Nunna Tuikhurahte Hruai Tlaka Ruat
Nunna Tuikhurahte Hruai Tlaka Ruat
“Berâm No, . . . chu an vêngtu a ni ang a, nunna tuikhurahte a hruai ang.”—THUP. 7:17.
1. Engtin nge Pathian Thu chuan hriak thih Kristiante chu a târ lan a, eng mawhphurhna nge Isua’n a pêk?
PATHIAN THU chuan leia Krista thilneihte enkawltu hriak thih Kristiante chu “bawi rinawm, fing tak” tiin a târ lang a. Kum 1918-a Krista’n “bawi” a enfiah khân, hriak thihte chu “a hun apianga” thlarau lam chaw semin an rinawm tih a hmu a ni. Chuvângin, an Pu, Isua chu a lungawi ta a, anni chu “a neih zawng zawng” chunga hotuah a siam a. (Matthaia 24:45-47 chhiar rawh.) He mi kawng hian, hriak thihte chuan vân lam ro an chan hmain, he leia Jehova betute mi dangte rawng chu an bâwl a ni.
2. Isua thil neihte chu târ lang rawh.
2 Pu ber chuan a thil neihte chungah thu a nei a, a thlante an nih angin a duh ang angin a hmang thei a ni. Jehova’n Lala a siam, Isua Krista thil neihah chuan leia Lalram hmakhua zawng zawng a tel a ni. Chutah chuan tirhkoh Johana’n inlârnaa a hmuh “mipui tam tak” pawh an tel a. Johana chuan mipui tam tak chungchâng chu heti hian a sawi: “Ngai teh, mipui tam tak tuma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te puan vâr sina tumkau kengin, lalṭhutphah hmaah leh Berâm No hmaa ding ka hmu a,” tiin.—Thup. 7:9.
3, 4. Engtin nge mi pui tam tak chu nasa taka duhsak an nih?
3 Mipui tam tak chu Isua’n a “berâm dang” tia a sawite zînga mi an ni a. (Joh. 10:16) An beiseina chu lei paradis-a chatuana nun a ni. Anni chuan, Isua’n “nunna tuikhurahte a hruai ang a; Pathianin an mit ata mittui zawng zawng a hru fai tawh ang” tih chu an ring tlat a. Chu beiseina avâng chuan, “an puante Berâm No thisena suin an tivâr” a ni. (Thup. 7:14, 17) Isua tlanna chu an ring a, chuvâng chuan Pathian hmaah ‘puan vâr’ an nei a. Anni chu Abrahama angin Pathian ṭhian mi fela ruatte an ni.
4 Chu bâkah, berâm dang pung chho zêlte chu Pathianin mi fela a ruat avângin, anni chuan hrehawm nasa taka he khawvêl tihboralnaah dam khawchhuah beiseina an nei thei a. (Jak. 2:23-26) Jehova chu an hnaih thei a, Armageddon-a a huhova dam khawchhuah beiseina ropui tak an nei bawk a ni. (Jak. 4:8; Thup. 7:15 ) Anni chu an inla hrang lo va, vân lam Lal leh leia a unau hriak thihte kaihhruaina hnuaia rawngbâwl chu an inhuam a ni.
5. Engtin nge mipui tam tak chuan hriak thih Krista unaute chu an ṭanpui?
5 Hriak thih Kistiante chuan Setana khawvêl aṭanga dodâlna nasa tak chu a tâwk a, an la tâwk zêl dâwn a ni. Amaherawhchu, an ṭhian mipui tam tak zînga mite ṭanpuina chu an ring thei a. Hriak thih Kristiante chu tlêm tawh hle mah se, mipui tam tak chu a nuai têlin kum tin an pung zêl a ni. Hriak thihte chuan khawvêl puma Kristian kohhran 1,00,000 vêl chu anmahni chuan an enkawl thei lo. Chuvâng chuan, hriak thihte’n berâm dang hnên aṭanga an dawn ṭanpuina pakhat chu, mipui tam tak zînga mi puitlingte’n kohhran upa anga rawng an bâwlna hi a ni a. Anni chuan “bawi rinawm, fing tak” hnêna kawltîr mêk Kristian maktaduai têlte enkawlnaah an ṭanpui a ni.
6. Hriak thih Kristian hnêna a ṭhian berâm dang ṭanpuina chu eng anga hrilh lâwk nge a nih?
6 Hriak thih Kristiante hnêna an ṭhian berâm dangte pêk ṭanpuina chu zâwlnei Isaia’n a lo hrilh lâwk a. Ani chuan: “LALPA chuan heti hian a ti, ‘Aigupta thawkrimho leh Ethiopia sumdâwng mi leh Seba-ho mi sâng takte chu in hnên lamah an lo kal ang a, in taah an awm tawh ang; nangmahni an zui ang che u,’” tiin a ziak a ni. (Is. 45:14) Tûn laiah lei lam beiseina nei Kristiante chuan hriak thih bawih pâwl leh a Governing Body chu zuiin, a hruaina chu an zui a tih theih a. “Thawkrimho” an nih angin, berâm dangte chuan Krista’n leia a hnungzuitu hriak thihte hnêna thawh tûra a tih khawvêl pum huap thu hrilhna ṭanpui nân an tha leh zung, leh an sum leh paite chu phal takin an hmang a ni.—Tirh. 1:8; Thup. 12:17.
7. Mipui tam tak chu eng atâna zirtîr nge an nih?
7 An unau hriak thihte hnêna ṭanpuina an pêk rualin, mipui tam tak zînga mite chuan Armageddon hnua awm tûr mihring thar bul inṭanna lungphûm atân zirtîrna an dawng a. Chu lungphûm chu a nghet tûr a ni a, chuta awmte chuan an Pu ber kaihhruaina chu an zâwm duhin, an hlen thei bawk tûr a ni. Kristian tinte chu Lal Krista Isua tâna hman tlâk an nihzia lantîr theihna hun remchâng pêk an ni a. Tûna rinna nei a, rinawmna lantîrin, khawvêl tharah Lalin kaihhruaina a pêkte chu an zâwm dâwn tih an târ lang a ni.
Mipui Tam Tak Chuan Rinna An Lantîr
8, 9. Engtin nge mipui tam tak chuan an rinna an lantîr?
8 Hriak thih Kristian kohhranho ṭhian, berâm dangte chuan an rinna chu kawng chi hrang hrangin an lantîr a. A hmasa berin, hriak thihte chu Pathian Ram chanchin ṭha puan chhuahnaah an ṭanpui a ni. (Mt. 24:14; 28:19, 20) A pahnihnaah chuan, Governing Body pêk kaihhruaina chu lâwm takin an zâwm a ni.—Heb. 13:17; Zakaria 8:23 chu chhiar rawh.
9 A pathumnaah chuan, mipui tam takte chuan Jehova felna thu bulte nunpuiin an unau hriak thihte chu an ṭanpui a. Anni chuan “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te” ang chi miziate neih chu an tum hrâm hrâm a ni. (Gal. 5:22, 23) Tûn laiah chuan, “tisa thiltihte” ni lo, chûng thlarau rahte lantîr chu a lâr lo mai thei. Chuti chung chuan, mipui tam takte chuan “inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te, chutiangte chu,” pumpelh an tum tlat a ni.—Gal. 5:19-21.
10. Mipui tam tak zînga mite’n eng nge an tum tlat?
10 Mi ṭha famkim lo kan nih avângin, thlarau rahte rah chhuah a, tisa thiltihte pumpelh, leh Setana khawvêl nêksâwrna do chu a harsa mai thei a. Amaherawhchu, mi mal chak lohna te, rei lo te chhûng tlâkhniamna te, a nih loh leh hrisêl lohna te chuan kan rinna a nghawng emaw, Jehova kan hmangaihna a tinêp emaw avâng tea lunghnual loh chu kan tum tlat a ni. Jehova chuan a tiam ang ngei chuan mipui tam tak chu hrehawm nasa tak ata a dam khawchhuahtîr ngei dâwn tih kan hria a ni.
11. Kristiante rinna tihchauh nân Setana’n eng tih dânte nge a hman?
11 Amaherawhchu, kan hmêlma dik tak chu Diabola a ni a, a beidawng mai mai lo tih kan hriat avângin kan invêng reng a ni. (1 Petera 5:8 chhiar rawh.) Kan nunpui zirtîrnate hi a dik lo tih min rintîr tûrin kalpêngte leh mi dangte hman a tum a. Mahse, chu tih dân chu a hlawhchham fo ṭhîn. Chutiang bawkin, tihduhdahna chuan thu hrilhna chu tihkhaih lak deuh châng nei ṭhîn mah se, tihduhdahna tuarte rinna chu a tichak sauh ṭhîn zâwk bawk. Chuvângin, Setana chuan kan rinna tihchauh dân hlawhtling zâwk tûra a rinte chu a hmang tam tawlh tawlh a. Lunghnualna chu a hmang ṭangkai hle a ni. Kum zabi khatnaa Kristiante hnêna: “Anmahni chunga ṭha lo tûrin mi sualte chutianga hnialkalhna tuartu [Krista] chu ngaihtuah teh u,” tia hrilh an nih khân he thil hlauhawm laka vaukhân an ni. Engvângin nge? “In thlarau lamah in inthlahdah a, in lo hah loh nân,” a ni.—Heb. 12:3.
12. Engtin nge Bible fuihna thu chuan lunghnualte chu a tihchak?
12 Jehova rawngbâwlna chawlhsan mai duh châng i nei em? Hlawhchham nia inhriat châng i nei em? I nei a nih chuan, Setana’n chu chu remchângah hmanga Jehova rawng i bâwlna a dâltîr che chu phal suh. Ngun taka Bible zirna te, tih tak zeta ṭawngṭai te, leh inkhâwmnaa tel ziah leh Kristianpuite nêna inkawm ziahna chuan a tichak chein, ‘thlarau lama inthlahdahna’ lakah a vêng ang che. Jehova chuan a rawngbâwltute chu an chakna nei leh tûra ṭanpui a tiam a, a thutiam chu kan ring thei a ni. (Isaia 40:30, 31 chhiar rawh.) Lalram rawngbâwlna chu ngaihsak tlat rawh. Hun khawhralnate chu pumpelhin, mi dangte ṭanpui chu tum tlat rawh. Tichuan, lunghnual chung pawha chhel tûrin chakna i nei ang.—Gal. 6:1, 2.
Hrehawm Nasa Tak Ata Khawvêl Tharah
13. Armageddon-a dam khawchhuakte chu eng hnathawh tûr hian nge nghâk?
13 Armageddon hnuah chuan, mi fel lo tholeh tam takte chu Jehova kawngte zirtîr an ngai dâwn a. (Tirh. 24:15) Anni chuan Isua tlanna inthâwina chungchângte an zir a ngai ang a, chu bâkah, chu tlanna hlâwknate an dawn theihna tûrin rinna nei tûra zirtîr pawh an ngai ngei ang. Anni chuan tûn hmaa an lo vawn sakhuana dik lo ngaih dânte hnâwlin, an nun hluite chu an kalsan a ngai dâwn a ni. Kristian dikte chhinchhiahna mihring tharin an inthuam tûr a ni bawk. (Eph. 4:22-24; Kol. 3:9, 10) Chutih lai chuan dam khawchhuak berâm dangte chuan hnathawh tûr tam tak an nei ang a. Tûn khawvêl suaksual awm mêka nêksâwrna leh tihbuaina laka fihlîm a, chutianga Jehova rawngbâwl chu a va hlimawm dâwn êm!
14, 15. Hrehawm nasa taka dam khawchhuakte leh mi fel tho lehte inkâra inbiak pawhna awm tûr chu târ lang rawh.
14 Isua lei lama a rawngbâwl hmaa awm Jehova chhiahhlawh mi rinawmte pawhin chu tih hunah chuan zir tûr tam tak an nei ang. Thutiam Messia nihna an hmuh châk êm êm, an hmuh tâk lohva chanchin chu an zir ang. An tûn hma nunah khân, Jehova zirtîr nih an duhna chu an lo lantîr tawh a ni. Entîr nân, Daniela ziak amah ngei pawhin a hriat thiam loh hrilh lâwknate thlen famkimna hriatfiah chu a hlimawmin, chanvo ropui tak nih dân tûr chu han suangtuah chhin teh!—Dan. 12:8, 9.
15 Tho lehte chuan kan hnên aṭangin zir tûr tam tak dawng dâwn mah se, keini pawhin thil zawh tûr tam tak kan nei ve ngei ang. Anni chuan Bible-a târ lan thilthleng, chipchiar taka kan hriat lohte chu min hrilh thei dâwn a. Isua chanchin kimchang tak chu a laichîn unau Baptistu Johana hnên aṭanga hriat a phûrawm dân tûr chu ngaihtuah teh! Chûng thuhretu rinawmte hnên aṭanga kan thil hriatte chuan tûna Pathian Thu hriat thiamna kan neih aia tam zâwk chu min pe ngei ang. Hun tâwp chhûnga mipui tam tak zînga mi thi tate pawh tiamin, Jehova chhiahhlawh rinawm thi tate chuan “thawhlehna ṭha lehzual” an chang ang. Setana thunun khawvêlah hian Jehova rawng an bâwlna chu an ṭan a. Dinhmun ṭha zâwk hnuaia khawvêl thara an rawngbâwlna chhun zawm chu a va nuam dâwn êm!—Heb. 11:35; 1 Joh. 5:19.
16. Hrilh lâwkna angin, engtin nge Rorêlna Nî chu a kal zêl ang?
16 Rorêlna Nî hun chhûng engtik emawah chuan, lehkhabute chu hawn a ni ang. Bible nêna ṭangrualin chûng chuan a nung zawng zawng chu chatuana nunna hmu tlâk an nih leh nih loh rêl tûrin ṭan chhan a pe ang. (Thu Puan 20:12, 13 chhiar rawh.) Rorêlna Nî tâwpah chuan, mi tinte chuan lei leh vâna lalchungnunna thu buaiah an ṭan lam lantîr theihna hun remchâng tam tak an nei ang. Anni chuan Lalram ruahmannaah intulûtin, Berâm No chu “nunna tuikhurahte” an inhruaitîr ang em? Nge Pathian Ram chu an hnâwl dâwn? (Thup. 7:17; Is. 65:20) Chu tih hunah chuan, leia chêng mi zawng zawng chuan sual rochunna emaw, chhehvêl dinhmun suaksual tak tihbuaina emaw awm lovin, mahni tân thu tlûkna an siam thei dâwn a ni. Tumahin Jehova rorêlna hnuhnûng ber chu an sawisêl thei lo vang. Mi suaksualte chauh chu chatuana tihboral an ni ang.—Thup. 20:14, 15.
17, 18. Eng beiseina hlimawm tak nên nge hriak thih Kristiante leh berâm dang te chuan Rorêlna Nî chu an nghah?
17 Tûn laia hriak thih Kristiante chu Ram mi ni tlâka ruat an ni a, Rorêl Nî chhûnga rorêlna chan chu an nghâkhlel a ni. Chanvo ropui tak a va ni dâwn em! Chu beiseina chuan kum zabi khatnaa Petera’n a unaute hnêna a pêk fuihna zâwm tûrin anni chu a chêttîr a ni: “A kohna leh a thlanna che u chu tinghet tûrin taihmâk chhuah lehzual rawh u; chûng chu intih zawngin engtikah mah in tlu lo vang; chutichuan Isua Krista kan Lalpa leh Chhandamtu chatuan rama luh theihna chu an pe ngei dâwn si che u a,” tih chu.—2 Pet. 1:10, 11.
18 Berâm dang chuan an unau hriak thihte’n chutiang beiseina an nei chu an lâwmpui a. Anmahni ṭanpui chu an tum tlat a ni. Tûn laia Pathian ṭhiante an nih angin, Pathian rawngbâwlnaa taihmâk chhuah lehzual tûra chêttîr an ni a. Rorêlna Nî chhûng chuan, Isua’n anmahni chu nunna tuikhurah a hruai ang a, anni chuan phûr takin Pathian ruahmanna chu thinlung zawng zawngin an thlâwp ang. Tichuan—a tâwpah chuan—chatuana Jehova lei lam chhiahhlawh ni tlâka ruat an ni tawh ang!—Rom 8:20, 21; Thup. 21:1-7. (w08 1/15)
I Hre Chhuak Em?
• Isua thilneihah eng nge tel?
• Engtin nge mipui tam tak chuan an unau hriak thihte chu an ṭanpui?
• Eng chanvo leh beiseina nge mipui tam tak chuan an neih?
• Engtin nge Rorêlna Nî chu i thlîr?
[Zirlai Atâna Zawhnate]
[Phêk 26-naa milem]
Mipui tam tak chuan an puante chu Berâm No thisena suin an tivar
[Phêk 27-naa milem]
Mi rinawm tho lehte hnên aṭangin eng nge hriat i inbeisei?