hmain eng nge a tih?
9 Isua chuan sawi tûr a tlachham ngai lo va. Ṭha taka ngaithlatu a nih bâkah, mite ngaihtuahnate chu hriain, a sawi tûr tak chu a hre ṭhîn a ni. (Matthaia 9:4; 12:22-30; Luka 9:46, 47) Entîr nân: Isua a thawh leh hnu lâwk khân, a zirtîrte pahnih chu Jerusalem aṭangin Emmau khaw panin an kal a. Chanchin Ṭha ziak chuan heti hian a sawi: “An sawia an inhnial lai chuan Isua ngeiin a rawn pan a, an hnênah a kal ve ta a. Nimahsela amah chu an hriat theih loh nân, an mit chu tihvaihin a awm a. Tin, an hnênah, ‘Kal paha in sawi dun kha eng thu nge ni?’ a ti a. Tin, ngui takin an ding ta a. Tin, a hming Kleopa zâwkin a hnênah, ‘Jerusalem khuaah nangmah chauhvin em ni i chên, tun laia thil awmzia hi i hriat loh ni?’ a ti a, a chhâng a. Tin, ani chuan an hnênah, ‘Eng thil maw?’ a ti a,” tiin. Zirtîrtu Ropui chuan Nazaret Isua’n mite a zirtîr a, thilmak a tihte leh tihhlum a nih thu an sawite chu a ngaithla a. Tûnah chuan thihna aṭanga kaihthawh a nih thu ṭhenkhatin an sawi a ni. Isua chuan Kleopa leh a ṭhianpa’n sawi tûr an neihte chu a sawitîr a. Tichuan, an hriat ngai thilte chu sawiin, ‘Pathian Lehkha Thute a hrilhfiah’ ta a ni.—Luka 24:13-27, 32.
10. Engtin nge rawngbâwlnaa i mi tawh sakhaw vawn leh ngaih dân chu i hriat theih ang?
10 In neitu tuemaw sakhaw vawn leh a thlîr dân chungchâng engmah i hre lo mai thei a. Chu mi hriat nân chuan, ṭawngṭaina chungchânga mite ngaih dân ngaihthlâk nuam i tih thu i sawi thei a ni. Tichuan, “Tuemawin ṭawngṭainate a ngaihthlâk tak tak i ring em? tiin i zâwt thei a. A chhânna chuan a thil thlîr dân leh a sakhaw vawn chungchâng tam tak a târ lang thei a ni. Ani chu sakhaw mi tak a nih chuan, “Pathianin ṭawngṭaina zawng zawng a ngaihthlâk i ring nge, a pawm loh ṭawngṭaina ṭhenkhat a awm i ring zâwk?” tia zâwtin, a thil thlîr dân chu hriat belh i tum thei a ni. Chutiang zawhna chuan titina pângngai tak a hring thei a. Chu mi chungchânga Bible sawi dân hrilh a ṭhat hunah chuan, a rinna sawi chhe si lovin, thiam taka hrilh chu i duh ngei ang. I thusawi ngaihthlâk nuam a tih chuan, amah i tlawhleh chu a duh thei ang. Mahse, i chhân theih loh zawhna zâwt ta che se la engtin nge ni ang? Zir bingna neiin ‘i beisei chhan chhâng tûrin’ i tlawhkîr leh thei a, chu chu ‘thuhnuairawlh tak leh ṭih dêk chungin’ i ti tûr a ni.—1 Petera 3:15.
Isua Chuan A Thleng Tlâkte A Zirtîr
11. Engin nge zirtîrna dawng tlâkte zawng hmu tûrin ṭanpui ang che?
11 Mi ṭha famkim Isua chuan zirtîrna dawng tlâkte hriat hran theihna a nei a. Keini erawh chuan “chatuana nun duhna rilru dik tak neite” zawn hmuh chu harsa kan ti hle a ni. (Tirhkohte 13:48, NW) Isua’n: “Khaw lianah emaw, khaw têah emaw in luhna apiangah a thleng tlâk mi tûr che u zawng chhuak ula,” tia a hrilhna tirhkohte pawh khân chutiang mi zawn hmuh chu harsa an ti bawk. (Matthaia 10:11) Isua tirhkohte angin, Bible thutak ngaithlaa, zir duhte chu i zawng chhuak tûr a ni. I biak zawng zawngte thusawi ngun taka ngaithla a, an rilru put hmang chhinchhiahin, a thleng tlâkte chu i hmu chhuak thei a ni.
12. Engtin nge ngaihventu chu i ṭanpui zawm zêl theih?
12 Lalram thuchah tlêma ngaihventu i kalsan hnu chuan, a thlarau lam mamawh chu i ngaihtuah zawm zêl tûr a ni a. Mi tuemaw hnêna chanchin ṭha i hrilh hnuah i thil hmuhte i ziak chhuah chuan, chu chuan thlarau lamah ṭanpui zêl tûrin a ṭanpui ang che. Tlawhkîrna i neih chhûngin, ama thurinte, a rilru put hmang te, a nih loh leh a dinhmun te hriat belh tûr chuan ngun taka i ngaihthlâk a ngai a ni.
13. Engin nge Bible chungchâng mi ngaih dân hre tûrin ṭanpui mai thei che?
13 Engtin nge mite chu Pathian Thu an ngaih dân hrilh tûr chea i ṭanpui theih? Ṭhenkhatah chuan, “Bible hriat thiam harsa i ti em?” tia zawh chu a ṭangkai ṭhîn. Chu zawhna chhânna chuan mite thlarau lam pang thila an rilru put hmang chu a târ lang fo a ni. Kawng dang leh chu Bible châng pakhat chhiar a, “Hei hi engtin nge i ngaih?” tia zawh hi a ni. Rawngbâwlnaah zawhna inâwm takte chu hmangin, Isua angin i hlawhtling thei a ni. Amaherawhchu, fîmkhur a ngaihna lai a awm a ni.
Isua Chuan Zawhnate Thiam Takin A Hmang
14. Mite chu dâwp chhuak ni si lovin, engtin nge an thil thlîr dân ngaihsakna i lantîr theih?
14 Tihrilhhai si lovin, mi dangte thil thlîr dân ngaihsakna lantîr rawh. Isua tih dân chu zui ang che. Ani chuan mite dâwp chhuak ni si lovin, zawhna rilru la takte chu a zâwt a. Ngaithlatu ngilnei tak, rilru ṭha pute a tihahdam a, an awm tinuamtu a ni bawk. (Matthaia 11:28) Mi chi tinrêngte chuan an buainate an hrilh hreh lo. (Marka 1:40; 5:35, 36; 10:13, 17; 46, 47) Mite’n Bible leh a zirtîrnate chungchâng an ngaih dân hrilh che nuam ti tûr chuan, anmahni dâwp chhuah tum angin i lang tûr a ni lo.
15, 16. Engtin nge mite chu sakhuana chungchâng i sawipui theih?
15 Zawhna thiam taka hman bâkah, thu ngaihven awm tak sawi a, an chhânna ngaithlain, titina chu i tiphurawm thei a ni. Entîr nân, Isua’n Nikodema hnênah: “Mi tupawh an pian thar loh chuan Pathian ram an hmu thei lo vang,” tiin a hrilh a. (Johana 3:3) Hêng thute hi a ngaihvên awm êm avângin, Nikodema chu Isua thusawi chhâng lêt lo leh ngaithla lovin a awm thei lo a ni. (Johana 3:4-20) Chutiang kawng chuan nang pawhin mite chu i titipui ve thei a ni.
16 Tûn laiah, sakhaw thar tam tak lo piang chhuakte chungchâng chu Africa khaw mual, Europe Khaw Chhak lam, leh Latin America ram angahte hian sawi a hlawh hle a. Chutiang hmunah chuan, hetianga sawiin titina ṭan theih a ni fo: “Sakhaw tam tak a awmna hian min tihrilhhai a. Mahse, hnam zawng zawnga mite chu biakna dika an inpumkhat hun hmuh thuai chu ka beisei a ni. Chu chu a ṭha i ti em?” tiin. I beiseina mak tak chungchâng engemaw sawina chuan mite chu an ngaih dân i sawi chhuahtîr thei ang. Chhânna chi hnih awm theite târ lanna zawhnate chu chhân a awlsam zâwk ṭhîn. (Matthaia 17:25) In neitu chuan i zawhna a chhân hnuah chuan, Bible châng pakhat emaw, pahnih emaw hmangin i zawhna chu chhâng ang che. (Isaia 11:9; Zephania 3:9) A chhân dân ṭha taka ngaihthlâkna leh chhinchhiahna aṭangin i tlawh leh huna sawipui tûr chu i hre thei ang.
Isua Chuan Naupangte Thusawi A Ngaithla
17. Engin nge Isua chuan naupangte a ngaihven tih târ lang?
17 Isua chuan puitlingte chauh ni lovin, naupangte pawh a ngaihven a. Naupangte infiamna leh an thusawite chu a hria a ni. A châng chuan naupangte chu amah pan hnai tûrin a sâwm bawk. (Luka 7:31, 32; 18:15-17) Isua thusawi ngaithlatu mipui zîngah pawh naupang tam tak an tel a. Mipa naupangte’n au chhuaka Messia an chawimawi khân, Isua’n chu chu a hmuin, Pathian Lehkha Thu hrilh lâwkna thlen famkimna a nihzia a sawi a ni. (Matthaia 14:21; 15:38; 21:15, 16) Tûn laiah pawh naupang tam tak chu Isua zirtîrte an lo ni a. Chuti chu anni chu engtin nge i ṭanpui theih ang?
18, 19. Engtin nge i fa chu thlarau lama i ṭanpui theih?
18 I fa chu thlarau lama ṭanpui tûr chuan, a thusawi i ngaithla tûr a ni. Jehova ngaihtuahna nêna inmil lo ngaih dân a neih mai theihte chu i hriat a ngai a. I fa chuan engpawh sawi mah se, a ṭha zâwnga chhân lêt phawt chu a finthlâk a ni. Tichuan, i fa chu Jehova thil thlîr dân hre thiam tûra ṭanpui nân Bible châng inâwm takte chu i hmang thei ang.
19 Zawhnate chuan naupangte rilru vei zâwng hre tûrin a ṭanpui thei che a. Mahse, puitlingte ang bawkin, naupangte chuan dâwp chhuah nih chu an duh bîk lo. I fa chu zawhna khirh tak takte chhântîr ṭeuh ai chuan, engvângin nge nangma chungchâng chu tâwi têa i sawi hmasak loh vang? In thu sawiho azirin, i thil ngaihtuah ṭhin dân leh chutianga i ngaihtuah chhan i hrilhfiah thei a. Tichuan, “Chutiang chuan i ngaihtuah ve em?” tiin i zâwt thei a ni. I fa chhân lêt dân chuan Pathian Lehkha Thu sawihona ṭangkai tak leh mi tichak thei tak a awmtîr thei a ni.
Zirtîr Siamtu Ropui Chu Entawn Zêl Rawh
20, 21. Engvângin nge zirtîr siamtu anga i rawngbâwlnaah ṭha taka ngaithlatu i nih ang?
20 I fa emaw, mi dang emaw chu thu i sawipui a nih chuan, ṭha taka ngaihthlâk chu a pawimawh a. A dik a dik chuan, chu chu hmangaihna lantîrna a ni. Ngaihthlâkna hmangin, inngaitlâwm takin thil i ti a, thusawitu chu zahna leh ngaihsakna i lantîr a ni bawk. Ngun taka ngaithla tûr chuan mi thusawi ngun taka bengkhawn a ngai a ni.
21 Kristian thlawhhma rawngbâwlnaa i telin, in neitute thusawi chu ngun takin ngaithla zawm zêl rawh. An thusawi ṭha taka i ngaihthlâk chuan, anmahni hîp tûr Bible thutak a engemaw ber chu i hre thei ngei ang. Tichuan, Isua zirtîr dân chi hrang hrangte chu hmangin anmahni ṭanpui chu tum rawh. Chutianga i tih chuan, Zirtîr Siamtu Ropui i entawn avângin hlimna leh lungâwina i nei ang. (w07 11/15)
Engtin Nge I Chhân Ang?
• Engtin nge Isua chuan mite chu an rilru sawi chhuak tûra a fuih?
• Engvângin nge Isua’n a zirtîra awmte thusawi chu a ngaihthlâk?
• Engtin nge thlawhhma rawngbâwlnaah zawhnate i hman theih?
• Naupangte thlarau lama ṭanpui tûrin eng nge i tih theih?
[Zirlai Atâna Zawhnate]
[Phêk 28-naa milem]
Thu hrilhnaah i biakte thusawi chu ngaithla ngei ngei rawh
[Phêk 30-naa milem]
Naupangte thlarau lama kan ṭanpui hian Isua kan entawn tihna a ni