‘Rawngbâwlna Lalpaa I Hmuhah Khân Fîmkhur Rawh’
‘Rawngbâwlna Lalpaa I Hmuhah Khân Fîmkhur Rawh’
“Rawngbâwlna Lalpaa i hmuh kha hlen tûrin fîmkhur rawh.”—KOL. 4:17.
1, 2. Kristiante chuan mihringte chungah eng mawhphurhna nge an neih?
KAN kianga awmte chungah hian mawhphurhna lian tak kan nei a. Tûna an thu tlûkna siam hi “hrehawm nasa tak” a thlen hunah an nun phah emaw, an thih phah emaw dâwn a ni. (Thup. 7:14) Thâwk khum Thufingte bu ziaktu chuan: “Thi tûra hruaite chu chhan chhuak la. Thah mai tûrte chu chhan chhuak thuai rawh,” a ti. Thu pawimawh a va ni êm! Mite an hmaa duh thlan tûr awm chungchâng vaukhân tûra kan mawhphurhna kan tih loh chuan mite thisen mawh chu kan phur thei a ni. A chunga kan sawi tak thu chu: “‘Ngai teh, hei chu ka hre lo,’ i tih mai chuan, thinlung bûktu chuan a ngaihtuah dâwn lâwm ni? I nunna vawngtu chuan a hre dâwn lâwm ni? Mi tin an thiltih ang zêlin a rûl dâwn lâwm ni?” tia chhunzawm a ni. Jehova chhiahhlawhte chuan mite tawn tûr thil hlauhawm tak chu ‘ka hre lo’ an ti thei lo tih a chiang hle.—Thuf. 24:11, 12.
2 Jehova chuan nunna a hlut a. A chhiahhlawhte chu an theih anga tam nun chhanhim tûrin a fuih a ni. Pathian rawngbâwltu mi tinte chuan Pathian Thua nun chhanhimna thute chu mite an hriattîr ngei tûr a ni a. Kan hna thawh hi hlauhawm lo thleng tûr a hmuh huna vaukhânna petu râlvêngtu hna thawh ang a ni. Chûng thi tûrte thisen mawh phurh chu kan duh lo. (Ezek. 33:1-7) Chuvângin, ‘thu hrilh’ zêl chu a va pawimawh êm!—2 Timothea 4:1, 2, 5 chhiar rawh.
3. He thuziak leh a dawta thuziakahte chuan eng thu nge kan zir dâwn?
3 He thuziakah hian nun chhan himna rawngbâwlnaa harsatna awmte i tawrh chhuah theih dân leh mi tam zâwkte i ṭanpui theih dân chu kan zir ang. A dawta thuziak chuan thutak pawimawh tak chu zirtîr thiamna nêna i zirtîr theih dân a bih chiang ang. Zir tûr thuziak pathumna chuan khawvêl pum puia Lalram thuchhuahtute hna thawh phûrawm tak ṭhenkhatte chu a rawn târ lang ang. Amaherawhchu, hêng thute kan sawi hma hian, kan hun a khirh hle nachhan chipchiar taka thlîr lêt chu a ṭha ang.
Mi Tam Takte Beisei Nei Lova An Awm Chhan
4, 5. Mihringte’n eng nge an tawh a, engtin nge mi tam takin an chhân lêt?
4 Khawvêla thilthlengte hian “khawvêl tâwpna” hunah kan nung tih leh tâwpna a hnai tawh hle tih a târ lang a. Mihringte hian Isua leh a zirtîrte’n ‘ni hnuhnûng’ chhinchhiahna thilthlengte leh dinhmun an sawite chu an tawng mêk a. “Nau veina” tia sawi zînga tel indo te, ṭâm tla te, lîr nghîng te, leh harsatna dang tam tak te chuan mihringte a ti mangang hle a ni. Dân pawisak lohna, mahni hmasialna, leh Pathian ngaihsakna nei lo rilru put hmangte chu hmun tinah a awm a. Bible tehnate mila nun tumte tân pawh tûn hi “hun khirh takte” a ni tho tho a ni.—Mt. 24:3, 6-8, 12; 2 Tim. 3:1-5.
5 Amaherawhchu, mi tam takte hian khawvêla thil thlengte’n awmzia a neih dân dik tak chu an hre thiam lo. Chuvângin, tam takte chu anmahni leh an chhûngkaw sahimna ringawt ngaihtuahin an lungngai a ni. Hmangaihte sûnna emaw, mi mal thil tawn Eph. 2:12.
lungchhiatthlâkte emaw chuan mi tam takte chu rilru na takin a siam a. Chutiang thil a thlen chhan leh a chinfelna dik tak an hriat loh avângin, chûng mite chu beisei nei lovin an awm a ni.—6. Engvângin nge “Babulon Khaw Ropui” chuan a hnung zuitute a ṭanpui theih loh?
6 “Babulon Khaw Ropui,” khawvêl sakhuana dik lo lalram chuan mihringte tân thlamuanna a thlen meuh lo. Chu mi nêna inkalh takin, “a mi ngaih chînna uain” hmang chuan mi tam takte chu Pathian nêna inlaichînna an neih theih dân chungchângah a ngaihna hre lovin a awmtîr a ni. Chu bâkah, sakhaw dik lo chuan nawhchizuar anga awmin, “leia lalte” chu thlêm thluin, a thunun bawk a; mipuite chu politics lama an hotute duh ang anga awm tûrin thurin dik lote leh thlarau zâwlnate chu a hmang a. Chutiang chuan, sakhaw dik lo chuan thu neihna leh huhâng a nei a, chutih rual chuan sakhaw lam thudik chu a hnâwl ṭhak a ni.—Thup. 17:1, 2, 5; 18:23.
7. Eng hmabâk nge mi tam zâwkte tân awm a, engtin nge ṭhenkhat chu ṭanpui an nih mai theih?
7 Isua chuan boralna kawngka zauvah chuan mi zawng zawng deuhthaw chu an kal tih a zirtîr a. (Mt. 7:13, 14) Mi ṭhenkhat chu Bible zirtîrte hre reng chunga an hnâwl avângin kawngka zauvah chuan an kal a, mahse, mi dang tam takte erawh chuan Jehova thil phûtte chungchâng thu dik lo zirtîr an nih vâng, a nih loh leh an hriat loh avângin kawngka zauvah chuan an kal thung a ni. Pathian Lehkha Thu aṭanga nun phung thlâk chhan tûr chiang tak hrilh hriat an nih chuan, ṭhenkhat chuan an nun dân an thlâk danglam ngei ang. Mahse, Babulon Khaw Ropuia awm rengte leh Bible tehnate hnâwl chhunzawm zêltute chu “hrehawm nasa takah” chuan zuah an ni lo vang.—Thup. 7:14.
‘Bâng Lovin’ Thu Hril Zêl Rawh
8, 9. Kum zabi khatnaa Kristiante chuan dodâlna an tawh khân eng nge an tih a, engvângin nge?
8 Isua chuan a zirtîrte’n Ram chanchin ṭha an hrilin, zirtîr an siam ang tih a sawi a. (Mt. 28:19, 20) Chuvângin, Kristian dikte chuan thu hrilhnaa tel chu Pathian laka an rinawmna leh an rinna atâna thil mamawh bul ber angin an thlîr reng a ni. Chuvângin, Isua zuitu hmasate chuan dodâlna kârah pawh thu an hril chhunzawm zêl a. Chakna an neih theih nân Jehova chungah an innghat a, Pathianin ‘huai taka a thu hriltîr’ zêl tûrin an ṭawngṭai a. A chhân nân Jehova chuan thlarau thianghlim an chungah a thlentîr a, tichuan Pathian thu chu huaisen takin an hril ta a ni.—Tirh. 4:18, 29, 31.
9 Dodâlna chu tharum thawhnaa a chan hunah, Isua hnung zuitute chuan chanchin ṭha hrilh an bânsan em? Bânsan lo ve. Tirhkohte thu hrilhnain a tih thinrim avângin, Juda sakhaw hruaitute chuan anni chu an man a, an vau a, an vêl bawk a. Mahse, tirhkohte chuan, Tirh. 5:28, 29, 40-42.
“‘Isua chu Krista a ni’ tiin zirtîr leh hrilh an bâng chuang lo.” Anni chuan ‘mihring thu aiin Pathian thu an zâwm zâwk tûr a ni’ tih an hre chiang hle.—10. Tûn laiah Kristiante’n eng harsatnate nge an tawh a, mahse an nungchang ṭha chuan eng rah ṭha tak nge a chhuah theih?
10 Tûn laia Pathian rawngbâwl a tam zâwkte chuan an thu hrilhna avângin vuak emaw, tân ina khung emaw chu an tuar lo. Amaherawhchu, Kristian dik zawng zawngte chuan fiahna leh harsatna engemaw tak chu an tuar vek a ni. Entîr nân, i Bible zirtîr chhia leh ṭha hriatna chuan mi dangte ang lo deuhva nun emaw, danglam bîk tak emaw ni tûrin a tur che pawh a ni thei. Bible thu bulte ṭanchhana thu tlûkna i siam avângin i hnathawhpui te, school kalpui te, a nih loh leh i ṭhenawm te chuan danglam takah an ngai thei che. Amaherawhchu, chutianga an ngaih makna che chuan a tilunghnual tûr che a ni lo. Khawvêl hi thlarau lam thim hnuaiah a awm a; mahse, Kristiante chu “tiêngtu angin” an lang tûr a ni. (Phil. 2:15) Ngun taka lo thlîrtu ṭhenkhat chuan i hna thawh ṭha tak chu an hmuin, an hlut ang a, chu mi avâng chuan Jehova an chawimawi mai thei asin.—Matthaia 5:16 chhiar rawh.
11. (a) Engtin nge ṭhenkhat chuan thu hrilhna chu an chhân lêt mai theih? (b) Tirhkoh Paula’n eng ang dodâlna nge a tawh a, engtin nge a a hma chhawn?
11 Lalram thu hril zêl tûr chuan huaisenna kan neih a ngai a. Mi ṭhenkhat, i chhûngte hial pawhin an nuihzat che emaw, kawng danga tihlunghnual che emaw an tum thei a ni. (Mt. 10:36) Tirhkoh Paula chuan a rawngbâwlna a chhunzawm zêl avângin, vawi tam tak vuak a tuar a. Chutianga dodâlna a chhan lêt dân chu chhinchhiah teh: “Hrehawm tuar leh zahthlâk taka siama kan awm hnu khân buai êm êm chung pawhin Pathian Chanchin Ṭha in hnêna sawi tûrin kan Pathianah chuan kan lo huai tâk zâwk kha,” tih chu. (1 Thes. 2:2) Paula tân chuan man a nih a, a puante hlihsak a, vuak leh tân ina khung a nih hnua chanchin ṭha hrilh zêl chu a harsa hle ngei ang. (Tirh. 16:19-24) Engin nge thu hril zêl thei tûra huaisenna pe? Thu hril tûra Pathian hna pêk tihpuitlin a châknain chu huaisenna chu a pe a ni.—1 Kor. 9:16.
12, 13. Mi ṭhenkhatte’n eng ang harsatna nge an tawh a, engtin nge tawrh chhuah an tum?
12 Mite ina an awm ngai vak lohna hmun emaw, Lalram thu hrilhna an ngaihven lohna emawa ṭhahnemngaihna vawn reng chu thil harsa tak a ni thei bawk. Chutiang dinhmunah chuan eng nge kan tih theih? Tawnchawpa thu hril tûrin huaisenna neih belh kan ngai mai thei. Kan hun duan siam rem emaw, mite kan hmuh tam theihna hmuna thu hrilh emaw chu a ngai thei bawk ang.—Johana 4:7-15; Tirhkohte 16:13; 17:17 nên khaikhin rawh.
13 Harsatna dang mi tam takin an tawh chu, rawngbâwlnaa an tih theih zât titlêmtu kum upatna leh hrisêl lohnate a ni. Chutiang chu i dinhmun a nih chuan lunghnual mai suh. Jehova chuan i tih theih tâwk a hre chiang hle a, chu chu a ngaihlu hle a ni. (2 Korinth 8:12 chhiar rawh.) Harsatna eng pawh—dodâlna te, ngaihsak lohna te, a nih loh leh hrisêl lohna te—tâwk mah la, mi dangte hnêna chanchin ṭha hril tûrin i dinhmun mila i tih theih apiang chu ti rawh.—Thuf. 3:27; Marka 12:41-44 nên khaikhin rawh.
‘I Rawngbâwlnaah Fîmkhur Rawh’
14. Tirhkoh Paula’n a Kristianpuite tân entîrna eng nge a hnutchhiah a, eng fuihna nge a pêk?
14 Tirhkoh Paula chuan a rawngbâwlna chu a ngai pawimawh hle a, a rinpuite pawh chutiang bawka ngai pawimawh ve tûrin a fuih a ni. (Tirh. 20:20, 21; 1 Kor. 11:1) Paula’n mi mal taka a fuih kum zabi khatnaa Kristian pakhat chu Arkippa a ni. Kolossa mite hnêna a lehkha thawnah Paula chuan: “Arkippa hnênah khân, ‘Rawngbâwlna lalpaa i hmuh kha hlen tûrin fimkhur rawh,’ ti ang che u,” tiin a ziak a ni. (Kol. 4:17) Arkippa chu tunge a nih tih emaw, eng dinhmunah nge a din tih emaw chu kan hre lo; mahse, thu hrilh rawngbâwl hna chu a pawm tih a lang a ni. Kristian inpumpêk tawh i nih chuan, nang pawhin rawngbâwl hna chu i pawm tawh tihna a ni a. Chu rawngbâwlna chu hlen tûrin i fîmkhur zêl em?
15. Kristian inpumpêknaah chuan eng thilte nge tel a, chu chuan eng zawhna nge a siam?
15 Baptisma kan chan hma khân, thinlung chhûngril tak aṭanga ṭawngṭaiin Jehova hnênah kan nun kan pumpêk tawh a. Chu chu a duhzâwng tih kan tum tlat tihna a ni. Tichuan, ‘Pathian duhzâwng tih chu ka nuna thil pawimawh ber a ni tak zet em?’ tiin kan inzâwt tûr a ni. Jehova’n enkawl tûra min duh mawhphurhna tam tak—kan chhûngkaw châwm ang chite chu kan nei a ni thei. (1 Tim. 5:8) Mahse, engtin nge chutiang thil atâna kan hman bâk kan hun leh tha leh zungte chu kan hman? Kan nunah eng thil nge pawimawh ber?—2 Korinth 5:14, 15 chhiar rawh.
16, 17. Kristian ṭhalaite emaw, mawhphurhna la nei tam lote emaw chuan eng nge an ngaihtuah theih?
16 Kristian ṭhalai inpumpêk tawh school zo tawh emaw, zo ṭêp tawh emaw i ni em? Chhûngkuaah mawhphurhna rit tak i neih a rinawm loh va. Chuti a nih chuan, i nunah eng thil nge tih i tum? Jehova duhzâwng ti tûra i intiamna chu eng thu tlûknain nge a ṭha thei ang bera tipuitling tûrin ṭanpui ang che? Mi tam takte chuan pioneer thawk thei tûrin an thiltih tûrte chu an siam rem a, chu mi avâng chuan hlimna nasa tak leh lungawina an nei a ni.—Sâm 110:3; Thur. 12:1.
17 Ṭhalai i ni mai thei a. Hunbi kima hna thawh i nei a, mahse mahni inenkawl tih mai lo chu mawhphurhna dang i nei êm êm lo va. I hun neih dân azira kohhran thiltihnaa tel chu nuam i ti hle ang tih chu rinhlelh rual a ni lo. Chu aia hlimna nasa zâwk chu i nei thei ang em? Rawngbâwlna lama tel tam zâwk theih dân i ngaihtuah em? (Sâm 34:8; Thuf. 10:22) Thu hrilhna bial ṭhenkhatah chuan mi tinte chu nunna petu, thutak hrilh tûrin hna thawh tûr tam tak a la awm a ni. Lalram thuchhuahtu mamawh lehzualna hmuna thawk tûrin, i nunah chuan insiam remna i nei thei ang em?—1 Timothea 6:6-8 chhiar rawh.
18. Eng insiam remna nge innei tharin an siam a, chu chuan eng rah nge a chhuah?
18 United States-a mi Kevin-a leh Elen-i entawn tûr siam hi ngaihtuah teh. * An awmna hmuna innei tharte tih ṭhin dân angin, in thar lei an ngai niin an hria a. An pahnihin hna an thawk a, nuam takin an khawsa thei a ni. Mahse, an hnathawh dân leh an in lam hnate avâng chuan rawngbâwla chhuahna hun an nei tam lo hle a. An hun leh tha leh zung zawng zawng deuhthaw mai chu an thil neihte atân an hmang zo tih an inhre chhuak a ni. Amaherawhchu, samkhai taka nung pioneer nupa tuak hlim tak an han hmuhin, Kevin-a leh Elena-i chuan an nuna an thil ngaih pawimawhte thlâk danglam chu an titlu ta a. Ṭawngṭaia Jehova kaihhruaina an zawn hnuah, an in chu an hralh a, in an luah hawh ta a. Elena-i chuan a hnathawh reizâwng chu titlêmin, pioneer a thawk ta a ni. A nupui thiltawn hlimawm tak avâng chuan Kevina chuan hunbi kima a hnathawh chu a chawlhsan a, pioneer a thawk ve ta bawk a. A hnuah chuan, South America rama Lalram thuchhuahtu an mamawh lehzualna hmuna rawngbâwl tûrin an insawn ta a ni. “Nupa nun hlim tak kan nei zêl a, mahse thlarau lam thiltumte kan han ûm chuan, kan hlimna chu a nasa lehzual a ni,” tiin Kevin-a chuan a sawi.—Matthaia 6:19-22 chhiar rawh.
19, 20. Engvângin nge chanchin ṭha hrilh hi tûn laia hna pawimawh ber a nih?
19 Chanchin ṭha hrilh hi tûn laia khawvêla hna pawimawh ber a ni. (Thup. 14:6, 7) Chu chuan Jehova hming tihthianghlimna a ṭanpui a. (Mt. 6:9) Bible thute chuan kum tina Bible thu pawmtu mi sâng tam takte nun chu a siam ṭhain, an chhandamna a thlen thei a ni. Mahse, tirhkoh Paula chuan: “Thu hriltu awm lovin engtin nge an hriat ang?” tiin a zâwt a. (Rom 10:14, 15) Ni e, engtin nge an hriat theih tehlul ang? I rawngbâwlna hlen tûrin engvângin nge i theih ang apiang tih chu i tum tlat loh vang le?
20 Mite chu he hun khirh tak pawimawhna leh an thu tlûkna siamin nghawng a neih dânte hre thiam tûra ṭanpui theih dân kawng dang chu i zirtîr thiamna tih hmasâwn zêl hi a ni. I tihhmasâwn theih dân chu a dawta thuziakah sawiho a ni ang. (w08 1/15)
[Footnote]
^ par. 18 An hming thlâk danglam a ni.
Engtin Nge I Chhân Ang?
• Eng mawhphurhna nge Kristiante’n mite chungah an neih?
• Engtin nge kan thu hrilhnaa harsatnate chu kan hmachhawn ang?
• Kan rawngbâwlna hmuh chu engtin nge kan thawh zawh theih ang?
[Zirlai Atâna Zawhnate]
[Phêk 9-naa milem]
Dodâlna kâra thu hril tûr chuan huaisen a ngai
[Phêk 11-naa milem]
Mite ina an awm ngai meuh lohna hmunah thu i hril a nih chuan eng nge i tih theih?